بســم اللّـه الرّحمـن الرّحيــم
الحمـد لِلّـه ربِّ العـالمـين، والصّـلاة والسّـلام علٰـى أشـرف المرسـلين، سيِّدنا محـمَّدٍ وعلى آلـه وأصحـابه أجمعـين.
ފުވައްމޮލޮކަހަ އަދޮ މަ އާއްމާ، ތި ވިދާޅޮވީ ހުނު މަރްޙަބާޔާއަށަ، މިއަތެޅެ އަތެޅެވެރިޔާށާޔާ، އަތެޅެ އޮފީހެ ވޭރުންނާޔާ، ރަށި ވޭރުންނާޔާ، ފުވައްމޮލޮކެ ލޯބިވެތި ރައްޔިތުނަ، ވަރަހަ އިޚްލާޞްތެރި ކަންމާއެކީ ޝުކުރު ދަންނަވަން. ފުވައްމޮލޮކެ ބަނދަރޮ ހެދުމުގެ ބޮނޑޮ މަޝްރޫޢު ނިމީ، އަދޮ އެ ބަނދަރޮ ރަސްމީގޮތެން ހުޅުވާދިނުމަކީ، މަށަ ލިބުން ވަރަހަ ބޮނޑޮ އުފަލެއް.
އާދެ، މި އުފާވެރި އަދި ތާރީޚީ މުނާސަބަތުގައި ފުވައްމުލަކުގެ ޢިއްޒަތްތެރި އަތޮޅުވެރިޔާ އަލްފާޟިލް ޢަބްދުއްރަޙްމާން މުޙަންމަދަށާއި، ފުވައްމުލަކުގެ ވެރިންނަށާއި، ފުވައްމުލަކުގެ ކޮމިޓީތަކުގެ މެންބަރުންނަށާއި، ފުވައްމުލަކުގެ ލޮބުވެތި ރައްޔިތުންނަށް ވަރަށް އިޚްލާޞްތެރިކަމާއެކީ ތަހުނިޔާއާއި މުބާރަކުބާދީ ދަންނަވަން. އަދި މިއަދުގެ މި މުހިންމު އިޙްތިފާލުގައި ބައިވެރިވެވަޑައިގެންދެއްވުމަށްޓަކައި ވަޑައިގެންނެވި ވަޒީރުންނަށާއި، ސަރުކާރުގެ އިސްބޭފުޅުންނަށްވެސް ޝުކުރު އަދާކޮށް، މަރްޙަބާ ދަންނަވަން. ހަމައެހެންމެ، މި ރަސްމިއްޔާތުގައި ބައިވެރިވެވަޑައިގަންނަވާ، ރައްޔިތުންގެ މަޖިލީހުގެ ޢިއްޒަތްތެރި ހުރިހާ މެންބަރުންނަށް އަޅުގަނޑު ވަރަށް އިޚްލާޞްތެރިކަމާއެކު ޝުކުރު ދަންނަވަން. އޭގެއިތުރުން، މި ޖަލްސާގައި އަދި މި އިޙްތިފާލުތަކުގައި ބައިވެރިވެވަޑައިގެންދެއްވުމަށްޓަކައި ވަޑައިގެންނެވި، އަތޮޅުތަކުގެ އަތޮޅުވެރިންނަށާއި އަދި އެހެން ރަށްރަށުގެ ވެރިންނަށާއި ރައްޔިތުންނަށްވެސް ވަރަށް އިޚްލާޞްތެރިކަމާއެކު ޝުކުރު ދަންނަވައި، މަރްޙަބާ ދަންނަވަން.
އާދެ، އަޅުގަނޑުގެ ކުރިން ވާހަކަފުޅު ދެއްކެވި ދެ ބޭފުޅުންވެސް ވިދާޅުވިފަދައިން، މިއަދަކީ ފުވައްމުލަކަށް ވަރަށް ޚާއްޞަ ދުވަހެއް. ފުވައްމުލަކުގެ ތާރީޚުގައި ވަރަށް ކުލަގަދަގޮތެއްގައި ފާހަގަކުރެވޭނެ ދުވަހެއް. އާދެ، ފުވައްމުލަކުގެ ލޮބުވެތި ރައްޔިތުން ކުރައްވަމުން ގެންދެވި ދިގު އިންތިޒާރު ނިމުމަކަށް އައި ދުވަސް. އާދެ، އަޅުގަނޑު ހިތަށް އަންނަނީ، އަރަބީންގެ ހަރުބަހެއް. "وَإِنّ غَدًا لِنَاظِرِهِ لَقَرِيبٌ"، ''ހަމަކަށަވަރުން މާދަމާއަކީ، އެދުވަހުގެ އިންތިޒާރުގައިވާ މީހަކަށް ވަރަށް އަވަހަށް އަންނާނެ ދުވަހެއްކަން ކަށަވަރެވެ.'' އާދެ، އެހެންވީމާ، އިންތިޒާރު ކިތަންމެ ދިގުކަމުގައި އިޙްސާސް ކުރެއްވުނަސް، އެ އިންތިޒާރަކީ ނިމުމަކަށް އަންނާނެ އެއްޗެއް. އެހެންވީމާ، މާތްﷲގެ ތަނަވަސް ރަޙްމަތުން އަދި އެކަލާނގެ ވާގިފުޅާއެކީގައި، މިހަދައި ނިމުނު ބޮޑު މަޝްރޫޢު ނިމި، ފުވައްމުލަކުގެ ރައްޔިތުންނަށާއި އަދި މިރަށަށް ޒިޔާރަތްކުރާ، ގޮސްއައިސްވާ ހުރިހާ ފަރާތްތަކަކަށް ލިބުނު މި އަމާން، ބޮޑު، ތަނަވަސް ބަނދަރުގެ ނިޢުމަތަކީ، އެކަމަށްޓަކައި އަޅުގަނޑުމެން اللهُ سُبْحَانَهُ وَتَعَالَى އަށް ޙަމްދާއި ޝުކުރު ކުރަންޖެހޭނެ ބޮޑު ނިޢުމަތެއް.
މި މަޝްރޫޢު މިހާ ކާމިޔާބުގޮތެއްގައި ނިމިގެން މިދިޔައީ، ވަރަށް ގިނަ ފަރާތްތަކެއްގެ ބުރަ މަސައްކަތާއި އެއްބާރުލުމާއި އެހީތެރިކަން ލިބިގެން. އެހެންކަމުން، އެ ފަރާތްތަކަށް އަޅުގަނޑުވެސް މިއަދުގެ މުނާސަބަތުގައި ވަރަށް އިޚްލާޞްތެރިކަމާއެކު ޝުކުރު ދަންނަވަން. އާދެ، ލިސްޓުގެ އެންމެ ފުރަތަމަ ވަނަ ލިބިވަޑައިގަންނަވަނީ، މިނިސްޓަރ އޮފް ކޮންސްޓްރަކްޝަން އެންޑް ޕަބްލިކް ވާރކްސް އަލްފާޟިލް ޢުމަރު ޒާހިރަށް. އާދެ، އެމަނިކުފާނަކީ މި މަޝްރޫޢު ފެށުނީއްސުރެ ނިމެންދެން ވަރަށް ބުރަކޮށް، ވަރަށް އިޚްލާޞްތެރިކަމާއެކު މަސައްކަތްކޮށްދެއްވި ބޭފުޅެއް. ވަރަށްގިނަފަހަރު މި ރަށަށް ޒިޔާރަތްކުރައްވައި، ދިމާވާ އެކި ދަތިތައް ޙައްލުކުރައްވައި، ވަރަށް ހިންމަތާއެކު މަސައްކަތްކުރެއްވި ބޭފުޅެއް. އެހެންކަމުން، އަލްފާޟިލް ޢުމަރު ޒާހިރަށާއި، އެ މަނިކުފާނުގެ ބެއްލެވުމުގެ ދަށުން އެ މިނިސްޓްރީން މި މަސައްކަތުގައި އުޅުއްވި ވެރިންނަށާއި މުވައްޒަފުންނަށް އަޅުގަނޑު ވަރަށް އިޚްލާޞްތެރިކަމާއެކު ޝުކުރު ދަންނަވަން. އާދެ، އޭގެތެރޭގައި މަޝްރޫޢުގެ ޕްރޮޖެކްޓް މެނޭޖަރުންގެ ގޮތުގައި މަސައްކަތްކުރެއްވި ބޭފުޅުންނާއި، ފަޅު ގޮއްވުމުގެ މަސައްކަތުގައި އުޅުއްވި ބޭފުޅުންނާއި، ޚާއްޞަކޮށް، އެ މިނިސްޓްރީގެ އެގްޒެކެޓިވް ޑިރެކްޓަރ އަލްފާޟިލް މައިޒާން އިބްރާހީމް މަނިކު، އަޅުގަނޑު ޝާމިލްކުރަން.
އާދެ، މި މަޝްރޫޢަކީ، ބޭރުގެ އެހީ ލިބިގެން އަދި ސަރުކާރުގެ ބަޖެޓުން ޚަރަދުކޮށްގެން ނިންމި މަޝްރޫޢެއް. ބޭރުގެ އެހީ ހޯދުމުގައި މިނިސްޓަރ އޮފް ފޮރިން އެފެއާޒް އަލްއުސްތާޛު ފަތުޙުﷲ ޖަމީލާއި، އެ މިނިސްޓްރީގެ ވެރިންނާއި މުވައްޒަފުން މަސައްކަތްކޮށްދެއްވި. ޚާއްޞަކޮށް، ޑިޕާޓްމަންޓް އޮފް އެކްސްޓަރނަލް ރިސޯސަސްގެ ވެރިންނާއި މުވައްޒަފުން. އެހެންވީމާ، މިނިސްޓަރ ފަތުޙުﷲ ޖަމީލަށާއި، ޑިޕާޓްމަންޓް އޮފް އެކްސްޓަރނަލް ރިސޯސަސްގެ ވެރިންނަށާއި މުވައްޒަފުންނަށްވެސް އަޅުގަނޑު ޝުކުރު ދަންނަވަން.
މި މަޝްރޫޢަކީ، މިނިސްޓަރ އޮފް އެޓޮލްސް އެޑްމިނިސްޓްރޭޝަން އަލްއުސްތާޛު ޢަބްދުﷲ ޙަމީދު، ވަރަށް ކައިރިން ބައްލަވަމުން ގެންދެވި އަދި ވަރަށްބޮޑު އަހަންމިއްޔަތެއް ދެއްވި މަޝްރޫޢެއް. އެ މަނިކުފާނުގެ ބެއްލެވުމުގެ ދަށުން، އެ މިނިސްޓްރީގެ އިސްވެރިންނާއި، އަތޮޅުވެރިންނާއި، އަތޮޅުއޮފީހުގެ ވެރިންނާއި، މުވައްޒަފުންނާއި، މިރަށުގެ ވެރިންނާއި، މި ރަށުގެ އާންމު ރައްޔިތުންވެސް މިކަމުގައި ވަރަށް ބޮޑަށް ބައިވެރިވެވަޑައިގެންދެއްވި. އެހެންވީމާ، މިނިސްޓަރ ޢަބްދުﷲ ޙަމީދަށާއި، އެ މިނިސްޓްރީގެ އެހެން ވެރިންނަށާއި، މުވައްޒަފުންނަށާއި، އަތޮޅުވެރިންނަށާއި، އަތޮޅުއޮފީހުގެ ވެރިންނަށާއި، މުވައްޒަފުންނަށާއި، އަދި ރަށުގެ ވެރިންނަށާއި، ރަށުގެ މުވައްޒަފުންނަށާއި، ކޮމިޓީތަކުގެ މެންބަރުންނަށާއި، އާންމުކޮށް، ރަށުގެ އެންމެހާ ރައްޔިތުންނަށް އަޅުގަނޑު ޝުކުރު ދަންނަވަން.
ހަމަ އެއާއެކީގައި، މަޝްރޫޢު ވިލަރެސްކޮށްދެއްވި ކޮމިޓީގެ މެންބަރުންނަށްވެސް ޝުކުރު ދަންނަވަން. އެ ބޭފުޅުންގެ މަސައްކަތަކީ، ޝައްކެއްނެތްގޮތުގައި، ވަރަށް މުހިންމު މަސައްކަތެއް. އަދި އޭގެ އިތުރުންވެސް، ފުވައްމުލަކު އަތޮޅު ތަޢުލީމީ މަރްކަޒަށާއި، ސަރުކާރުން ހިންގަވާ ސްކޫލްތަކުގެ ވެރިންނަށާއި މުދައްރިސުންނަށްވެސް، އެބޭފުޅުން ކޮށްދެއްވި މަސައްކަތްތަކަށްޓަކައި މި ފުރުޞަތުގައި އަޅުގަނޑު ޝުކުރު ދަންނަވަން.
އާދެ، މި އެހީދިން ބޭރުގެ ފަރާތަކީ، ޑެންމާކްގެ ޑެއިނިޝް އިންޓަރނޭޝަނަލް ޑިވެލޮޕްމަންޓް އޭޖެންސީ (ޑެނީޑާ). އެހެންވީމާ، "ޑެނީޑާ'' އަށްވެސް ވަރަށް އިޚްލާޞްތެރިކަމާއެކީގައި، ދިވެހި ސަރުކާރުގެ ނަމުގަޔާއި، ފުވައްމުލަކުގެ ރައްޔިތުންގެ ނަމުގައި އަޅުގަނޑު ޝުކުރު އަދާކުރަން.
ހަމައެފަދައިން، މަޝްރޫޢުގެ ކޮންސަލްޓަންޓުން ކަމަށްވާ ނިރާސް ޕޯޓް ކޮންސަލްޓަންޓްސްއަށްވެސް ޝުކުރު ދަންނަވަން. އަދި މަޝްރޫޢުގެ ކޮންޓްރެކްޓަރ އާދެ، މަސައްކަތް ހިންގަވައިދެއްވި ފަރާތަކީ، ހޯގާޑް އެންޑް ޝޫޒް ކަމަށްވާތީ، އެ ކުންފުނީގެ ވެރިންނަށާއި، މުވައްޒަފުންނަށާއި، މަސައްކަތުގައި އުޅުއްވި ހުރިހާ ބޭފުޅުންނަށް ވަރަށް އިޚްލާޞްތެރިކަމާއެކު ޝުކުރު ދަންނަވަން.
އާދެ، ފުވައްމުލަކުގައި ބަނދަރެއް ނެތުމުގެ ދަތިކަމާއި، އެކަމުގެ ނުރައްކާތެރިކަމާއި، ބިރުވެރިކަމާއި، ހިތްދަތިކަން ފުވައްމުލަކުގެ ރައްޔިތުންނާއި އަދި މިރަށަށް ގޮސްއައިސްވާ އެންމެންނަށް ތަޖުރިބާ ކުރެވެމުންދާތާ ވަރަށް ގިނަ އަހަރުތަކެއްވެއްޖެ. މިކަމަކީ، ފުވައްމުލަކަށް ދިމާވެފައިވާ އެންމެ ބޮޑު ދަތިކަމުގައި ދެންނެވުމަކީ، ދޮގަކަށްނުވާނެ.
އަޅުގަނޑު ރައީސްކަމާ ޙަވާލުވިފަހުން މިރަށަށް ކުރި އެންމެ ފުރަތަމަ ދަތުރުގައިވެސް އަޅުގަނޑަށް އެކަން އިޙްސާސްކުރެވުނު. އަޅުގަނޑު މީގެކުރިން އައި ކޮންމެ ފަހަރަކުމެ އައިސް މިރަށަށް ފައިބަން ޖެހިފައިވަނީ، ވަރަށް ދަތިގޮތެއްގައި. އާދެ، ކުޑަ ބޮއްކުރާއަކަށް އަރައިގެން އަދި ރަށުގެ ރައްޔިތުން މޫދަށް ފައިބައިގެން، ބޮއްކުރާ ދަމާފައި ގެންނަނީ. ރާޅަށް ބަލައިގެން، ހުސްދޭތެރެއަށް ބަލާފައި ބޮއްކުރާ ގޮނޑުދޮށާ ކައިރިކޮށްލީމާ، ކޮންމެވެސް ސިފައެއްގައި އެތާ ފުންމާލައިގެން ސަލާމަތްކަން ހޯދަންޖެހެނީ. މިކަހަލަ ދަތިގޮތަކަށް އަޅުގަނޑުވެސް މީގެކުރިން މި ރަށަށް އައިސް ފައިބާފައިވަނީ. އަދި އެއަށްވުރެ މާ ދަތިގޮތަކަށް ފުވައްމުލަކުގެ ރައްޔިތުން މިއޮތްހާ ޒަމާނުގައި ރަށަށް އައިސް އަދި ރަށުން ފުރާ ހަދާފައިވަނީ.
ދެންމެ އަތޮޅުވެރިންގެ ވާހަކަފުޅުގައި ވިދާޅުވިފަދައިން، މިކަމުގެ ތެރޭގައި އަދި އޭގެކުރިން މިނިސްޓަރުވެސް ވިދާޅުވި، މި ނުރައްކާތަކުގެ ތެރޭގައި އާދެ، އަރާފޭބުމުގެ ނުރައްކަލުގެ ތެރޭގައި، ފުވައްމުލަކުގެ ވަރަށް ގިނަ މީހުން ވަނީ މި ދުނިޔެއާ ވަކިވެގެން ގޮސްފައި. އަދި އެމީހުންގެ އޮޑިދޯނިފަހަރު ވަނީ ހަލާކުވެގެން ގޮސްފައި. ވަރަށް ގިނަ މުދާތައް ވަނީ ގެއްލިފައި. މިއީ އަޅުގަނޑުމެން މިއަދު ހަނދާންކުރަންޖެހޭނެ ކަމެއް.
އާދެ، ދެންމެ ޢިއްޒަތްތެރި މިނިސްޓަރުގެ އެދިވަޑައިގަތުމުގެމަތިން، ފުވައްމުލަކަށް އަރާފޭބުމުގައި ދިމާވި ނުރައްކާތެރި ހާދިސާތަކުގައި ނިޔާވެދިޔަ މީހުންނަށް ގެނައި ސުކޫތަކީ، އަޅުގަނޑުވެސް އެކަމަށްޓަކައި ވަރަށް ހިތްހަމަޖެހުނު ކަމެއް. އާދެ، އެމީހުންގެ މަތިން މިއަދު އަޅުގަނޑުމެން ހަނދާންކުރުމަކީ، ހަމަ ކޮންމެހެން ކުރަންޖެހޭނެ ކަމެއް. އެމީހުންގެ މަތިން ހަނދާންކޮށް، އެމީހުންނަށް މާތްﷲ ހެޔޮ ރަޙްމަތް ލެއްވުން އެދި އަޅުގަނޑުމެން ދުޢާކުރަންވާނެ. ހަމައެޔާއެކީގައި، އެމީހުންގެ ޢާއިލާތަކަށް ކެތްތެރިކަން ދެއްވައި، ޘަވާބު އިތުރުކުރެއްވުން އެދި ދުޢާކުރުމަކީވެސް އަޅުގަނޑުމެން މުސްލިމުންގެ ގޮތުގައި، އަޅުގަނޑުމެން ކުރަންޖެހޭނެ ކަމެއް.
އާދެ، މި ހިތްދަތި އަދި ނުރައްކާތެރި ކަންތައްތަކުގެ ތެރޭގައި، ފުވައްމުލަކުގެ ރައްޔިތުން ވަރަށް ގިނަ އަހަރުތަކެއް ވޭތުކުރެއްވުމަށްފަހުގައި، މާތްﷲގެ ހެޔޮ ރަޙްމަތްފުޅުން މިއަދު މިވަނީ އެހެން ސިފައަކަށް އެކަންތައް ބަދަލުވެފައި. ފުވައްމުލަކަށް ލިބިފައި މިވަނީ، ވަރަށް ރީތި އަދި ވަރަށް އަމާން، ވަރަށް ސަލާމަތްކަން ބޮޑު ބަނދަރެއް. އިރާދަކުރެއްވިއްޔާ މީގެފަހަކުން، އަޅުގަނޑު ކުރިން މި ދެންނެވިފަދަ ހާދިސާތަކެއް ހިނގާކަށެއް ނުޖެހޭނެ.
އާދެ، ކޮންމެއަކަސް މަޝްރޫޢެއްގެ މަސައްކަތް ނިމިގެންދިޔުމަކީ، އެހިސާބުން އަޅުގަނޑުމެން އެކަން ހަނދާންނައްތާލަންވީ ކަމެއްނޫން. މި މަޝްރޫޢު ނިމިގެން މި ދިޔައީ، އަޅުގަނޑުމެންނަށް ވަރަށް ރީތި ބަނދަރެއް ލިބިގެން. ވަރަށް އަމާން، ތަނަވަސް، ބޮޑު ބަނދަރެއް ލިބިގެން. އެހެންވީމާ، އެ ބަނދަރު ރައްކާތެރިކޮށް، އެ ބަނދަރަށް އަޅުގަނޑުމެން ދޭންޖެހޭ ސަމާލުކަން ދިނުމަކީ، ހަމަ ކޮންމެހެން ކުރަންޖެހޭނެ ކަމެއް.
އިންސާނުން ހަދާ އެއްޗިއްސަކީ، އަބަދަކު ދެމިހުންނާނެ އެއްޗިއްސެއް ނޫން. ހަލާކުވެގެންދާނެ. އެކިގޮތްގޮތްވާނެ. މަރާމާތު ކުރަންޖެހޭނެ. އެހެންވީމާ، އަޅުގަނޑުމެން ޢަމަލުކުރަންވާނީ، ބަނދަރަށް ވީހާވެސް އޯގާތެރިކޮށް، ބަނދަރުގެ ފަސޭހަތަކަށް، ވަސީލަތްތަކަށް ގެއްލުމެއް ނުލިބޭ ގޮތެއްގެމަތިން. އަދި އެއްވެސް ސަބަބަކާ ހުރެ ގެއްލުމެއް ލިބިއްޖެނަމަ، އެންމެންވެގެން އެކަމެއްޖެހޭނެ ރަނގަޅު ކުރަން. އިޞްލާޙުކުރަން.
އާދެ، ސަރުކާރުން މިހާރު ހަމަޖައްސާފައި މިވަނީ، ފުވައްމުލަކުގެ ބަނދަރަކީ، ފައިސާގެ ގޮތުންނާއި އަދި ކުރަންޖެހުނު މަސައްކަތުގެ ގޮތުން، ރާއްޖޭގެ އެހެން ރަށްރަށުގެ ބަނދަރުތަކާ ޚިލާފު ބަނދަރެއް ކަމުގައިވިޔަސް، ފުވައްމުލަކުގެ ބަނދަރަކީވެސް ހަމަ ރަށެއްގެ ބަނދަރު. އެހެންވީމާ، މި ބަނދަރު ހިންގަވާނީ ހަމަ މިއަތޮޅުގެ އަތޮޅުއޮފީހުންނާއި، މި ރަށުގެ ވެރިން. މި ރަށުގެ ރައްޔިތުން. އަދި ރާއްޖޭގެ އެހެން ރަށްރަށުގެ ބަނދަރުތަކޭ އެއްފަދައިން، މި ބަނދަރު ބޭނުންކުރުމުގައި އެއްވެސްކަހަލަ އަގެއް، ކުއްޔެއް، ފީއެއް ދެއްކުމެއް ނޯންނަގޮތަކަށް.
އާދެ، އަޅުގަނޑު ކުރިންވެސް ދެންނެވިހެން، އިންސާނުން ހަދާ ތަންތަނާއި ތަކެއްޗަކީ، އެއަށް ގެއްލުން ލިބޭނެ އަދި އުނިވާނެ، ހަލާކުވާނެ ތަންތަނާއި ތަކެތި. އެހެންވީމާ، މި ބަނދަރަށް ދިމާވާ، އެކަންތައްތައް ރަނގަޅުކޮށް މަރާމާތުކުރުމުގައި، ސަރުކާރުން އެކަން ކުރާގޮތަށް ވަނީ ހަމަޖައްސާފައި. އާދެ، ހަމަ މިނިސްޓްރީ އޮފް ކޮންސްޓްރަކްޝަން އެންޑް ޕަބްލިކް ވާރކްސްއިން، އިރާދަކުރެއްވިއްޔާ މަރާމާތުކުރުމުގެ ހުރިހާ މަސައްކަތްތަކެއް މުސްތަޤްބަލުގައިވެސް ކޮށްދެއްވަމުން ގެންދަވާނެ.
ޝައްކެއްނެތް، މިފަދަ ބަނދަރެއްގެ ފަސޭހަ، ފުވައްމުލަކަށް ލިބުމުން އޭގެ މާނައަކީ، މި އަތޮޅުގެ ނުވަތަ މި ރަށުގެ އިޖްތިމާޢީ އަދި އިޤްތިޞާދީ ތަރައްޤީއަށް ވަރަށް ބޮޑެތި ފައިދާތަކެއް ކުރާނެއޭ. މި ބަނދަރާއެކީގައި ވަރަށް ރަނގަޅު މަގެއްވެސް މިހާރު މިވަނީ ހެދިފައި. އެއީ، ބަނދަރު ހަދަންޖެހުނު ހިސާބުގެ ދުރުކަމުން، ރައްޔިތުންނަށް އޭގެ ބުރަ އުފުލަންޖެހޭތީ. އެކަން ސަރުކާރަށް އެނގިގެން، ރަނގަޅު ފެންވަރަކަށް ހަދައިދީފައި އޮތްމަގެއް މި ހެދުނީ. ފުވައްމުލަކުގެ ބަނދަރު ބޭނުންކުރެއްވުމުގައި، ރައްޔިތުންނަށް ވީހާވެސް ފަސޭހަވާނެގޮތެއް ބަލައިގެން، ކިތަންމެ ޚަރަދު ބޮޑުވިޔަސް، އެކަން ކުރަން ސަރުކާރުން ގަސްތުކުރީ. އާދެ، އެ މަގަކީ، އެ މަގެއް ރަސްމީގޮތުން ހުޅުވައިދިނުމުގެ އުފަލާއި ޝަރަފް މިއަދު އަޅުގަނޑަށް ލިބުނު ''ޖަމާލުއްދީން ނައިބުތުއްތު މަގު.''
އާދެ، މި މަގު ނިސްބަތް މިވަނީ، ފުވައްމުލަކުގެ ވަރަށް ޤަދަރުވެރި، ވަރަށް ޢިއްޒަތްތެރި ބޭފުޅަކަށް. ފުވައްމުލަކުގައި އުފެދުނު، ވަރަށް ބޮޑު ޢިލްމުވެރިޔަކަށް، އަދީބަކަށް، ޝާޢިރަކަށް. އާދެ، އެ ބޭފުޅަކީ، ފުވައްމުލަކު އެޅަތޮށިގޭ މުޙަންމަދު ތަކުރުފާނުގެ ޢީސާ ނާއިބު ތަކުރުފާނުގެ ދަރިކަލުން، އައްޝައިޚުލް ފަޤީހު މުޙަންމަދު ޖަމާލުއްދީން އިބްނު އައްނާއިބު ޢީސަލް މުލަކީ ނުވަތަ މަޝްހޫރު ނައިބުތުއްތު.
ނައިބު ތުއްތުއަކީ، މާތްވެގެންވާ އިސްލާމްދީނާއި ޢަރަބިބަހުގެ ޢިލްމުވެރިއެއް. ދިވެހި އަދަބިއްޔާތުގެ އެންމެ އިސް ސަފުގެ އަދީބެއް. ޅެންވެރިއެއް. އޭނާގެ ފަރާތްޕުޅުން ވަރަށް ގިނަ ބަޔަކަށްވަނީ، ތަޢުލީމުގެ އަލިކަން ލިބިފައި. ރާއްޖޭގެ ވަރަށް ޤަދަރުހުރި މަޝްހޫރު ޢިލްމުވެރިންނަށް ކިޔަވައިދެއްވި އެއްބޭފުޅަކީ، ނައިބު ތުއްތު ކަމަށް އަޅުގަނޑުމެންނަށް އެނގޭ. ހަމައެހެންމެ، އޭނާ ހެއްދެވި ފޮތްތަކެއް އަދިވެސް އަޅުގަނޑުމެންގެ އަތްމަތީގައި އެބަހުރި. ދީނީ ބައެއް ފޮތްފޮތާއި، ދިވެހިބަހުގެ ގަވާއިދާބެހޭ ފޮތާއި އަދި ރައިވަރު ފޮތްފޮތާއި، މިކަހަލަ ވަރަށް ގިނަ އަދަބީ އުފެއްދުންތައް އޭނާވަނީ އަޅުގަނޑުމެންގެ އަތްމައްޗަށް ދޫކުރައްވާފައި. އެހެންވީމާ، އެފަދަ ޚިދުމަތްތެރި ބޭފުޅަކަށް، މި ފުވައްމުލަކުގައި ހެދުނު މަގު ނިސްބަތްވުމަކީ، އަޅުގަނޑު ހިތުން ވަރަށް މުނާސިބު ކަމެއް. އެފަދަ ބޭފުޅުންގެ ހަނދާންތައް އަޅުގަނޑުމެން ދިރުވަންޖެހޭނެ. އެބޭފުޅުންގެ ޚިދުމަތްތަކުގެމަތިން އަބަދުވެސް ހަނދާންކުރަންޖެހޭނެ. އަދި އެބޭފުޅުން އެ ދެއްކެވި މަގުގައި ސާބިތުކަމާއެކީގައި ހިނގޭތޯ އަޅުގަނޑުމެން ބަލަންޖެހޭނެ.
އާދެ، ޝައްކެއްނެތް، މިއަދަކީ ފުވައްމުލަކުގެ ތާރީޚުގައި ވަރަށް މުހިންމު ދުވަހެއްކަމުގައި ވެގެންދާނެ. އާދެ، އަތޮޅުވެރިންގެ ވާހަކަފުޅުގައި ވިދާޅުވި، އަޅުގަނޑު މިރަށަށް މީގެކުރިން އަށްފަހަރު އަތުވެއްޖެއޭ. މިއީ ނުވަވަނަ ފަހަރޭ. އަޅުގަނޑަށް ހީވަނީ، އަޅުގަނޑު މި މަގާމާ ޙަވާލުވުމުގެ ކުރިންވެސް އެއްފަހަރު އަޅުގަނޑަށް މިރަށަށް އާދެވުނުހެން، 1974 ވަނަ އަހަރުގެ ފަހުކޮޅު. އެހެންވީމާ، އެއާއެކީގައި ފަހަރެއްގައި ވެދާނެ، މިއީ އަޅުގަނޑު މިރަށަށް އަންނަ ދިހަވަނަ ފަހަރުކަމަށް. އެކަން ކޮންމެގޮތެއްގައި އޮތަކަސް، މިއަދު މިއީ މަހެއްގެ 10 ވަނަ ދުވަސް. އެހެންވީމާ، އެގޮތުންވެސް އެބަ ދިމާވޭކަންނޭނގެ. އެންމެ މަހެއް ނޫން، ދެމަހެއްގެ 10 ވަނަ ދުވަސް. ޖުމާދަލްއޫލާ މަހުގެ 10 ވަނަ ދުވަސް. އަދި ޖުލައި މަހުގެ 10 ވަނަ ދުވަސް. އެހެންވީމާ، ދެން މި ހުރިހާ ގޮތަކުންވެސް ވަރަށް ރަނގަޅު އިއްތިފާޤެއް ކަމަށް، އަޅުގަނޑަށް ހީވަނީ މިކަން ވެގެންދާނީ.
ކޮންމެއަކަސް މިއަދުގެ މި އުފާވެރި ތާރީޚީ މުނާސަބަތުގައި، އަދިވެސް އެއްފަހަރު ފުވައްމުލަކުގެ ލޮބުވެތި ރައްޔިތުންނަށް އަޅުގަނޑުގެ އިޚްލާޞްތެރި ހެޔޮއެދުމާއި ތަހުނިޔާ ދަންނަވަން. އަދި ފުވައްމުލަކުގެ ރައްޔިތުންނަށާއި، ރާއްޖޭގެ ލޮބުވެތި އެންމެހާ ރައްޔިތުންނަށް އަދަށްވުރެ ތަނަވަސް، ފާގަތި، އުފާވެރި، ތަރައްޤީވެފައިވާ މާދަމައަކަށް އެދި ﷲގެ ޙަޟްރަތުގައި އަޅުގަނޑު ދުޢާ ދަންނަވަން.
والسّلام عليكم ورحمـة اللّـه وبركاته.