ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ލޯރޑް މޭޔަރ އޮފް ލީޑްސް، ކައުންސިލަރ އެބިގެއިލް މަރޝްލް ކަޓުންގ އަދި ވެސްޓް ޔޮކްޝަޔަރގެ މޭޔަރ ޓްރޭސީ ބްރޭބިންއާ ބައްދަލުކުރައްވައިފިއެވެ. މި ބައްދަލުކުރެއްވުން ބާއްވަވާފައިވަނީ ރައީސުލްޖުމްހޫރިއްޔާ މިހާރު އިނގިރޭސިވިލާތަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ދިވެހިރާއްޖޭގެ ތަރައްޤީއަށް މިހާރު ހުރި ގޮންޖެހުންތަކުން އަރައިގަތުމަށްޓަކައި، ލީޑްސް ސިޓީއާ ގުޅިގެން ކުރެވިދާނެ މަސައްކަތްތަކާ ބެހޭގޮތުން މަޝްވަރާ ކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ސަރުކާރުން ޢާންމު ހިދުމަތްތައް ޑިޖިޓަލައިޒް ކުރުމަށް އިސްކަންދެއްވާކަން ފާހަގަކުރެއްވިއެވެ. މީގެ އިތުރުން، މަގުތައް އަލުން ތަރައްޤީ ކުރުމާއި، ދަތުރުފަތުރުގެ ނިޒާމު ހަރުދަނާ ކުރެއްވުމަށް ރާއްވަވާފައިވާ މަޝްރޫޢުތަކުގެ މައްޗަށްވެސް އެ މަނިކުފާނު އަލިއަޅުއްވާލެއްވިއެވެ.
ފަތުރުވެރިކަމުގެ ދާއިރާއިން އެއްބާރުލުން ދިނުމާ ގުޅޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، އެ މަނިކުފާނުގެ މި ދަތުރުފުޅުގެ ތެރެއިން ލިވަޕޫލް ފުޓްބޯޅަ ކްލަބާއެކު ޤާއިމުކުރެވުނު އާ އިސްތިރާޖީ ގުޅުމާއެކު ރާއްޖޭގެ ފަތުރުވެރިކަމުގެ ސިނާޢަތަށް އިތުރު ކުރިއެރުމެއް ލިބިގެންދާނެ ކަމަށް އުއްމީދުކުރައްވާ ކަމުގައި ވިދާޅުވެފައެވެ.
މި ބައްދަލުކުރެއްވުމުގައި ލީޑްސްގެ ލޯރޑް މޭޔަރާއި ބައްދަލުވުމުގެ އެހެން ބައިވެރިން ވަނީ އެ ސިޓީގެ ބައެއް މަސައްކަތްތަކުގެ މައްޗަށް އަލިއަޅުވާލައްވައި ވާހަކަފުޅުދައްކަވާފައެވެ. އެ ގޮތުން އާންމު ދަތުރުފަތުރުގެ ނިޒާމާއި ކުޅިވަރުގެ އިތުރުން ސަގާފީ ގުޅުންތަކާއި މޫސުމީ ބަދަލުތަކުން ކުރާ ނޭދެވޭ އަސަރު ކުޑަކުރުމަށް ކުރެވޭ މަސައްކަތްތަކަށް މާލީ އެހީ ހޯދުންފަދަ އެކި ދާއިރާތަކުން ގުޅިގެން މަސައްކަތް ކުރުމާ ގުޅޭގޮތުން ވާހަކަފުޅު ދެއްކެވިއެވެ. އަދި މިރޮނގުން ރާއްޖޭގެ ތަރައްޤީއަށް އެއްބާރުލުން ދެވެންހުރި ދާއިރާތަކުން އެހީތެރިކަން ފޯރުކޮށްދިނުމާގުޅޭ ގޮތުންވެސް މި ބައްދަލުވުމުގައި މަޝްވަރާކުރެއްވިއެވެ.
މި ބައްދަލުކުރެއްވުން ނިންމަވާލެއްވީ، ދެޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ބަދަހިކުރުމަށް މަސައްކަތް ކުރުމުގެ އުންމީދު އާކުރައްވަމުންނެވެ.
