މި ޕޮޑްކާސްޓްގައި ރައީސުލްޖުމްހޫރިއްޔާގެ އަރިހުގައި ސުވާލު ދެންނެވީ، ރާއްޖޭގެ ޓީ.ވީ. ޕްރެޒެންޓަރެއް ކަމަށްވާ އަލްފާޟިލް އަޙްމަދު ޝަކީބް.
ޕްރެޒެންޓަރ:
السَّلامُ عَلَيْكُم.
ރައީސުލްޖުމްހޫރިއްޔާގެ އޮފީހުން ފަށްޓަވައިގެން ކުރިއަށްގެންދަވާ ޕޮޑްކާސްޓް ސިލްސިލާގެ އަޅުގަނޑުމެންގެ ދެވަނަ އެޕިސޯޑަށް ވަރަށް އިޚްލާޞްތެރިކަމާއެކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް މަރުޙަބާ ދަންނަވަން.
އާދެ، އަޅުގަނޑުމެންގެ މިއަދުގެ ޕޮޑްކާސްޓަށް ދާއިރު، އަޅުގަނޑު ހިތަށްއެރީ، އަޅުގަނޑުމެންގެ މި ސިލްސިލާގެ ފުރަތަމަ އެޕިސޯޑުގެ ވާހަކަވެސް ކޮންމެވެސްވަރަކަށް ހިމަނާލާނީއޭ. އަޅުގަނޑުމެން އެކަމަކު މާބޮޑަށް އޭގެތެރެއަކަށް ދާކަށެއްނޫން. އެހެންނަމަވެސް، އަޅުގަނޑުމެން އެ ޕޮޑްކާސްޓްގައި ވަރަށް ތަފްޞީލުކޮށް ދެއްކި ވާހަކައެއް ޞިއްޙީ ދާއިރާގެ ވާހަކަތައް. އެހެންނަމަވެސް، މި ހަފްތާގައިވެސް އަޅުގަނޑުމެން ފަށަންމިވީ އެއިންކަންނޭނގެ އަޅުގަނޑު ހިތަށްއެރީ.
ވޭތުވެދިޔަ ދެތިން ދުވަހަކަށް ބަލައިލާއިރުގައި، ޚަބަރުތަކުން އަޅުގަނޑަށް ވަރަށް ބޮޑަށް ފާހަގަކުރެވުނު، ޞިއްޙީ ދާއިރާގެ އެއްބަސްވުންތަކެއްގައި ސޮއިކުރެވުނު ވާހަކައެއް. ރާއްޖޭގެ ބައެއް ރަށްރަށުގެ ހޮސްޕިޓަލްތަކާއި އަދި ޞިއްޙީ ޚިދުމަތްދޭ މަރުކަޒުތަކެއްގެ ޢުމްރާނީ މަސައްކަތްތަކެއްގެ ވާހަކަ އައީ ވަރަށް ބޮޑަށް. ރައީސް މި މަޝްރޫޢުތަކާ ބެހޭގޮތުން ކޮންމެވެސްވަރަކަށް އެއްޗެއް ވިދާޅުވެލެއްވުން ކިހިނެއްތޯ؟ ވަރަށް މުހިންމު ކަންތައްތަކެއް ކަމަށް އަޅުގަނޑަށް ފެނޭ މި.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، ވަރަށް ބޮޑަށް ޝުކުރިއްޔާ. ޙަޤީޤަތުގައިވެސް މިއީ ޞިއްޙީ ދާއިރާއަށް ކަންތައްތައް ފަހިކޮށްދިނުން، އެ ދާއިރާގެ ކުރިއެރުމަކީ ވަރަށްބޮޑު އިސްކަމެއްދީގެން އަޅުގަނޑުމެން ކުރިއަށްގެންދާ މަސައްކަތްތަކެއް. 10 މަޝްރޫޢެއްގައި މި ސޮއިކުރެވިގެން ދިޔައީ. އަދި އެއީ، މަދު ޢަދަދެއް އިނގޭތޯ. ކުރިއަށް އޮތް ދުވަސްތަކުގައި އިރާދަކުރެއްވިއްޔާ ވަރަށްގިނަ ރަށްރަށުގައި، ވަރަށްގިނަ ހެލްތު ސެންޓަރުތަކާއި، ހޮސްޕިޓަލްތައް ހެދުމުގެ މަސައްކަތް ކުރެވިގެންދާނެ.
މައިގަނޑު ގޮތެއްގައި މިހާރު އަޅުގަނޑުމެން މި އިސްކަން މިދެނީ، އަޅުގަނޑު ރިޔާސީ ބަޔާނުގައި ދެންނެވިން، މިހާރު ހުއްޓިފައި ހުރި، މައިގަނޑު ގޮތެއްގައި ހުއްޓިފައި ހުރި ހުރިހާ މަޝްރޫޢުތަކެއް، މި މަސް ނިމެންވާއިރަށް ފެށުން އެއީ، ވަރަށްބޮޑު ޓާގެޓެއް ގޮތުގައި. އެ ޓާގެޓް ހާސިލުކުރުމަށްޓަކައި މީޑިއާއިން ފެނިވަޑައިގަންނަވާނެ، ވަރަށްގިނަ މަޝްރޫޢުތަކުގައި މިދިޔަ ދެ ހަފްތާއެއްހާ ދުވަސްތެރޭގައި ސޮއިކުރެވެމުންދިޔަކަން. އެއީ، އެކަން އިނގޭތޯ މައިގަނޑު ގޮތެއްގައި. އާ މަޝްރޫޢުތަކުގައިވެސް ސޮއިކުރެވިފައި އެބަހުރި. އެކަމަކު އެކި ސަބަބުތަކާ ހެދި ނުހިނގާހުރި މަޝްރޫޢުތައް، ނުހިނގައިގެން އުޅޭ މައްސަލަތައް ޙައްލުކޮށްދީފައި، މިހާރު ކުރެވޭނެގޮތް މި ހެދީ. އެގޮތަށް ވަރަށްގިނަ މަޝްރޫޢުތައް ސޮއިކުރެވިފައި، ހެލްތު ދާއިރާގައި ހުއްޓިފައި ހުރި ވަރަށްގިނަ މަޝްރޫޢުތަކެއް ހުރި. ހޮސްޕިޓަލް އެޅުމާއި، ޞިއްޙީ މަރުކަޒު އެޅުމާ، މިކަހަލަ ކަންތައްތަކެއް. އެހެންވީމާ، އެގޮތުން ހިންގޭ މަޝްރޫޢުތަކުގެ ސޮއިކުރުންތަކެއް ހިނގައި އެދިޔައީ ދޮގެއްތޯ.
ޕްރެޒެންޓަރ:
ޞިއްޙީ ދާއިރާގެ ވާހަކަ ދައްކާއިރުގައި، ދެން އަޅުގަނޑު ހަމަ ހިތަށްއަރަނީ، ރާއްޖޭގައި މީހުން ދިރިއުޅޭ ރަށްތަކުގެ ޢަދަދު އަދި ކިތަންމެ ގިނަކަމަށްވިޔަސް، އާބާދީގެ ނިސްބަތަށް ބަލާއިރުގައި، މާލޭ ސަރަޙައްދުގައި އާބާދީ މިއޮތީ ގާތްގަނޑަކަށް ހަމަ އެއްކޮށްކަހަލަ ގޮތަކަށް ދޮގެއްތޯ. އެހެންވީމާ، ޞިއްޙީ ޚިދުމަތްތަކަށް ބަލާއިރުވެސް ރަށްރަށުގައި ޚިދުމަތްތައް އަދި އެހެން ފުޅާނުކުރި ކަމަށްވިޔަސް، މާލޭ ސަރަޙައްދުގެ ޚިދުމަތްތައް ފުޅާކުރުމުގެ މުހިންމުކަން ވަރަށްބޮޑުކަންނޭނގެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، ވަރަށް ބޮޑު.
ޕްރެޒެންޓަރ:
އޭގެތެރެއަށް ދެން ހަމަ ދިޔުމުގެ ކުރީގައި، މިހާރު ކިހިނެއްތޯ، ތެލަސީމިއާ ސެންޓަރުގެ މަސައްކަތްތައް. ހަމަ ވަރަށްބާރުލާފައި އެބަދޭ އެހެންނޫންތޯ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
ވަރަށް ބާރަށް އެބަދޭ ދޮގެއްތޯ. މިހާރު ސިފައިން އެ ފެށީ، ހުޅުމާލޭގައި އޮރެންޖް ހިޔާ ބިލްޑިންގއަށް ތެލަސީމިއާ ސެންޓަރު ބަދަލުކުރަން ލިބުނު ފްލޯރ ހެދުމުގެ މަސައްކަތް.
އާދެ، އަޅުގަނޑު ސިފައިންނަށް ދިން ޑެޑްލައިނަކީ އެއްމަސް ދުވަސް އިނގޭތޯ. ސިފައިންނަށް އަޅުގަނޑު ދެންނެވީ، ހުއްޓާނުލައި ރެޔާއި ދުވާލު މަސައްކަތް ކުރައްވާށޭ. ދެން ސިފައިންނަކީ ވަރަށް ހީވާގި ބައެއް. ވަރަށް ޑިސިޕްލިން، ހާޑްވާރކް ކުރައްވާ، ބުރަ މަސައްކަތް ކުރައްވާ ބައެއް. ދެން އަޅުގަނޑުވެސް ބެލިން، ކުރެހުންތަކާއި ހުރިހާ އެއްޗެއް. އެތަނަށް ބޭނުންވާގޮތަށް އިންޓީރިއަރވެސް ޑިޒައިން ކުރެވިފައި އެހުރީ. ކުޑަކުދިންނާއި ޒުވާން ކުދިން ޚާއްޞަކޮށް، މިހާރު ތެލަސީމިއާ ސެންޓަރުގެ މާޙައުލު އޮންނަގޮތުން އެހާ ހިތްގައިމެއް ނޫން. ވަރަށްކުޑަ ތަންކޮޅެއް. އެއަށްވެސް ރަނގަޅު ބަދަލުތަކެއް، އިންޓީރިއާއަށްވެސް ގެނެސްފައި ހުންނާނެ. ދެން މިހާރު ބަދަލުވާ ތަން ވަރަށް ރަނގަޅުވާނެ.
އެހެންވީމާ، އިރާދަކުރެއްވިއްޔާ 30 އެޕްރީލަށް ނިންމާނެ އިނގޭތޯ. ސިފައިންގެ މަސައްކަތް ނިންމާނެ. ދެން މޭ މަހު 8، އެއީ، ދުނިޔޭގެ ތެލަސީމިއާ ދުވަސް. އެ ދުވަހަށް އަޅުގަނޑުމެން އިރާދަކުރެއްވިއްޔާ މާލޭގައި ހުރި މަރުކަޒު މިތަނަށް ބަދަލުކޮށް، އެ ދުވަހުގެ ކުރިން އިނގޭތޯ، ބަދަލުކޮށް، ވަރަށް ފަސޭހަކަމާއެކީގައި، މާއުނދަގުލެއް ކުދިންނަށްވެސް ދިމާނުވާގޮތަށް، ހަމަ ކުރު ވަގުތުކޮޅެއްގެ ތެރޭގައި ބަދަލުކުރުމުގެ ކަންތައްވެސް ރޭވިގެންދާނެ. ބަދަލުކުރެވި މިހާރަށްވުރެވެސް ރަނގަޅު ޚިދުމަތްތައް ލިބޭނެ. ވަސީލަތުގެ ގޮތުންވެސް. މިހާރު އަޅުގަނޑު ވާނީ ހަމަޖައްސައިދީފައި، ޑީ.އެން.އޭ. ޓެސްޓްކުރާނެ މެޝިންތައް ހޯދުމާއި، އެކަހަލަ ވަރަށްގިނަ ސާމްޕަލްތައް ބަހައްޓާނެ ޖާގަވެސް ތަނުގައި ވަރަށްބޮޑުވާނެ. އެތަނަށް އިތުރު ފްރިޖްތައް ހޯދުމާއި، މިކަހަލަ ހުރިހާ ކަމެއްވެސް އެބަ ހިނގާ. ސީނިއަރ ފިޒިޝަނެއްވެސް މިހާރު ފުލްޓައިމްކޮށް މަސައްކަތް ކުރަން ފަށައިފި. އެއީވެސް ވަރަށްގިނަ ދުވަސްވީ ކަމެއް، ނުކުރެވިފައި އޮތް އިނގޭތޯ. ފަސް ނަރުހުން ހޯދުމަށް ހުޅުވާލެވިފައި އެވަނީ. އެކަންވެސް އިރާދަކުރެއްވީތީ ހަމަޖެހިގެން އެދަނީ. އެކަންކަން ދަނީ ވަރަށް ރަނގަޅަށް އިނގޭތޯ.
ޕްރެޒެންޓަރ:
ރައީސް، މި މަސައްކަތް އެމް.އެން.ޑީ.އެފް. ބޭފުޅުންނާ ހަވާލުކުރެއްވީމާ، ބައެއް ޚަބަރުތަކުގައި އެބަހުރި ކޮންމެވެސްވަރަކަށް ފާޑުވެސް ކިޔާފައި. އެމް.އެން.ޑީ.އެފް. މީހުން ލައްވައި ހެއްޔޭ، މިކަހަލަ ކަންތައްތައް ކުރަންވީ. ދެން އަޅުގަނޑު ހިތަށްއެރީ، ޤައުމީ ކޮންމެ ކަމެއްގައިވެސް އެމް.އެން.ޑީ.އެފް. ބޭފުޅުންނަކީ ވަރަށް މުހިންމު ބައެކޭ. ދެން ކޮން ވިސްނުންފުޅެއްގައިބާވައޭ މިކަން ކުރައްވަނީ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
ހަމަ އެ ވިސްނުމުގައި އިނގޭތޯ. ޤައުމީ ވިސްނުމެއްގައި. ވަރަށްބޮޑު ޤައުމީ ކަމެއް މިއީ. މި ޤައުމުގައި ވަރަށްބޮޑު މައްސަލައެއް ތެލަސީމިއާ މައްސަލައަކީ. ދެން މި މައްސަލައަށް ރަނގަޅު ޙައްލެއްނައިސް މި ހުރިހާ ދުވަސް މިދިޔައީ. ދެން މި ނިންމަންހުރި އިމާރާތް ނުނިމި މިއޮތީ މުއްދަތު ހަމަވިއިރުވެސް. އަޅުގަނޑު ކުރީ ދުވަހު މިދިޔައީ އެތަން ބަލައިލަން. ދިޔައިރުގައި ދެބައިކުޅަ އެއްބައި މަސައްކަތްވެސް ނުނިމޭ. ދެން އަނެއްކާ އެ މީހުންނަށް އެކްސްޓެންޝަނެއް ދީގެން، އެ މީހުންނަށް އަދި އިތުރު ލާރިދީގެން، މިހެންގޮސް ދިގުލައިގެން ދާންވީތޯ، އެ މުއްދަތު ހަމަވާން ދެ ދުވަސް އޮތީ. އެހެންވީމާ، އެހިސާބުން އެމީހުން ދޫކޮށްލާފައި، ކުރި މަސައްކަތް ވެލިއުކޮށްފައި، ދޭންޖެހޭ އެއްޗެއް އުޞޫލުގެ ތެރެއިން ދޭންޖެހެންޏާ ދީފައި، ދެން ވަގުތުން ސިފައިން ވަދެ، މިކަން ކުރިއްޔާއޭ މިކަން ނިމޭނީ އަޅުގަނޑު ގަބޫލުކުރީ. ސިފައިންނަކީ މީގެކުރިންވެސް މިކަހަލަ ކިތަންމެ ކަމެއް ކޮށްފައި ތިބި ބައެއް އިނގޭތޯ.
ޕްރެޒެންޓަރ:
ކިހިނެއްތޯ، ދެންމެއަކު ކުރިން އަޅުގަނޑު ދަންނަވާލިހެން، ރާއްޖޭގެ އެކިހިސާބުގައި ޞިއްޙީގޮތުން ރަނގަޅު ޚިދުމަތްތަކެއް ފޯރުކޮށްދިނުމަކީ، އަޅުގަނޑު ހިތުން ވަރަށް މުހިންމު ކަމެއް އެއީ. އަސާސީ ޚިދުމަތެއްތާ ދޮގެއްތޯ. އެކަމަކު މާލެ ސަރަޙައްދުގައި، މާލެ، ހުޅުމާލެ، ވިލިނގިއްޔަށް ބަލާކަމަށްވަންޏާ، އާބާދީގެ މިހާބޮޑު ބައެއް އޮންނައިރުގައި، ސަރުކާރުގެ ހޮސްޕިޓަލެއްގެ ގޮތުގައި ހުޅުމާލޭގައި އަދި މިހިރީ އެންމެ ތަނެއް. މާލޭގައިވެސް ހަމަ ބޮޑު އެއްތަން. ދެން ވިލިމާލޭގައިވެސް އެއްތަން ދޮގެއްތޯ. ކިހިނެއްތޯ މިތަންތަނުގެ ޚިދުމަތްތައް ފުޅާކުރުމުގެ ވިސްނުންފުޅު އޮތީ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
ވަރަށް ވަރަށް އިސްކަންދެން. ދެން ހުރިހާ ރަށަކަށްވެސް އިސްކަންދެން. ހުރިހާ ރަށެއްގައިވެސް ތިބީ ދިވެހި ރައްޔިތުން. ކޮންމެ ރައްޔިތެއްވެސް އަޅުގަނޑަށް ހަމަހަމަ. ހުރިހާ ރަށެއްގައިވެސް އިރާދަކުރެއްވިއްޔާ މި އަހަރާއި މި އަންނަ އަހަރު ތެރޭގައި ހެލްތު ސެންޓަރުތައް އެޅި، ނޫނީވިއްޔާ ހޮސްޕިޓަލްތައް އިރާދަކުރެއްވިއްޔާ އެޅިގެންދާނެ، އަޅުގަނޑުގެ ރިޔާސީ ވަޢުދުގައި އޮތްގޮތަށް އިނގޭތޯ. ދެން މާލޭގައި މިއުޅެނީ އެންމެ ގިނަ މީހުން. އާބާދީގެ ގާތްގަނޑަކަށް ދެބައިކުޅައެއްބަޔާ ގާތަށް މާލޭސިޓީ، މި ސަރަޙައްދުގައި. އެހެންވީމާ، ކޮންމެގޮތެއްވިޔަސް ހަމަ އެންމެ ގިނަ މީހުން ތިބި ތަނަށް ވަރަށް އިސްކަން ދޭންޖެހޭނެ. އެއީކީ ތަފާތުކުރުމެއް ނޫންކަންނޭނގެ. ދެން އައި.ޖީ.އެމް.އެޗް.ގެ ފެންވަރު ވަރަށް ދަށްކޮށް ހުރީ. އަޅުގަނޑުމެން މިދިޔަ ދުވަސްތަކުގައި ވަރަށްގިނަ ކަންކަން ކޮށްފިން، އައި.ޖީ.އެމް.އެޗް.ގެ ފެންވަރު ރަނގަޅުކުރަން. މިގޮތުން ބަލާއިރު، ދެން އެންމެ އަވަހަށް ހުޅުވިގެންދާނީ ނިމިފައިވާ 75 އެނދުގެ ޕްރޮޖެކްޓް. އެތަން ހުޅުވިގެންދާނެ. އޭރުން ވަރަށްބޮޑުތަނުން ޖާގަ އިތުރުވެގެން އެބަދޭ. އެތަން ހުޅުވިގެން ދިޔައިމަ، މިހާރު އައި.ޖީ.އެމް.އެޗަށް ދިމާވެފައިވާ ޖާގައިގެ ދަތިކަން ވަރަށްބޮޑުތަނުން ޙައްލުވެގެން އެބަދޭ އިނގޭތޯ. ދެން އެ ޕްރޮޖެކްޓްގެ ވާހަކަ އަޅުގަނޑު ރިޔާސީ ބަޔާނުގައިވެސް ދެންނެވިން. އެ ތަން ހުޅުވިގެންދާނެ ވާހަކަ. މޭ މަހުގެ ތެރޭގައި އިރާދަކުރެއްވިއްޔާ ހުޅުވޭނެ. ދެން އެތަނުގައި ޖެނެރަލް ވާރޑުގެ 44 އެނދާއި، އެޗް.ޑީ.ޔޫ.، ހައި ޑިޕެންޑެންސީގެ 15 އެނދު، ދެން ޕްރައިވެޓް 14 ޔުނިޓް ހުންނާނެ.
ދެން ހަމަ އެއާއެކީގައިވެސް ވަރަށްގިނަ މަސައްކަތް މިދިޔަ ދުވަސްތަކުގައި އަޅުގަނޑުމެން ވާނީ ކޮށްފައި. މިސާލަކަށް، ކުޑަކުދިންނަށް ޚާއްޞަ އީ.އާރު. އަޅުގަނޑުމެން ހަދައިފިން އިނގޭތޯ. ކުޑަކުދިންނަށް ޚާއްޞަ އީ.އާރު. ހެދީމަ ވަރަށްބޮޑު ތަނުން ފަސޭހަވެގެން އެބަދޭ. މައިގަނޑު މެއިން، އެންމެ މުހިންމު، އެންމެ މައިގަނޑުކޮށް ހުންނަ އީ.އާރަށް ލުއިތަކެއް އެބަ ލިބޭ އިނގޭތޯ. ތުއްތު ކުދިންނާއި، 16 އަހަރުން ދަށުގެ ކުދިންނަށް ޚާއްޞަ އިމަރޖެންސީ ޚިދުމަތް ދޭން ފެށިފަހުން މިހާތަނަށް، އެއީ، މިދިޔަ ނޮވެންބަރުގައި އަޅުގަނޑުމެން ފެށީ އިނގޭތޯ. މިދިޔަ ނޮވެންބަރުގައި ފެށީ. ފަށައިގެން މިދިޔަ ގާތްގަނޑަކަށް ހަތަރު މަހެއްހާ ދުވަހުގެ ތެރޭގައި، ދިހަހާސް ތިންސަތޭކަ ނުވަދިހަ ތިން ކުދިން އެތަނުން ޚިދުމަތް ހޯދައިފި. މާނައަކީ، އެހެންނޫންނަމަ، ޢާންމުންވެސް ދާ އީ.އާރަށޭ މި ކުދިންވެސް ދާންޖެހޭނީ.
ޕްރެޒެންޓަރ:
ކޮބައިތޯ އެތަނުގެ ޚާއްޞަ ސިފަތަކަކީ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެއީ، އެތަނުގެ އެންވަޔަރަންމަންޓްވެސް ހުންނާނީ ކުދިންނަށް ހިތްގައިމު ގޮތަކަށް. އަދި ޚާއްޞަ ޑޮކްޓަރުން ތިބެފައި، ކުޑަކުދިންނަށް ޚާއްޞަ ސަމާލުކަމެއް އެތަނުން އެބަދެވޭ. ބެލެނިވެރިންނަށްވެސް ވަރަށް ހިތްހަމަޖެހުން އެކަމުގެ ސަބަބުން އެބަލިބޭ. އަވަހަށް ޚިދުމަތް އެބަދެވޭ. އަވަހަށް ޚިދުމަތް ދިނީމާ، ކުދިންގެ ޞިއްޙަތު ސަލާމަތް އެބަ ކޮށްދެވޭ. ރަނގަޅު ބޭސް އަވަހަށް ދެވި، ހުރިހާ ކަމެއް ކުރެވޭ.
ޕްރެޒެންޓަރ:
އެހެން ބަލިތަކުގެ މީހުންނާ ދުރަށް ގެންދިޔުމުގެ ފުރުޞަތުވެސް އެހެން ނޫންތޯ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެހެންވީމާ، އެކަހަލަ ކިތަންމެ ކަމެއް ކުރެވިގެން ހިނގައްޖެ އިނގޭތޯ.
ދެން ހަމަ އެގޮތަށް ހުޅުމާލޭގައިވެސް. ހުޅުމާލޭގައިވެސް އަޅުގަނޑުމެން، މާލޭގައި ދަރުމަވަންތަ ހޮސްޕިޓަލް، ޓަރޝަރީ ލެވެލްއަށް ބަދަލުކޮށްފައި ހުޅުވިގޮތަށް، ހުޅުމާލޭ ހޮސްޕިޓަލްވެސް ހަމަ އެ ދުވަސްވަރު، ހަމަ ނޮވެންބަރުގެ ތެރޭގައި އަޅުގަނޑުމެން ބަދަލުކުރިން. އަޕްގްރޭޑް ކުރިން. އަދި އިތުރު ޚިދުމަތްތައްވެސް އެދަނީ އިތުރުކުރެވެމުން.
ދެން ވިލިމާލެ. ވިލިމާލޭގައި ވިލިމާލޭ ރައްޔިތުން އެންމެ ބޮޑަށް ބޭނުންވާ ކަމަކީ ޞިއްޙީ ޚިދުމަތް ރަނގަޅުވުން އިނގޭތޯ. އެހެންވީމާ، އެކަމަށް އަޅުގަނޑު އެންމެ އިސްކަމެއް ދިނީ، ޗައިނާއިން އަޅުގަނޑުމެންނަށް މި ލިބޭ ހިލޭ އެހީގެ ތެރެއިން ކުރާ ކަމެއްގެ ގޮތުގައި. މާލޭގައި ދެ ކަމެއް. މާލޭސިޓީގެ ހުރިހާ މަގުތަކެއް ހެދުމާއި، ވިލިމާލޭގައި 100 އެނދުގެ ޓަރޝަރީ ހޮސްޕިޓަލެއް އެޅުން. ދެން އެއީ، ހަމަ ކޮންފަރމް، ޔަޤީންވެފައި. ފައިސާގެ އެއްވެސް މައްސަލައެއްވެސް ނެތް. މިހާރު އެ އޮންނަ މަރުޙަލާތައް ކުރިއަށްދަނީ. ޑިޒައިން ސްޓޭޖާއި، މިހެންގޮސް ކަންތައްތަކެއް. ދެން އެ މަޝްރޫޢު އިރާދަކުރެއްވިއްޔާ ޔަޤީންކަމާއެކީގައި ފެށޭނެ. ދެން ޗައިނާ ސަރުކާރުން ހަމަ ވަރަށް އިސްކަމެއް ދެއްވާ އެކަމަށް.
އެހެންވީމާ، މާލެ، ވިލިމާލެ، ހުޅުމާލެ މަޝްރޫޢުތައް، މި ދެންނެވިހެން ކުރިއަށްދާނެ. އަޅުގަނޑު ރިޔާސީ އިންތިޚާބުގައި ވަޢުދުވީން، ކުރިއަށް އޮތް ތަނުގައި އިރާދަކުރެއްވިއްޔާ އެހެން ހޮސްޕިޓަލްތަކެއް އެޅޭނެ ކަމަށްވެސް. މިސާލަކަށް، މާލޭގައި ކެންސަރ ހޮސްޕިޓަލެއް އެޅުން އިނގޭތޯ. އަޅުގަނޑުމެން އެކަމަށް މަސައްކަތްތަކެއް އެބަ ކުރަން. އަދި ހުޅުމާލޭގައި ތެލަސީމިއާއަށް ޚާއްޞަ ހޮސްޕިޓަލެއް އެޅުންވެސް އެބައޮތް އިނގޭތޯ. އިރާދަކުރެއްވީތީ އެކަންވެސް އެބަ ކުރިއަށްދޭ އިނގޭތޯ. ދެން އަންހެނުންނާއި ކުޑަކުދިންނަށް ޚާއްޞަ ހޮސްޕިޓަލެއް އެޅުންވެސް އިރާދަކުރެއްވިއްޔާ މި ދައުރު ތެރޭގައި ކުރިއަށްދާނެ އެކަންތައް.
އެހެންވީމާ، އެއީ، މާލެ ސަރަޙައްދުގައި އެންމެގިނަ މީހުން އުޅޭތީ، އެންމެ ގިނަ މީހުންނަށް މިތަންތަނުން ޚިދުމަތްދޭ ގޮތަށް. އެހެންނޫނީ ބޭރަށް ހުރިހާ އެންމެން މިދަނީ.
ޕްރެޒެންޓަރ:
މިދިޔަ ހަފްތާގައި އަޅުގަނޑުމެންގެ އެޕިސޯޑްގައި ދެކެވުނު ވާހަކައެއްގެ ތެރެއިން ހަމަ އަޅުގަނޑު ހިތުން ފާހަގަކޮށްލަންޖެހޭ ވާހަކައެއް، އެ ދުވަހުވެސް އަޅުގަނޑު ދަންނަވާލިން. މި ދުންފަތުގެ އިސްތިޢުމާލުގެ ސަބަބުން މި ޞިއްޙީ ދާއިރާއަށް މި ކުރިމަތިވާ ގޮންޖެހުންތައް. ދުންފަތާ ގުޅުންހުރި ބަލިތައް. ދެން އެ ދުވަހު މަނިކުފާނު ފާހަގަކޮށްލެއްވި، ޖެނެރޭޝަން ބޭންގެ ވާހަކަ. އަޅުގަނޑު ހިތުން ވަރަށްގިނަ ބަޔަކަށް ކަމުދިޔަ ވާހަކައެއް އެއީ. ކުޑަކުޑަ ތަންކޮޅެއް ތަފްޞީލުކޮށްލަދެއްވާ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެހެން ދެންނެވި ސަބަބަކީ، އަޅުގަނޑު ޙަޤީޤަތުގައިވެސް މިއުޅެނީ މި މައްސަލަ ޙައްލުކުރަންވެގެން އިނގޭތޯ. ޚާއްޞަކޮށް، އަޅުގަނޑުމެންގެ ޅަދަރިން، ތުއްތުކުދިން، މި ނުރަނގަޅު އާދައިގެ ތެރެއަށް ދާން ދޫކޮށްލައިގެން ސަރުކާރެއް އޮންނަންވީ ސަބަބެއް އަޅުގަނޑަކަށް ނުވިސްނޭ. ސަރުކާރެއްގެ ޒިންމާތަކެއް އެބައޮތޭ، އަޅުގަނޑު ގަބޫލުކުރަނީ އިނގޭތޯ. ސަރުކާރުން އެ ޒިންމާ އަދާކުރަންޖެހޭ. އެހެން ނޫނީވިއްޔާ ހަމަ އެހެން ޤައުމުތަކުގައިވެސް ވާހެން ރާއްޖޭގައިވެސް މިދަނީ ހަމަ ޒުވާން ކުދިން ސިނގިރޭޓުގެ ތެރެއަށް ގޮސް، ނޫނީ ދުންފަތުގެ އިސްތިޢުމާލުގެ ތެރެއަށް ގޮސް، ދެން އެއިން ސަލާމަތް ނުވެގެން އުޅެންޖެހެނީ.
އެހެންވީމާ، 18 އަހަރު ފުރިގެން، ނޫނީވިއްޔާ ޒުވާން ޢުމުރުގައި ދުންފަތުގެ އިސްތިޢުމާލު ކުރަން ފެށުމުގެ ކުރިން، އެކަން ހުއްޓުވިއްޖިއްޔާ އެއީ، އެންމެ ރަނގަޅު ގޮތޭ. އަދި ފަށައިގެންވެސް މާގިނަ އަހަރުތަކެއް ނުވެ ތިބި ކުދިން، އެއިން ސަލާމަތް ކުރަން، ހުއްޓުވަން ފަސޭހަވާނެއޭ. އާދަ އޭގައި ހިފާފައި ހުރިވަރު ކުޑަވާނެތާ ކޮންމެގޮތެއްވިޔަސް. 40، 50 އަހަރުގެ މީހަކު އެކަމުން ދުރުވާން އުނދަގޫވާނެ، 20 އަހަރު، 25 އަހަރުގެ ޒުވާނަކާ ބަލާއިރުގައި. އެހެން ނޫންތޯ.
އެހެންވީމާ، އަޅުގަނޑު މިހާރު މި ކެބިނެޓް ޕޭޕަރެއް، ދިރާސާތަކެއް ކޮށްގެން ހަދަން ހެލްތު މިނިސްޓަރާ ހަވާލުކޮށްފައި ވާނީ. ވަރަށް ތަފްޞީލުކޮށް ބަލާފައި، ގޮތްތަކެއް ނިންމަން. އަދި މިކަމާ ގުޅޭ ރާއްޖޭގެ ކަމާބެހޭ ފަރާތްތަކުގެވެސް މަޝްވަރާ ހޯދަން އިނގޭތޯ. ޑޮކްޓަރުންނާއި، ދެން އެކި ފަރާތްތަކުގެ. ދެން ދެތިން އޮޕްޝަނެއް ގެންނަން. ދެތިންގޮތެއް ހުށަހަޅަން މި ވިސްނަނީ. ކެބިނެޓުގައި މަޝްވަރާކޮށްފައި ގޮތެއް ނިންމަން. ދެން ހަމަ މި ޕްރޮގްރާމްގައި، އަޅުގަނޑު ހަމަ ޕަބްލިކަށް، ޢާންމުންނަށްވެސް މި ޚިޔާލު ހަމަ ފްލޯޓްކޮށްލާނަން. ދެތިން ހަތަރު ގޮތެއް އެބަ ހުށަހަޅަން އިނގޭތޯ. އެއްގޮތަކީ، 2007 ވަނަ އަހަރުގެ ޖަނަވަރީ 1ން ފެށިގެން އުފަންވީ ހުރިހާ ކުދިން، އަދި އުފަންވާނެ ހުރިހާ ކުދިން، އެ ކުދިން އުމުރުން ކުރިއަށް އޮތް ތަނުގައިވެސް މި ހަމަ ހިމެނޭގޮތަށް، ސިނގިރޭޓާއި، ދުންފަތުގެ އިސްތިޢުމާލު ނުކުރެވޭގޮތަށް ހެދުން އިނގޭތޯ. ދެވަނަ އޮޕްޝަނަކީ، ދެވަނަގޮތަކީ، 2004 ވަނަ އަހަރުން ފެށިގެން، 2004ގެ ޖަނަވަރީ 1ން ފެށިގެން އުފަންވެފައިވާ އަދި އުފަންވާނެ ހުރިހާ ކުދިން ސިނގިރޭޓް، ނޫނީ ދުންފަތުގެ އިސްތިޢުމާލު ކުރުމުން ދުރުކުރުން.
ޕްރެޒެންޓަރ:
އޭގެ މާނައަކީ މިހާރު އަޅުގަނޑުމެން މި ވާހަކަ ދައްކާއިރުގައި، ޢުމުރުން 18 އަހަރު ނުވަތަ ޢުމުރުން 21 އަހަރު ވެފައި ތިބި ކުދިންނާއި، އޭގެ ދަށުގެ ޢުމުރުފުރާގެ ކޮންމެ ކުއްޖަކަށް މަނާވާނެއޭ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ. ދެން މިހާރު އެ ކުދިން ހަމަ ޢުމުރުން ދުވަސްވީވަރަކަށްވެސް މަނާވާނެ. ދެން މާނައަކީ ކުރިއަށް އޮތްތާ، ޢުމުރުގައިވެސް ނުބޮވޭނެއޭ ސިނގިރޭޓެއް، ނޫނީ ދުންފަތުގެ އިސްތިޢުމާލެއް ނުކުރެވޭނެއޭ ޤާނޫނުގެ ދަށުން. ދެން ހަމަ އެއަށްވުރެ ތަންކޮޅެއް ޢުމުރު މައްޗަށްދާ ކަމަށްވަންޏާ، 2000 ވަނަ އަހަރުގެ ޖަނަވަރީ 1ން ފެށިގެން. އޭރުން 25 އަހަރު. އެހެންވީމާ، ކޮންމެގޮތެއްވިޔަސް، 18 އަހަރާއި 25 އަހަރާ ދޭތެރޭގެ ކުދިން، ނޫނީވިއްޔާ ޒުވާނުން އެކަމުގެ ތެރޭގައި އުޅޭތާ މިވީ އަދި އެހާގިނަ ދުވަހެއް ނޫން. އެހެންވީމާ، އެ ކުދިން އެ ވަބާއިން ސަލާމަތްކުރަން، ނޫނީވިއްޔާ އެކަމުން ސަލާމަތްކުރަން ފަސޭހަވާނެއޭ، 30، 40 އަހަރު ވެފައި ތިބި މީހުން އެކަމުން ސަލާމަތްކުރަން ބޭން ކުރުމަށްވުރެ.
އެހެންވީމާ، އަޅުގަނޑު މި ހުށަހަޅަނީ، ދެތިން ގޮތެއް. 2007 ވަނަ އަހަރުގެ ޖަނަވަރީ 1، 2004ގެ ޖަނަވަރީ 1، 2000 ވަނަ އަހަރުގެ ޖަނަވަރީ 1. މި ތިންގޮތް. މި ތިންގޮތުންކުރެ ކޮންމެވެސް އެއްގޮތަކަށް، އަޅުގަނޑުމެން ފަންނީ ލެވެލްގައި މަޝްވަރާކޮށްފައި، މީގައި ހުރި އެކި ކަންތައްތައް ބަލައި ހަދާފައި، ޤާނޫނެއް އުފައްދައިގެން މަނާކުރާގޮތަށޭ، މި ކުރިއަށް އޮތް ދުވަސްތަކުގައި އިނގޭތޯ. އޭރުން އަޅުގަނޑުމެންނަށް އިރާދަކުރެއްވިއްޔާ ޒުވާން ޖީލު އެބަ ސަލާމަތްކުރެވޭ. މިހާރު އެއޮތީ ވޭޕް މަނާކޮށްފައި. ދެން ސިނގިރޭޓާއި، އެކިކަހަލަ ދުންފަތުގެ އިސްތިޢުމާލު ކުރުމުން ޒުވާނުން ދުރުކުރުވުން އިނގޭތޯ. ދެންތިބި ފަރާތްތަކުންވެސް، އެކި ޢުމުރުފުރައިގެ ފަރާތްތަކުންވެސް، އަޅުގަނޑު މި ހަމަ ބާރުއަޅަނީ، ސިނގިރޭޓް ބުއިމާއި، އެކިކަހަލަ ދުންފަތުގެ އިސްތިޢުމާލު ކުރުމުން ދުރުވާން. އަގުބޮޑުކުރީ އެ މަޤްޞަދުގައި.
އަޅުގަނޑަށް އެނގޭ ވަރަށް އުނދަގޫ ކަމެއްކަން. އެކަމަކު އަޅުގަނޑަށް އާދޭ މެސެޖް އެއްޗެހި ވަރަށް ގިނައިން. މަންމަމެން، ބައްޕަމެން އެބަ މެސެޖްކުރޭ، ތިމަންނަގެ ދަރިފުޅު، ދެން އެއީ 30 އަހަރުގެ ދަރިޔަކަށްވެސް ވެދާނެ. ކުރީގައި ސިނގިރޭޓް ބޮނީ އޭނާ އަތުގައި ހުރި، އޭނާއަށް ލިބޭ މުސާރައިންނޭ. މިހާރު ލާރި ހުސްވެގެން، ތިމަންނަ އަތުގައި ހުރި ލާރިކޮޅޭ މިގެންދަނީ. ކިހާދެރަ ކަމެއްހޭ ތިކުރީ؟ އަޅުގަނޑަށް އާދޭ މެސެޖް އިނގޭތޯ. އަންޑަރސްޓޭންޑްވެއޭ މި ކަންތައް. އެކަމަކު މިކަހަލަ ކަމަކުން ދުރުކުރާކަށް ފަހަރަކު ފަހަރަކު ތަންކޮޅެއް ޓެކްސް ބޮޑުކޮށްގެނެއް މިކަމެއް ނުވާނެ. އެހެންވީމާ، ސިނގިރޭޓް އެތެރެކުރާ މީހުންނަށް އެ ދެވެނީ ފުރުޞަތެއް. އެ މީހުން އެތަންކޮޅު އެޖަސްޓްކޮށްގެން ހަމަ ވިއްކަމުން ދާން އެ ވިޔަފާރި. އަޅުގަނޑު އެދެން، ސިނގިރޭޓް އެތެރެކޮށް، ސިނގިރޭޓް ވިޔަފާރިކުރާ މީހުން، އެ ވިޔަފާރި ދޫކޮށްލަން. އެހެން ކަމަކާއިގެން އުޅެން. މިއީކީ ކުރާވަރުގެ ކަމެއް ނޫނޭ. ދެން މިއީ ކުޑަކުޑަ ޤައުމެއް. މިއީކީ މިލިއަނުން، މިލިއަނުން މީހުން އުޅޭ ތަނެއް ނޫން. ކީއްކުރަން މިތާނގައި އެކަން ކުރަންވީކީ. އަޅުގަނޑުމެންގެ މި ކުޑަ މުޖުތަމަޢު ސަލާމަތްކުރިއްޔާ މާރަނގަޅެއްނު މިކަމުން.
ޕްރެޒެންޓަރ:
ދުންފަތުގެ ވާހަކައިން، ދެންމެ ތިޔަ ވިދާޅުވިހެން ޤާނޫނަކުން އެކަން ކުރެވޭތޯ މަސައްކަތްޕުޅު ކުރައްވާއިރުގައި، ދެން ރާއްޖޭގައި އަޅުގަނޑު ހިތުން، ހަމަ މަނިކުފާނަށްވެސް އެނގިވަޑައިގަންނަވާނެ، ވަރަށްގިނަ މީހުންގެ ޝައްކު އުފެދޭ ދާއިރާއެއްކަންނޭނގެ، މި ޤާނޫނުތައް ތަންފީޛު ކުރުމުގެ ވާހަކަ އިނގޭތޯ. ދާދި އިހަކަށް ދުވަހަކުވެސް ނޫހުގައި ޖަހާފައި އޮތް، ރާއްޖޭގައި މިހާރު ވޭޕް ބޭނުންކުރުން މަނައޭ. އެކަމަކު އެއަރޕޯޓުތަކުންނެއް ނުހިފަހައްޓައޭ އިނގޭތޯ. މިއީ ހަމަ ފެނުނު ޚަބަރެއް.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
މީގެ ތަންފީޛީ މަރުޙަލާ ވަރަށް މުހިންމު ދޮގެއްތޯ. ވަރަށް އިސްކަމެއް ދެން އިނގޭތޯ. ކުރިއަށްވުރެ ހަމަ އެތައް ގުނައެއްކޮށް ރަނގަޅުވާނެ ކަމުގެ ޔަޤީންކަން މިދެނީ. އެތައް ގުނައަކުން ރަނގަޅުވާނެ. ރަނގަޅު ކުރަންޖެހޭ އިނގޭތޯ. ހަމަ މީގައި ހުރިހާ މުއައްސަސާތައް، އެއް ލެވެލްއެއްގައި މަސައްކަތް ކުރުން މުހިންމުވާނެ. އެކަމަށް ވަރަށް ބާރުވެސް އެބަ އަޅަން އިނގޭތޯ. މިދޭތެރެއިން ރައީސް އޮފީހުގައިވެސް، ކަމާބެހޭ މުއައްސަސާތައް ގެނެސްފައި އަޅުގަނޑު ބައްދަލުވުމެއްވެސް ބޭއްވިން. ކަސްޓަމާއި މިހެންގޮސް އެކި ފަރާތްތައް. ގެނެސްގެން ތިޔަ ވިދާޅުވިގޮތަށް، ވޭޕްގެ މައްސަލައިގައި އަދި ސިނގިރޭޓުގެ މައްސަލައިގައިވެސް އެންމެން އެއްވަރަކަށް މަސައްކަތް ކުރަން، ތަންފީޛު ކުރުމުގައި އިނގޭތޯ. އެކަން ރަނގަޅުވެގެންދާނެ.
ދެން ސިޔާސީވެސް ކުރޭ މިކަންތައް އިނގޭތޯ. ވަރަށް ބޮޑަށް ސިޔާސީކުރޭ. ދެން އަޅުގަނޑު ބަލައިލާއިރުގައި، ސިނގިރޭޓްވެސް ވިއްކުމުގައި މިއުޅެނީ އަޅުގަނޑުމެންނާ އިދިކޮޅު ފިކުރުގެ މީހުންގެ މީހުން އިނގޭތޯ. އެ މީހުން މި މުޒާހަރާތަކަށްވެސް އެބަ އެހީދޭ. އަޅުގަނޑަށް މަޢުލޫމާތު ލިބޭނެ ނޫންތޯ. އެ މީހުން ބޭނުންވާނީ، ކީކޭ ދަންނަވާނީ، މިކަން މަނާކޮށްފައި އޮތް އޮތުން ނިމުމަކަށް ގެންނަން. އެހެންވީމާ، ސިޔާސީ ނުކުރާށޭ، ދެން ރައްޔިތުންގެ ޞިއްޙަތު.
ޕްރެޒެންޓަރ:
އަޅުގަނޑު އަޞްލު އެ ވާހަކަ މި ދެންނެވި ސަބަބަކީ، ދެންމެ މި ދެންނެވިހެން، ނޫހަކުން އަޅުގަނޑަށް ފެނުނު އެންމެ ޚަބަރެއް ކަމަށްވިޔަސް، އެ ޚަބަރު ކިޔާލީމާ، އަޅުގަނޑަށް ކޮންމެވެސްވަރަކަށް ނެގުނު މެސެޖަކީ، ސަރުކާރަކުންނެއް ކޮންމެހެން މިކަން ތަންފީޛުކުރާކަށް އެހާބޮޑަކަށް މަސައްކަތެއް ނުކުރެއޭ. އެކަމަކު އެހެންނޫންކަން ޙަޤީޤަތުގައި ސަރުކާރުގެ ވިސްނުންފުޅަކީ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެހެންވީމާ، އިރާދަކުރެއްވިއްޔާ މިގޮތަށް ގެންދާނަން، ރައްޔިތުންގެ ޚިޔާލާއި މަޝްވަރާއާ އެކީގައި. ރައްޔިތުންގެ ބައިވެރިވުން ވަރަށް މުހިންމު އިނގޭތޯ. ރައްޔިތުންނަށްޓަކައި ކުރާ ކަމެއް. ރައްޔިތުންނާއެކު މި ސަރުކާރު އޮންނާނީ އަބަދުވެސް.
ޕްރެޒެންޓަރ:
ރައީސް ދެންމެ ތިޔަ ވިދާޅުވިހެން، އަޅުގަނޑަށް ހީވަނީ ހަމަ ގިނަ ބަޔަކު ބަލައިގަނޭ. އެއީ، ކުރީ ދުވަހު އަޅުގަނޑުމެންގެ ޕޮޑްކާސްޓްގައި އަޅުގަނޑު ދެންނެވީމެއް ނޫންތޯ، މިސްކިތުން ދުންފަތުގެ ވަސް ނުދުވާ ވާހަކަ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އަޅުގަނޑަށްވެސް އެ މެސެޖްތައް އައޭ. އެ ވާހަކަ ވިދާޅުވި ހިސާބުން އައި.
ޕްރެޒެންޓަރ:
ސޯޝަލް މީޑިއާގައިވެސް އެހެންވީމާ، އޭގެ މާނައަކީ ހަމަ ވަރަށްގިނަ ބަޔަކު މިކަން ބަލައިގެންފިއޭ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެންމެފަހުން މިއަދުވެސް، އަޅުގަނޑު ނުވެސް ދަންނަ މީހެއް ހަމަ އިނގޭތޯ. މެސެޖްކޮށްފައި އެބައޮތް، ތިމަންނައަށް އެންމެބޮޑު ހިތްހަމަޖެހުމެއް މި ރޯދަމަހު ލިބުނީ، ތިމަންނަ މިސްކިތަށް އަރާއިރުގައި، ކައިރީގައި ހުންނަ ކޮންމެވެސް މީހެއްގެ އަނގައިން އެ ދުވާ ދުންފަތުގެ، ސިނގިރޭޓުގެ ވަހުން ސަލާމަތްވީމައޭ. اَلْحَمْدُ للَّهِ.
ޕްރެޒެންޓަރ:
ދުންފަތުގެ ވާހަކައަކީ އަޅުގަނޑަށް ހީވަނީ ދައްކަންވެއްޖިއްޔާ ވަރަށް ދިގުކޮށްވެސް ދެއްކިދާނެ ވާހަކައެއްހެން. ދުންފަތުގެ ވާހަކައިން އަޅުގަނޑު އެންމެބޮޑަށް ފާހަގަކޮށްލަން ބޭނުންވާ ކަމަކީ، ދުންފަތާ ދުރުވާވަރަކަށް އަޅުގަނޑުމެންނަށް އެ ދެވެނީ ދުޅަހެޔޮ ދިރިއުޅުމަކާ ކައިރިއަށް ދޮގެއްތޯ. ދެން ދުޅަހެޔޮ ދިރިއުޅުމަކަށް، ނޫނީވިއްޔާ ބަލިތަކާ ދުރުހެލިވުމަށްޓަކައި އަޅުގަނޑު ހިތަށްއަރަނީ މަނިކުފާނުގެ މެނިފެސްޓޯގައިވެސް ވަރަށް ބޮޑަށް ބާރުއަޅުއްވާފައި އޮތް ކަމެކޭ އެއީ. ދެން ރާއްޖޭގެ ބޭފުޅަކު ލިޔުއްވި ކޮންމެވެސް އެއްޗެއްގައި އަޅުގަނޑު ދުށް ހަނދާންވޭ. ރާއްޖޭގެ ކޮންމެ ރަށަކީވެސް ހަމަ ހިތްގައިމު އައުޓްޑޯ ޖިމެކޭ، މޫދާއި ގޮނޑުދޮށާ މި ހުރިހާ ތަނަކަށް ބަލާއިރު. އެހެންވީމާ، ބަލިތަކާ ދުރުހެލިވުން، މި ހޮސްޕިޓަލްތަކާ ހަމަޔަށް ނުގޮސްވާނެ ގޮތެއް ހޯއްދަވަން މަނިކުފާނުގެ ވިސްނުންފުޅު ކިހިނެއްތޯ ގެންގުޅުއްވަނީ؟ ސަރުކާރުގެ ވިސްނުންފުޅު.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އެއީ، ވަރަށްބޮޑު އިސްކަމެއް ދޭ ކަމެއް ނޫންތޯ. އަޅުގަނޑު ރިޔާސީ އިންތިޚާބުގައިވެސް އެ ވާހަކަ ވަރަށް ދެއްކިން. ބަލިތަކާ ހަމަޔަށް ގޮސްގެން، ބަލިވެގެން ހޮސްޕިޓަލަށް ދިޔުމުގެ ކުރިން އެބަޖެހެއޭ، ބަލިވިޔަނުދޭން މަސައްކަތްތަކެއް ކުރަން. އެއީ، އަޞްލުގައި ވަރަށްބޮޑު ކަމެކޭ އިންވެސްޓް ކުރަންޖެހޭ. ކުރީގައި ރާއްޖޭގައި މިކަމަށް ވަރަށްބޮޑު ސަމާލުކަމެއް ދެވުނު ދުވަސްތަކެއްވެސްދިޔަ. ދެން އެ އާދަ ގޮސްފައި މިއޮތީ. އަޅުގަނޑު ބޭނުންވަނީ އަނެއްކާވެސް ޞިއްޙީ ދާއިރާއިން އިސްކަމެއް ދޭން، ޕްރިވެންޓިވް ހެލްތް ކެއަރއަށް. ނޫނީ ބަލިވުމުގެ ކުރިން އަޅަންޖެހޭ ފިޔަވަޅުތައް އެޅުމަށް. އެގޮތަށް ތިޔަ ވިދާޅުވިހެން، ސިނގިރޭޓް ބުއިމުން، ނޫނީވިއްޔާ ދުންފަތުގެ އިސްތިޢުމާލު ކުރުމުން ޖީލެއް ދުރުކުރުވުމަކީ، ކުރެވޭނެ ހަމަ އެންމެބޮޑު އެއް ކަންތައް ޙަޤީޤަތުގައި ޕްރިވެންޓިވް ހެލްތް ކެއަރގެ ތެރެއިން.
ދެން އޭގެއިތުރަށް، ކުރީ ދުވަހުގެ ޕްރޮގްރާމްގައި، ބޭފުޅެއްގެ ސުވާލުގެ ޖަވާބުގައިވެސް އައިކަންނޭނގެ، ތަރުކާރީއާއި މޭވާގެ ވާހަކަ ދޮގެއްތޯ. ހަކުރުގެ ބާވަތްތައް މަދުކުރުމާއި، ތަރުކާރީއާއި މޭވާއާއި، ރަނގަޅު ކާނާ ކެއުމަށް ބާރުއެޅުމާއި، އެ ލިބޭނެގޮތް ހަދައިދިނުމާ، މިކަހަލަ ކަންތައްތައްވެސް މިއީ ވަރަށް މުހިންމު ކަމެއް. ލައިފް ސްޓައިލް ޑިޒީޒަސް ވަރަށްގިނަ. ކެންސަރުގެ އިތުރުން، ހަމަ ހުރޭ، ގައިންގަޔަށް އަރާ ބަލިތަކާއި، ވާރުތަކުރާ ބަލިތައްވެސް. އެކަމަކު އަޅުގަނޑުމެންނަށް އެތައް ބަލިތަކުން ދުރުވެވޭނެ ގޮތްތައް ހުރޭ އިނގޭތޯ.
ރަށްރަށުގައި ދެން އައުޓްޑޯ ޖިމްއޭ ވިދާޅުވީމަ، ރަށްރަށުގެ މާޙައުލަކީ ހަމަ ވަރަށް ހިތްގައިމު މާޙައުލެއް. އެކަމަކު ކަސްރަތު ކޮށްލެވޭނެގޮތަށް، ބަރު އެއްޗެހި ނުއުފުލާ ކަސްރަތު ކުރެވޭ އައުޓްޑޯ ޖިމްތައް ހެދުމަކީވެސް އަޅުގަނޑުމެން ބޭނުންވާ ކަމެއް. މިސާލަކަށް، މޫދުވެސް. ވަރަށްގިނަ ރަށްތަކުން އެދޭ ކަމެކޭ. މިކަހަލަ ހިތްގައިމު މޫދު ނުހުންނަ ބައެއް ރަށްތައްވެސް އެބަހުރޭތާ، މިހާރު މަޝްރޫޢުތައް ހިންގީމަ، ގިރައިގެން ދިޔުމާ ކަންކަމުގެ ތެރެއިންވެސް. ވަރަށް ގިނައިން އެދޭ، ތިމަންނަމެންނަށް ޚާއްޞަކޮށް، އިސްރަށްވެހިން އެދިލައްވަނީ އިނގޭތޯ. މޫދަށްއެރިލާނެ ތަންކޮޅެއް ހަދައިދޭށޭ. ދެން ކުޑަކޮށް ބޭރުވެސް ތޮށިލެވިފައި، ތަންކޮޅެއް ރައްކާތެރިގޮތަކަށް. އަޅުގަނޑުމެން މިހާރު މަޝްރޫޢުތައް ކުރިއަށްގެންދާއިރުގައި، ބަނދަރު ހަދާއިރުގައި، ނޫނީވިއްޔާ ގިރާ ސަރަޙައްދު ޙިމާޔަތް ކުރަން ތޮށިލާއިރުގައި، އެގޮތަށް ތަންކޮޅެއްލާފައި މި ހަދައިދެނީ ރަށްރަށުގައި. މޫދަށް އެރެވޭގޮތަށް. އެއީ، އަޞްލު ހަށިގަނޑަށް ވަރަށް ފައިދާވާ ކަހަލަ ކަސްރަތުތައް ކުރެވޭ މޫދުގައި. ދެން އޭގެއިތުރަށް، އައުޓްޑޯ ޖިމް ހަދައިދިނުން. ކޮންމެ ރަށެއްގައި އިރާދަކުރެއްވިއްޔާ ހުޅުވޭނެ، މި އަންނަ އަހަރުގެ ނިޔަލަށް އިނގޭތޯ. ރިޔާސީ ބަޔާނުގައިވެސް އަޅުގަނޑު ދެންނެވިން، މި އަހަރާއި މި އަންނަ އަހަރުގެ ތެރޭގައި ހުރިހާ ރަށެއްގައި އައުޓްޑޯ ޖިމް ބަހައްޓާނަމޭ. އެއީ، ވަރަށް މުހިންމު ކަމެއް، ކަސްރަތު ކުރުމަކީ ދޮގެއްތޯ.
ދެން ކުޑަކުދިންގެ ޕާކުތައް މި ހަދަނީ. އެއީވެސް ޙަޤީޤަތުގައި ބަލިތަކުން ދުރުކުރުވުމަށް ވަރަށް މުހިންމު ކަމެއް. ގޭތެރޭގައި ބަންދުވެފައި މިހެން ތިބުމުގެ ބަދަލުގައި ކުދިންނެރެ، ޢާއިލާއާ އެކީގައި ގޮސްފައި، ތަންކޮޅެއް ހިތްހަމަޖެހޭ ތަނެއްގައި ވަގުތުކޮޅެއް ހޭދަކޮށްލުން، ހަރަކާތްތެރިވެލުން. ސިކުނޑިއަށްވެސް އެއިން ލިބޭ ހަމަޖެހުމެއް އެބައޮވޭ. މާލޭގައިވެސް ހަލާކުވެފައި ހުރި ޕާކުތައް ހެދުމާއި، އާ ޕާކުތައް ހެދުން. އަޅުގަނޑުމެން މިހާރު މިއުޅެނީ އަލުން ރީތިކޮށް ސަލްޓަން ޕާކް ހަދާލަން. ކުރިއަށްވުރެ ގިނަ ކަންކަން ހިމަނާފައި އިނގޭތޯ. ސަލްޓަން ޕާކަކީ ވަރަށްގިނަ ގަސް ހުންނަ ތަނެއްވީމާ، އަޅުގަނޑުމެން ހަދާއިރުގައި، އެއްގަހުން އަނެއް ގަހަށް ދެވޭގޮތަށް، މަތީގައި އެކިކަހަލަ އެކްޓިވިޓީޒްތައް ހިމަނާފައި، އެކަހަލަ ބައިބައި ހިމަނާފައި، ކުރަން ނިންމާފައި މިއޮތީ އިނގޭތޯ. ތަންކޮޅެއް ޝައުޤުވެރިވާ ކަހަލަ ގޮތަކަށް އިނގޭތޯ. އެންމެ ކުޑަކުދިންނަށް އެކަންޏެއް ނޫން. އެންމެ ކުޑަކުދިންނާއި، ޒުވާނުންނާއި، ބޮޑެތި މީހުންނާ، ހުރިހާ އެންމެންނަށްވެސް ބޭނުންކުރެވޭ ކަހަލަ ކަންތައްތައް ހިމެނޭނެ. އެއްގަހުން އަނެއް ގަހަށް ގޮސްލައި ހަދައިލެވޭކަހަލަ، ތަންކޮޅެއް އެޑްވެންޗަރަސްއޭ މި ކިޔާކަހަލަ ކަންތައްތައް. ބިންމަތީ ލެވެލްގެ އިތުރަށް، މަތީގައި ކުޑަ ޕާކެއް އަންނާނެ ކަމަށް ބައްލަވަންވީ އިނގޭތޯ. ދެން އޭގެއިތުރަށްވެސް ކަންތައްތައް ހިމެނޭގޮތަށް، ޕާކުތައް މި ހެދެނީ. މިއީ ވަރަށް މުހިންމު ކަމެއް.
ދެން އޭގެއިތުރަށް، ކަސްރަތު ކުރުމަށް އިސްކަންދިނުމާއި، ކުޅިވަރުތަކަށް އިސްކަން ދިނުމާއި، މި ހިންގޭ މަޝްރޫޢުތައް ހިންގުންވެސް އެއީ، އޭގެތެރެއިން ހިނގާ ކަންކަން އިނގޭތޯ. އެހެންވީމާ، ވަރަށް އިސްކަމެއް ދެން. އަދި އޭގެއިތުރަށް، ހަމަ ޢާންމު ޞިއްޙަތު ރައްކާތެރިކުރުމަށް ކުރެވޭ ޕަބްލިކް ހެލްތުގެ ކަންތައްތައްވެސް. ތަންކޮޅެއް ކުރިން ވަރަށް ރަނގަޅަށް އޮތް ކަމެއް. ވަކިހިސާބަކުން ދޫވެގެންދިޔަ ކަމެއް. އަނެއްކާ އަޅުގަނޑުމެން މި ރަނގަޅުކުރަނީ. ވަރަށް މުހިންމު ކަމެއް، ކުޑަކުދިން ބަރާބަރަށް ކިރުމާއި، އެ ކުދިންނަށް ދޭންޖެހޭ ވެކްސިންތައް ބަރާބަރަށް ދިނުމާއި، މިހެންގޮސް ދަމަނަވެށީގައި މި ކުރާ ކަންތައްތައް ކުރަންޖެހޭ. އަޅުގަނޑު ވަޢުދުވެފައި އޮންނާނެ، ކޮންމެ އަތޮޅެއްގައިވެސް ހަމަ އެންމެ ފެންވަރު ރަނގަޅުކޮށް ދަމަނަވެށީގެ ޚިދުމަތްވެސް ދޭނެ ކަމަށް.
ދެން މިހެންގޮސް ޖުމްލަކޮށް، އިރާދަކުރެއްވިއްޔާ ވަށާޖެހޭ ޞިއްޙީ ޕޮލިސީއެއް ތަންފީޛު ކުރެވޭތޯ، އަޅުގަނޑު މި ބަލާ ޕޮލިސީއަކީ އިނގޭތޯ. އޭރުން އިރާދަކުރެއްވިއްޔާ ޑޮކްޓަރަށް ދައްކަންޖެހޭވަރު މަދުކުރެވި، ދައްކަންޖެހޭ ޙާލަތުގައި، ރާއްޖޭގައި ތިބެގެން އެންމެ ރަނގަޅު ޚިދުމަތް ހޯދޭނެގޮތް ހެދުން އިނގޭތޯ. މިހާރު މި ދާންޖެހެނީ އެކި ޤައުމުތަކަށް. އެއީކީ ފަސޭހަކަމެއް ނޫން އިނގޭތޯ. އެކަމަކު ރާއްޖޭގައި ތިބެގެން، އެންމެ ފެންވަރު ރަނގަޅު ޚިދުމަތް، ބަލިވީމަ ލިބޭނެގޮތްވެސް ވާންޖެހޭނެ. އެހެންވީމާ، އެ ވަށާޖެހޭގޮތަށް އެކަން ކުރެވޭތޯ މި ބަލަނީ.
ޕްރެޒެންޓަރ:
އަޅުގަނޑުވެސް ހިތަށްއަރާ، ދެންމެ ތިޔަހެން ވިދާޅުވީމާ، އެކަމާ ގުޅޭ ކޮންމެވެސް މުއައްސަސާއަކުން އިސްނަންގަވައިގެން، ރާއްޖޭގެ މި ވެށީގެ ތެރެއިން މީހުންނަށް، ޒުވާނުންނަށް ޚާއްޞަކޮށް ކަސްރަތު ލިބޭ ކަހަލަ، މިސާލަކަށް، ފެތުން، ފަލިޖެހުން ކަހަލަ ކުޅިވަރުތަކުގެ މުބާރާތްތަކެއް މިހެން ތަޢާރުފް ކުރުމުގެ ކަންތައްތައްވެސް، ކޮންމެވެސް ދިމާއަކުން ކުރައްވާނެނަމަ، އެއީ، މުސްތަޤްބަލަށްޓަކައި ޖީލުތަކަށް ހާދަ ރަނގަޅު ކަމަކަށްވާނެއޭ ދޮގެއްތޯ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، ވަރަށް ރަނގަޅުވާނެ.
ޕްރެޒެންޓަރ:
އަޅުގަނޑު ހިތަށްއަރާ، ކޮންމެވެސް ބޭފުޅުންކޮޅެއް އެކަހަލަ ކަމެއް އިސްނަންގަވައިގެން ކުރެއްވުން ރަނގަޅޭ.
އަޅުގަނޑު ދެން ހަމަ ފަހަރެއްގައި ސީދާ މި ދެކެވޭ ވާހަކައާ ގުޅުންހުރި ކަމަކަށް ނުވެދާނެ. އެހެންނަމަވެސް، ދެން ދަތުރުފުޅެއް ކުރައްވަން އުޅުއްވާ ކަހަލަ ވާހަކައެއް އަޑުއިވިފައި އޮތީމަ. ކިހިނެއްތޯ؟
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، މި ޢީދު ބަންދުގައި އިނގިރޭސިވިލާތަށް މިދަނީ ރާއްޖޭގެ ޓޫރިޒަމް ޕްރޮމޯޓް ކުރުމަށްޓަކައި އިނގޭތޯ.
މިދޭތެރެއިން އެމް.އެމް.ޕީ.އާރު.ސީ. އިން ވިޒިޓް މޯލްޑިވްސްގެ ފަރާތުން ވާނެ، ލިވަރޕޫލް ފުޓްބޯލް ކްލަބާ އެކީގައި އެގްރީމަންޓެއްގައި ސޮއިކޮށްފައި. ލިވަރޕޫލްގެ ޓޫރިޒަމް ޕާޓްނަރއެއްގެ ގޮތުގައި ދިވެހިރާއްޖެ ކަނޑައަޅާފައި އިނގޭތޯ. ދެން ވަރަށް ސަޕޯޓަރުން ގިނަ، ވަރަށް ކާމިޔާބު ކްލަބެއްވީމަ.
ދެން އިނގިރޭސިވިލާތަކީ ރާއްޖެއަށް ވަރަށްގިނަ ޓޫރިސްޓުން އަންނަ ޤައުމަކަށްވީމައާ އެކީގައި، އަދި މުޅި ޔޫރަޕަށްވެސް، އަދި ދުނިޔެއަށްވެސް މީގެ އެކްސްޕޯޝަރ އެބަލިބޭ. އެހެންވީމާ، މި ޕްރޮމޯޝަން އިޝްތިހާރު ދެއްކުން ފަށާ މެޗަށް އަޅުގަނޑަށް ލިވަރޕޫލް ފުޓްބޯލް ކްލަބުން ދަޢުވަތު ދިނީ. ދެން އަޅުގަނޑު ބޭނުންވަނީ، ރާއްޖެއަށް މީގެ އެންމެ ބޮޑު އެކްސްޕޯޝަރއެއް ލިބޭނެގޮތަށް މިކަން ކޮށްދޭން. އެއީ، ރާއްޖޭގެ ޓޫރިޒަމާއި އަދި އިޤްތިޞާދަށް ކުރެވޭ މުހިންމު އިންވެސްޓްމަންޓެއް ޙަޤީޤަތުގައި މިއީ. މިކަން ކުރިއަށް ގެންދިޔުމަކީ މިއީ، މި ޕާޓްނަރޝިޕްގެ ތެރެއިން ރާއްޖެއަށް މިކަން ފަހިކޮށްދިނުން. އެހެންވީމާ، އަޅުގަނޑު ދާން އެ ދަޢުވަތު ގަބޫލުކުރީ.
ދެން ލިވަރޕޫލް އެވަރޓަން/ޑަރބިން މެޗްގައި، އެރޭ 2 އެޕްރީލްގައި އޮންނަ މެޗްގައި، ފުރަތަމަ އެތަނުގައި ދަނޑުގައި ހުންނަ ލެޑް ޕެނަލްތަކުން ދައްކަން ފަށާނެ ރާއްޖޭގެ އިޝްތިހާރު. ދެން އަދި އޭގެއިތުރަށް، ހަމަ އެ ބޭފުޅުންގެ ހުރިހާ ސޯޝަލް މީޑިއާ ޕްލެޓްފޯމްތަކާއި، ހުރިހާ މާރޗެންޑައިޒެއްގައި ރާއްޖެ ދައްކާނެ. ރާއްޖެ ހިމަނާނެ.
ދެން އަދި އިތުރު ކަންކަންވެސް ހިމެނޭ މީގެތެރޭގައި. އަޅުގަނޑު ބައެއް ބައްދަލުވުންތަކުގައިވެސް ބައިވެރިވާނަން. ސްޕޯޓްސް މިނިސްޓަރވެސް އަޅުގަނޑާ އެކީގައި ވަޑައިގަންނަވާ. ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދުންވެސް މީގައި މި ފުރުޞަތު ހުޅުވާލެވިފައި، ނޫނީ އެ އޮޕްޝަން ހިމެނޭ މީގެތެރޭގައި އިނގޭތޯ. އޭގެ މަޝްވަރާތައްވެސް ކުރިއަށްދާނެ.
އެހެންވީމާ، ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދިއްޖިއްޔާ އެއީ، ވަރަށްބޮޑު ކަމަކަށްވާނެ ދޮގެއްތޯ. ރާއްޖޭގެ ފުޓްބޯޅަ ކުރިއެރުވުމަށް، ކުޑަކުދިންނަށް ޚާއްޞަކޮށް، ޒުވާން ކުދިންނަށް ދެވޭ ފުރުޞަތަކަށްވާނެ. ދެން ޖުމްލަކޮށް، ރާއްޖޭގެ ފުޓްބޯޅައަށް ކުރިއެރުން ގެނެސްދިނުމަށް.
ދެން އެހެންވީމާ، މިކަމުގައި މިދަނީ އިނގޭތޯ. ދާއިރުގައި އަޅުގަނޑު އެބަދަން ބްރެޑްފަރޑަށްވެސް. ބްރެޑްފަރޑްގައިވެސް ފުޓްބޯޅައިގެ މުހިންމު މަޝްރޫޢެއް ހިނގާ، ބްރެޑްފަރޑް ޔުނިވަރސިޓީގެ އިސްނެންގެވުމުގެ ދަށުން.
ދެން އެހެންވީމާ، މިކަހަލަ ދަތުރެއްގައި ދާއިރުގައި، އަބަދުވެސް އަޅުގަނޑު ރާއްޖެއިން ބޭރަށްދަންޏާ، ދިވެހި ކިޔަވާކުދިންނާ ބައްދަލުކުރަން. ދެން ދިވެހި ކިޔަވާކުދިން ވަރަށް ހަރަކާތްތެރި ޤައުމެއް އިނގިރޭސިވިލާތަކީ. މިހާރުވެސް 300 އަށްވުރެ ގިނައިން ކިޔަވާކުދިން އެބަތިބި. އެހެންވީމާ، އެމް.އެސް.އޭ. ޔޫ.ކޭ.، މޯލްޑިވްސް ސްޓޫޑަންޓް އެސޯސިއޭޝަން ޔޫ.ކޭ.، އެ ކުދިންނާ ބައްދަލުކޮށްލައި، ވަގުތުކޮޅެއް ހޭދަވެސްކޮށްލާނަން އިރާދަކުރެއްވިއްޔާ.
ދެން އަޅުގަނޑާ ވަރަށް ޕަރސަނަލީ ގުޅިފައި އޮތް ޖަމުޢިއްޔާއެއް އެއީ. އަޅުގަނޑު ކުރީގައި އިނގިރޭސިވިލާތުގައި ކިޔަވަންހުރިއިރުގައި، އެމް.އެސް.އޭ. ޔޫ.ކޭ.ގެ ޗެއަރޕަރސަންކަންވެސް ކުރިން. ވަރަށްގިނަ ހަރަކާތްތަކެއް ހިންގިން. ދެން މިދޭތެރެއިން މިދިޔަ ސަރުކާރު ދުވަސްވަރު، މުޅިން ވަޅުޖެހިފައި އޮތީވެސް. އެމް.އެސް.އޭ.ގެ ބެލުމުގެ ދަށުގައި ހުރި ކިޔަވާކުދިން ބޭނުންކުރި ގެވެސް ނަގައި، އެތަންވެސް އަތުލާފައި އޮތީ. ދެން އަޅުގަނޑު މިހާރު އަނެއްކާ އެތަން އަނބުރާ މިދެނީ. ސްޓޫޑަންޓުން ތިބޭ ގެ އެއީ، ލަންޑަނުގައި ހުންނަ. ވަރަށް ފައިދާތަކެއް ކުދިންނަށް ކުރާ ގެއެއް އެއީ. އެހެންވެ އެ ގެ އަނެއްކާ މި ހަވާލުކުރަނީ އިނގޭތޯ.
އެހެންވީމާ، މައިގަނޑު ގޮތެއްގައި މިދަނީ ޓޫރިޒަމް ޕްރޮމޯޝަން ކަމެއްގައި. ދާއިރުގައި މިހެންހުރި މުހިންމު ކަންތައްތައް ކުރުން. ދެން ލީޑްސްގެ ބައެއް އިސް ފަރާތްތަކާ ބައްދަލުކުރުމާއި، މިކަހަލަ ބައެއް ކަންތައްތައް. މިއީ ދެ ދުވަހެއްގެ ދަތުރެއް، ދެތިން ދުވަސް އިނގޭތޯ.
ޕްރެޒެންޓަރ:
އެއްދޮނުގައި ދެތިން ހަތަރު ބުޅި ޖަހާލަނީ ދޮގެއްތޯ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
ޖަހާލެވޭތޯ އިނގޭތޯ.
ޕްރެޒެންޓަރ:
އާދެ، ދެން ޢީދުގެ ތަހުނިޔާ އަރިސްކުރަން އިނގޭތޯ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، ވަރަށް ބޮޑަށް ޝުކުރިއްޔާ. ޢީދު މުބާރަކް އިނގޭތޯ.
ޕްރެޒެންޓަރ:
އިރާދަކުރެއްވިއްޔާ ޢީދުގެ ފަހުން އަނެއްކާވެސް އަޅުގަނޑުމެން ބައްދަލުކޮށްލަން ދޮގެއްތޯ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު:
އާދެ، ދެން ބައްދަލުވާ ދުވަހު އިރާދަކުރެއްވިއްޔާ، ކޮންމެވެސް އެހެން ދާއިރާއަކަށް އަލިއަޅުވާލަން ގަސްދުކުރަން އިނގޭތޯ. ޝުކުރިއްޔާ.
ޕްރެޒެންޓަރ:
އާދެ، ޝުކުރިއްޔާ އިނގޭތޯ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.