بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ނިލަންދޫގެ ކައުންސިލްގެ ރައީސް އަދި ކައުންސިލަރުން، ޑަބްލިޔު.ޑީ.ސީ.ގެ މެންބަރުން، ނިލަންދޫގެ މުއައްސަސާތަކުގެ ވެރިން، މި ދާއިރާގެ ޢިއްޒަތްތެރި މަޖިލިސް މެންބަރު، ދައުލަތުގެ ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، އެންމެ ޚާއްޞަކޮށް، މި ރަށުގެ ލޮބުވެތި އަޚުންނާއި އުޚުތުން، އަދި މި ޖަލްސާ ބައްލަވަމުން އަދި އަޑުއައްސަވަމުން ގެންދަވާ ލޮބުވެތި ދިވެހި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މި ރަށަށް އަޅުގަނޑުމެންނަށް އާދެވުމުން، ތިޔަބޭފުޅުން ތިޔަ ވިދާޅުވި ހޫނު މަރުޙަބާއަށްޓަކައި، އަޅުގަނޑާއި އަޅުގަނޑާ އެކުގައި ވަޑައިގެންނެވި ހުރިހާ ބޭފުޅުންގެ ނަންފުޅުގައި ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
އާދެ، މި ރަށުގެ ތަރައްޤީއަށް ކުރަންހުރި ކަންކަމުގައި، އިރާދަކުރެއްވިއްޔާ އަޅުގަނޑުމެން ވަރަށް ސަމާލުކަންދީގެން، ޙަޤީޤީ ކުލަ ޖައްސައިދޭނަން. އެކިއެކި ދާއިރާތަކުން، ޢުމްރާނީ ތަރައްޤީގެ ގޮތުން، އިޖުތިމާޢީ ތަރައްޤީގެ ގޮތުން ގިނަގުނަ ކަންތައްތަކެއް، ނިލަންދޫގެ ރައްޔިތުން އުންމީދުކުރޭ. އަޅުގަނޑު ކެމްޕެއިން ތެރޭގައިވެސް، މީގެތެރެއިން، ބައެއް ކަންކަމުގައި ކުރިއަށްދާނެ ވާހަކަ ވަޢުދުވެފައި ވާނެ.
އާދެ، ކައުންސިލްގެ ފަރާތުން ދެންމެ އެ ފާހަގަކުރެއްވި ކަންތައް އަދި ކަންތައްތައް އަދި ޢިއްޒަތްތެރި މަޖިލިސް މެންބަރުވެސް ފާހަގަކުރެއްވި ކަންތައްތައް އެއީ، މި ރަށާއި، މި ދާއިރާގެ ތަރައްޤީއަށް ތިޔަބޭފުޅުންގެ އުންމީދުތައް ހުރިގޮތް. އާދެ، އިރާދަކުރެއްވިއްޔާ އަޅުގަނޑުގެ މަސައްކަތަކަށް ވާނީ، ސަރުކާރުގެ އަމާޒަކަށް ވާނީ، ރައްޔިތުން އެދޭގޮތަށް ކަންތައްތައް ފަހިކޮށްދީ، އެކަންކަން ހާސިލުކޮށްދިނުން.
އެގޮތުން ބަލާއިރުގައި، މި ރަށުގެ ބަނދަރަށް ތަރައްޤީ ގެނެސްދިނުން. ބަނދަރު އިތުރަށް ފުރިހަމަކުރުމަކީ، ތިޔަބޭފުޅުންގެ ވަރަށް މުހިންމު ކަމެއްގޮތުގައި އޮތް ކަމެއް. އާދެ، އިރާދަކުރެއްވިއްޔާ އަޅުގަނޑުމެން އެކަން ތިޔަބޭފުޅުންނަށްޓަކައި، ތިޔަބޭފުޅުން ތިޔަ އުންމީދުކުރައްވާ ގޮތަށް ކޮށްދޭނަން. އެ ޔަޤީންކަން ދެން.
މި ރަށުގެ ދަނޑުވެރިންނާއި އަދި ޖުމްލަކޮށް އަދި މި ރަށުގެ ރައްޔިތުންގެ ޖުމްލަ މަސައްކަތުގައި އަދި ދިރިއުޅުމުގައި ވަރަށް މުހިންމު، ރަށުގެ ޙިމާޔަތްކަން. ރަށް ގިރުމުގެ މައްސަލައަށް ޙައްލެއް ގެނެސްދިނުން. އަދި ރަށުގައި އެކިއެކި މަސައްކަތްތައް ކުރުމުގައިވެސް ގިރާ ސަރަޙައްދު ޙިމާޔަތްކުރުމަކީ ވަރަށް މުހިންމު ކަމެއް. މި މަޝްރޫޢާއި، އަދިވެސް ވަރަށް މުހިންމު ކަންތައްތައް ހިނގަމުން ގޮސް، ނުނިމިހުރި މަޝްރޫޢުތައްވެސް. ފެނާއި ނަރުދަމާގެ މަސައްކަތްވެސް އެއޮތީ ނުނިމި. އެ މަޝްރޫޢާއި އަދިވެސް އޭގެއިތުރަށް، ކުޅިވަރުގެ ވަސީލަތްތައް ޤާއިމުކުރުން. ވަކިން ޚާއްޞަކޮށް، ފުޓްސަލް ދަނޑު އަޅައިދިނުން. މިކަންކަންވެސް އިރާދަކުރެއްވިއްޔާ ވަރަށް އިސްކަންދީގެން ކޮށްދޭނަން. އެ ޔަޤީންކަން ދެން.
އެހެންވީމާ، ކުޅިވަރުގެ މި ދެންނެވި މަޝްރޫޢުތަކުގެ ތެރެއިން ފުޓްސަލް ދަނޑުގެ މައްސަލަ، އެންމެ އަވަސްގޮތެއްގައި ޙައްލުކުރުމަށް އަޅުގަނޑުމެން ކަންތައްތައް ފަހިކޮށްދޭނަން. ކޮށްދީ، އެކަން ފުޓްސަލް ކުޅޭ ޒުވާނުންނަށްޓަކައި ކޮށްދޭނަން.
މި ސްކޫލްގެ ކުރިއެރުމަށްވެސް މުހިންމު ކަންތައްތައް ކުރަން އެބަހުރި. މަލްޓިޕާރޕަސް ހޯލެއް އަޅައިދޭނެ ކަމަށް އަޅުގަނޑު ކެމްޕެއިން ތެރޭގައި ވަޢުދުވިން. އެ ވަޢުދުމަތިން ވަރަށް ރަނގަޅަށް ހަނދާން އެބަހުރި. އެހެންވީމާ، އެ ވަޢުދު އިރާދަކުރެއްވިއްޔާ އަޅުގަނޑު ވީގޮތަށް ފުއްދައިދޭނަން. އެ ޔަޤީންކަން ދެން.
އާދެ، ދެންމެ ކައުންސިލްގެ ރައީސް އެ ފާހަގަކުރެއްވި ފަދައިން، ދަނޑުވެރިންގެ ޕްރޮޑަކްޓްސް ވިއްކުމަށްޓަކައި ކަންތައްތައް ހަމަޖައްސައިދިނުމަކީ، ތިޔަބޭފުޅުން ވަރަށް އެދިވަޑައިގަންނަވާ ކަމެއް. އެގްރޯނެޓްގެ މެކޭނިޒަމްގެ ތެރެއިން، ނުވަތަ އެނޫންގޮތަކުންވިޔަސް، ރަމަޟާން މަސް އަންނަންވާއިރަށް ރަނގަޅު ޙައްލެއް ހޯދައިދިނުމަކީ، ތިޔަބޭފުޅުން ވަރަށް އެދިވަޑައިގަންނަވާ ކަމެއް. އަދި ޖުމްލަކޮށްވެސް ދާއިމީ ޙައްލެއް އެކަމަށް ލިބެންޖެހޭ.
އާދެ، އަޅުގަނޑުމެން އެގްރޯނެޓް ކުންފުންޏެއް އުވައެއްނުލަން. އެއީ، ކޮންމެވެސްވަރަކަށް ބައެއް މީހުން އެކަމުގައި ޙަޤީޤަތަކަށް ނޫން ވާހަކަ ދައްކަމުން އެ ގެންދަނީ. އެގްރޯނެޓް، އަޅުގަނޑުމެން އެސް.ޓީ.އޯ.އާ އެކީގައި އުފައްދާފައި އޮތް ކުންފުންޏެއް އޮންނާނެ. މޯލްޑިވްސް އިންޑަސްޓްރިއަލް ޑިވެލޮޕްމަންޓް ޒޯން، ފްރީ ޒޯން ކިޔާ ކުންފުންޏެއް. ސަރުކާރުގެ 100 ޕަސެންޓް ހިއްސާވާ ކުންފުންޏެއް. އެ ކުންފުނިން ހިންގާ ކުންފުންޏެއްގެ ގޮތުގައި، ސަބްސިޑަރީ ކުންފުންޏެއް ގޮތަށް މި ބަދަލުކުރީ. އެހެންވީމާ، އެގްރޯނެޓެއް ނުއުވޭ. އެގްރޯނެޓް އޮންނާނެ. އެހެންވީމާ، އެގްރޯނެޓްގެ އެ މަސައްކަތް ހިންގާގޮތް ހަރުދަނާކުރުމަށްޓަކައި، ބޮޑަށް ސްޓްރީމްލައިންކޮށް، އިތުރަށް ފުޅާކުރުމަށް އަޅުގަނޑުމެން ނިންމީ.
އެހެންވީމާ، އެގްރޯނެޓުގެ ތެރެއިން، ނޫނީވިއްޔާ އެ ނިޒާމުގެ ތެރެއިން ރާއްޖޭގައި ދަނޑުވެރިކަން ފުޅާކުރުމަކީ، އަޅުގަނޑުމެންގެ ވަރަށް މުހިންމު ސިޔާސަތެއް. ދަނޑުވެރިކަމަކީ މި ރާއްޖޭގެ އިޤްތިޞާދު ޑައިވަރސިފައި ކުރުމަށް ބަލާއިރުގައި، އަޅުގަނޑުމެން ވަރަށް ބޮޑަށް ސަމާލުކަން ދޭ ދާއިރާއެއް. އެހެންވީމާ، އެކަން މިހާރަށްވުރެ މާބޮޑުތަނުން ރަނގަޅުކުރުން އަޅުގަނޑުމެންގެ ވިސްނުމަކީ.
ރާއްޖޭގައި އެކި ކަންކޮޅުތަކުގައި، ރާއްޖެއަށް ބޭނުންވާވަރަށް ރާއްޖޭގައި އުފެއްދޭ ކާބޯތަކެތީގެ ބާވަތްތައް އުފެއްދުމަށް ޚާއްޞަ މަސައްކަތްތަކެއްވެސް ސަރުކާރުން މިވަނީ ފަށާފައި. އޭގެ އިންވެސްޓްމަންޓްތަކަށް ފުރުޞަތުދީ، އެކަހަލަ އިންވެސްޓްމަންޓްތައް ރާއްޖޭގައި ޤާއިމުކުރުމަށް ވަރަށް ބާރަށް އެބަ މަސައްކަތްތަކެއް ކުރަން.
އެހެންވީމާ، ދަނޑުވެރިންނަށް އޮތީ އުފާފާގަތިކަން ރާއްޖޭގައި. ދަނޑުވެރިކަމުގެ ޞިނާޢަތް މިއަދާ ހަމައަށް އޮތް ހިސާބަށްވުރެ އެތައް ގުނައަކުން ރަނގަޅުކޮށް، ދަނޑުވެރިކަން އެއީ، ރާއްޖޭގައި ވަރަށް ރަނގަޅަށް ހިންގޭ، ފުޅާކުރެވޭ ޞިނާޢަތަކަށް ހެދުން އެއީ، އަޅުގަނޑުމެންގެ މައިގަނޑު ސިޔާސަތެއް. އެހެންވީމާ، އާންމުކޮށް އޮންނަގޮތާ ތަފާތުކޮށް، ދަނޑުވެރިކަމަށް ޚާޢްޞަކޮށް މަސައްކަތްކުރަން ސަރުކާރުގެ ވުޒާރާއެއްވެސް އެވަނީ ޚާއްޞަކުރެވިފައި. އެ ވުޒާރާއިން އެދަނީ އެ މަސައްކަތްތަކުގައި އަވަދިނެތި ވަރަށް ބާރަށް މަސައްކަތްކުރަމުން.
އެހެންވީމާ، މި ރަށުގެ ދަނޑުވެރިންނަށްވެސް އަޅުގަނޑު ދޭން ބޭނުންވަނީ އެ ޔަޤީންކަން. އަދި ރާއްޖޭގައި ދަނޑުވެރިކަމުގައި މަސައްކަތްކުރާ ހުރިހާ ފަރާތްތަކަށްވެސް އެ ޔަޤީންކަން އަޅުގަނޑު ދެން. އާދެ، އެހެންވީމާ، ދަނޑުވެރިންނަށް މި ޔަޤީންކަން އަޅުގަނޑު ޖުމްލަގޮތެއްގައި އަރުވަން.
އާދެ، ހަމަ އެއާއެކީގައި، ދެންވެސް ހުރި މުހިންމު ކަންކަން، މި ރަށުގެ ތަރައްޤީއަށް ހުރި ކަންކަމުގައި. ޞިއްޙީ މަރުކަޒުގެ ފެންވަރު ރަނގަޅުކޮށް، ޚިދުމަތް ދޭ ގަޑި އިތުރުކުރުމަކީ، ރައްޔިތުން އެދޭ ކަމެއްވީމަ، އެކަމަށް ކުރެވެން ހުރި ކަންކަން ބަލައި، ޞިއްޙީ ވުޒާރާގެ ފަރާތުން ކައުންސިލާ ގުޅިގެން އެކަމަށް މަސައްކަތްކުރަމުން ދާނެ. އަޅުގަނޑުމެން ވަރަށް އިސްކަމެއް ދެން، ޞިއްޙީ ދާއިރާއަށް. ރަށްރަށުގައި، އެ ރަށެއްގެ އާބާދީއާ އެންމެ އެކަށީގެންވާ ފެންވަރަކަށް، ރަށުގައި މަސައްކަތްކުރާ ފަރާތްތަކަށް، ރަށަށް ޒިޔާރަތްކުރާ ފަރާތްތަކަށް އެކަށީގެންވާ ޚިދުމަތްތަކެއް ދެވޭ ތަނަކަށް، އެ ރަށެއްގައި ހުންނަ ޞިއްޙީ މަރުކަޒު، ނޫނީވިއްޔާ ހޮސްޕިޓަލް ވިޔަސް، އެ ހުންނަ ނިޒާމެއް ރަނގަޅުކޮށް، ފެންވަރު ރަނގަޅުކުރުމަށް. އެހެންވީމާ، އެ ދާއިރާއަށްވެސް ކުރިއެރުން ގެނެސްދޭނަން.
އާދެ، އެހެންވީމާ، ޖުމްލަކޮށް ހުރިހާ ދާއިރާއަކުން މި ރަށުގެ ތަރައްޤީއަށް މި ބޭނުންވާ ކަންކަމުގައި އިރާދަކުރެއްވިއްޔާ، މި އަހަރުގެ ތެރޭގައި ގިނަ ކަންތައްތަކެއް ފެށި، އަދި ފެށިފައި، ނުނިމިހުރި ކަންކަން ނިންމަމުން ދާނަން. އަދި ދެންހުރި ކަންކަންވެސް މި އަހަރާއި، މި އަންނަ އަހަރު ތެރެޔަށް ބަހާލެވިގެން ފަށައިދީ، ނިންމަމުން ދާނަން. އެހެންވީމާ، އެ ޔަޤީންކަން ތިޔަބޭފުޅުންނަށް އަޅުގަނޑު އަރުވަން.
އާދެ، އެ ޔަޤީންކަމާ އެކުގައި އަޅުގަނޑު ނިންމާލާނަން.
ތިޔަބޭފުޅުން ތިޔަ ބަހައްޓަވާ ގާތްކަމާއި، ދެއްވާ މެހްމާންދާރީއަށް އަދިވެސް އެއްފަހަރު ވަރަށް ބޮޑަށް ޝުކުރު ދަންނަވަން. ނިލަންދޫގެ ތަރައްޤީއަށް އިރާދަކުރެއްވިއްޔާ، ކުރިއަށް އޮތީ ޢަމަލީގޮތުން ޙަޤީޤީ މާނައިގައި ތިޔަބޭފުޅުންގެ އުންމީދުތަކުގައި ކުލަޖެހިގެން ދިޔުން. އިރާދަކުރެއްވިއްޔާ އެކަން ހާސިލުކޮށްދޭނަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވެވުން. އަޅުގަނޑުމެންގެ ޤައުމު ތަރައްޤީ ކުރުމުގައި، އަޅުގަނޑުމެން މި ކުރާ މަސައްކަތްތައް ކާމިޔާބުވެގެން ދިޔުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.