بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ކަނޑުހުޅުދޫގެ ކައުންސިލްގެ ރައީސާއި، ކައުންސިލަރުން، ޑަބްލިޔު.ޑީ.ސީ.ގެ އެންމެހައި މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، އަދި ރައްޔިތުންގެ މަޖިލީހުގެ ޢިއްޒަތްތެރި މެންބަރުންނާއި، ކުންފުނިތަކުގެ ވެރިން، ވަކިން ޚާއްޞަކޮށް، ކަނޑުހުޅުދޫގެ ލޮބުވެތި އެންމެހައި އަޚުންނާއި އުޚުތުން، އަދި މި ޖަލްސާ ބައްލަވަމުން، އަޑުއައްސަވަމުން ގެންދަވާ ލޮބުވެތި ދިވެހި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ ހުވަދުއަތޮޅަށް އަޅުގަނޑުމެން މި ކުރާ ދަތުރުގައި މި ރަށަށް މި އާދެވުނީ، މެންދުރު ގަޑީގައި. ވަރަށް ހޫނުގަދަ ވަގުތެއްގައި. ނަމަވެސް، ތިޔަބޭފުޅުން ހަމަ އެ ހޫނުގައި ނުކުމެވަޑައިގެން، ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން.
އާދެ، ރަށުގެ ތަރައްޤީއަށް ކުރަންހުރި ކަންކަމުގައި، ރަނގަޅު، އުފާވެރި، ޔަޤީން ޚަބަރު ދިނުން، އަޅުގަނޑުގެ ދަތުރުގެ ބޭނުމަކީ. އާދެ، މި ފެށިގެންމިދާ އަހަރަކީ، ތިޔަބޭފުޅުންގެ މިހުރި ގިނަ މައްސަލަތަކަށް، އިރާދަކުރެއްވިއްޔާ ދާއިމީ ގޮތެއްގައި ރަނގަޅު ހައްލު ގެނެސްދޭނެ އަހަރުކަމުގައި އަޅުގަނޑު ތިޔަބޭފުޅުންނަށް ދަންނަވަން.
މިގޮތުން ބަލާއިރު، ދެންމެ ކައުންސިލްގެ ފަރާތުން އެ ފާހަގަކުރެއްވި ކަންތައް، އަދި ހަމަ އިރުކޮޅެއް ކުރިން ކައުންސިލްގެ ބޭފުޅުންނާ އެކީގައި ބޭއްވި ބައްދަލުވުމުގައިވެސް ފާހަގަކުރެއްވި ކަންތައްތައް އެއީ، އަޅުގަނޑުމެން އިސްކަންދޭނެ ކަންތައްތައް.
މީގެތެރެއިން ބައެއް ކަންކަމަކީ، ރިޔާސީ އިންތިޚާބުގެ ތެރޭގައި، އަޅުގަނޑު ތިޔަބޭފުޅުންނަށް ވަޢުދުވި ގޮތުގައި، ވެފައިވެސްވާ ކަންތައްތަކެއް.
އާދެ، ބަނދަރުގެ މައްސަލައަކީ، ބަނދަރުގެ ޖާގަ ކުޑަވުމުގެ މައްސަލައަކީ، ރަށަށް ވަރަށް މުހިންމު މައްސަލައެއް. އެހެންވީމާ، މި މައްސަލައަށް ހައްލެއް ގެނެސްދިނުމަށް އަޅުގަނޑުމެން ސަރުކާރުގެ ބަޖެޓުގެ ތެރެއިން، ޢަމަލީގޮތުން އެ މަސައްކަތް ފަށައިދީ، އެ މައްސަލަ ހައްލުކޮށްދޭނެ ކަމުގެ ޔަޤީންކަން އަޅުގަނޑު ދެން. އާދެ، އެހެންވީމާ، ކައުންސިލާއި، މިނިސްޓްރީއާ މަޝްވަރާ ކުރެވިގެން، އެކަމުގައި ކައުންސިލުން ބޭނުންވާ ގޮތަށް، ބަނދަރުގެ މައްސަލަ އަޅުގަނޑުމެން އިރާދަކުރެއްވިއްޔާ ހައްލުކޮށްދޭނަން.
އަޅުގަނޑުމެން މި ޖަލްސާ ކުރާ ހޯލު، އާދެ، މިރަށުގެ ސްކޫލްގެ ޖާގައިގެ ދަތިކަން، ހޯލުގެ މަސައްކަތް ނުހިނގާ، ލަސްވެގެންދާ މައްސަލަ ހައްލުކޮށް، އަދި ކްލާސްރޫމްގެ ޖާގަ އިތުރުކުރުމާއި، ޖުމްލަކޮށް، ސްކޫލްގެ ކެޕޭސިޓީ އިތުރުކުރުން. ސްކޫލަށް މަލްޓިޕަރޕަސް ހޯލާއި، އަދި އަޅަމުންދާ ކުލާސްރޫމްތަކުގެ އިތުރަށްވެސް، އަޅުގަނޑު ގަބޫލުކުރަނީ މި ރަށުގައި، މި ސްކޫލްގައި އަދި އިތުރު ކުލާސްރޫމްތައް އެޅުމަކީ ކުރަންޖެހޭ ކަމެކޭ.
އެހެންވީމާ، މިހާރު މަސައްކަތް ކުރެވެމުންދާ މަޝްރޫޢުގެ ސްކޯޕްގެ އިތުރަށްވެސް، ކުލާސްރޫމްތައް ހިމަނައިގެން، މި ރަށުގައި ކުލާސްރޫމާއި، އަދި މަލްޓިޕަރޕަސް ހޯލް ނިންމައިދޭނެ ވާހަކަ، މި ސްކޫލްގައި ނިންމައިދޭނެ ވާހަކަ އަޅުގަނޑު ދަންނަވަން.
އާދެ، ހަމައެއާއެކީގައި، ޞިއްޙީ ދާއިރާ. މި އަހަރުގެ ބަޖެޓުގައި އެންމެ އިސްކަމެއް މި ދެނީ، ތަޢުލީމީ ދާއިރާއާއި، ޞިއްޙީ ދާއިރާ، ދެވަނައަށް އެންމެ އިސްކަމެއްދޭ ކަމެއްގެ ގޮތުގައި. އެންމެ އިސްކަންދެނީ ބޯހިޔާވަހިކަމުގެ މައްސަލައަށް. އެއަށް އަދި ފަހުން ދާނަން.
އާދެ، ޞިއްޙީ މަރުކަޒަށް ދިމާވެފައިވާ އެކި ކަހަލަ ކަންތައްތައް، ކުދިކުދި ކަންކަމުން ގޮސް، ތަންކޮޅެއް މުހިންމު ކަންތައްތައްވެސް އެބަހުރި. އަޅުގަނޑު ވަޢުދުވެސް ވެފައި ވާނެ، 24 ގަޑިއިރު ޚިދުމަތްދެވޭ ފެންވަރަށް ކުރަންޖެހޭ ހުރިހާ ކަމެއް ކުރާނެ ވާހަކަ. އެހެންވީމާ، އެ ވަޢުދު ފުއްދުމުގެ ތެރެއިންނާވެސް އެކީގައި، އަޅުގަނޑުމެން، އިރާދަކުރެއްވިއްޔާ ޞިއްޙީ މަރުކަޒުން އެދިވަޑައިގެންފައިވާ ކަންތައްތަކަށް، އިޖާބަދީ، މި އަހަރުގެ ތެރޭގައި މިކަންކަމަށް ރަނގަޅު ނަތީޖާއެއް ނެރެދޭނަން. އިރާދަކުރެއްވިއްޔާ، އަޅުގަނޑު ވަޢުދުވެފައިވާ ގޮތަށް، ޞިއްޙީ މަރުކަޒުން 24 ގަޑިއިރު ޚިދުމަތް ދިނުމަށް ކުރަންޖެހޭ ހުރިހާ ކަމެއް ހިމެނޭގޮތަށް، އެކަން ފުއްދައިދޭނަން.
މިއަދު މިތަނުގައި އަޅުގަނޑުގެ ވާހަކަ ނިމުނީމާ، އިރާދަކުރެއްވިއްޔާ އޭ.ޓީ.އެމް.ގެ މަސައްކަތް، ކައުންސިލާ ހަވާލުކޮށްގެން ފެށިގެންދާނެ.
އާދެ، އަދި ހަމައެއާއެކީގައި، ވަރަށް ގިނަ އެހެން ކަންކަންވެސް ރަށުގައި އެބަހުރި ކުރިއަށް ގެންދަން. ކުޅިވަރުގެ ދާއިރާ، އާދެ، މިގޮތުން ބަލާއިރުގައި މުހިންމު ދާއިރާއެއް. ފުޓްސަލް ދަނޑުގެ ފެންސު ޖެހުމާ އެކީގައި، ކުޅިވަރު ބަލަން ތިބޭނެ ރޮސްޓްރަމް ޖާގައާއި، ފުޓްބޯޅަ ދަނޑުގެ ޓާރފް ބަދަލުކޮށް، އެތުލެޓިކްސްއަށް ބޭނުންކުރެވޭ ގޮތަށް ތަރައްޤީކުރުމާއި، މިކަންކަމަކީ، ތިޔަބޭފުޅުންނަށް، ކުޅިވަރުގެ ދާއިރާގައި މަސައްކަތްކުރާ މި ރަށުގެ ޒުވާނުންނަށް ވަރަށް މުހިންމު ކަމެއް. އެހެންވީމާ، އަޅުގަނޑު ޔަޤީންކަން ދެން، އިރާދަކުރެއްވިއްޔާ، މި އަހަރުގެ ތެރޭގައި، އެކަންކަން އެގޮތުގައި ފުރިހަމަކޮށްދޭނެކަމުގެ.
އާދެ، ބިން އިތުރުކުރެވިގެން، އިތުރަށް ހައުސިންގ ޔުނިޓް އެޅޭނީވެސް. މި އަހަރުގެ ތެރޭގައި ފެށޭނެ ކަމަކަށް ގަބޫލެއްނުކުރެވޭ، ބިން ހިއްކުމުގެ މަޝްރޫޢެއް. އެހެންނަމަވެސް، މި އަންނަ އަހަރުގެ ބަޖެޓުގެ ތެރެއިން، ބިން ހިއްކުމުގެ މަޝްރޫޢެއް ހިންގައިދޭނަން އިރާދަކުރެއްވިއްޔާ. ހިންގައި، އަދި ބިން ހިއްކައި ނިމުނީމާ، މި އަންނަ އަހަރު ނުވާކަމަށްވަންޏާ، ދެން ޖެހިގެން އަންނަ އަހަރު އެންމެ ލަސްވެގެން ރޯހައުސްގެ ހައުސިންގ މަޝްރޫޢެއް ހިންގައިދޭނަން. މިކަންކަން ކުރެވޭނެ ގޮތަށް އަޅުގަނޑު ދަންނަވާނީ. މި އަހަރު ނުކުރެވޭނެ ކަމަށްވާތީ، ބިން ހިއްކުން މި އަންނަ އަހަރޭ އަޅުގަނޑު މި ދެންނެވީ.
އާދެ، އެހެންވީމާ، ޖުމްލަކޮށް ތިޔަބޭފުޅުންގެ ކަންބޮޑުވުންތަކުގައި ހުރި ވަރަށް ގިނަ ކަންކަން މީގެ ތެރެއިން އެބަ ހައްލުވޭ. ކައުންސިލުން ފާހަގަކުރެއްވި، ޞިއްޙީ މަރުކަޒުން ފާހަގަކުރެއްވި، ސީ އެމްބިއުލަންސްގެ ދަތިކަމުގެ ވާހަކަވެސް. އަޅުގަނޑު މާލެ ގޮސްފައި، މިކަމާ ބެހޭގޮތުން އިށީންނާނަން، ކަމާބެހޭ ފަރާތްތަކާ އެކީގައި. މި ރަށާއި އަދި ޖުމްލަކޮށް، އަޅުގަނޑު ހިތުން ރާއްޖޭގެ އެކި ކަންކޮޅުތަކުގައި، މިހާރަށްވުރެ ޚިދުމަތް ރަނގަޅުކުރަން ޖެހިފައި އޮތް ކަމެއް އެއީ. އެހެންވީމާ، އެކަމަށް ރަނގަޅު ހައްލެއް ގެނައުމަށް އަޅުގަނޑު މަސައްކަތް ފަށާނަން.
އާދެ، އެހެންވީމާ، ޖުމްލަކޮށް މިހިރަ ހުރިހާ ކަމަކީ، އިރާދަކުރެއްވިއްޔާ މި ރަށުގައި ހައްލުކޮށްދޭނެ ކަންތައްތައް.
އަޅުގަނޑު މި ދަތުރުތައް މިކުރަނީ، މިކަންކަން ކޮށްދޭނެ ވާހަކަ، ރައްޔިތުންނަށް މުހިންމުވެފައިވާ ކަންކަން ވަރަށް އިސްކަންދީގެން، މިއަހަރުގެ ތެރޭގައި ހިނގައިގަންނާނެ ވާހަކަ، އަދި ނިމެމުންދާނެ ވާހަކަ ދަންނަވަންވެގެން. އަދި ތިޔަބޭފުޅުން ވިދާޅުވާން ހުރި ކަންކަންވެސް އަޅުގަނޑު ގާތުގައި ތަންކޮޅެއް ގާތުން މިހެން ބައްދަލުވެލައިގެން ދައްކައިލުމުގެ ފުރުޞަތު ދިނުމަށްޓަކައި. އަދި އަޑުއަހަންވެސް އަޅުގަނޑު ބޭނުންވާތީ.
އާދެ، އެހެންވީމާ، މި ރަށުގެ ރައްޔިތުންނަށް، ކަނޑުހުޅުދޫގެ ތަރައްޤީއަށް މި ބޭނުންވާ ކަންކަން، މި ދެންނެވި ގޮތަށް އިރާދަކުރެއްވިއްޔާ އަޅުގަނޑުމެން ކޮށްދޭނަން. އަދި އޭގެ ފުރިހަމަ އުފާވެރިކަން ތިޔަބޭފުޅުންނަށް އިރާދަކުރެއްވިއްޔާ ލިބެމުންދާނެ، އޭގެ ނަތީޖާއެއްގެ ގޮތުން.
އަޅުގަނޑު ހަމަ ކުރުކޮށްލާނަން މިހިސާބުން.
އަޅުގަނޑުގެ ދުޢާއަކީ، ތިޔަބޭފުޅުންގެ އުންމީދުތަކުގައި ކުލަޖެހިގެން ދިޔުން. އަދި އަޅުގަނޑުމެން މިކުރާ މަސައްކަތްތަކުގައި ކާމިޔާބީ މިންވަރު ކުރެއްވުން. އޭގެ ނަތީޖާއެއްގެ ގޮތުން، އަޅުގަނޑުމެންގެ މި ޤައުމު އަޅުގަނޑުމެން މި އެދޭގޮތުގައި، ވަށައިޖެހޭ ތަރައްޤީއެއް ލިބިގެންދިޔުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.