بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ފިޔޯރީގެ ކައުންސިލްގެ ރައީސާއި، ކައުންސިލްގެ މެންބަރުންނާއި، ޑަބްލިއު.ޑީ.ސީ. މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލީހުގެ މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، ޚާއްޞަކޮށް މި ރަށުގެ ލޮބުވެތި ރައްޔިތުން، އަދި މި ޖަލްސާ ދުރާއިގާތުން ބައްލަވާ އަދި އަޑުއައްސަވަމުން ގެންދަވާ ދިވެހި ހުރިހާ ލޮބުވެތި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދުގެ ވަރަށް ހަވީރުގެ ވަގުތެއްގައި ފިޔޯރީއަށް އަޅުގަނޑުމެންނަށް އާދެވުނީ. އެ ވަގުތު މި ރަށުގެ ލޮބުވެތި ރައްޔިތުން ނުކުމެވަޑައިގެން އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި ހިތުގެ އެންމެ ފުންމިނުން ތިޔަ ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
އާދެ ކުރިން އާދެވުނު ފަހަރު، މިފަދަ ބައްދަލުވުމެއް ނުބޭއްވޭ. އެހެންނަމަވެސް، މިފަހަރު މިގޮތަށް ވަރަށް ހިތްގައިމު މާހައުލެއްގައި ތިޔަ ލޮބުވެތި ހުރިހާ ރައްޔިތުން ވަޑައިގެން، މިބައްދަލުވުން ބޭއްވޭ ކަމަށްޓަކައި ވަރަށް ބޮޑަށް އުފާކުރަން.
އާދެ، މި ރަށުގެ ރައްޔިތުންނަކީ މަސައްކަތަށް ވަރަށް ލޯބިކުރާ، ވަރަށް ހީވާގި ރައްޔިތުންތަކެއް. މަސްވެރިކަމަކީ މި ރަށަށް، މި ސަރަހައްދުގެ އަދި މިއަތޮޅުގެވެސް އެންމެ މުހިންމު ޞިނާޢަތް. އެހެންވީމާ، މި ރަށުގެ ތަރައްޤީއަށް ކަމެއް ކުރާ ކަމުގައިވާނަމަ، އެންމެ މުހިންމުވާނީ ހަމަ ޔަގީނުންވެސް މަސްވެރިކަމުގެ ޞިނާޢަތަށް ކަމެއް ކޮށްދިނުން. އެހެންވީމާ، އެގޮތުން އަޅުގަނޑު ކެމްޕެއިން ތެރޭގައި ވީ ވަޢުދެއް ވެފައި ވާނީ.
އާދެ، އެއީ، މަސްކިރާ ކާރުޚާނާ ނުވަތަ ފެކްޓްރީއެއް ޤާއިމުކުރުމުގެ ވަޢުދު. އަޅުގަނޑު އެއްވެސް ރަށެއްގައި ކެމްޕެއިން ތެރޭގައި އަދި ފަހުންވެސް އަދި ފޮތުގައި ލިޔެ، މެނިފެސްޓޯގައި ވިޔަސް، ވަޢުދެއްނުވަން އެކަން ފުއްދުމުގެ ނިޔަތުގައި ނޫނީ. އަދި ފުއްދޭނެ ކަމުގެ ފުރިހަމަ ޔަޤީންކަން އޮވެގެން ނޫނީ. އެއީ، އަޅުގަނޑު ޤަބޫލުކުރާ ގޮތުގައި، އަޅުގަނޑު ވާ ކޮންމެ ވަޢުދެއް ޖެހޭނެ ފުއްދަން. އެއީ، ތެދުވެރިކަމާއި އަމާނާތްތެރިކަމާ އެކީގައި އަޅުގަނޑު ކުރަންޖެހޭނެ ކަމެއް.
އެހެންވީމާ، މި ރަށުގެ ރައްޔިތުންނަށްޓަކައި އަޅުގަނޑު ވީ ވަޢުދު ފުއްދުމަކީ އަޅުގަނޑު ކުރާނެ ކަމެއް. އެގޮތުން ބަލާއިރުގައި، މި ރަށުގައި ޤާއިމުކުރުމަށް އަޅުގަނޑު ވަޢުދުވި ތިންހާސް ޓަނުގެ މަސްކިރާ ފެކްޓްރީގެ މަސައްކަތް ވަރަށް އަވަހަށް ފެށިގެންދާނެ. އާދެ، މި ފެކްޓްރީއަކީ ދުވާލަކު ސަތޭކަ ޓަނުގެ ދަޅުމަސް ބަންދުކުރާ ކެޕޭސީޓީ ހުންނަ ކާރުޚާނާއެއް. އަދި ތިންހާސް ޓަނުގެ މަސްފިނިކޮށް ރައްކާކުރެވޭ ކޯލްޑް ސްޓޯރޭޖަކާއެކު، ސަތޭކަ ޓަނުގެ ފިޝްމީލް ޕްލާންޓަކާއި، ފަންސާސް ޓަނުގެ އައިސް ޕްލާންޓެއް ހިމެނޭ ކާރުޚާނާއެއް. ޗައިނާގެ ކުންފުންޏަކާ އެކުގައި ސޮއިކުރެވި، މަސައްކަތް ފެށުމުގެ މަސައްކަތް މިކުރަނީ. ސޮއިކުރުމަށް މަސައްކަތް ކުރަނީ. ފައިނޭންސިންގ ކަންތައް ހަމަޖައްސައިގެން، އެކަން ކުރިއަށް ގެންދަން. މިހާރު ގޮސްފައިވާ ހިސާބުން އެންމެ ލަސްވެގެން އިރާދަކުރެއްވިއްޔާ، ފެބުރުވަރީ މަހުގެ ތެރޭގައި އެގްރީމަންޓުގައި ސޮއިކުރެވި، އަދި އެންމެ ގިނަވެގެން އޭގެ ދެމަސްދުވަހުގެ ތެރޭގައި، އޭގެ ފަހުން އެންމެ ގިނަވެގެން ދެމަސްދުވަހުގެ ތެރޭގައި ޢަމަލީ ގޮތުން ފެކްޓްރީގެ މަސައްކަތް މި ރަށުގައި ފެށޭނެ. މީގެ ނަތީޖާއަކަށް ވާނީ، ޚާއްޞަކޮށް މި އަތޮޅުގެ އަދި މި ސަރަޙައްދުގެ މަސްވެރިކަމަށް ވަރަށް ބޮޑު ކުރިއެރުމެއް ލިބިގެންދިއުން.
އާދެ، މަސްވެރިކަމުގެ ޞިނާޢަތަކީ އަޅުގަނޑުމެން އެންމެ އިސްކަންދޭ އެއް ޞިނާޢަތް. އަޅުގަނޑު އެންމެ ސަމާލުކަމެއްދޭ އެއް އިންޑަސްޓްރީ. ދިވެހިންގެ ލޭނާރު. ދިވެހި އެތައް ޢާއިލާއެއްގެ ދިރިއުޅުން ބިނާވެފައިވާ އިންޑަސްޓްރީ. އެތައް ސަރުކާރަކުން އެކި ވަޢުދުތައްވެ، އެކި އުއްމީދުތައް ދީ، އެކަންކަމުގައި ކުލަނުޖެހި ގޮސްފައިވާ ޞިނާޢަތް. އަޅުގަނޑު އެކަން ދެނެހުރެ، މަސްވެރިންގެ އަޑުއަހާ، ވަޢުދުތައްވީ. އިރާދަކުރެއްވިއްޔާ، މިއަދުގެ ޙާލަތަށް ބަލާއިރު އަޅުގަނޑުމެންނާ ހަވާލުވިއިރު ދޭންއޮތް ފައިސާއާއެކު އަދި މި ނިމިދިޔަ އަހަރު ދޭންޖެހޭ ހުރިހާ ފައިސާއަކާއެކު، ބެކްލޮގް އެއްކޮށް ޚަލާޞްކޮށް އަޅުގަނޑުމެން ނިންމައިފިން. އަދި ހަމައެއާއެކު ވަޢުދުވީ ގޮތަށް މަސްކިރާތާ 48 ގަޑިއިރުގެ ތެރޭގައި މިހާރު އެ ދަނީ ފައިސާ ދެމުން.
މިދިޔަ މަސްވެރިންގެ ދުވަހުން ފެށިގެން މެދުނުކެނޑި ކިތަންމެ ގިނަ މަހެއް ކިރިނަމަވެސް، އިރާދަކުރެއްވީތީ މިދަނީ ފައިސާ ދެމުން. އެކަން އެގޮތުގައި އަޅުގަނޑުމެން މިދަނީ ކުރަމުން. އަދި ކުރިއަށް އޮތް ތާނގައިވެސް މެދުނުކެނޑި އެގޮތަށް އަޅުގަނޑުމެން ފައިސާ ދޭނަން. އެއީ، އަޅުގަނޑަށް ލިބޭ ވަރަށް ބޮޑު އުފަލެއް. އެކަމުގައި ޝާމިލްވާ ހުރިހާ ފަރާތްތަކުން އެ ކޮށްދެއްވަނީ ވަރަށް ބުރަ މަސައްކަތެއް. މިފްކޯއާއި، ބޭންކް އޮފް މޯލްޑިވްސް، ފިޝަރީޒް މިނިސްޓްރީ، ފިނޭންސް މިނިސްޓްރީ، މި ފަރާތްތަކުން ގުޅިގެން މި ކުރެވެނީ ވަރަށް ވަރުގަދަ މަސައްކަތެއް. އެހެންވީމާ، އިރާދަކުރެއްވިއްޔާ، އެކަން އެގޮތުގައި ކުރިއަށްދާނެ.
އޭގެއިތުރަށްވެސް، އެ އިންޑަސްޓްރީ ކުރިއެރުވުމަށް ވަރަށް ގިނަ ކަންކަން ކުރަން އަޅުގަނޑުމެން ނިންމާފައި އޮންނާނެ. ތެލުގެ އަގު މަސްވެރިންނަށް ހެޔޮގޮތުގައި ހޯދައިދިނުމަށް، އެސް.ޓީ.އޯ.ގެ ރޭޓުގައި ތެޔޮ ލިބޭނެގޮތް، ކޮންމެ އަތޮޅެއްގައި ހަމަޖެއްސުމުގެ މަސައްކަތްވެސް އެއީ، ހަމަ އޭގެތެރެއިން ހިނގާ ކަމެއް. އަޅުގަނޑުމެން ވާނީ އެ ތާވަލު އިޢުލާނުކޮށްފައި. މި ފެށިގެން މިދާ އަހަރުގެ ތެރޭގައި، ކޮންމެ އަތޮޅެއްގައި މަދުވެގެން އެއްތަން ޤާއިމުކުރުމަށް ވަނީ ކަނޑައަޅާފައި.
އެއާއެކީގައި މުޅި އިންޑަސްޓްރީގެ ކުރިއެރުމަށްޓަކައި ގިނަ ކަންތައްތަކެއް އެވަނީ ކުރަން ފެށިފައި. މިފްކޯގެ ހިންގުން ރަނގަޅުކުރުމަށްޓަކައި އެ ކުންފުނި ހަރުދަނާކުރުމަށްޓަކައި ބޭކާރުގޮތުގައި ކުރެވޭ ޚަރަދުތަކާއި، މިސްމެނޭޖްމަންޓުގެ ތެރެއިން ދާ ކަންކަން ރަނގަޅުކުރުމާއި، މިފަދަ އެތައް ކަމެއް ރަނގަޅުކޮށް، ސްޓްރީމްލައިންކޮށް، އިންޑަސްޓްރީއަށް އެކަށޭނަގޮތެއްގައި ޚިދުމަތްދެވޭ ތަނަކަށް، އެ ކުންފުނި ހެދުމަށްޓަކައިވެސް، ގިނަގުނަ ރިފޯމް މަސައްކަތްތަކެއް އެވަނީ ފެށިފައި.
އެހެންވީމާ، މި ރަށުގައި ހުރެގެން މި ވާހަކަ ދައްކާއިރުގައި، މުޅި ރާއްޖޭގެ ހުރިހާ މަސްވެރިންނަށް އަޅުގަނޑު ދަންނަވާލާ ވާހަކަތަކެއް މި ދެންނެވީ. ކުރިއަށް އޮތް ދުވަސްތަކުގައިވެސް އިރާދަކުރެއްވިއްޔާ މަސްވެރިންގެ ޝަކުވާތައް، މަސްވެރިންގެ ކަންބޮޑުވުންތައް، މަސްވެރިންގެ ޚިޔާލުތައް އަޑުއަހައި، އަޅުގަނޑުމެން ވެފައިވާ ވަޢުދުތައް ފުއްދުމުގައި މަސްވެރިންނާ އެކުގައި އަޅުގަނޑުމެން ދާނީ ކުރިއަށް. ރާއްޖޭގެ ހުރިހާ ކަންކޮޅުތަކެއްގައި، އެގޮތުން ގާއިމުކުރަން އަޅުގަނޑުމެން ކަނޑައަޅާފައިވާ ފެކްޓްރީތަކާއި، މަސް ފިނިކުރާ ތަންތަނާއި އަދި ދޯނިތަކުގައި އާރު.އެސް.ޑަބްލިޔު. ފެސިލިޓީ ގާއިމުކޮށްދިނުމާ، މިހެން ގޮސް ހަމަ ވަރަށް ގިނަ ކަންތައްތައް ކުރިއަށްދާނެ.
އާދެ، މި ރަށުގެ ތަރައްޤީއަށްޓަކައި ދެންހުރި ކަންކަމަށް ބަލާއިރުގައިވެސް ހަމަ ވަރަށް ގިނަ ކަންކަން ކުރަން އެބަހުރި. ސްކޫލްގެ ހޯލު، އަލުން ޤާއިމުކުރުން ވަރަށް މުހިންމު. މަލްޓިޕާރޕަސް ހޯލެއް އިރާދަކުރެއްވިއްޔާ އަޅުގަނޑުމެން މި އަހަރުގެ ތެރޭގައި އަޅައިދޭނަން. އާދެ، އެއާއެކީގައި ސްކޫލަށް އިތުރު ކްލާސްރޫމްތައްވެސް އިތުރުކޮށްދޭނަން. އެހެންވީމާ، ސްކޫލަށް ބޭނުންވާ ކްލާސްރޫމްތަކާއި، ލެބާއި އަދި މަލްޓިޕާރޕަސް ހޯލް ހިމެނޭ މަޝްރޫޢު އިރާދަކުރެއްވިއްޔާ އަޅުގަނޑުމެން ކުރިއަށް ގެންގޮސްދޭނަން.
ހަމައެއާއެކީގައި، ކޮންމެ ރަށެއްގައި އޭ.ޓީ.އެމް.ގެ ޚިދުމަތް ގާއިމުކުރުމަކީ، އެއީ، އަޅުގަނޑު ވީ ވަޢުދެއް. އެ ވަޢުދު ފުއްދާނަން. އިރާދަކުރެއްވިއްޔާ އެކަން ވަނީ ފެށިފައި މިހާރު. ބީ.އެމް.އެލް.ގެ އޭ.ޓީ.އެމް. މެޝިންތައް، ރާއްޖޭގެ ހަމަ ކޮންމެ ރަށެއްގައި، މި އަހަރު ތެރޭގައި ބެހެއްޓިގެންދާނެ. އެގޮތުން، މި ރަށްވެސް އޭގެތެރޭގައ ހިމެނޭނެ. ހަމައެއާއެކީގައި، އިސްލާމިކް ބޭންކުންވެސް ބައެއް ރަށްތަކުގައި އޭ.ޓީ.އެމް. ބަހައްޓާނެ. އަދި ބައެއް ރަށްތަކުގައި ބޭންކުގެ ބްރާންޗްތައްވެސް ހެދިގެންދާނެ. އަދި ބައެއް ރަށްތަކުގައި ޑޮލަރު އޭ.ޓީ.އެމް. ތައްވެސް ބެހެއްޓޭނެ. އެހެންވީމާ، މި އަހަރު ވެގެންދާނީ ބޭންކިންގ ޚިދުމަތް ތިޔަބޭފުޅުންގެ ގާތުން ލިބޭނެގޮތް ޢަމަލީ ގޮތުން ފުރިހަމަކުރެވިގެންދާ އަހަރަކަށް. އެކަމުގެ އުފާވެރިކަން، މި ރަށުގެ ރައްޔިތުންނަށްވެސް ލިބިގެންދާ އަހަރަކަށް.
އާދެ، ހަމަ އެއާއެކީގައި، މި އަހަރަކީ ޞިއްޙީ ދާއިރާއަށްވެސް އަޅުގަނޑުމެން ވަރަށް ގިނަ ޚިދުމަތްތަކެއް ކުރަން ބަޖެޓުގައި ކަނޑައަޅާފައި އޮތް އަހަރެއް. ކޮންމެ ރަށެއްގައިވެސް އެންމެ އެކަށީގެންވާ ފެންވަރެއްގައި، އެ ރަށެއްގެ އާބާދީއާ އެކަށީގެންވާ ގޮތަކަށް ޤާއިމުކުރުމަކީ ޞިއްޙީ ދާއިރާގައި އަޅުގަނޑުމެން މި އަހަރު ކުރަން ކަނޑައަޅާފައި އޮތް ކަންތައް. އެހެންވީމާ، މި ރަށަށް ބޭނުންވާ ޑޮކްޓަރުންނާއި، ވަސީލަތްތައް ހަމަކުރުމަށްޓަކައި އަޅުގަނޑުމެން ގިނަ މަސައްކަތްތަކެއް ކުރާނަން. އެހެންވީމާ، އެކަމުގައި އަޅުގަނޑުމެން ކުރިއަށްދާނެ ވާހަކަ ދަންނަވާލަން. މި ރަށުގައި ހުރި ހެލްތު ސެންޓަރަށް ބޭނުންވާ ހިއުމަން ރިސޯސަސް އަދި އެހެން ވަސީލަތްތައް ޤާއިމުކުރުމަށް މަސައްކަތްތައް ކުރާނެކަން ތިޔަބޭފުޅުންނަށް ޔަޤީންކޮށް ދަންނަވާލަން.
އާދެ، ހަމައެއާއެކީގައި، ކުޅިވަރުގެ ވަސީލަތްތައް ޤާއިމުކުރުމަކީ ވަރަށް އިސްކަންދޭ ކަމެއް އަޅުގަނޑުމެން. ޒުވާނުން ފުޓްބޯޅަ ކުޅުމާއި، އެކި ކަހަލަ ކުޅިވަރުތައް ކުޅުމަށް ވަރަށް ސަމާލުކަންދޭ. އެހެންވީމާ، މި ރަށުގައިވެސް އެގޮތުން ފެށިފައިވާ މަޝްރޫޢުތައް ރަނގަޅަށް ކުރިއަށް ގެންގޮސް ނިންމާލަދިނުމާއި، ޔޫތު ސެންޓަރުގެ މަސައްކަތް، ޔޫތު ސެންޓަރުވެސް ރަނގަޅު ތަނަކަށް، ރަނގަޅު ފެންވަރުގައި ބޭނުންކުރެވޭ ގޮތަށް ޤާއިމުކޮށްދިނުމާއި، މިކަންކަމަކީ ހަމަ ކުރިޔަށް ގެންދެވޭނެ ކަންތައްތައްވީމާ، އެއީ، ވަރަށް ޔަޤީންކަމާ އެކީގައި އަޅުގަނޑުމެން ކުރާނެ ކަމެއްކަން ދަންނަވާލަން.
އާދެ، ހަމަ އެއާއެކީގައި ކުނި މެނޭޖް ކުރުމުގެ ނިޒާމަކީ، ކޮންމެ ރަށަކަށް ވެސް އަޅުގަނޑުމެން މި އަހަރު ތެރޭގައި ކުރަން ނިންމާފައި އޮތް ވަރަށް މުހިންމު ކަމެއް. މި އަހަރު، މުޅި އަހަރު ދުވަހުގެ ތެރޭގައި، އެކި ރަށްރަށުގައި އެ މަސައްކަތްތައް ކުރިއަށް ގޮސް، މި އަހަރު ނިމެންވާއިރުގައި، އަޅުގަނޑުމެންގެ އަމާޒަކީ މުޅި ރާއްޖޭގައި، ހަމަ ކޮންމެ ރަށެއްގައިވެސް، ކޮންމެ ރަށެއްގައި ވެސް އެ ރަށެއްގެ ނިސްބަތުން ކުނި މެނޭޖުކުރެވޭ ނިޒާމު ގާއިމުކޮށް ނިންމުން. މިއީ ވަރަށް ބޮޑު މަސައްކަތެއް. ވަރަށް ގިނަ ޒަމާންވީ މައްސަލައެއް. އެކަމަކު އެ މައްސަލަ ޙައްލުކުރުމަށް އަޅުގަނޑުމެން މި ކަނޑައެޅި ޓާގެޓަކީ ވަރަށް އެމްބިޝަސް ޓާގެޓެއް. އެހެންނަމަވެސް، އެޗީވަބަލް ޓާގެޓެއް. އިރާދަކުރެއްވިއްޔާ، އެ ޓާގެޓް އަޅުގަނޑުމެން ހާސިލުކުރާނަން. މި ރަށް ހިމެނޭހެން، ރާއްޖޭގެ ހުރިހާ ރަށެއްގައި، އެ ރަށެއްގެ އާބާދީގެ ނިސްބަތުން ޤާއިމުކުރަންޖެހޭ ފެންވަރުގެ އަދި އެ ރަށެއްގެ ދެންހުރި ޞިނާޢަތްތަކާއި، ހިނގާ މަސައްކަތްތަކާއި، މީހުން އެ ރަށުގައި އަރައި ފައިބާ ނިސްބަތާ، މިކަންކަމަށް ބަލާފައި، އެ ރަށަކަށް ބޭނުންވާ ފެންވަރުގައި، ވޭސްޓް މެނޭޖްމަންޓް ނިޒާމު ގާއިމުކޮށް، ރާއްޖޭގައި ހުރިހާ ރަށެއްގައި މިއަހަރު ނިމުމުގެ ކުރިން ގާއިމުކޮށް ނިންމާނަން.
އާދެ، އެހެންވީމާ، މިދަންނަވާލީ ހަމަ ބައެއް ކަންކަން، ފިޔޯރީގެ ތަރައްޤީއަށްޓަކައި އަޅުގަނޑުމެން މި އަހަރު ތެރޭގައި ކުރިއަށް ގެންދާނެ. އަދިވެސް ގިނަ ކަންކަން އެބަހުރި. މަގުހެދުން، ބަނދަރުގެ މައްސަލަ ޙައްލުކުރުން. މިހެންގޮސް ކަންތައްތައް ހުންނާނެ. އެހެންވީމާ، ޖުމްލަކޮށް އަޅުގަނޑު ހަމަ ދަންނަވާލަން ބޭނުންވަނީ، މިގޮތަށް އަޅުގަނޑުމެން މަސައްކަތްތައް ކުރިއަށް ގެންދާނެ ވާހަކަ. ގެދޮރުގެ މައްސަލަ ޙައްލުކުރުމަކީ، މި އަހަރުގެ ބަޖެޓުގައި އެންމެ އިސްކަންދީފައި އޮތް ކަންތައް.
އެހެންވީމާ، ރާއްޖޭގެ ހުރިހާ ރައްޔިތުންވެސް ޝާމިލުވާ ގޮތަށް، މި ވާހަކަތައް މި ދަންނަވާލަނީ. މިހާރު މި ޢަމަލުކުރަން ފެށި ބަޖެޓުގެ ތެރެއިން، އެންމެ އިސްކަމެއް ދެނީ ގެދޮރުގެ މައްސަލައަށް. އެއީ، އެންމެ އިސްކަންދޭ މައްސަލަ ޙައްލުކުރަން. ބަޖެޓުގައި އާ މަޝްރޫޢުތައް ހިންގަން ހިމަނާފައިވާ ގާތްގަނޑަކަށް ތިން ބިލިއަނަށްވުރެ ގިނަ ރުފިޔާ، ތިން ހާސް މިލިއަންގެ ތެރެއިން ދެބައިކުޅަ އެއްބަޔަކީ ގެދޮރުގެ މަސައްކަތްތައް، ގެދޮރުގެ އިމާރާތް، ގެދޮރުގެ މަޝްރޫޢުތައް ހިންގާ އިމާރާތް އަޅައި، އެ މަޝްރޫޢުތައް ކުރިއަށް ގެންދިއުމަށް ހިމަނާފައިވާ އަދަދެއް. އެކި ރަށްރަށުގައި އަޅުގަނޑު ވާނެ ވަޢުދުވެފައި މިގޮތަށް އެކިވަރުވަރުގެ، އެކި އަދަދުތަކުގެ، އެކި ބާވަތްތަކުގެ ގެދޮރު ބިނާކުރަން.
އެހެންވީމާ، މި ޖަނަވަރީ މަހުގެ ތެރޭގައި އަޅުގަނޑުމެން އިޢުލާނު ކުރަމުންދާނަން، މިކަންކަން ކޮށްދޭނެ ފަރާތްތައް ހޯދަން. ފަރާތްތައް ހަމަޖެހެމުންދާވަރަކަށް ޢަމަލީ މަސައްކަތް ފެށިގެންދާނެ. އެހެންވީމާ، ގެދޮރު ބިނާކުރުމުގެ މަސައްކަތަށް ބަޖެޓުގައި އެންމެ އިސްކަމެއް ދީފައި އޮންނާނީ.
ދެން، ތަޢުލީމީ ދާއިރާއާއި، ޞިއްޙީ ދާއިރާއާ ހަމަ އެއްވަރަކަށް ދެން އިސްކަންދޭނީ. މާނައަކީ މި ރަށް ހިމެނޭހެން، ރާއްޖޭގެ ކޮންމެ ރަށެއްގައިހެން އެންމެ އިސްކަމެއް ދެން ދޭންޖެހޭ ރަށުގެ ރައްޔިތުންނަށް، ދުވަހުން ދުވަހަށް އެންމެ އަސަރުކުރާ ކަންކަމުގެ ތެރޭގައި، ޢާއިލާއަށް، ދިރިއުޅުމަށް އެންމެ މުހިންމު ކަމަކަށް މިވަނީ ޞިއްޙީ އަދި ތަޢުލީމީ ކަންކަން ރަނގަޅުވުން. ޖީލެއް ބިނާކުރުމުގައި ފިކުރީ ތަރައްޤީ ހާސިލުކުރުމުގައި ދުޅަހެޔޮ ޞިއްޙަތެއް ޔަޤީންކޮށްދިނުމާއި، ރަނގަޅު ތަޢުލީމެއް ދިނުމަކީ ކުރަން ލާޒިމު ކަމެއް.
އެހެންވީމާ، ރަށްރަށުގައި ޤާއިމުކުރަންޖެހޭ ސްކޫލްތައް ޤާއިމުކުރުމާއި، ސްކޫލްތަކަށް ޖާގަ އިތުރުކުރުމާއި، ސްކޫލްތަކަށް ހޯދަންވާ ތަކެތި ހޯދުން. ޞިއްޙީ މަރުކަޒުތަކަށް ބޭނުންވާ ތަކެތި ހޯދައި، ވަސީލަތް ގާއިމުކުރުމާއި، މިހެންގޮސް، މި ދެ ދާއިރާއަށް ޚަރަދުކުރުން، ދެވަނައަށް އެންމެ އިސްކަމެއް ދެނީ.
ދެން އެއާއެކީގައި، މަގުތަކާ ގުޅޭ ތަރައްޤީގެ ޢުމްރާނީ މަސައްކަތް. ފެނާއި ނަރުދަމާ ޤާއިމުކުރަންޖެހޭ ރަށްރަށުގައި، ފެނާއި ނަރުދަމާ ޤާއިމުކޮށްދިނުމުގެ މަސައްކަތް ކުރުން. އަދި އެ ކަންކަން ކޮށް ނިމިފައިވާ ރަށްރަށުގައި، މަގުތައް ހެދުމަށް މަސައްކަތްތައް ކުރާނީ. އެއަށްފަހު، ކުޅިވަރާއި އިޖުތިމާޢީ ދާއިރާތަކުގެ މަސައްކަތްތަކަށް ޕްރޮޖެކްޓްސްތައް ހިންގަން ޚަރަދުކުރާނީ.
ދެން އެއާއެކީގައި، ވަކި ރަށްރަށުގައި އެންމެ އިސްކަންދޭންޖެހެނީ، މިކަންކަމުގެ ބަދަލުގައި ވަކި ކަމަކަށް ކަމަށްވަންޏާ، މިސާލަކަށް، ބައެއް ރަށްތަކުގައި މި ހުރިހާ ކަމަކަށްވުރެ މުހިންމުވަނީ، އެ ރަށްރަށުގެ ބަނދަރު ހެދުން. ނޫނީ އެ ރަށަކަށް މި ހުރިހާ ކަމަކަށްވުރެ މުހިންމުވަނީ އެ ރަށުގެ ނަރުދަމާ ޤާއިމުކޮށް، މަގުހެދުން ނޫނީ ކޮންމެވެސް އެހެން ކަމެއް. އެހެންވީމާ، މިހެން ހުންނަ ސްޕެސިފިކް ކަންކަމާއި، ބިންހިއްކުން. ބައެއް ރަށްތަކުގައި ބިން، ކޮންމެ ކަމަކަށްވުރެ އިސްކަންދޭންޖެހޭ ޖާގަ އިތުރުކުރުމަށް ބިމަށް.
އެހެންވީމާ، މިދަންނަވާލީ، ޖުމްލަ ގޮތެއްގައި ޕްލޭން އޮތްގޮތް. މި ޕްލޭންގެ ބޭރުން ޚާއްޞަކޮށް ރަށަކަށް ބޭނުންވާ ކަންކަމަށް ހަމަ އެންމެ އިސްކަމެއް ދޭނަން. އެގޮތަށް އަޅުގަނޑު ހަމަ މި ދަތުރުގައިވެސް ބައެއް ރަށްތަކުގައި ވަޢުދުވެފައި އޮންނާނީ. ނޫނީ ޔަޤީންކަން ދީފައިވާނީ. އެހެންވީމާ، މިއީ އަޅުގަނޑުމެން ކަންކަން ކުރަން ރާވާފައިވާ ގޮތް. އެގޮތުން، މި ރަށުގައި ހިންގަން ނިންމާފައިވާ މަޝްރޫޢުތައް ކުރިއަށްދާނެ ގޮތްވެސް އަޅުގަނޑު ދަންނަވައިލައިފިން. އާދެ، އިރާދަކުރެއްވިއްޔާ، މިގޮތުގެ މަތިން ރާއްޖޭގެ ރައްޔިތުންނަށް ތަރައްޤީގެ ޙަޤީޤީ އިހުސާސް، މިއަހަރު ތެރޭގައި ޢަމަލީ ގޮތުން ވާނެކަން މިއީ އަޅުގަނޑު ޔަޤީންކަންދޭ ކަމެއް.
ހަމަ އެއާއެކީގައި، ވަރަށް އިސްކަމެއް އަޅުގަނޑުމެން ދެން، ޚާއްޞަކޮށް، ރޯދަމަސް އަންނާތީއާ އެކީގައި، ކަރަންޓުގެ މައްސަލައަށް ޙައްލު ގެނެސްދިނުމަށް. މިއީ، މި ރަށެކޭ އެއްގޮތަށް ހަމަ ވަރަށް ގިނަ ރަށްތަކުގައި، ވަރަށް ބޮޑުވެފައި އޮތް މައްސަލައެއް. ފެނަކައިގެ އިންޖީނުގެތަކުގެ ޖަނަރޭޓަރުތައް ހަލާކުވުން، ނޫނީވިއްޔާ ބަދަލުކުރަންޖެހި، އިތުރުކުރަންޖެހި، ސައިޒު ބޮޑުކުރަންޖެހިފައި މިހިރީ. މިދިޔަ އަހަރު އަޅުގަނޑުމެން ވަރަށް ބޮޑު ހޭދައެއް ކުރަންޖެހުނު، މިކަންތައްތައް ރަނގަޅުކުރުމަށްޓަކައި. އެއީ، އަޅުގަނޑުމެންނާ ހަވާލުވިއިރުގައި، އެތައް އަހަރެއް ވެފައި އޮތީ އެތަންތަން ރަނގަޅަށް ނުބަލަހައްޓާ. މިހާރު އަޅުގަނޑުމެން ޚާއްޞަ މަސައްކަތްތަކެއް ފަށައިފިން، ފިނޭންސް މިނިސްޓްރީއާއި، ފެނަކައާއި، އެސް.ޓީ.އޯ.، އެމް.ޓީ.ސީ.ސީ.އާ ތަންތަން، ކުންފުނިތައް ގުޅި، ކުރިއަށް އޮތް ރޯދަމަސް އަންނަންވާއިރަށް އަޅުގަނޑުމެން މި އަމާޒުކުރަނީ، މުޅި ރާއްޖޭގައި ހަމަ އެންމެ ރަށެއްވެސް، މި މައްސަލައެއް އޮތް ރަށެއްވިއްޔާ ހަމަ ހިމެނޭގޮތަށް، އެންމެ ރަށެއްވެސް ދޫކޮށްނުލާ. ހުރިހާ ރަށެއްގައި ޖަނަރޭޓަރުތަކުގެ މައްސަލަ ހައްލުކުރުމަށް ގެންނަންޖެހޭ ޖަނަރޭޓަރުތައް ގެނެސްދީ، އިންސްޓޯލްކޮށް ނިންމަން. މިއީވެސް ވަރަށް ބޮޑު ޗެލެންޖަކަށް ވާނެ ކަމެއް. އެހެންނަމަވެސް، އެ މަސައްކަތް މިފެށީ. އިރާދަކުރެއްވިއްޔާ މި ދެމަސް ތެރޭގައި، ރާއްޖޭގެ ހުރިހާ ރަށެއްގައި ރަމަޟާންމަހު ތިޔަބޭފުޅުން ކަންބޮޑުވެ ވަޑައިގަންނަވަން ޖެހިވަޑައިނުގަންނަވާ ފެންވަރަށް މި ކަރަންޓުގެ މައްސަލަ ޙައްލުކުރުމަކީ، އަޅުގަނޑުމެން މި އަމާޒު ހިފި ކަންތައް. އިރާދަކުރެއްވިއްޔާ، އަޅުގަނޑުމެން ބަލާނަން، އެކަން ތިޔަބޭފުޅުން ހިތްހަމަޖެހިވަޑައިގަންނަވާ ގޮތަށް ކޮށްދެވޭތޯ.
އާދެ، މި ހުރިހާ ކަމަކީ ޚަރަދުތައް ހިނގާ ކަންކަން. އަޅުގަނޑުމެން މިދިޔަ އަހަރު މި ނިންމާލީ ވަރަށް ބޮޑު އަނދަވަޅެއްގައި އޮތް ހާލަތަކުން އަރައިގަނެގެން. އެއްވެސްވަރަކަށް ފައިސާ ޗާޕުނުކޮށް. ދަރަނިތައް ދައްކަމުން. ބަނގުރޫޓުނުވެ. ރާއްޖޭގެ އެކިއެކި ކުންފުނިތަކަށް ކުދިކުދި އަދި މެދު ފަންތީގެ ވިޔަފާރިތަކަށް ދޭންޖެހޭ ފައިސާވެސް ކޮންމެވެސްވަރަކަށް ދެމުން. އަދި މި އަހަރުގެ ކުރިއަށް އޮތް ދެމަސްތެރޭގައި ވަރަށް ބޮޑު އަދަދަކުން އިރާދަކުރެއްވިއްޔާ ދޭން މި މަސައްކަތް މިކުރަނީ. އެހެންވީމާ، މި ހުރިހާ ކަމެއް ކުރިއަށް ގެންދަމުން، އެއްވެސްވަރަކަށް އަޅުގަނޑުމެން މި ދެންނެވިހެން ފައިސާ ޗާޕުނުކޮށް، އިޤްތިޞާދު ނަގައި ކޮޅަށްޖަހަމުން، ތަރައްޤީގެ މަސައްކަތްތަކަށް މި ތައްޔާރުވީ. މި އަހަރު ވާނީ ތަރައްޤީގެ ޢަމަލީ މަސައްކަތްތަކުގެ އަހަރަކަށް. މި ދެންނެވި ފަދައިން، އަޅުގަނޑުމެން މިއިން އެއްވެސް ކަމެއް ކުރުމަކަށް ފައިސާއެއް ޗާޕެއް ނުކުރާނެ. އަޅުގަނޑު ވީ ވަޢުދާ އެއްގޮތަށް އަޅުގަނޑު ކުރިއަށްދާނީ. އެކަން ކުރެވޭނެކަން އަޅުގަނޑުމެންނަށް އެނގޭ.
ޑޮލަރުގެ ދަތިކަން އޮތީމަ، އަޅުގަނޑުމެން އެވަނީ މިހާރު ޤާނޫނެއް ފާސްކޮށް، ޢަމަލުކުރަން ފަށާފައި. މިހާރު މަޖުބޫރުވާނެ، ރިޒޯޓްތަކަށްވެސް އަދި އެކިއެކި އިންޑަސްޓްރީތަކުގައި މަސައްކަތްކުރާ ފަރާތްތަކަށްވެސް، ބޭންކަށް ޑޮލަރު މާރުކުރަން. 500 ޑޮލަރު ޓޫރިސްޓަކަށް. އަދި އެކިއެކި ކުންފުނިތައް، ނޫނީ އެކިވަރުވަރުގެ ކުންފުނިތަކުން އިންޑަސްޓްރީތަކުން، ނޫނީވިއްޔާ ވިޔަފާރިތަކުން ތަފާތު ވަރުވަރަށް ޑޮލަރު މާރުކުރަން މިހާރު ޖެހޭނެ. އެއޮތީ ޤާނޫނެއް ހަދައި، ގެޒެޓްކޮށް، ޢަމަލުކުރަން ފަށާފައި.
އެހެންވީމާ، ދެން ފެނިގެންދާނީ އިރާދަކުރެއްވިއްޔާ، މިއަށް އަޅުގަނޑު ހަމަ ޔަޤީން، ހަމަ ހުރިހާ ވިޔަފާރިވެރިން ވެސް އެއްބާރުލުން ދެއްވާނެ. އެއާއެކީގައި، އަޅުގަނޑުމެންނަށް ތިޔަބޭފުޅުން ފަދަ ވިޔަފާރިތައް ކުރައްވާ ބޭފުޅުންނަށް މި ބޭނުންވާ އެކިއެކި ޓީ.ޓީ. ހެދުމާއި، އެކި ކަންކަމަށާއި، ބޭރުގައި ތިބޭ ދިވެހިންނަށް ބޭނުންވާ ފައިސާ، ޑޮލަރު ހޯދުމާއި، ކްރެޑިޓް ކާޑުގެ ލިމިޓް ބޮޑުކުރުމާއި، މި ކަންކަމަށް މަގުފަހިވެގެން ގޮސް، އަޅުގަނޑުމެންގެ މި އެސް.އޯ.އީ. ތަކުން މިހާރު ޑޮލަރު ހޯދުމަށް މި ދިމާވާ ދަތިތައްވެސް ޙައްލުވެ، ބްލެކް މާކެޓުގެ ޑިމާންޑް ކުޑަކުރެވި، ޑޮލަރުގެ އަގު ތިރިވެގެން ދިޔުން އެއީ، ދުވަސްތަކެއް އަދި ނަގާނެ ކަމެއް. އެހެންނަމަވެސް، މީގެ ނަތީޖާއަކަށް ވާނީ ކުރިއަށް އޮތް މަސްތަކުގެ ތެރޭގައި އަދި އިރާދަކުރެއްވިއްޔާ މި އަހަރު ނިމިގެންދާއިރު، އެ ހިސާބަށް ދެވިފައި އޮންނާނެ ކަމަށް. އެއީ، ހަމަ ޙަޤީޤަތުގައި ވެސް ޤާނޫނާ އެއްގޮތަށް، ހުރިހާ ވިޔަފާރިތަކުން ޑޮލަރު މާރުކުރާނަމަ ހާސިލުވާނެ ކަމެއް. އެހެންވީމާ، މިގޮތަށް އަޅުގަނޑުމެން ކަންތައްތައް ތަރުތީބުކޮށް މި ގެންދަނީ.
ހަމަ މިއާއެކީގައި، ޚަރަދު ކުޑަކުރުމަށްޓަކައިވެސް އަޅުގަނޑުމެން ކަންތައްތަކެއް ކުރަންޖެހޭނެ. މިރޭ އަޅުގަނޑު މި ވާހަކަ ދައްކާއިރު ފްލޯޓްކޮށްލާ ޚިޔާލެއް، ޕަބްލިކް ޑިބޭޓަށް އަޅުގަނޑު ހުޅުވާލައި، ހުށަހަޅާލާ ޚިޔާލެއް. ކުރިންވެސް އަޅުގަނޑު ވާނީ ކައުންސިލުތަކުގެ ސައިޒު، ނޫނީވިއްޔާ ކޮމްޕޮޒިޝަން ކުޑަކުރަންޖެހޭކަން ޚިޔާލުފާޅުކޮށްފައި. އަދި އެކަމަށްޓަކައި މަޝްވަރާތައް ކުރެވި، ރައްޔިތުންގެ ޚިޔާލާއި، ކަމާބެހޭ ހުރިހާ އެންމެންގެ މަޝްވަރާއާ އެކީގައި ގެންނަންވާ ބަދަލުތައް ގެންނާނެ ކަމަށް.
މިގޮތުން ބަލާއިރުގައި، އެއް ކަންބޮޑުވުމަކަށްވީ، ކައުންސިލަރުންގެ އަދަދު މަދުކޮށްފިއްޔާ، ޑިމޮކްރެޓިކް ރިޕްރެޒެންޓޭޝަނަށް އަސަރު ކުރުން. މާ މީހުން މަދުވީމަ. އެއީ، އެއް ޚިޔާލު، އެއް ވިސްނުން. މުޅިން އެއާ އެއްގޮތަށް ކަންކަން ވާނީކީ ނޫން. އެހެންނަމަވެސް، އެވެސް ހަމަ އޮތް ކޮންސަރންއެއް. ބޭނުންވަނީ ޚަރަދު ކުޑަކުރަން. ނިޒާމު މާ ޚަރަދު ބޮޑީ. ކޮންމެ ރަށެއްގައި، އެ ރަށެއްގެ އާބާދީއަށް ޚިދުމަތްކުރަން ބޭނުންވާ އަދަދަށްވުރެ ގިނައިން ފުލްޓައިމްކޮށް ގިނަ ކައުންސިލަރުން ތިބުމަކީ ޚަރަދު ބޮޑު ނިޒާމެއް.
އެހެންވީމާ، މި ހުރިހާ ކަމަކަށް އަލިއަޅުވާލައި، ކުރެވިދާނެ ގޮތެއް ކަމަށް އަޅުގަނޑަށް ފެންނަ ގޮތަކީ، ކައުންސިލަރުންގެ އަދަދު މަދުނުކޮށް، ފުލްޓައިމްކޮށް ތިބޭނީ، ކައުންސިލްގެ ރައީސާއި، ނައިބު ރައީސްގެ ގޮތުގައި ކަނޑައަޅަން. އިންތިޚާބުގައި ފުލްޓައިމް މަޤާމަކަށް އިންތިޚާބު ކުރާނީ، ކައުންސިލުގެ ރައީސްގެ މަގާމަށާއި، ކައުންސިލުގެ ނައިބު ރައީސްގެ މަގާމަށް ނަގާ ދެ މީހުން ކަމަށް ކަނޑައަޅައި، ދެން ހަމަ މިހާރުވެސް ތިބޭ އަދަދަށް ކައުންސިލަރުން އިންތިޚާބު ކުރާނީ. ނަމަވެސް، އެއީ ކޮންމެ ޖަލްސާއަކަށް ވަކި އެލަވަންސެއް ލިބޭގޮތަށް. ސިޓިންގއަށް އެލަވަންސް ދޭ ގޮތަށް. ރާއްޖެ ނޫން އެހެން ޤައުމުތަކުގައި، ތަރައްޤީވެފައި ހުރި ގިނަ ގައުމުތަކެއްގައި އޮންނަ ގޮތް އެއީ. އެގޮތަށް ތިބޭ ކައުންސިލަރުން ތިބޭނެ. އެހެން ހެދީމަ ޑިމޮކްރެޓިކް ރިޕްރެޒެންޓޭޝަނަށް ބަދަލެއް ނާދޭ. އަސަރެއް ނުކުރޭ. ހަމަ މިހާރު ތިބި އަދަދަށް ކައުންސިލަރުން ތިބޭނެ. އެހެންނަމަވެސް، އޮފީހުގައި ފުލްޓައިމްކޮށް ޤާއިމުވެ، އޮފީސް ހިންގަން ތިބޭނީ، ރައީސާއި، ނައިބު ރައީސް. މިކަން ކުރެވިދާނެ، ރައީސްކަމަށް ކުރިމަތިލާ މީހާއާ އެކުގައި، ރަނިންގމޭޓެއް ގޮތުގައި މީހަކު ކުރިމަތިލައިގެން. އެ މީހާއާ އެކުގައި ވޯޓުލާން. އޭރުން އެއް ފިކުރެއްގެ، އެއް ޚިޔާލެއްގެ، އެއް ސިޔާސީ ފިކުރެއްގެ ދެ މީހުން ހޮވުމުގެ ފުރުޞަތު ވެސް ލިބޭނެ. ހަމަ މިގޮތަށް، ޑަބްލިޔު.ޑީ.ސީ. ވެސް ބަދަލުކުރެވިދާނެ. ޑަބްލިޔު.ޑީ.ސީ.ގެ ވެސް ރައީސާއާއި، ނައިބު ރައީސާ އެއީ، ފުލްޓައިމްކޮށް ނެގޭ ދެ މީހުންނަށް ހަދައި، ދެންތިބި މީހުންނަކީ މިހާރު ތިބޭ ގޮތަށް ޕަރ ސިޓިންގ އެލަވަންސް ލިބޭ މީހުންނަށް ހެދިދާނެ. ސިޓީތަކުގައިވެސް، މޭޔަރާއި، ޑެޕިއުޓީ މޭޔަރު އެކަނި، އެއީ، ފުލްޓައިމްކޮށް، އެގްޒެކެޓިވް ރޯލް އަދާކުރާ މީހުންގެ ގޮތުގައި އިންތިޚާބުކޮށް، ދެން ތިބޭ ހުރިހާ ކައުންސިލަރުންނަކީ، މި ދެންނެވި ގޮތަށް، ޕާޓްޓައިމްކޮށް، ކޮންމެ ޖަލްސާއަކަށް ހާޒިރުވެގެން، އެ ލިބޭ އެލަވަންސެއް ލިބޭ ބަޔަކަށް ހެދުން. މިހެން ހެދީމަ، ވަރަށް ބޮޑުތަނުން ހިންގުމުގެ ޚަރަދުކުޑަވޭ. އެކަމަކު ޑިމޮކްރެޓިކް ރިޕްރެޒެންޓޭޝަން، ނޫނީވިއްޔާ ކައުންސިލަރުން ހޮވަންވާ އަދަދަކަށް ބަދަލެއް ނާދޭ. އަޅުގަނޑު ހިތުން މިކަން މިގޮތަށް ކުރުން ރައްޔިތުންނަށް ފެނިވަޑައިގަންނަވާ ކަމުގައިވާނަމަ، ރައްޔިތުންގެ ތެރޭގައި މިކަމަށް ޕަބްލިކް ޑިބޭޓް ކުރެއްވުމަކަށް އަޅުގަނޑު އެދޭގޮތް. ކުރިޔަށް އޮތް ދުވަސްތަކުގައި މިކަމަށް އެންމެ ރަނގަޅު ވިސްނުމެއް ރައްޔިތުންގެ ތެރެއިން އައުމަކީ އަޅުގަނޑު އެދޭ ގޮތް. މިގޮތަށް މިކަން ކުރެވިއްޖެ ނަމަ، ވަރަށް ބޮޑުތަނުން ކައުންސިލްގެ ޚަރަދު ކުޑަކުރެވުނީ. މަހުން މަހަށް ކުރާ މުސާރައިގެ ޚަރަދު. އެހެންނަމަވެސް، މީހުން ތިބޭނެ ހަމަ މިހާރު ތިބޭ އަދަދަށް. އެއީ، އަޅުގަނޑު ހިތުން ހަމަ ވަރަށް ރާއްޖެއަށް އެކަށީގެންވާ ގޮތަކަށް ވާނެ. މި ޚިޔާލު އަޅުގަނޑު މިރޭ ހަމަ މި ދޫކޮށްލީ. އަޅުގަނޑު އެދެނީ، މިކަމަށް ރަނގަޅު ހައްލެއް، އަޅުގަނޑުމެން ކުރިއަށް އޮތް ދުވަސްތަކުގައި ގެންނަން. މަޝްވަރާ ކުރަން. ކުރިއަށް އޮތް ދުވަސްތަކުގައި، މިކަމަށް ވަރަށް ސީރިއަސް ގޮތެއްގައި ފަންނީ ލެވެލެއްގައިވެސް އަދި އާންމު ރައްޔިތުންގެ މަޝްވަރާތަކުގައިވެސް، ހޮޅުއަށިތަކުގައިވެސް، ގޭތެރޭގައިވެސް، ސިޓިންގރޫމްގައިވެސް މަޝްވަރާކޮށް، އަޅުގަނޑުމެންނަށް އެންމެ އެކަށީގެންވާ ގޮތަކަށް މިކަމަށް ޙައްލެއް ގެނައުމަކީ، އަޅުގަނޑު ހިތުން ކުރަންޖެހޭ ކަމެއް.
އާދެ، މިގޮތަށް އެލަވަންސް ލިބޭ ބަޔަކަށް ކައުންސިލަރުން ބަދަލުވާއިރުގައި، މިހާރު ޑަބްލިޔު.ޑީ.ސީ.ގެ މެންބަރުންގެ އޮތް ކޮންސަރން، އެކަން ދިމާނުވާ ގޮތަށް، ހަމަ ޤާނޫނަށް އެ ގެންނަ އިޞްލާޙުގެ ތެރެއިން އެ ޕާޓްޓައިމްވާ ކައުންސިލަރުންނަށް ލިބޭ އެލަވަންސަކީވެސް، މުސާރައިގެ ސްޓޭޓަސް އޮންނަ އެލަވަންސަކަށް ހަމަ ޤާނޫނުގައި ހެދީމަ، އެ ލިބެންޖެހޭ ޢިނާޔަތްތައް ހަމަ ލިބިގެންދާނެ. ޚަރަދު ކުޑަވެގެންދާނެ އެހެންނަމަވެސް. އާދެ، އަޅުގަނޑު ހަމަ ޚިޔާލު މި ދޫކޮށްލީ.
އާދެ، އަޅުގަނޑު ހަމަ ނިންމާލަމުން ވެސް ދަންނަވާލާނީ، އަޅުގަނޑުމެން ތަރައްޤީގެ މަސައްކަތްތައް ކުރިއަށް މިގެންދަނީ، ރައްޔިތުންގެ ޚިޔާލާއި މަޝްވަރާއާ އެކުގައޭ. އަޅުގަނޑު މި ބޭނުންވަނީ، ރައްޔިތުން ގާތަށް މިގޮތަށް އައިސް، ރައްޔިތުން ބޭނުންވާ ކަންކަން އަޑުއަހައިގެން، ރައްޔިތުން ބޭނުންވާ ގޮތަށް ކަންކަން ގެންދަންށޭ. ފިޔޯރީގެ ރައްޔިތުންނަށް އެންމެ މުހިންމު ކަންކަމުގައި ޢަމަލީ ސިފަ އިރާދަކުރެއްވިއްޔާ މި އަހަރު ޖެހިގެންދާނެ. މަސް ފެކްޓްރީއާއި، ދެން ހުރި ކަންކަމުގައި ޢަމަލީ ސިފަ، ދެންމެ އަޅުގަނޑު ހަމަ މި އިއުލާނުކުރި ގޮތަށް ކުރިއަށް ގެންދާނަން. ހަމަ އެފަދައިން، ރާއްޖޭގެ ހުރިހާ ރަށަކަށް މުހިންމުވެފައި ހުރި ކަންކަމުގެ ތެރެއިން، އަޅުގަނޑު މިރޭ މި ދެންނެވި ވާހަކަތަކާއި، އަދި ކުރިންވެސް ދެންނެވިފައި ހުރި ކަންކަމަކީ، އެ ކަންކަން ކުރުމުގެ ނިޔަތާއި ޢަޒުމާ އެކުގައި އަޅުގަނޑު ދައްކާ ވާހަކަތައް. އެ ކަންކަން އެގޮތަށް ކުރާނެ ވާހަކަ ހަމަ މިރޭވެސް ތަކުރާރުކޮށްލަން.
އާދެ، އަޅުގަނޑުގެ ދުޢާއަކީ އަޅުގަނޑުމެންގެ ޤައުމަށް އަދަށްވުރެ ފާގަތި ދުވަސްތަކެއް، މާދަމާއެއް اللهُ سُبْحَانَهُ وَتَعَالَى މިންވަރު ކުރެއްވުން. އަޅުގަނޑުމެންގެ ޤައުމަކީ، މިނިވަންކަންމަތީ ތާއަބަދު ދެމެހެއްޓިގެންވާ ޤައުމެއް ކަމުގައި ލައްވާށި! އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.