بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ވާދޫގެ ކައުންސިލުގެ ރައީސާއި ކައުންސިލަރުން، ޑަބްލިޔު.ޑީ.ސީ.ގެ މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، ވަކިން ޚާއްޞަކޮށް، މި ރަށުގެ ލޮބުވެތި ރައްޔިތުން، މި ދާއިރާގެ ލޮބުވެތި ރައްޔިތުން އަދި މި ޖަލްސާ ދުރާގައި ގާތުން ބައްލަވަމުން، އަޑުއައްސަމުން ގެންދަވާ އެންމެހައި އަޚުންނާއި އުޚްތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދުގެ މި ހަވީރު ވަގުތު މި ރަށަށް އާދެވުމުން، ތިޔަބޭފުޅުން ވިދާޅުވި ހޫނު މަރުޙަބާއަށް ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
އާދެ، އަޅުގަނޑުގެ މަސައްކަތުގެ ފިލޯސޮފީއަކީ، ރައްޔިތުންނާ ގާތުން މަސައްކަތް ކުރުން. އެހެންވީމާ، މިދިޔަ ދުވަސްތަކުގައި އަޅުގަނޑު ވަރަށް އިސްކަމެއް ދިނިން، ރައްޔިތުން ހޮވާފައި ތިބި މަންދޫބުންނާ ވީހާވެސް ގާތުން ބައްދަލުކުރަން. ވަރަށް ގިނަ ރަށްތަކަށް ގޮސް، އެ ރަށަށް، އެ ރަށުގެ ކައިރީގައި ހުރި ރަށުގެ ކައުންސިލަރުންވެސް ވަޑައިގެން ބައްދަލުކުރެއްވި. މިހާރު ގާތްގަނޑަކަށް ހުރިހާ ރަށެއްގެ ކައުންސިލްތަކާއި، ހުރިހާ އަތޮޅު ކައުންސިލްތަކާއި، ސިޓީ ކައުންސިލްތަކާ ބައްދަލުކޮށް މި ނިމެނީ. ނަމަވެސް، ކޮންމެ ރަށަކަށްވެސް އަޅުގަނޑު ދާން ގަސްދުކޮށްފައި އޮންނާނީ. އަދި ވަޢުދުވެސްވީ ކަމެއް އެއީ.
އެހެންވީމާ، މިއަދު މި ފެށި ދަތުރަކީ މިގޮތުން ކައުންސިލްތަކާ ބައްދަލުކުރުމަށްޓަކައި އޭރުގައި އެ ކުރިއަށް ގެންދިޔަ ރައުންޑް ނިމި، ނޫނީ ނިމުމަކާ ހަމައަށް ގޮސް، ދެން ކޮންމެ ރަށަކަށްވެސް ދިޔުމަށްޓަކައި އަޅުގަނޑު ފެށި ސިލްސިލާ ދަތުރުތަކުގެ ތެރެއިން ކުރާ ދަތުރެއް. އެހެންވީމާ، ވަރަށް އުފާކުރަން، މިއަދު މި ރަށަށް އާދެވި ތިޔަބޭފުޅުންނާ އެކުގައި މި ވަގުތުކޮޅު ހޭދަކޮށްލެވޭތީ.
ބޭނުމަކީ ރައްޔިތުން ބޭނުންފުޅުވާ ގޮތަށް ކަންތައްތައް ވީހާވެސް އަވަހަކަށް ތަންފީޒީ މަރުޙަލާއަށް ގެންގޮސްދިނުން. މި އަހަރަކީ އިރާދަކުރެއްވިއްޔާ އެކަމުގެ އަހަރު. ނަތީޖާ ނެރެދިނުމުގެ ޢަމަލީ މަސައްކަތުގެ އަހަރު އިރާދަކުރެއްވިއްޔާ. މިއީ ޙަޤީޤަތުގައިވެސް އަޅުގަނޑު އެގޮތަށް މީންކޮށްފައި، މާނަކޮށްފައި، ހަމަ އެކަން ކުރުމުގެ ނިޔަތުގައި ދައްކާ ވާހަކައެއް. މި އަހަރުގެ މިދިޔަ ހައެއްކަ ދުވަސް ތެރޭގައިވެސް ރާއްޖޭގެ ރައްޔިތުންނަށް ފެނިވަޑައިގެންފައި އޮންނާނީ، ހަމަ އެގޮތަށް މުހިންމު ގިނަ ކަންތައްތަކެއް ފެށިގެންދިޔަ ތަން. މި ރަށުގެ ރައްޔިތުންގެ ތަރައްޤީއަށްޓަކައި ބޭނުންވާ ކަންކަމުގައިވެސް އިރާދަކުރެއްވިއްޔާ ހަމަ މި އަހަރުގެ ތެރޭގައި ކުލަ ޖައްސައިދޭނަން.
އާދެ، ވަރަށްގިނަ ކަންކަން އެބަހުރި. ކައުންސިލްގެ ރައީސް ފާހަގަކޮށްދެއްވި ކަންތައްތައް. ޢިއްޒަތްތެރި މެންބަރު ފާހަގަކޮށްދެއްވި ކަންތައްތައް. މިހެން ހުރި އެތައް ކަމެއް މިހިރީ. އެހެންވީމާ، އެކަންކަމަށް ސަމާލުކަންދީގެން، މި އަހަރުގެ ތެރޭގައި، ވީހާވެސް އަވަހަކަށް ކަންތައްތައް ފަށާނެ ކަމުގެ ޔަޤީންކަން އަޅުގަނޑު ތިޔަބޭފުޅުންނަށް މި ދެނީ.
މި ސްކޫލަކީ މި ރަށަށް ޚާއްޞަ ތަނެއް. މި ރަށަކީ ތަޢުލީމީ ރަށެއް. ފަޚުރުވެރި މާޒީއެއް އޮތް ވާދޫ ދަންނަކަލޭގެފާނުގެ ރަށް. މި ރަށަށް ސަރުކާރުތަކުން ޖެހޭނެ އަހަންމިއްޔަތުކަން ދޭން. ޚާއްޞަކޮށް، ތަޢުލީމީ ދާއިރާ ކުރިއަރުވަން. އެއީ، އަޅުގަނޑު މިރަށުގެ ތަޢުލީމީ ދާއިރާއާ ދޭތެރޭ ދެކޭގޮތަކީ. އެހެންވީމާ، އަޅުގަނޑު ދޭ ޔަޤީންކަމަކީ، ސްކޫލަށް އިތުރުކުރަންޖެހޭ ކްލާސްރޫމް، މަލްޓިޕާރޕަސް ހޯލް، މިކަންކަން މިހާރު ދާންވާ ސްޕީޑްގައި ނުގޮސް ހުއްޓިފައި މި އޮތް މަސައްކަތް، އިރާދަކުރެއްވިއްޔާ ވަރަށް ރަނގަޅަށް ގެންގޮސް ނިންމައިދޭނެކަމުގެ ޔަޤީންކަން.
އޭގެއިތުރަށްވެސް، ދިވެހި ޓީޗަރެއް ނެތުމުގެ ވާހަކަ ފާހަގަކުރެއްވި. ޕްރިންސިޕަލް އަދި ކިޔަވާކުދިންވެސް، ސަފުގައި ސަލާން ކުރަން ތިބި ކުދިންވެސް، ބެލެނިވެރިންވެސް ފާހަގަކުރެއްވި. ދެން އެކަމުގެ މަޢުލޫމާތު އަޅުގަނޑު އޮޅުންފިލުވާލިއިރުގައި، ޓީޗަރެއް ހޯދުމުގައި ހުރި ދަތިތަކެއް. މިނިސްޓްރީން ހަމަ މިއަދު ވެސް ތައްޔާރަށް އޮތީ. އަދި ޕްރިންސިޕަލްވެސް، ކައުންސިލްގެ ރައީސްވެސް މިއަދު އަޅުގަނޑުމެން ދެންމެ ކުޑައިރުކޮޅެއް ކުރިން، ކުޑަވަގުތުކޮޅަކަށް ބައްދަލުކޮށްލިއިރުގައި، އެ ވާހަކަފުޅު އެގޮތަށް ދެއްކެވީ. އެކަށީގެންވާ ޓީޗަރަކު، ރިސޯސް ޓީޗަރެއްގެ ގޮތަށްވިޔަސް، ވޭޖް އުޞޫލުންވިޔަސް އަދި ވަގުތީ ޓީޗަރެއްގެ ގޮތަށްވިޔަސް، ޓީޗަރަކު ހޯދުމުގެ މަސައްކަތް ކުރިއަށް ގެންދަން. ލިބުނުހާ އަވަހަކަށް މިނިސްޓްރީން އެމްޕްލޯއި ކޮށްދޭނެ. އެހެންވީމާ، މި ބަލަނީ މިދިޔަ ދުވަސްތަކުގައިވެސް ބަލަމުން މިއައީ، ޓީޗަރެއްގެ ކަންތައް ޙައްލުކުރަން. އެގޮތަށްވެސް ޓީޗަރެއް ނުލިބި، އެއްވެސްވަރަކަށް ކިޔަވައިނުދެވި ދިޔުމަކީ، އަޅުގަނޑުމެން ގަބޫލުކުރާ ސިޔާސަތަކަށް ނުވާތީ، މިހާރު އެ ދާގޮތަށް އެދަނީ. އަޅުގަނޑު ދޭ ޔަޤީންކަމަކީ، ސަރުކާރުގެ 100 ޕަސެންޓް ސަޕޯޓް މިކަމަށް އޮންނާނެއޭ ޓީޗަރެއް ހޯދުމުގައި. އެހެންވީމާ، ހުރިހާ ބޭފުޅުން ގުޅިވަޑައިގެން ހިންގަވާށޭ، މިކަމަށް ޙައްލެއް ގެންނަން.
ދެން ސްކޫލަށް މި ބޭނުންވާ ޢުމްރާނީ ތަރައްޤީގެ ކަންކަން ޔަޤީނުންވެސް ހަމަ ވަރަށް އިސްކަންދީގެން، މި އަހަރުގެ ކުރީކޮޅުގައި އެކަން ކޮށްދޭނަން. އެއީ، ހޯލުގެ މަސައްކަތާއި، ކްލާސްރޫމްގެ މަސައްކަތާއި އަދިވެސް ދެންވެސް ބޭނުންވާ ކަންތައްތައް. އެހެންވީމާ، މި ރަށުގެ ތަޢުލީމު ކުރިއެރުވުމަށްޓަކައި ރަށުގެ ރައްޔިތުން ތިޔަ އުންމީދު ކުރައްވާ ގޮތަށް، ސަރުކާރުން އެކަމަށް ފުރިހަމަކަން ގެނެސްދޭނެ ކަމުގެ ޔަޤީންކަން ދެން.
އާދެ، އަޅުގަނޑަށްވެސް މަގުތައް އޮތްގޮތް ފެނޭ. ވަރަށް މުހިންމު ކަމެއް ޙަޤީޤަތުގައިވެސް. އަދި މިގޮތަށް ބޮޑެތި ރަށްރަށުގައި މަގުތައް ހެދިގެންދިޔުމަކީ، އަޅުގަނޑު ވަޢުދުވެސް ވެފައި އޮތް ކަމެއް. މެނިފެސްޓޯގައި ހިމަނައި، އަދި ކެމްޕެއިން ތެރޭގައި ގާތްގަނޑަކަށް ހުރިހާ ރަށެއްގައި ވީ ވަޢުދެއް. ކޮންމެ ރަށަކަށްވެސް، އެ ރަށަކަށް އެކަށީގެންވާ ޢަދަދަކަށް މަގު ހަދައިދޭނަމޭ. ސިޓީއެއްގައި ވިއްޔާ ހުރިހާ މަގެއް. ދެން އެގޮތަށް ހުންނާނެ ވަޢުދުވެފައި. އެހެންވީމާ، މި ރަށަށްވެސް ބޭނުންވާ މައި މަގުތައް، އެއީ، ޚިދުމަތްތަކާ ގުޅިފައި ހުރި ތަންތަން ހުރި މަގުތައް، މައިމަގުތައް ހަދައިދޭން އަޅުގަނޑު ވަޢުދުވީ. ސީދާ މި ރަށަށް. އެއީ އަޅުގަނޑުގެ މައިގަނޑު ވަޢުދެއްވީމަ، އަޅުގަނޑު މިއަދު މި ދޭ ޔަޤީންކަމަކީ، އަލަށް މި އަހަރު، މިހާރު މި މަހު މި ތަންފީޒު ކުރަން މި ފަށާ ބަޖެޓުގެ ތެރެއިން އެންމެ އިސްކަމެއް ދޭ ޢުމްރާނީ ތަރައްޤީގެ މަސައްކަތަކަށް ވާނީ، މި ރަށުގައި ހަދަންޖެހޭ މައިމަގުތައް ހަދައިދިނުން. އެހެންވީމާ، ސްކޫލް މަޝްރޫޢު އެއީ، ވަކި މަޝްރޫޢެއްގެ ގޮތަށް ބައްލަވާ އެބަ. އެކަން ނަގާފައި، އެންމެ އިސްކަންދޭ ޢުމްރާނީ ތަރައްޤީގެ މަސައްކަތަކަށް އެކަން، މަގުހެދުން ހަދައިދޭނަން.
އާދެ، ހަމަ އެއާއެކީގައި، ޞިއްޙީ މަރުކަޒުގެ ޚިދުމަތް އިތުރަށް ރަނގަޅުކޮށްދިނުމުގެ ކަންތައްވެސް ކޮށްދޭނަން. އަދި އޭގެއިތުރަށްވެސް، ވަރަށް އިސްކަމެއް ދޭ ކަމެއް، އަޅުގަނޑުމެންގެ ސިޔާސަތުގެ ތެރެއިން، ކައުންސިލްތަކަށް އިޤްތިޞާދީ ބާރުވެރިކަން ހޯދައިދިނުން. ވަގުތީ އެގްރީމަންޓެއް، ނޫނީވިއްޔާ 10 އަހަރުގެ އެގްރީމަންޓެއްގެ ތެރެއިން ފަޅުރަށްތައް ހަވާލުކުރުމުގެ މަސައްކަތްވެސް ވަނީ ފެށިފައި. ކުއްޔަށް ދޭން.
ދެން މި ރަށުގެ ރައްޔިތުންނަށް ބޭނުންވާ އިޤްތިޞާދީ ކުރިއެރުން ހޯދުމަށްޓަކައިވެސް އަޅުގަނޑުމެން އީޖާބީ ގޮތެއްގައި ކައުންސިލާއި، ކަމާބެހޭ ވުޒާރާއާ ގުޅިގެން މަސައްކަތް ކުރައްވަން އަޅުގަނޑު ދަންނަވަން. ކޮށްގެން އެގްރީމަންޓަކާ ހިސާބަށް ގެންދިޔުމަށް، ސަރުކާރުގެ ފަރާތުން ފުރިހަމަ އެއްބާރުލުން ދޭނަން. އޭރުން ރަށުގެ ރައްޔިތުންގެ ޝާމިލުވުން އޮންނަ ގޮތަށް، ކައުންސިލް މެދުވެރިކޮށް ރައްޔިތުންނަށް މުއްސަނދިކަން ހޯދޭނެ ގޮތްތައް ފަހިވެގެންދާނެ.
އެހެންވީމާ، ޖުމްލަކޮށް އަޅުގަނޑުގެ ވިސްނުމަކީ، ސަރުކާރުގެ ވިސްނުމަކީ ރަށަށް ކައުންސިލް މެދުވެރިކޮށް، ރަށުގެ ކުދި މެދު ފަންތީގެ ވިޔަފާރިތަކަށް ފައިދާވާނެ ކަހަލަ ފުރުޞަތުތައް، ފަޅުރަށްތައް މެދުވެރިކޮށް ހޯދައިދިނުން ކަމުގައިވާތީ، މި ރަށަށްވެސް އެ ފުރުޞަތު އަޅުގަނޑު ވަރަށް ފަހިކޮށް ފަހިކޮށްދިނުން. އެހެންވީމާ، އޮތީ މަސައްކަތް ކުރުން. ކައުންސިލާއި، ކަމާބެހޭ ވުޒާރާއާއެކީ މަސައްކަތްކުރުން. އެކަމުގައި އަޅުގަނޑުމެން ފުރިހަމަ އެއްބާރުލުން ދޭނަން.
އާދެ، ދެންވެސް އެގޮތަށް ހުރި ހުރިހާ ދާއިރާތަކަކަށް، ވާދޫގެ ތަރައްޤީއަށްޓަކައި ސަރުކާރުގެ ފުރިހަމަ އެއްބާރުލުން ދޭނަން. ކުނި މެނޭޖް ކުރުމުގެ ވާހަކަ ފާހަގަކުރެއްވި. ކުނި މެނޭޖް ކުރުމަކީ، މުޅި ޖުމްލަ މައްސަލައެއް ޤައުމުގައި އޮތް. އެއީ، ކޮންމެ ރަށެއްގައިވެސް އޮތް މައްސަލައެއް. އެއީ، މިރަށުގައި މިހާރު ވަރަށް ގިނަ ކަންތައް ކުރެވިފައި، އެކި މަރުޙަލާތަކަށް ގޮސްފައި އޮތް ކަމެއް. އެހެންވީމާ، އެކަން އެކީގައި ގެންގޮސް ނިންމާލަން މި ޖެހެނީ، މަރުކަޒުގެ މަސައްކަތްކޮށް، އޮޕަރޭޝަނަލައިޒްވާ ހިސާބަށް ދާން. އެހެންވީމާ، ޔަޤީންކުރައްވާ، އެކަން ނިންމައިދޭނެކަން. އެކަން ކޮށްދޭނެކަން.
އާދެ، އެހެންވީމާ، ޖުމްލަކޮށް މި ދަންނަވަނީ، ދެންވެސް އަދި ހުންނާނެއޭ ވަރަށް ގިނަ ކަންކަން. ބަނދަރުގެ މައްސަލަ، ކުޅިވަރާ ގުޅޭ ކަންކަން، ޒުވާނުންނާ ގުޅޭ ކަންކަން، އަންހެން ބޭފުޅުންގެ ދުޅަހެޔޮ ޞިއްޙަތާ ގުޅޭ ގިނަ ކަންތައްތައް. އެހެންވީމާ، މި އަހަރުގެ ތެރޭގައި އިރާދަކުރެއްވިއްޔާ، މިގޮތަށް ހުރި ކަންކަމުގައި، ތަރުތީބެއްގެ ތެރެއިން މަސައްކަތްތައް ފަށައިދީ، މި އަންނަ އަހަރާ އެކީގައި މަސައްކަތްތައް ނިންމާލުން މިއީ، އަޅުގަނޑުމެންގެ މި ކަނޑައަޅާފައި މިއޮތް ޕްލޭނަކީ.
ކުރިންވެސް އިޢުލާނުކޮށްފައި އޮންނާނީ، ސަރުކާރަށް އެއް އަހަރުވީ ދުވަހު 17 ނޮވެންބަރުގައި ބޭއްވި ޙަފްލާގައިވެސް، މި ފެށޭ އަހަރަކީ، އަދި އެ އަހަރާ ޖެހިގެން ދެން އަންނަ އަހަރަކީ، ޖުމްލަކޮށް އަޅުގަނޑު ކެމްޕެއިން ތެރޭގައި މިގޮތަށް ޕޯޑިއަމްތަކުގައި ހުރެގެންނާއި، ލިޔެފައި އޮތް މެނިފެސްޓޯގަޔާ އެކީގައި ހުރި ވަޢުދުތައް ފުއްދާ ވާހަކަ. ޢަމަލީ މަސައްކަތް ފަށައިދީ، ބައެއް ކަންކަން ނިމޭނެއޭ. ދެ އަހަރުގެ ތެރޭގައި ނިމޭ ކަމެއްވިއްޔާ ނިމިގެންދާނެ. އަދި އެއަށްވުރެ ގިނަ ދުވަހުން ނިންމޭވަރުގެ ބޮޑު މަޝްރޫޢެއްވިއްޔާ، 2027އާ ހަމަޔަށްވެސް ދާނެ.
އެހެންވީމާ، 2025، 2026 އަކީ، މިގޮތަށް ރަށްރަށުގައި ކުރަން އަޅުގަނޑު ނިންމާފައި، އިޢުލާނުކޮށްފައި، ވަޢުދުވެފައި ހުރި ކަންކަން ކުރާ ދެ އަހަރު. އެހެންވީމާ، މި އަހަރުގައި، މި ރަށުގައި މި ދެންނެވި ގޮތަށް މަސައްކަތްތައް ހިނގާނެ. ސްކޫލް އަދި މަގު. ދެން ޞިއްޙީ މަރުކަޒު. ދެންމެ އަޅުގަނޑު މި ދެންނެވި މިހެންހުރި ހުރިހާ ކަންތައްތައް. އާދެ، އެހެންވީމާ، މިގޮތުގެ މަތިން، ކުރިއަށް ހުރި ދުވަސްތަކުގައި މަސައްކަތްތައް ދާނީ.
ހަމައެއާއެކީގައި، އަޅުގަނޑު މި ރަށުގައި ހަމަ ތަކުރާރުކޮށްލަން. މި އަންނަ މަޖިލީހުގެ ދެން އަންނަ ދައުރު ހުޅުވޭ ތަނުން، ފުރަތަމަ ހަފުތާ ތެރޭގައި އަޅުގަނޑުމެން މި ބަލަނީ، އަންހެނުން ތަރައްޤީއަށް މަސައްކަތްކުރާ ކޮމިޓީތަކަށް އަޅުގަނޑު ވީ ވަޢުދު ފުއްދުމަށް ހުށަހަޅަންޖެހޭ އިޞްލާޙު މަޖިލީހަށް ހުށަހަޅަން. އެއީ، ވަޒީފާއާބެހޭ ޤާނޫނާއި، ލާމަރުކަޒީ ޤާނޫނަށް ގެންނަންޖެހޭ ދެ އިޞްލާޙެއް. މިހާރު އެ ލިބޭ އެލަވަންސަށް، މުސާރައިގެ ސްޓޭޓަސް ދެނީ. އެލަވަންސް ބޮޑުކުރާ ވާހަކައެއް ނޫން. އެލަވަންސެއްގެ ގޮތުގައި އޮވެގެންނެއް ރޯދަމަހުގެ ޢިނާޔަތެއް ނުދޭ، މިހާތަނަށް އައިއިރުގައި. ބޭންކަކުން ލޯނެއް ނުނެގޭ. ވިހެއުމުގެ ޗުއްޓީއެއް ނުލިބޭ. މިކަހަލަ އެއްވެސް ކަމެއްނުވޭ.
އެހެންވީމާ، މިދިޔަ އަހަރުގެ ތެރޭގައި، ޑަބްލިޔު.ޑީ.ސީ.ތަކާ އަޅުގަނޑު ބައްދަލުކުރިއިރުގައި، ހަމަ ހުރިހާ ޑަބްލިޔު.ޑީ.ސީ.ތަކެއްގެވެސް އެދުމަކަށް އޮތީ އެކަން. އަޅުގަނޑު ވަޢުދުވީ އެކަން ކޮށްދޭން. އެހެންވީމާ، މި އިޞްލާޙުތައް އިރާދަކުރެއްވިއްޔާ ގެނެސް، މި އަންނަ ރަމަޟާން މަހުން ފެށިގެން، ކޮންމެ ރަމަޟާން މަހެއްގައި، ޑަބްލިޔު.ޑީ.ސީ.ގެ މެންބަރުންނަށް ރޯދަމަހުގެ ޢިނާޔަތް ލިބޭނެ. އަދި އެ އެލަވަންސަކީ މުސާރަ ލިބޭ އެހެން މުވައްޒަފުންނަށް އެ ލިބޭ ކަހަލަ މުސާރައިގެ ސްޓޭޓަސް، ހައިސިއްޔަތު ލިބޭ އެއްޗަކަށް ބަދަލުކުރެވޭނެ ޤާނޫނީގޮތުން. އެއްގޮތަކަށްވެސް ފުލްޓައިމްކޮށް ވަޒީފާއަށް ނުކުންނަންޖެހޭ ވާހަކައެއް ނޫން. ހަމަ މިހާރުވެސް މަސައްކަތް ކުރައްވާ ގޮތަށް ކުރައްވާނީ. އެކަމަކު މި ދެންނެވި ބެނެފިޓްތައް ލިބޭގޮތް ހަދައިދޭނަމޭ.
އެހެންވީމާ، އެގޮތަށް ގެންނަންވާ އިޞްލާޙު މަޖިލީހުގެ ތެރެއިން ގެނެސްދީ، މި އަންނަ ރޯދަމަހުން ފެށިގެން އިރާދަކުރެއްވިއްޔާ ރޯދަމަހުގެ ޢިނާޔަތްތައްވެސް ޑަބްލިޔު.ޑީ.ސީ. މެންބަރުންނަށް ލިބޭގޮތް ވާނެ. އެކަން ހަމަ ތަކުރާރުކޮށް މި ރަށުގައި ހާމަކޮށްލަން.
އާދެ، އަޅުގަނޑު ބޭނުންވަނީ އަންހެނުންނަކީ، އަންހެން ކަނބަލުންނަކީ، ރަށުގެ ތަރައްޤީއަށް، ކޮންމެ ރަށެއްގައިވެސް އެންމެ ހަރަކާތްތެރިކޮށް މަސައްކަތް ކުރައްވާ ބޭފުޅުންނަށްވާއިރުގައި، އެކަން ރެކޮގްނައިޒް ކުރަން. އެކަމުގައި ސަރުކާރުން ދެވެން އޮތް ހުރިހާ އެއްބާރުލުމެއް ދޭން. އަންހެން ބޭފުޅުންނާއި، ފިރިހެން ބޭފުޅުންނަކީ، ހަމަހަމަކަމާ އެކީގައި އެއް ހައިސިއްޔަތެއް ލިބިގެން، ރަށުގެ ތަރައްޤީއަށް އަދި ޤައުމުގެ ތަރައްޤީއަށް މަސައްކަތްކުރާ ބައެއްގެ ގޮތުގައި ހެދުން އެއީ، އަޅުގަނޑުގެ ވިސްނުމަކީ އަދި ސަރުކާރުގެ ސިޔާސަތަކީ. މަތީ ފަޑީގައި، ޓޮޕް މެނޭޖްމަންޓުން އަންހެން ބޭފުޅުންނަށް ޖާގަދިނުން ސަރުކާރުގެ ސިޔާސަތަކީ.
ފެނިވަޑައިގަންނަވާނެ، މި ސަރުކާރުގައި، މިދިޔަ ހުރިހާ ސަރުކާރުތަކާ އަޅައިބަލާއިރުގައި، ކުންފުނިތަކުގެ ވެރިން އަދި އެހެނިހެން އިސް ލެވެލްތަކުގައި، އަންހެން ބޭފުޅުން އެންމެ ގިނަވާނީ. މީގެ ކުރިން އަންހެން ބޭފުޅަކު ލީޑްނުކުރާ މުއައްސަސާތަކުގައި މިހާރު ތިއްބަވާނެ، އަންހެން ބޭފުޅުން ޤައުމީ ލެވެލްގައިވެސް. އެހެންވީމާ، އަންހެން ބޭފުޅުންނަށް، އެ ކުރައްވާ މަސައްކަތުގައި، އެ ދޭންވާ ރިކޮގްނިޝަން ދީ، ފުރުޞަތުތައް ފަހިކޮށްދިނުން އެއީ، އަޅުގަނޑުމެންގެ ސިޔާސަތު.
އާދެ، އެހެންވީމާ، މި ރަށުގެ ތަރައްޤީއަށްޓަކައިވެސް ކުރެވޭ ކަންކަމުގައި އަޅުގަނޑުމެން ކުރިއަށްދާނީ މި ވިސްނުމުގައި. އަދި މުޅި ޤައުމުގެ ތަރައްޤީގައިވެސް އަޅުގަނޑުމެން ކަންކަން ކުރިއަށްގެންދާނީ މި ވިސްނުމުގައި.
އާދެ، އަދިވެސް އެއްފަހަރު، ތިޔަ ހުރިހާ ލޮބުވެތި ރައްޔިތުންނަށް ވަރަށް ބޮޑަށް ޝުކުރު ދަންނަވަން، ތިޔަ ބަހައްޓަވާ ގާތްކަމާއި، ދެއްވާ ތަރުޙީބަށްޓަކައި. ހުރިހާ ބޭފުޅުން އެކުގައި ގުޅިގެން ކުރެވޭ މަސައްކަތެއްގެ ގޮތުގައި ހައްދަވާ، މި ރަށުގެ ތަރައްޤީ. އަދި ޖުމްލަކޮށް ރާއްޖޭގެ ހުރިހާ ރައްޔިތުންވެސް މި އެކުވެރިކަމާ އެކީގައި ކުރިއަށް ގޮސް، އަޅުގަނޑުމެން މި އުންމީދު ކުރަމުން މި އަންނަ ތަރައްޤީގެ މަސައްކަތްތައް ޙަޤީޤަތަކަށް ހެދުން، އަޅުގަނޑުމެންގެ ޢަޒުމަކަށް މި އަހަރު ވާންވީ.
އަޅުގަނޑު އަބަދުވެސް ދަންނަވާ ވާހަކައެއް. ތަރައްޤީއަކީ ވަރަށް ފުޅާ އެއްޗެކޭ. ތަރައްޤީއަކީ ދެންމެ މި ފާހަގަކުރި ކަހަލަ، ހަމައެކަނި ލޮލަށް ފެންނަ، އަތުން ހިފޭ މަޝްރޫޢުތައް އެކަންޏެއް ނޫނޭ. އެކަންކަންވެސް ކުރަމުން، އަޅުގަނޑުމެންގެ ސިކުނޑި ތަރައްޤީކޮށް، އަޅުގަނޑުމެންގެ އަޚްލާޤު އެގޮތުން ރަނގަޅުކޮށް، ދަރިން ހެޔޮގޮތުގައި ތަރުބިއްޔަތުކޮށް، އަޅުގަނޑުމެންގެ މުޖުތަމަޢަކީ ހެޔޮ ކަންކަމަށް އަމުރުކޮށް، ނުބައި ކަންކަން ނަހީކުރާ މުޖުތަމަޢެއްގެ ގޮތުގައި ބަދަލުކުރުން އެއީ، ވަށާޖެހޭ ތަރައްޤީއަކީ. މި ދެ ކަންތައް އެކުގައި ކުރާ ބަޔަކަށް ވުމުގެ ޢަޒުމް، މި އަހަރު އަޅުގަނޑުމެން ކަނޑައަޅައިގެން، އެންމެން އެކުގައި އެބަޖެހޭ މަސައްކަތްތައް ކުރަން.
އަޅުގަނޑުމެންނަކީ އަޅުގަނޑުމެންގެ މުޖުތަމަޢުގައި އަޅުގަނޑުމެންގެ ލޯކުރިމަތިން، ގޯސް ކަމެއް ފެނުނީމާ، އެކަމަކަށް ނޫނެކޭ ބުނަން ކެރޭ ބަޔަކަށްވާން އެބަޖެހޭ. ޒަމާންތަކެއް ވަންދެން، ވަކި ގޮތަކަށް ކަމެއް ގޯސްކޮށް ހިނގަމުންދިޔުމަކީ، ދެން އެގޮތަށް ހަމަ ދޫކޮށްލައިގެން ތިބެންޖެހޭނެ ކަމެއް ނޫންކަން އެބަޖެހޭ، އަޅުގަނޑުމެންގެ ހިތުގައި ކަނޑައަޅައި، ޢަމަލުން ދައްކަން. ސަރުކާރު މިއޮތީ އެގޮތުގައި ކުރިއަށްދާން.
އެހެންވީމާ، މި ވިސްނުމުގައި، ކުރިއަށް އޮތް މުސްތަޤްބަލަށްޓަކައި އަޅުގަނޑުމެންގެ ޖީލުތައް ސަލާމަތްކޮށްދީ، ވަށާޖެހޭ ތަރައްޤީއަކުން ތަރައްޤީ ހާސިލުކޮށްދީފައި އޮތް، ޙަޤީޤީ މާނައިގައި ތަރައްޤީވެފައި އޮތް ދިވެހިރާއްޖެއަކަށް ހަދައިދިނުމަށްޓަކައި ވަރަށް އުނދަގޫ ބައެއް ނިންމުންތަކެއް ނިންމަމުން މިދަނީ އެކިއެކި ވަބާތަކުން ޤައުމު ސަލާމަތްކުރުމަށް. އެއީ، އަޅުގަނޑުމެންގެ ތެރޭގައި ހުރި، ހަމަ އަށަގަނެފައި، މޫލާފައި ހުރި، ދެވިހިފާފައި ހުރި ބައެއް އާދަތަކުންވެސް، އަޅުގަނޑުމެން ހިތްވަރުލާފައި ސަލާމަތްވުމަށް މަސައްކަތް ކުރުމުގެ ނިޔަތުގައި ކުރާ ކަންކަން. އެއްގޮތަކަށްވެސް އެއީކީއެއް ރައްޔިތުންނަށް ދަތިކުރުމަށް، އުނދަގޫކުރުމަށް ކުރާ ކަންކަމެއް ނޫން. މިކަމުގައި އަޅުގަނޑުގެ ނިޔަތް ވަރަށް ސާފު.
އެހެންވީމާ، އަޅުގަނޑު އެދެނީ ހުރިހާ ބޭފުޅުން ގުޅިވަޑައިގެން، އަޅުގަނޑުމެންގެ ޤައުމު ތަރައްޤީ ކުރުމުގައި ވަށާޖެހޭ، މާނަވީ އަދި އަތުން ހިފޭ ތަރައްޤީ ހާސިލުކުރުމުގައި، ހޯދުމުގައި މި ވިސްނުމުގައި ކުރިއަށްދާން ޢަޒުމް ކަނޑައަޅަން. އޭރުން އަޅުގަނޑުމެން މި ގެންނަން ބޭނުންވާ ޙަޤީޤީ ތަރައްޤީ ރާއްޖެއަށް އިރާދަކުރެއްވިއްޔާ ލިބިގެންދާނީ.
އަޅުގަނޑުގެ ދުޢާއަކީ، އަޅުގަނޑުމެން މި ކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް ލައްވަވައި، އަޅުގަނޑުމެންނަކީ ހެޔޮބަސް އަހައި، ހެޔޮބަސް ޤަބޫލުކުރާ ބަޔެއް ކަމުގައި ލެއްވެވުން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.