بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ނަޑެއްލާގެ ކައުންސިލްގެ ރައީސާއި، ކައުންސިލަރުން، ޑަބްލިޔު.ޑީ.ސީ. މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، ވަކިން ޚާއްޞަކޮށް، ނަޑެއްލާގެ ލޮބުވެތި ރައްޔިތުން، އަދި މި ޖަލްސާ ބައްލަވާ، އަޑުއައްސަވާ، ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މި ރަށަށް އާދެވުނީ ހަމަ އެންމެ މެންދުރު ގަޑީގައި. ވަރަށް ހޫނުގަދަ ވަގުތެއްގައި. ނަމަވެސް، ތިޔަބޭފުޅުން އެ ހޫނުގައި ވެސް ނުކުމެވަޑައިގެން ވިދާޅުވި ހޫނު މަރުޙަބާއަށްޓަކައި، ފަށްފަށުން ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
އާދެ، މި ކުރާ ދަތުރުގެ ބޭނުމަކީ، ތިޔަބޭފުޅުންނާ ގާތަށްއައިސް، ތިޔަބޭފުޅުން ބޭނުންފުޅުވާ ކަންކަމުގައި މަޝްވަރާކޮށް، ކުރިއަށްދާނެ ގޮތް ޙިއްޞާކުރުން. ރައްޔިތުންނާ ގާތުން ކަންކަމުގައި މަޝްވަރާކޮށް ކުރިއަށްދިޔުން. އެހެންވީމާ، އަޅުގަނޑު ވަރަށް އުފާކުރަން، މި ބައްދަލުވުން މިގޮތަށް ބޭއްވިގެންދާތީ. ދެންމެ ކައުންސިލުގެ ރައީސް އެ ފާހަގަކުރެއްވީ، މި ރަށަށް ބޭނުންޖެހިފައިވާ މުހިއްމު ހުރިހާ ކަމެއް.
އާދެ، އަޅުގަނޑު ތިޔަބޭފުޅުންނަށް ދޭނެ ފުރިހަމަ ޔަޤީންކަމަކީ، މިކަންކަމުގައި ވަރަށް ފަރުވާތެރިކަމާ އެކީގައި ސަރުކާރުން މަސައްކަތް ކޮށްދޭނެ ކަމުގެ ޔަޤީންކަން. އާދެ، އެގޮތުން ބަލާއިރުގައި، މި ރަށުގެ ތަރައްޤީއަށް ހުރިހާ ނަޒަރަކުން ބަލާއިރު ވެސް ވަކި މަޝްރޫޢެއް ފާހަގަކުރަން ބޭނުންވާނަމަ، ތިޔަބޭފުޅުންނަށް ހަމަ އެންމެ މުހިންމު ކަމަކީ، ބަނދަރުގެ މައްސަލައަށް ޙައްލެއް އައުން. އާދެ، 2008 ވަނަ އަހަރު ހެދި ކުޑަ ބަނދަރެއް، މިހާރު ކޮންމެގޮތެއްވިޔަސް، ރަށުގެ ތަރައްޤީއަށް ބަލާއިރުގައި އެވަނީ އެއްގޮތަކަށްވެސް ބޭނުންކުރެވޭވަރުގެ ބަނދަރަކަށް ނޫން.
އެހެންވީމާ، އަޅުގަނޑު ދަންނަވާލަން ބޭނުންވަނީ، އިރާދަކުރެއްވިއްޔާ މި މަހުގެ ތެރޭގައި، މި ޖަނަވަރީ މަހުގެ ތެރޭގައި، ތިޔަބޭފުޅުން ބޭނުންވެލައްވާ ކަހަލަ އާ ބަނދަރެއް ހެދުމަށް އަޅުގަނޑު އިޢުލާނުކުރާނަން ކޮންޓްރަކްޓަރެއް ހޯދަން. މިހާރު ފާސްކޮށްފައި އޮތް ބަޖެޓުގެ ތެރެއިން، މި ރަށަށް އެންމެ އިސްކަމެއް ދޭނީ، އާ ބަނދަރެއް ހަދައިދިނުމަށް. އެއާއެކީގައި ރަށުގެ އުދައެރުން، ރަށް ގިރުމުގެ މައްސަލައިގައި އެކަށީގެންވާ ހައްލެއް ވެސް އެ މަޝްރޫޢާ އެކުގައި، އެކުއެކީގައި ގެނެވޭނެ ގޮތަކަށް، މި ދެންނެވި މަޝްރޫޢު ކުރިއަށް ގެންދަން. އިރާދަކުރެއްވިއްޔާ ދެ މައްސަލައަށް ވެސް ހައްލެއް ގެނެސްދޭނަން.
އާދެ، އަޅުގަނޑު ގަބޫލުކުރަނީ، ރައްޔިތުންނަށް އޭރުން ހިތްހަމަޖެހުން ލިބިވަޑައިގަންނަވާނެ ކަމަށް. ވަރަށް ބޮޑު ކަންބޮޑުވުންތަކެއްގައި ދިރިއުޅެމުން ތިޔަ ވަޑައިގަންނަވާ ވަޑައިގަތުމަށް ހިތްހަމަޖެހުން ލިބިވަޑައިގެން، ރަށުގެ ތަރައްޤީއަށްޓަކައި ވަރަށް ގިނަ ކަންކަމުގައި މަގުފަހިވެގެންދާނެ، މި ދެ މައްސަލައަށް ބޮޑު ޙައްލެއް ލިބިގެންދިޔައިމާ. އެހެންވީމާ، އެންމެ އިސްކަމެއް ދީގެން، މި މަހު އަޅުގަނޑު ކޮންޓްރެކްޓަރެއް ހޯދަން އިޢުލާނުކޮށް، ވީހާވެސް އަވަހަކަށް ހަމަ މަސައްކަތް ހަވާލުކޮށް، ރައްޔިތުން ބޭނުންވާ ގޮތަށް ޢަމަލީ މަސައްކަތް ފެށި ކުރިއަށްދާނެ. އެހެންވީމާ، މި އަހަރު، މި މަހުގެ ތެރޭގައި އެކަން ފަށާނެ ވާހަކަ މި ދެންނެވީ.
އާދެ، ދެން ހުރި ހުރިހާ މަސައްކަތްތަކަކީވެސް މި ރަށުގެ ތަރައްޤީގައި މުހިންމު ކަންތައްތައް. އެގޮތުން ބަލާއިރުގައި، ޒަމާނީ ފެންވަރުގެ މިސްކިތެއް. އާ މިސްކިތެއް މި ރަށަށް އެބަ ބޭނުންވޭ. ވިއްސަކަށް އަހަރު ވެގެންދިޔައީ، މިހާރު ހުރި މިސްކިތް ބޭނުންކުރާތާ. އާދެ، އެހެންވީމާ، މި ކަމަށް ވެސް އިރާދަކުރެއްވިއްޔާ ރަނގަޅު ޙައްލު ގެނެސްދޭނަން. މި އަހަރުގެ ތެރޭގައި، އާ މިސްކިތެއް އެޅުމުގެ މަސައްކަތް ފަށާނެ ވާހަކަ ތިޔަބޭފުޅުންނަށް އަޅުގަނޑު ދަންނަވަން.
ހަމައެއާއެކީގައި، ސްކޫލުގެ ޖާގައިގައި މި އޮތް މައްސަލައަށް ވެސް ޙައްލު ގެނެސްދިނުމާއި، ސްކޫލުގެ ކްލާސްރޫމާއި، ދެންހުރި ކަންކަމަށް ވެސް ބޭނުންވާ އެކަށީގެންވާ ޙައްލު ގެނެސްދިނުމަށްޓަކައި، މަސައްކަތްތައް ކޮށްދޭނެ ވާހަކަ. އަދި ހަމައެއާއެކީގައި، ޞިއްޙީ ގޮތުން، ޞިއްޙީ މަރުކަޒަށް ވެސް ބޭނުންވާ ޖާގަ އިތުރުކޮށްދިނުމުގެ މަސައްކަތާއި، ޒުވާނުންނަށް ބޭނުންވާ ކުޅިވަރު ފެސިލިޓީޒްތައް، ފުޓުބޯޅަ ދަނޑުގައި މިހާރު ނިންމަން އެހެރަ ހުރިހާ ކަމެއް ނިންމައިދިނުމާއެކު، ޒުވާނުންގެ މަރުކަޒާއި، ވޮލީކޯޓު ފުރިހަމަކުރުމަށް ތިޔަ ބޭނުންވެލައްވާ ފެންސް ޖެހުމާއި، މި ހުރިހާ ކަމެއް އެއްކޮށް، މި އަހަރު ކޮށްދޭނެ ވާހަކަ އަޅުގަނޑު ދަންނަވަން.
އާދެ، ފުލުހުންގެ ޚިދުމަތް ހަމައެކަނި ނެތް ރަށަކަށް މި ރަށް އޮވެގެންނުވާނެ. އަޅުގަނޑުގެ ސިޔާސަތަކީ އެކަށީގެންވާ، އެ ރަށެއްގެ އާބާދީގެ ނިސްބަތުން އެކަށީގެންވާ ފެންވަރަކަށް، ކޮންމެ ރަށެއްގައި ވެސް ފުލުހުން ޤާއިމުވެ ތިބެ، ޚިދުމަތް ދިނުން. އެހެންވީމާ، އެކަން އެއީ ހަމަޖެހިގެންދާނެ ކަމެއް ކަމަށް ދަންނަވާލަން. އެއީ، މިފަދަ ކޮންމެ ރަށެއްގައި ވެސް އަޅުގަނޑު ދޭ ޔަޤީންކަން. ރާއްޖޭގެ ކޮންމެ ރަށެއްގައި ވެސް، އެ ރަށެއްގެ އާބާދީގެ ނިސްބަތުން ބޭނުންވާ ފެންވަރަށް ޚިދުމަތް ދިނުމަށް ޤާއިމުވެ ތިބޭ ފުލުހުންގެ ޚިދުމަތް ޤާއިމުވެގެންދާނެ. އެހެންވީމާ، އެ ސިޔާސަތުތަކުގެ ދަށުން މި ރަށުގައި ވެސް އެކަން ހަމަޖައްސައިދޭނެ ވާހަކަ ދަންނަވަން.
އާދެ، ދެން އޭ.ޓީ.އެމް.ގެ މައްސަލައަކީ، އަޅުގަނޑު މިހާރު އިޢުލާނުކޮށްފައި އޮތް ޕްލޭނެއް. މި ފެށިގެން މިދާ އަހަރު ތެރޭގައި ރާއްޖޭގައި ހަމަ ކޮންމެ ރަށެއްގައި، އޭ.ޓީ.އެމް.ގެ ޚިދުމަތް ޤާއިމުވާނެ. އެހެންވީމާ، މިއަދު އަޅުގަނޑު ހިތުން މި ރަށުގައި އޭ.ޓީ.އެމް.ގެ މަސައްކަތް ފެށުމަށް ކައުންސިލާ ހަވާލުކުރެވިގެންދާނެ. އަދި ކޮންމެ ރަށެއްގައި ވެސް، އޭ.ޓީ.އެމް. ނެތް ކޮންމެ ރަށެއްގައި ވެސް މި އަހަރުގެ ތެރޭގައި، ތަރުތީބެއްގެ ތެރެއިން ހުރިހާ ރަށެއްގައި، އޭ.ޓީ.އެމް. ޤާއިމުކުރުމުގެ މަސައްކަތް ހަވާލުކުރެވި، މަސައްކަތް ހިނގާނެ. އެހެންވީމާ، އޭ.ޓީ.އެމް. ނެތް ރަށްރަށުގެ ހުރިހާ ރަށްރަށެއްގެ ރައްޔިތުންނަށް އަޅުގަނޑު ހަމަ އެކަން ޔަޤީންކޮށް އަރުވަން.
އާދެ، މި ދެންނެވި ކަންކަމުގެ އިތުރަށް ވެސް، ރަށުގެ ތަރައްޤީއަށް ބޭނުންވާ، ވަރަށް މުހިންމު ގިނަ ކަންކަން ހުންނާނެ. ރަށަށް ބިން ބޭނުންވޭ. ޖާގަ އިތުރުކުރަން ބޭނުންވޭ. އެހެންވީމާ، މިކަހަލަ ހުރިހާ ކަމަކީ ސަރުކާރުން ސަމާލުކަން ދޭނެ ކަންކަން. ރައްޔިތުންނަށް އަޅުގަނޑު ވަޢުދުތަކެއްވީ، އެކަންކަން ކޮށްދިނުމަށްޓަކައި، ވަޢުދުތައް ހާސިލުކޮށްދިނުމަށްޓަކައި، ޢަމަލީ ގޮތުން ނަތީޖާ ނެރެދިނުމަށް.
އެހެންވީމާ، ނަޑެއްލާގެ ރައްޔިތުންގެ ކިބައިންވެސް އަޅުގަނޑު އެދޭ ކަމަކީ، މިކަންކަމުގައި ހަމަ ތިޔަ ދެއްވާ ފުރިހަމަ އެއްބާރުލެއްވުން ދެއްވަމުން ގެންދެވުން. މި ރަށުގެ ތަރައްޤީއަށް މި ބޭނުންވާ ހުރިހާ ކަންތައްތައް އަޅުގަނޑު ސަރުކާރުގެ ތެރެއިން އިސްކަންދީގެން ކޮށްދޭނަން. އެންމެ މުހިންމު ބޮޑު މަސައްކަތެއްގެ ގޮތުގައި، ބަނދަރު ހަދައިދިނުމާ އެކުގައި، ދެން ހުރި ހުރިހާ ކަމެއް.
އާދެ، އަޅުގަނޑު ހަމަ މި ވާހަކަކޮޅު ދަންނަވާލާފައި ނިންމާލާނަން. އަދިވެސް އެއްފަހަރު، ތިޔަ ބޭފުޅުން ތިޔަ ވިދާޅުވި ހޫނު މަރުޙަބާއަށް، ބަހައްޓަވާ ގާތްކަމަށް ވަރަށް ބޮޑަށް ޝުކުރު ދަންނަވަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް ލައްވައި، އަޅުގަނޑުމެންގެ ޤައުމަށް އުފާފާގަތިކަން މިންވަރު ކުރެއްވުން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.