بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފު، ރައްޔިތުންގެ މަޖިލީހުގެ ޢިއްޒަތްތެރި ރައީސް ޢަބްދުއްރަޙީމް ޢަބްދުﷲގެ ދެކަނބަލުން، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، އައިލެންޑް އޭވިއޭޝަންގެ ހީވާގި މުވައްޒަފުން، ވަޑައިގެން ތިއްބެވި އެންމެހައި ބޭފުޅުން، މި ޙަފްލާ ބައްލަވަމުން އަދި އަޑުއައްސަވަމުން ގެންދަވާ ދިވެހި ހުރިހާ ލޮބުވެތި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދަކީ ރާއްޖޭގެ އުދުހުމުގެ ތާރީޚުގައި، ވަރަށްވެސް ކުލަގަދަ ދުވަހެއް. ތާރީޚީ ވަގުތެއް.
އާދެ، ރިޔާސީ އިންތިޚާބުގެ ތެރޭގައި، އަޅުގަނޑުމެން ރާއްޖޭގެ ކުރިމަގުގެ ތަޞައްވުރު ރޭވުމުގެ މަސައްކަތުގެ ތެރޭގައި، މެނިފެސްޓޯ ލިޔުމުގެ ތެރޭގައި، އަޅުގަނޑުމެންގެ ތެރޭގައި މަޝްވަރާކޮށް، ކަނޑައެޅި ކަނޑައެޅުމެއް. ފަތުރުވެރިކަމުގެ ދާއިރާ އެތައް ގުނައަކުން ފުޅާކުރުމަށްޓަކައި، އަޅުގަނޑުމެންގެ އެއަރލައިން، ޤައުމީ އެއަރލައިންގެ ކެޕޭސިޓީ ބޮޑުކުރަން ޖެހޭނެކަން. އެގޮތުން އަޅުގަނޑުމެން ކަނޑައެޅީ، ދުރު ރާސްތާއަށް ދަތުރުކުރެވޭވަރުގެ، ވައިޑް-ބޮޑީ އެއަރކްރާފްޓްތައް ތަޢާރުފު ކުރަން.
އަޅުގަނޑު ވަޢުދުވީ، ވައިޑް-ބޮޑީ ދެ އެއަރކްރާފްޓް އައިލެންޑް އޭވިއޭޝަނަށް ގެނެސް، އަޅުގަނޑުމެންގެ އޮޕަރޭޝަން ފުޅާކުރަން. އެހެންވީމާ، މި ގޮތުން އަޅުގަނޑުމެން މި ފެށި މަސައްކަތުން، މިއަދު އިރާދަކުރެއްވީތީ، މީގެ ފުރަތަމަ ބޯޓު ރާއްޖެއަށް މި އަންނަނީ. އެކަމުގެ އުފާ އަޅުގަނޑުމެންނަށް މި ހާސިލުވަނީ. އެކަމަށްޓަކައި ރާއްޖޭގެ ލޮބުވެތި ހުރިހާ ރައްޔިތުންނަށް އަޅުގަނޑު މަރުޙަބާ ދަންނަވަން.
މިކަމަކީ، ޚާއްޞަކޮށް އަޅުގަނޑުމެންގެ މި ފަތުރުވެރިކަމުގެ އިންޑަސްޓްރީއަށް އިރާދަކުރެއްވިއްޔާ ވަރަށް ބޮޑު ކުރިއެރުމެއް، ކުރިއަށް އޮތް މަސްތަކުގައި، ލިބިގެންދާނެ ކަމެއް. މިއީ ފެށުމެއް. މިއަދު ފުރަތަމަ ބޯޓު އައި ކަމުގައިވިޔަސް، މީގެ ދެވަނަ ބޯޓު މި އަހަރު، 2025ވަނަ އަހަރުގެ އޮކްޓޫބަރު މަހުގެ ތެރޭގައި އިރާދަކުރެއްވިއްޔާ އުދުހެން ފަށާނެ. އެކަމުގެ ޔަގީންކަން އަރުވަން.
އެހެންވީމާ، ފިނޭންސް މިނިސްޓްރީއާއި، އައިލެންޑް އޭވިއޭޝަނާއި، ޓްރާންސްޕޯޓް މިނިސްޓްރީ ހުރިހާ ބޭފުޅުން ގުޅިވަޑައިގެން، އެ ކުރިއަށް ގެންދަވާ މަސައްކަތް ނިމި، ހުރިހާ މަރުޙަލާތަކެއް ނިމި، އޮކްޓޫބަރު މަހާ ހަމައަށްދާއިރު، ތައްޔާރީ ހާލަތަށް، އުދުހުމަށް ތައްޔާރުވެގެންދާނެ.
އާދެ، މިއަދު މިފެށޭ އުދުހުންތަކުން ޗައިނާގެ ބައެއް ހިސާބުތަކަށް ދަތުރު މި ކުރެވެނީ. އަދި އިރާދަކުރެއްވިއްޔާ ކުރިއަށް އޮތް ތަނުގައި، އެއަށްވުރެ ގިނަ މަންޒިލްތަކުން ޓޫރިސްޓުން ގެނެވޭނެ. އާދެ، އަޅުގަނޑުމެންނަށް މިކަމުން މި ލިބިގެންދާ ކުރިއެރުމަކީ، އަޅުގަނޑުމެންގެ އިޤްތިޞާދު ކުރިއެރުވުމަށްޓަކައި، ފުޅާކުރުމަށްޓަކައި، ފަށައިފައިވާ މަސައްކަތަށް ލިބޭ ވަރަށް ބޮޑު ކުރިއެރުމެއް. އަޅުގަނޑުމެންގެ އަތްމަތީގައި، އަޅުގަނޑުމެން ދިވެހިންގެ އަތްމަތީގައި، އަޅުގަނޑުމެންގެ އުދުހުންތައް އަޅުގަނޑުމެންގެ ޤައުމަށް ފަތުރުވެރިން ގެނައުމަށްޓަކައި، ލިބިގެންދާ ވަރަށް ބޮޑު ކުރިއެރުމަކަށް މިއަދު މިވެގެން މިދަނީ.
އާދެ، އިރާދަކުރެއްވިއްޔާ، މިގޮތުގައި އަޅުގަނޑުމެންގެ ޓޫރިޒަމް އިންޑަސްޓްރީއާއި، އުދުހުމުގެ ޞިނާޢަތް ކުރިއެރުވިގެންދާނެ. އަދި ކުރިއަށް މިއޮތް ދުވަސްތަކުގައި އައިލެންޑް އޭވިއޭޝަނަށްވެސް، އިތުރު ކުރިއެރުންތައް އަޅުގަނޑުމެން ގެނެސް، އަދި ހަމައެއާއެކީގައި އެމް.އޭ.ސީ.އެލް.އަށްވެސް އިތުރު ކުރިއެރުންތައް އަޅުގަނޑުމެން ގެނެސް، ވަރަށް ގިނަ ހަރުފަތްތަކެއް، ކުޑަ ދުވަސްކޮޅެއްގެ ތެރޭގައި، މި އަހަރުގެ ތެރޭގައި ގިރާކުރާނެ.
އެހެންވީމާ، ކުރިއަށް މިއޮތީ ތަރައްޤީގެ މަސައްކަތުގެ ދުވަސްތައް. މި އަހަރަކީ، މި ފެށިގެން މިދިޔަ 2025 ވަނަ އަހަރަކީ، ތަރައްޤީގެ އަހަރު. އިރާދަކުރެއްވިއްޔާ ލޮބުވެތި ދިވެހި ރައްޔިތުން ދެކޭނީ، ދެކެވަޑައިގަންނަވާނީ، ޢަމަލީގޮތުން ތަރައްޤީ ފެނިގެންދާ ތަން. ކޮންމެ ދާއިރާއަކުންވެސް. އެއީ، އިޤްތިޞާދީ ދާއިރާތަކުން ކަމުގައިވިޔަސް، ޢުމްރާނީ ތަރައްޤީއާ ގުޅިފައިވާ އެކިއެކި ދާއިރާތަކުން ކަމުގައިވިޔަސް، އިޖުތިމާޢީ ގޮތުން ޤައުމަށް ގެންނަން އަޅުގަނޑުމެން މަސައްކަތް ފަށައިފައި މިވާ، ހެޔޮ ބަދަލުތަކުގެ ދާއިރާއިން ކަމުގައިވިޔަސް. އަޅުގަނޑުމެންގެ ޤައުމުގައި ތަރައްޤީގެ ކަންކަން ވަރަށް ބާރުމިނުގައި ކުރިއަރައިގެންދާ އަހަރަކަށް، އަޅުގަނޑުމެންގެ ހުރިހާ އެންމެންގެ މަސައްކަތުން، ދިވެހި ލޮބުވެތި ރައްޔިތުންގެ ފުރިހަމަ އެއްބާރުލުމާއި ތާއީދާ އެކީގައި، ލިބިގެންދާ އަހަރަކަށް މި އަހަރު ވާނެ.
އަޅުގަނޑުމެން ބޭނުންވަނީ ޤައުމަށް ތަރައްޤީ އަންނަން. ތަރައްޤީއާއެކު ޤައުމުގައި ހަމަޖެހުން ޤާއިމުވެގެންދާން. ހަމަޖެހުން ޤާއިމުވެގެން ދިއުމާއެކުގައި، ޤައުމުގެ މިނިވަންކަމާއި ސިޔާދަތު ޔަގީންކަމާއެކީގައި ދެމެހެއްޓިގެން ދިއުން. މި ތިން ކަންތައް އެކުއެކީގައި، ހާސިލުވެގެންދާ، ވަށައިޖެހޭ ތަރައްޤީއެއް ޤައުމަށް ގެނެސްދިނުމަށް އަޅުގަނޑުމެން މަސައްކަތް މި ކުރަނީ. އަޅުގަނޑުމެން އެންމެން އެކުގައި މި ކުރާ މަސައްކަތް އިރާދަކުރެއްވިއްޔާ ކާމިޔާބުވެގެންދާނެ.
އާދެ،އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް ލައްވަވައި، މި ޤައުމަށް އުފާފާގަތިކަން މިންވަރު ކުރެއްވުން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.