بِسْمِ ٱللّٰهِ ٱلرَّحْمٰنِ ٱلرَّحِيمِ
اَلحَمْـدُ لِلّـهِ رَبّ العَـالَمِـين، وَالصَّلاَة ُوَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް އަލްފާޟިލް ޙިސާން ޙަސަން، ދައުލަތުގެ ވަޒީރުން، ވަޑައިގެން ތިއްބެވި އެންމެހައި ޢިއްޒަތްތެރިން؛
السَّلَامُ عَلَيْكُمْ وَرَحْمَةُ اللهِ وَبَرَكَاتُه.
އާދެ، މިއަދަކީ ދިވެހީންގެ އެއްބައިވަންތަކަމުގެ ދުވަސް. މިއަދަކީ ފަހުގެ ތާރީޚުގައި، ދިވެހިރާއްޖެއަށް ކުރިމަތިވި އެންމެ ނުރައްކާތެރި ކާރިސާގެ ހަނދާންތައް އަޅުގަނޑުމެން އާލާކުރާ ދުވަސް. އެ ދުވަހުގެ ހަނދާނުން މިއަދުވެސް ލޮލުން ކަރުނަހިލޭ އެއް ދުވަސް.
ސުނާމީގެ ރާޅުތައް އުތުރުން ދެކުނަށް މި ޤައުމު ދޮވެލީ، އެ ރާޅުތަކުގެ ކުރިމަތީގައިވާ ކޮންމެ އެއްޗެއް ސުންނާފަތި ކުރަމުން. ގެދޮރާއި، ސްކޫލްތަކާއި، ހޮސްޕިޓަލްތައް ބޭނުންނުކުރެވޭވަރަށް ހަލާކުވެ، ދިވެހި ރައްޔިތުންގެ ބޮޑު އާބާދީއެއް، ވަގުތީ ހިޔާތަކުގައި އުޅެން މަޖުބޫރުކުރުވަމުން.
ލޮނުގެ އަސަރުން ދަނޑުބިންތައް ހަލާކުވެ، ރަށްތަކުގެ ބޯފެން ތަޣައްޔަރުވި. ނިކަމެތިކަމާއި، ނާމާންކަމުގެ ވިލާތައް، މުޅި ޤައުމުގެ ޖައްވު ވަށާލި. ދިވެހި ތާރީޚުގެ ފަތްފުށްތަކުގައި ކަޅުއަކުރުން ލިޔެވުނު މިފަދަ މި ދުވަސް ފަހަނަޅައި، ވިލުންތެރި ފަތިހަކަށް ޤައުމު ގެންދެވުނީ، ކާރިސާގެ ވަގުތުގައި ދިވެހިން ދެއްކި އެއްބައިވަންތަކަމުގެ ލާމަސީލު ނަމޫނާއިންކަން އެއީ، ދެބަސްވެވެން ނެތް ޙަޤީޤަތެއް. އެކަން ހާސިލުކުރެވުނީ، ދިވެހި ދަރިން، އެކަކު އަނެކެއްގެ ކިބައިން ނެރުނު ހިތްވަރުން.
ދިވެހި ސިފައިންނާއި، ފުލުހުންނާއި، މި ކާރިސާއިން އަރައިގަތުމަށް ކުރެވުނު މަސައްކަތުގައި ބައިވެރިވި އެންމެހައި ފަރާތްތަކުން، ޤައުމީ ޚިދުމަތުގައި ދެއްކި ޤުރުބާނީގެ ފުރިހަމަ މިސާލުން. ފަރުދީ ފެންވަރުގައި ވެވުނު އެހީތެރިކަމުން. މި ހުރިހާ ކަމެއްގެ ސިއްރަކީ، މާތް اللهُ سُبْحَانَهُ وَتَعَالَى އަޅުގަނޑުމެންގެ ޤައުމަށް މިންވަރުކުރެއްވި އިސްލާމްދީނުގެ މަތިވެރި ހިދާޔަތާއި، ނޫރު.
މިއަދު އިފްތިތާޙު ކުރެވިގެންމިދާ ރާއްޖޭގެ ފުރަތަމަ ކާރިސީ ހިރާސް ކުޑަކުރުމުގެ އިސްތިރާޖް ޙަޤީޤަތަކަށް ހައްދަވައިދެއްވުމުގައި، އަޅުގަނޑުމެންގެ ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވި އިރުޝާދާއި، މިކަމުގައި އެ މަނިކުފާނު ދެއްވި އެހީތެރިކަމަށް، އެ މަނިކުފާނަށް ފަށްފަށުން ޝުކުރު އަދާކުރަން.
ވެރިކަމަށް ވަޑައިގެންނެވިތާ އަހަރަކާއި ކުޑަ ދުވަސްކޮޅެއްގެ ތެރޭގައި، މިފަދަ އިސްތިރާޖެއް އެކުލަވައިލެއްވުމުން ދައްކައިދެނީ، އެ މަނިކުފާނުގެ ސިޔާސަތު ބައްޓަންކުރެއްވުމުގައި، މިކަންކަމަށް ދެއްވާ އަހަންމިއްޔަތުކަން ޔަޤީން.
އާ ހިތްވަރަކާއި ޢަޒުމަކާއެކު، މާތްﷲގެ ވާގިފުޅާއެކު، ވިލުންތެރި ރާއްޖެއެއް ބިނާކުރުމުގެ ނަތީޖާ ހާސިލުކުރުމަށް މިއަދު އަނެއްކާވެސް އަޅުގަނޑުމެން މިތިބީ ނުކުމެ.
މި ކާރިސާއަށްފަހު ވުޖޫދަށް އައި، ނެޝަނަލް ޑިޒާސްޓަރ މެނޭޖްމަންޓް ސެންޓަރ މިއަދު އޮތޯރިޓީއަކަށް ބަދަލުވެ، ފުރިހަމަ ޤާނޫނީ ބާރުވެރިކަމާއެކު، ކާރިސާގެ ހާލަތަކަށް އިޖާބަދިނުމާއި، ތައްޔާރުވެ ތިބުމަށް، އެ އޮތޯރިޓީން ކުރަމުންދާ މަސައްކަތްތައް ފާހަގަކޮށް، ފަށްފަށުން ޝުކުރު ދަންނަވަން.
އާދެ، އަޅުގަނޑުގެ ވާހަކަކޮޅު ނިންމާލުމުގެ ކުރިން، ސުނާމީ ކާރިސާގައި ނިޔާވި ފަރާތްތަކަށް، މާތްﷲ ސުވަރުގޭގެ ދާއިމީ ނިޢުމަތް ދެއްވައި، އަދި އެ ފަރާތްތަކުގެ ޢާއިލާތަކަށް ކެތްތެރިކަން މިންވަރުކޮށްދެއްވުން އެދި އެކަލާނގެ ޙަޟްރަތުގައި ދުޢާ ދަންނަވަން.
އަޅުގަނޑުމެންގެ ރައްޔިތުންގެ ހިމާޔަތާއި، އަދި އިންސާނީ ޚިދުމަތުގައި މިކުރާ މަސައްކަތުގައި، މާތްﷲ ބަރަކާތްލައްވާށި! އަޅުގަނޑުމެންނަށް ދިމާވާ ކޮންމެ ގޮންޖެހުންތަކަކީ އެއީ، ހުޅުވިގެންދާ ފުރުޞަތެއް ކަމުގައި މާތްﷲ މިންވަރުކުރައްވާށި!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.