ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، އެޗް.އައި.ވީ.، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސް ގެ ނޭޝަނަލް ގައިޑްލައިންތައް އިފްތިތާހުކޮށްދެއްވައިފިއެވެ. އެ ކަމަނާ މި ގައިޑްލައިންތައް އިފްތިތާހުކޮށްދެއްވީ ބައިނަލްއަޤްވާމީ އެއިޑްސް ދުވަސް ފާހަގަކުރުމަށް މިއަދު ހެނދުނު މީރުމާ މާލަމުގައި ބޭއްވި ރަސްމިއްޔާތެއްގައެވެ.
މި ރަސްމިއްޔާތުގައި، އެޗް.އައި.ވީ.، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސް، ނޭޝަނަލް ގައިޑްލައިންތައް އިފްތިތާހުކޮށްދެއްވުމަށްފަހު، އެ ގައިޑްލައިންތަކުގެ މައްޗަށް ޕެނަލް ޑިސްކަޝަނެއް ކުރިއަށްގެންގޮސްފައިވެއެވެ. މި ޕެނަލް ޑިސްކަޝަންގައި، ރާއްޖޭގައި މި ބަލިތައް ފެތުރުމާއި ބަލިތައް ދެނެގަތުމާއި އަވަސް ފަރުވާ ދިނުމާ ގުޅޭ ގޮތުން ވަރަށް ފުޅާ ދާއިރާއެއްގައި މަޝްވަރާކުރައްވާފައިވެއެވެ.
އެޗް.އައި.ވީ. އަށް ފަރުވާ ދިނުމާ ގުޅޭ ގައިޑްލައިން އަލުން އެކުލަވާލެވިފައިމިވަނީ ނުވަ އަހަރުގެ މެދުކެނޑުމަކަށްފަހުގައެވެ. އެޗް.އައި.ވީ.، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސްއާ ގުޅޭ ގައިޑްލައިންތައް އެކުއެކީގައި މުތާލިއާ ކުރެވި، އެކުލަވާލެވި، އަދާހަމަކުރެވި، ތަންފީޒުކުރެވެން ފެށިގެން ދިއުމަކީ މިދާއިރާއިން ރާއްޖެއަށް ލިބިގެންދާ ވަރަށް ބޮޑު ކުރިއެރުމެކެވެ. މިއަދު އިފްތިތާހުކުރެވުނު މި ގައިޑްލައިންތަކަކީ ދުނިޔޭގެ ޞިއްޙަތު ޖަމިއްޔާގެ އެންމެ ފަހުގެ އިރުޝާދާއި ލަފާގެ މައްޗަށް އެކުލަވާލާފައިވާ ގައިޑްލައިންތަކެކެވެ.
