بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
އޮމަދޫ ކައުންސިލްގެ ރައީސް އަދި ކައުންސިލަރުން، ޑަބްލިޔޫ.ޑީ.ސީ.ގެ މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ކުންފުނިތަކުގެ ވެރިން، ވަޑައިގެން ތިއްބެވި އެންމެހައި ޢިއްޒަތްތެރިން، އޮމަދޫގެ ލޮބުވެތި ރައްޔިތުން، އަދި މި ޖަލްސާ ބައްލަވާ، އަޑުއައްސަވާ ދިވެހި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އަޅުގަނޑަށް މި ރަށަށް އާދެވުނު ހޫނުގަދަ ވަގުތުވެސް، ރަށުގެ ކުދިބޮޑު ހުރިހާ ރައްޔިތުން ކަހަލަ ގޮތަކަށް ނުކުމެވަޑައިގެން ވިދާޅުވި ހޫނު މަރުޙަބާއަށްޓަކައި އަޅުގަނޑުގެ ހިތުގެ އެންމެ ފުންމިނުން ފަށްފަށުން ޝުކުރު ދަންނަވަން.
އާދެ، އަޅުގަނޑު ދަންނަވާލަން ބޭނުންވަނީ، ހަމަ އެންމެ ދިގުކޮށްވެސް، ކުރުކޮށްވެސް މައިގަނޑު އެއް ވާހަކަ. އޮމަދޫގެ ތަރައްޤީއަށްޓަކައި ރައްޔިތުން އެދޭގޮތަށް، ރައްޔިތުންގެ އަޑުއަހައިގެން، ރައްޔިތުން ބޭނުންފުޅުވާ ގޮތަށް ކަންކަން ކޮށްދޭނެ ވާހަކަ. އެއީ، އަޅުގަނޑު ދޭ ޔަޤީންކަމަކީ.
މިގޮތުން ބަލާއިރު، ބަނދަރުގެ މައްސަލައަކީ އެންމެ މުހިންމު ކަންތައް. އެ މައްސަލައަށް ރަނގަޅު ޙައްލެއް އައުން. މި ނިމިގެންދިޔަ އަހަރުގެ ތެރޭގައި، މިކަމެއް ނުކުރެވުނު. އަދި މިފަދަ ގިނަ ކަންތައްތަކެއް އެބަހުރި، ރާއްޖޭގެ ހަމަ ގިނަ ކަންކޮޅުތަކުގައި. އެކި ސަބަބުތަކާ ހެދި. މައިގަނޑު ގޮތެއްގައި ބަޖެޓުގެ ތެރެއިން އެކަންކަމަށް ޖާގަ ނެތުމުގެ ސަބަބުން. އަޅުގަނޑުމެންނަށް ލިބިފައި އޮތީ، ވާރުތަކުރި ބަޖެޓެއް. އެހެންވީމާ، ކަންއޮތީ އަޅުގަނޑުމެން ބޭނުންވި ގޮތަކަށް ނޫން. ނަމަވެސް، މިހާރު މި ފެށެން އުޅޭ އަހަރު އިރާދަކުރެއްވިއްޔާ ކަންކަން ތަފާތުވާނެ. އެހެންވީމާ، ރަށުގެ ރައްޔިތުންގެ ކަންބޮޑުވުންތަކަށް ޙައްލު ލިބޭގޮތަށް، ކަންކަން ޙައްލުވެގެންދާ ގޮތަށް ފުރިހަމަ ބަނދަރެއް ހަދައިދޭނެ ކަމުގެ ޔަޤީންކަން ދެން. މި އަންނަ އަހަރު އެ މަސައްކަތް ހިނގާނީ. އެ ޔަޤީންކަން އަޅުގަނޑު ތިޔަބޭފުޅުންނަށް އަރުވަން.
އާދެ، ހަމަ އެއާއެކީގައި، ދެން ގިރާ ސަރަޙައްދުގެ މައްސަލަ. މި ދެ މަޝްރޫޢުގައިވެސް އޮތީ ސޮއިކުރެވިފައި. އެހެން ނަމަވެސް، ނުހިނގާ އޮތީ. އެހެންވީމާ، ބަނދަރުގެ މަސައްކަތް ހިނގަމުންދާއިރު، އެއާއެކުގައި އެ މައްސަލައަށްވެސް ޙައްލު ގެނެސްދޭނަން. އެހެންވީމާ، ދެ މަޝްރޫޢު އެކުއެކީގައި އިރާދަކުރެއްވިއްޔާ ނިންމާލަދޭނަން. މި އަންނަ އަހަރު އެ މަސައްކަތް ކުރިއަށްދާނެ ވާހަކަ އަޅުގަނޑު ދަންނަވަން. ވީހާވެސް ކުރީކޮޅު. އަހަރުގެ ހަމަ އެންމެ ކުރީކޮޅު މަސައްކަތްތައް ފަށައި، ހަމަ އެންމެ ސަމާލުކަންދޭ ކަމެއްގެ ގޮތުގައި، އެ މަސައްކަތް ކޮށްދިނުމަކީ، އަޅުގަނޑު ތިޔަބޭފުޅުންނަށް ދޭ ޔަޤީންކަމެއް. އިރާދަކުރެއްވިއްޔާ އެގޮތަށް ކުރިއަށް ގެންދާނަން.
އާދެ، މި އަންނަ އަހަރުގެ ބަޖެޓުގައި، އާ މަޝްރޫޢުތައް ހިންގުމަށް އަޅުގަނޑުމެން ތަރުތީބުކޮށްފައި އޮތް ހަމަޔަށް ބަލާއިރުގައި، ޞިއްޙީ ދާއިރާގެ ތަރައްޤީއާއި، އަދި ތަޢުލީމީ ދާއިރާގެ ތަރައްޤީއަށް ކުރަންހުރި ކަންކަމަށް ވަރަށް ވަރަށް ބޮޑު އިސްކަމެއްދޭ ގޮތަށް މިއޮތީ. މި ރަށުގައިވެސް ހަމަ އެގޮތަށް، ޞިއްޙީ މަރުކަޒުގެ ޙާލަތު ވަރަށްދަށްކޮށް ހުރީ. އަޅުގަނޑު އިރާދަކުރެއްވިއްޔާ މި ބައްދަލުވުން ނިންމާލާފައި ޞިއްޙީ މަރުކަޒަށް ގޮސްލާނަން. އަދި މި ސްކޫލް މިއޮތީ އޮތް ޙާލަތު. އެހެންވީމާ، ސްކޫލަށް ބޭނުންވާ މަލްޓި ޕަރޕަސް ހޯލާއި، ކްލާސްރޫމްތައް އިރާދަކުރެއްވިއްޔާ މި އަންނަ އަހަރު ހަދައިދޭނަން. ހަމަ އެފަދައިން، ޞިއްޙީ މަރުކަޒަށް ބޭނުންވާ އިތުރު ޖާގައާއި ވަސީލަތްތައް، މި އަންނަ އަހަރު ހަމަކޮށްދޭނެ ކަމުގެ ޔަޤީންކަންވެސް އަރުވަން. މިއީ ކެމްޕެއިންގައިވެސް އަޅުގަނޑު ދައްކާފައި ހުރި، ނޫނީ ވެފައި ހުރި ވަޢުދުތައް.
އާދެ، ކުޅިވަރުގެ ދާއިރާއިން ވަރަށްގިނަ ކަންތައްތައް އެކި ރަށްރަށުގައި ކުރަންހުރި ފަދައިން، މި ރަށުގައިވެސް ހުރީ ކުރަން ޖެހިފައި. ޚާއްޞަ ކަމެއްގެ ގޮތުގައި، އަންހެން ބޭފުޅުންގެ ހޭންޑްބޯލް ކޯޓެއް މި އަންނަ އަހަރު އިރާދަކުރެއްވިއްޔާ ހަދައިދޭނެ ވާހަކަ ދަންނަވަން. ހަމަ އެއާއެކީގައި، ފުޓްބޯޅަ ދަނޑުގެ މަސައްކަތްވެސް ކުރިއަށްދާނެ.
އާދެ، ކުނި މެނޭޖް ކުރުމަކީ، މުޅި ރާއްޖެ ޝާމިލްވާ ގޮތަށް، އެއް މައްސަލައެއް ގޮތުގައި އޮތް ބޮޑު މައްސަލައެއް. އެހެންވީމާ، އަޅުގަނޑުމެން ނިންމާފައި މިއޮތީ، ދެމެހެއްޓެނިވި ގޮތެއްގައި ވަށާޖެހޭ ޙައްލެއް އެކަމަށް ގެންނަން. އެހެންވީމާ، އޭގެތެރެއިން ހިނގާ މަޝްރޫޢުތައް ހިނގަމުންދާނެ. މި ރަށުގައި ޤާއިމުކުރެވިފައި ހުރި މަރުކަޒަށް ތަކެތި ހަމަކޮށްދިނުމަކީ، އޭގެތެރެއިން ކުރަން ޖެހިފައި އޮތް ކަންތައް. އެހެންވީމާ، އެގޮތަށް އަޅުގަނޑުމެން އިރާދަކުރެއްވިއްޔާ އެކަން ކުރިއަށް ގެންދާނަން. އަދި ހަމަ އެއާއެކީގައި، ދެންވެސް ހުރި ގިނަ ކަންކަމުގައި، މި އަންނަ އަހަރު ވެގެންދާނީ، ނަތީޖާ ނެރެދިނުމުގެ ޢަމަލީ މަސައްކަތް ފެންނަ އަހަރަކަށް.
އާދެ، މި ދަތުރު، މި ސިލްސިލާގެ ދަތުރުގެ ފަހު މަންޒިލް މިއަދު މިއީ. މިއަދާ ހަމަޔަށް އަޅުގަނޑަށް ބައްދަލުކުރެވިއްޖެ، ހަތަރު ރަށެއްގެ ކައުންސިލް ފިޔަވައި ހުރިހާ ކައުންސިލަކާ. އަދި އަތޮޅު ކައުންސިލްތަކާއި ސިޓީ ކައުންސިލްތަކާ. އެހެންވީމާ، މި ހަތަރު ރަށާ ބައްދަލުކުރުން އޮތީ. އެއީވެސް ދަތުރުގެ ތެރެއިން އެކި ސަބަބުތައް ދިމާވެ ބައްދަލުނުވީ. އެހެންވީމާ، މިދިޔަ ހުރިހާ ބައްދަލުވުންތަކުގައި އަޅުގަނޑަށް ވަނީ ރައްޔިތުންގެ ފަރާތުން ކަންކަން ސާފުކޮށްދެއްވާފައި، ކައުންސިލަރުންނާއި ޑަބްލިޔޫ.ޑީ.ސީ.އިން.
އެހެންވީމާ، މި ދެންނެވި ކަންކަމުގެ ނަތީޖާއަކަށް ވާނީ، މިގޮތަށް ވަޢުދުތައް ފުއްދުމަށްޓަކައި، ހުރިހާ ރަށެއްގައިވެސް މި އަންނަ އަހަރުގެ ތެރޭގައި އިރާދަކުރެއްވިއްޔާ ޢަމަލީ މަސައްކަތް ހިނގާ އަހަރަކަށްވުން.
އަދި ކުރިއަށް އޮތް ތަނުގައި، ކުރިއަށް އޮތް ހަފްތާތަކާއި މަސްތަކުގައި ތަރުތީބު ކުރެވިގެން، އަޅުގަނޑަށް ދެން ނުދެވިހުރި ހުރިހާ ރަށަކަށްވެސް އިރާދަކުރެއްވިއްޔާ ދާނަން. އެއްވެސް ރަށެއް ދޫކޮށްނުލާ. ހަމަ ހުރިހާ ރަށަކަށް، 2025 ވަނަ އަހަރުގެ ތެރެއަށް ބަހާލައިގެން އިރާދަކުރެއްވިއްޔާ ދާނެ ވާހަކަ ދަންނަވަން.
އެހެންވީމާ، މިއަދުގެ މި ދަތުރު ނިމުނަސް އެއްވެސްވަރަކަށް ކަންބޮޑުވެނުލެއްވުމަށް އަދި މާޔޫސްވެވަޑައިނުގަތުމަށް އަޅުގަނޑު އެދެނީ. އަޅުގަނޑު ބޭނުންވާ ގޮތަކީ ހަމަ ކޮންމެ ރަށެއްގެ ރައްޔިތުންނާވެސް ބައްދަލުކުރުން. އެހެންވީމާ، ހަމަ ކޮންމެ ރަށަކަށް ދާނަން އިރާދަކުރެއްވިއްޔާ. ގޮސް ރައްޔިތުންނާ ބައްދަލުކުރާނަން. އަދި ނުދެވުނަސް، ދެވެންދެންވެސް މަސައްކަތް ހިނގާނެ. އެއީ، ކައުންސިލްތަކާ ބައްދަލުވެ، މަޢުލޫމާތުތައް އެއްކުރެވިފައި މިހާރު ވަނީ. އެގޮތަށް ބަލައިގެން، ބަޖެޓް އެއޮތީ ފާސްކުރެވިފައި. އެހެންވީމާ، މަސައްކަތްތައް ބާރަށް ފެށިގެން ހިނގާނެ. އަދި އަޅުގަނޑަށް ވަގުތުވީ މިންވަރަކުން މި އަންނަ އަހަރުގެ ތެރެއަށް ބަހާލައިގެން، ހުރިހާ ރައްޔިތުންނާ ބައްދަލުވެސް ކުރާނަން.
އާދެ، އަދިވެސް އެއްފަހަރު، މި ރަށުގެ ރައްޔިތުން އަޅުގަނޑަށް ވިދާޅުވި ހޫނު މަރުޙަބާއަށް ފަށްފަށުން ޝުކުރު ދަންނަވަމުން، ތިޔަ ބަހައްޓަވާ ގާތްކަމަށް ވަރަށް ބޮޑަށް ޝުކުރު ދަންނަވަން. އޮމަދޫގެ ރައްޔިތުންގެ އުންމީދުތަކުގައި އިރާދަކުރެއްވިއްޔާ ޙަޤީޤީ ކުލަ، ޙަޤީޤަތަށް ކުލަ ޖައްސައިދޭނެ ކަމުގެ ޔަޤީންކަން ތިޔަބޭފުޅުންނަށް އަރުވަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް ލައްވައި، އަޅުގަނޑުމެންގެ ޤައުމަށް އުފާފާގަތިކަން މިންވަރުކުރެއްވުން. އާމީން.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.