بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
މަހިބަދޫ ކައުންސިލްގެ ރައީސް އަދި ކައުންސިލަރުންނާއި، ޑަބްލިޔޫ.ޑީ.ސީ.ގެ މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ވަޒީރުން، މިތަނަށް ވަޑައިގެން ތިއްބެވި މަހިބަދޫގެ ލޮބުވެތި ރައްޔިތުން، އަދި އެހެން ރަށްރަށުގެ ކައުންސިލްތަކުގެ ބޭފުޅުން، މި ޖަލްސާ ބައްލަވަމުން އަދި އަޑުއައްސަވަމުން ގެންދަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މި ރަށަށް އަޅުގަނޑުމެންނަށް އާދެވުމުން، ތިޔަބޭފުޅުން ވިދާޅުވި ހޫނު މަރުޙަބާއަށް އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
އާދެ، ކުރިންވެސް އަޅުގަނޑަށް މި ރަށަށް އެކިފަހަރު މަތިން އާދެވިފައިވޭ. ކެމްޕެއިން ތެރޭގައިވެސް. އެހެންކަމުން، މިފަހަރު މިގޮތަށް އާދެވުމުން ޙަޤީޤަތުގައިވެސް ވަރަށް އުފާކުރަން. ތިޔަބޭފުޅުން އެދިވަޑައިގެންނެވި ކަންކަމުގެ ތެރެއިން، އޭރުގައި އަޅުގަނޑު ވަޢުދުވެފައިވާ ކަންތައްތައް އިރާދަކުރެއްވީތީ ފުއްދައިދިނުމުގެ މަސައްކަތް މިހާރު މި ފެށިގެން ދަނީ. އެންމެ މުހިންމު ކަމެއްގެ ގޮތުގައި ފަޅު، މާފަރު ފަޅު އެއީ، ތިޔަބޭފުޅުންގެ އަދި މި ސަރަޙައްދަށްވެސް ޙަޤީޤަތުގައި އެންމެ މުހިންމު ތަރައްޤީގެ މަސައްކަތްތައް ކުރެވޭނެ މަންޒިލް ކަމަށްވާތީ، ތިޔަބޭފުޅުން އެދިވަޑައިގެންނެވި ގޮތަށް، އިޚްތިޞާޞްގެ ތެރޭގައި، ރަށުގެ ބައެއްގެ ގޮތުގައި އަޅުގަނޑު ހަމަޖައްސާފައި އެވަނީ. އިރާދަކުރެއްވިއްޔާ ދެން އޮތް ތަނުގައި، މި އަންނަ އަހަރު، 2025 ވަނަ އަހަރުގެ ތެރޭގައި، ރައްޔިތުން އެދިވަޑައިގަންނަވާ ވިސްނުންފުޅާ އެއްގޮތަށް ރަސްމީކޮށް ކޮންސެޕްޓް ފައިނަލް ކުރެވިގެންދާނެ. އަދި ޢަމަލީގޮތުން ބިން ހިއްކުމާއެކު، ދެން ކުރަންހުރި ހުރިހާ ކަމެއްގެ މަސައްކަތްތައް އަޅުގަނޑުމެން ތަރުތީބުކޮށް، އެ ތަނަކީ މަހިބަދޫ، އަޅުގަނޑުމެން މި ކަނޑައެޅި އަރބަން ސެންޓަރުގެ ޙަޤީޤީ މާނައިގައި ތަރައްޤީ ކުރެވިގެންދާ ތަނަކަށް އިރާދަކުރެއްވިއްޔާ އަޅުގަނޑުމެން ހަދައިދޭނަން. އެ ޔަޤީންކަން އަޅުގަނޑު އަރުވަން.
އާދެ، ރާއްޖޭގެ އެކި ސަރަޙައްދުތަކުގައި އަރބަން ސެންޓަރުތައް އަޅުގަނޑުމެން މި ކަނޑައަޅަނީ، ވަރަށްގިނަ ކަންކަމަށް ބަލާފައި. އަޅުގަނޑު މިހާތަނަށް އަދި ކެމްޕެއިންގައިވެސް އަދި މެނިފެސްޓޯގައިވެސް ހިމަނައިގެން އިޢުލާނުކޮށްފައި މިވަނީ 7 ރަށެއް. އެއީ، އެންމެ އުތުރާއި، ދެކުނުގެ އިންޓަރގްރޭޓަޑް ޒޯން ފިޔަވައި 7 ރަށެއް. މި 7 އަރބަން ސެންޓަރު މި ތަރައްޤީ ކުރަނީ، މިތަންތަނުގައި އެންމެމަތީ ފަންތީގެ ހުރިހާ ކަމެއް ޤާއިމުކުރުމުގެ ކޮންސެޕްޓްގައި، ވިސްނުމުގައި. އެއީ، ދުރު ރާސްތާގެ ތަރައްޤީއަށް ރާއްޖެ ބައްޓަންކުރަން ވިސްނާ ކަމުގައިވަންޏާ ކުރަންޖެހޭ ކަމެއް ކަމުގައިވާތީ. އެއީ، ތަޢުލީމީ ދާއިރާއިންވިޔަސް، ޞިއްޙީ ދާއިރާއިންވިޔަސް، އަދި އިޖުތިމާޢީ އެހެން ހުރިހާ ކަމަކުންވިޔަސް، އިޤްތިޞާދީ ގޮތުންވިޔަސް، އެންމެ ރަނގަޅު ފެންވަރުގައި ޚިދުމަތްތައް ލިބޭ ސަރަޙައްދުތަކެއް، ރާއްޖޭގެ އެކި ކަންކޮޅުތަކުގައި ޤާއިމުވެގެންދިޔުން ވާނީ، އާބާދީއާއި ތަރައްޤީ އެއްފަސްކުރުމުގެ ސިޔާސަތުގެ ތެރެއިން ރާއްޖެއަށް ދެމެހެއްޓެނިވި ތަރައްޤީ އަންނާނެ ކަންތައް ކަމުގައި. އެއީ، ޤުދުރަތީ ގޮތުން ރާއްޖޭގައި އޮތް ޙަޤީޤަތްތަކަށް ބަލާއިރުގައިވެސް، ކްލައިމެޓް ޗޭންޖްގެ މި އަންނަ އެކިކަހަލަ ކަންކަމަށް ބަލާއިރުގައިވެސް އަދި އެހެން ހުރިހާ ގޮތަކުން ބަލާއިރުގައިވެސް އެންމެމަތީ ފަންތީގައި، އެންމެ މަތީ ފެންވަރުގައި ކޮންމެ ރައްޔިތަކަށްވެސް ޚިދުމަތް ދިނުމަށް ބަލާއިރުގައި، ރާއްޖޭގެ ސަރަޙައްދުތަކެއް ޖެހޭ ތަރައްޤީވާން.
އެހެންވީމާ، އެ ކޮންސެޕްޓްގައި އަޅުގަނޑުމެން ކަންތައްތަކެއް ވަޢުދުތަކެއްވީ. އަދި މިހާރު މި ފަށާ މަރުޙަލާ، 20 އަހަރު ދުވަހަށް ރައްޔިތުން އެދިވަޑައިގަންނަވާ ކަންކަން ހިމަނައިގެން ތައްޔާރުކުރަން މި ފަށާ ޤައުމީ ތަރައްޤީގެ މާސްޓަރ ޕްލޭންގައިވެސް ކަންތައްތައް ބައްޓަންވެގެންދާނީ، އެކަހަލަ ގޮތަކަށް. އެއްގޮތަކަށްވެސް 7 ސަރަޙައްދުން ނިންމާލާ ގޮތަކަށް ނޫން. އެއީ، ކޮންމެހެންވެސް ތަރައްޤީ ކުރަންޖެހޭ 7 ސަރަޙައްދު.
އެހެންވީމާ، މަހިބަދޫ، މި އަރބަން ސެންޓަރަކަށް މި ކަނޑައެޅީ، މި ފަޅު ހިމަނައިގެން މުހިންމު ޑިވެލޮޕްމަންޓްތަކެއް ގެންނަން ބޭނުންވެގެން. އެހެންވީމާ، ޔަޤީންކަން މި އަރުވަނީ، އެގޮތަށް އިރާދަކުރެއްވިއްޔާ ކުރިއަށް ގެންދާނެކަން. އޭގެ ސަބަބުން މި ރަށުގެ ރައްޔިތުންގެ ގެދޮރުވެރިކަމާއި، އަދި އިޤްތިޞާދީ މަސައްކަތްތަކާއި، އަދި މި ސަރަޙައްދަށް އެކިގޮތްގޮތުން ގެދޮރުވެރިކަމާއި، އިޤްތިޞާދީ މަސައްކަތްތަކަށް ފައިދާވެގެންދާ މުހިންމު ހަބަކަށްވާނެތީވެ. އެހެންވީމާ، އެގޮތަށް އިރާދަކުރެއްވިއްޔާ ކަންކަން ގެންދަން އަޅުގަނޑުމެން މަސައްކަތް ކުރާނަން. އަދި އިރާދަކުރެއްވިއްޔާ އެގޮތަށް އެކަން ކުރާނަން.
ހަމައެއާއެކީގައި، މިހާރުވެސް މި ރަށުގައި އޮތް ބިމުގެ ތެރެއިން ލޭންޑްޔޫސް ޕްލޭންގައި ކަނޑައަޅާފައި އޮތް ސަރަޙައްދުގައި، 100 ހައުސިންގ ޔުނިޓު ޤާއިމުކުރުމަކީ، އަޅުގަނޑު ވެފައި އޮތް ވަޢުދެއް. މި އަންނަ އަހަރަށް މި ފާސްކުރި ބަޖެޓަށް އަޅުގަނޑު މި ކިޔަނީވެސް ބޯހިޔާވަހިކަމުގެ ބަޖެޓް. އެއީ، މި ރަށް ހިމެނޭހެން. ދެން އެހެން ރަށްރަށުގައިވެސް މި ދެންނެވި ގޮތަށް ގެދޮރު ބިނާކުރުމަށްޓަކައި އަޅުގަނޑު ވެފައި ހުރި ވަޢުދުތައް ފުއްދުމުގެ ބޭނުމުގައި އެކުލަވައިލި ބަޖެޓަކަށްވާތީ. އެހެންވީމާ، އިރާދަކުރެއްވިއްޔާ މި އަންނަ އަހަރު، 2025 ވަނަ އަހަރަކީ، މި ރަށުގައި ޤާއިމުކުރުމަށް އަޅުގަނޑު ވީ ވަޢުދު އިރާދަކުރެއްވިއްޔާ ފުއްދާ އަހަރު. އިރާދަކުރެއްވިއްޔާ، އެ 100 ޔުނިޓުގެ މަސައްކަތް އަޅުގަނޑުމެން ފަށާނަން. އަދި ވީހާވެސް ބާރުމިނެއްގައި ގެންގޮސް ނިންމައިދޭނެ ކަމުގެ ޔަޤީންކަން އަރުވަން.
އާދެ، ދެންމެ އަޅުގަނޑު ދެންނެވި ގޮތަށް، އަރބަން ސެންޓަރެއްވީމަ، ކޮންމެގޮތެއްވިޔަސް ހުރިހާ ކަމެއްވެސް އެންމެމަތީ ފަންތިއަށް ގެންދިޔުމަކީ އަޅުގަނޑުމެންގެ ސިޔާސަތު. އެހެންވީމާ، އެ ފަޅު ހިއްކިގެން އެންމެ ފުރިހަމަމިނަށް ދާނީ. ދަންދެންވެސް މި ބިމުގައި މިހާރު އޮތް ޖާގައިގެ ތެރޭގައިވެސް ކަންކަން ކުރެވެން އޮތްގޮތަށް، ލޭންޑް ޔޫސް ޕްލޭންގައި އޮތް އެކްސްޓެންޑްތަކަށް، މިންވަރަކަށް އަޅުގަނޑުމެން ކަންކަން ކުރާނީ.
ކުޅިވަރުގެ ދާއިރާއިންވެސް ފާހަގަކުރެވިފައި ހުރި ކަންކަން، އަންހެން ބޭފުޅުންގެ ހޭންޑްބޯލް ކޯޓު ކަމުގައިވިޔަސް، އަދި ޒުވާނުންގެ މަރުކަޒު ތަރައްޤީކޮށް، އެތަން މިހާރު ބަންދުކޮށްފައި ހުރި ހުރުން ބަދަލުކޮށް، އެތަނަށް ބޭނުންވާ ވަސީލަތްތަކާއެކު ތަރައްޤީ ކުރުމާއި، އަދި ފުޓްބޯޅަ ދަނޑުގެ ލައިޓް ހަރުކުރުން، މި އަންނަ އަހަރު ކުރީކޮޅު އިރާދަކުރެއްވިއްޔާ ވަރަށް އަވަހަށް ކުރިއަށްދާނެ.
އެހެންވީމާ، މިހިރަ ކަހަލަ ކަންކަން، ކުޅިވަރުގެ އެކި ކަންކަން، ފުޓްބޯޅަ ދަނޑާއި، ހޭންޑްބޯލް ކޯޓު، ޒުވާނުންގެ މަރުކަޒު، އަދިވެސް ދެންހުރި ކަންކަން ކުރުމަކީ، އަޅުގަނޑުމެން އިރާދަކުރެއްވިއްޔާ އެންމެ އިސްކަންދޭނެ ކަންތައްތައް. މި ރަށުގައި މިގޮތަށް ކުރަންހުރި ކަންކަން، މި އަންނަ އަހަރުގެ ތެރޭގައި ކުރިއަށްދާނެ. އެ ޔަޤީންކަން ތިޔަބޭފުޅުންނަށް އަޅުގަނޑު ދެން.
އާދެ، ދެންހުރި ކަންކަމުގައިވެސް ހަމަ އެގޮތަށް އޮތީ އިނގޭތޯ. ކޮންމެ ކަމެއް ވަކިން އަޅުގަނޑު ލިސްޓް ނުކުރިޔަސް، ޖުމްލަގޮތެއްގައި އަޅުގަނޑުމެންގެ ސިޔާސަތަކީ މިއީ ކަމަށްވާތީ. އެއީ، ދީނީ ދާއިރާއިން އިސްލާމިކް ސެންޓަރެއް ޤާއިމުކުރުމަކީވެސް ހަމަ ތިޔަބޭފުޅުން އެދިވަޑައިގަންނަވާ ކަމެއް. އަދި ދެންހުރި ކަންކަންވެސް. އެހެންވީމާ، އަޅުގަނޑު ދެންނެވި ފަދައިން، އަރބަން ސެންޓަރެއްގައި ހުންނާނެއޭ މި ހުރިހާ ކަމެއްވެސް. މި ހަތަރު އަހަރު، ކުރިއަށް އޮތް ހަތަރު އަހަރުގެ ތެރޭގައި، މި ދައުރުގެ ތެރޭގައި މިކަންކަން ކޮށްދިނުމަކީ، އަޅުގަނޑުމެންގެ ސިޔާސަތު. އެއީ، ކަނޑައެޅިފައި އޮތް ސިޔާސަތު. އެހެންވީމާ، އެގޮތަށް އެކަންކަން އަޅުގަނޑުމެން ކުރިއަށް ގެންދާނެ ވާހަކަ ހަމަ ދަންނަވަން.
އެހެންވީމާ، ކުރިއަށް މިއޮތް މަސްތަކުގައި އިރާދަކުރެއްވިއްޔާ އަޅުގަނޑުމެން ކަންކަން ގެންދާނީ، ޢިއްޒަތްތެރި މަޖިލިސް މެންބަރާއި، ކައުންސިލާއި، މި ރަށުގެ ރައްޔިތުންނާ ގުޅިގެން. ރަށުގެ ރައްޔިތުން ބޭނުންވާ ގޮތަށް ތަރައްޤީގެ ކަންކަން ބައްޓަންކުރުމުގެ މަސައްކަތް ގެންދާނީ. ހަމަ އެހެން، މި ދާއިރާގެ އެހެން ރަށްތައްވެސް. ކޮންމެ ރަށެއްގެ ރައްޔިތުންނަށްވެސް އަޅުގަނޑު މިދޭ ޔަޤީންކަމަކީ، އެގޮތަށް ކަންކަން ގެންދާނެ ކަމުގެ ޔަޤީންކަން.
އަޅުގަނޑު މި ފަށައިގެން އުޅޭ ދަތުރުތަކުގައި، ފުރަތަމަ އަޅުގަނޑު މި ބަލަނީ، ހުރިހާ ދާއިރާތައް، ނޫނީވިއްޔާ ހުރިހާ ކައުންސިލްތަކާ ބައްދަލުވާނެ ގޮތަކަށް ދިގުކޮށްލައިގެން ދަތުރުކުރަން. މިހާރު ގާތްގަނޑަކަށް މި ރައުންޑް މި ނިމެނީ. މި އަތޮޅު ނިމުނީމާ ދެން ބާކީ އޮންނާނީ ހަތަރު ކައުންސިލެއް. އެއީ، އަޅުގަނޑު ކުރީގައި ކުރި ދަތުރުތަކުގައި އެކި ސަބަބުތަކާ ހެދި ބައްދަލުނުވެ އޮތް ހަތަރު ކައުންސިލް. އެހެންވީމާ، އެ ހަތަރު ކައުންސިލާ ބައްދަލުވީމާ، މުޅި ރާއްޖޭގެ ހުރިހާ ކައުންސިލަކާ އަޅުގަނޑަށް ބައްދަލުވީ.
އަޅުގަނޑު ދެން ކުރަން ނިންމާފައި އޮތީ، ކޮންމެ ރަށަކަށް، އަޅުގަނޑު ނުދާ ހުރިހާ ރަށަކަށް ދިޔުމުގެ ދަތުރުތައް. އެހެންވީމާ، އެ ދަތުރުތައްވެސް އިރާދަކުރެއްވިއްޔާ ފަށާނަން. އެހެންވީމާ، މި ދާއިރާގެ ދެންހުރި ރަށްތަކަށްވެސް، މި އަތޮޅުގައިވެސް އަޅުގަނޑަށް ނުދެވި ހުރި ރަށްތަކަށް ރަސްމީކޮށް ނުދެވި ހުރި ރަށްތަކަށް އަދި މުޅި ރާއްޖޭގައިވެސް ނުދެވޭ ރަށްތަކަށް މި އަންނަ އަހަރުތެރެއަށް ބަހާލައިގެން، މުޅި އަހަރުތެރެއަށް ބަހާލައިގެން، މި އަންނަ އަހަރު ނިމުމުގެ ކުރިން، ރާއްޖޭގެ ކޮންމެ ރަށަކަށް އިރާދަކުރެއްވިއްޔާ އަޅުގަނޑު ދާނަން. ގޮސްފައި ކޮންމެ ރަށެއްގެ ރައްޔިތުންނާ އިރާދަކުރެއްވިއްޔާ އަޅުގަނޑު ބައްދަލުކުރާނަން. އޭރުން ތިޔަބޭފުޅުންގެ ފަރާތްޕުޅުން ސީދާ އަޅުގަނޑަށް ކަންކަން އެނގިގެންދާނެ. އަދި ތިޔަބޭފުޅުންނަށް ކަންކަން ވިދާޅުވެވޭނެ. ސީދާ ރައްޔިތުން ބޭނުންވާގޮތަށް ކަންތައްތައް ގެންދިޔުމުގައި، އަޅުގަނޑަށް ސީދާ ކަންކަން އޭރުން ވަރަށް ފަސޭހަވެގެންދޭ.
ކައުންސިލްތަކުންވެސް ވަރަށް ފުރިހަމައަށް އަޅުގަނޑަށް އެހީތެރިކަން ދޭ. އެނޫން ވާހަކައެއް ނޫން މި ދަންނަވަނީ. އެހެން ނަމަވެސް، ރައްޔިތުންނާ ސީދާ ބައްދަލުކޮށްގެން، ކަންކަން ކުރުމުގެ ބޭނުމުގައި. އެހެންވީމާ، މި ދަތުރުތަކުގައި، މިހާރު މިގެންދާ ރައުންޑުގައި އަޅުގަނޑަށް ނުދެވޭ ރަށްތަކަކީ، އަޅުގަނޑު ދޫކޮށްލާ ރަށްތަކެއް ނޫން. އަޅުގަނޑަށް އެކި ކައުންސިލްތަކުން ބައްދަލުވެގެން ހަމަ އެ ވާހަކަ ފާހަގަކުރައްވާތީ މި ދެންނެވީ. އިރާދަކުރެއްވިއްޔާ ހަމަ ހުރިހާ ރަށަކަށްވެސް އަޅުގަނޑު ދާނަން. އަދި ދެވަނަ ރައުންޑަކަށްވެސް، މެދަށް އެއް އަހަރު ދޫކޮށްލާފައި، އިރާދަކުރެއްވިއްޔާ 2027ގެ ތެރޭގައި އަޅުގަނޑު ހުރިހާ ރަށަކަށް އަނެއްކާވެސް ދެވަނަ ބުރެއް އެޅުން އަޅުގަނޑުގެ ޕްލޭނަކީ. އެއީ، އަޅުގަނޑު ވަޢުދުވެސް ވެފައި އޮތްގޮތް. ދައުރުގެ ތެރޭގައި ދެފަހަރު ކޮންމެ ރަށަކަށް ދާން.
އާދެ، އެހެންވީމާ، މި ރަށުގެ ތަރައްޤީއަށް މި ދެންނެވި ގޮތަށް އެންމެ މުހިންމު މަޝްރޫޢުގެ އިތުރަށް، މިހާރު މިއޮތް ފަސްގަނޑުގައި ޖާގަ އޮތް މިންވަރުން، ޕްލޭންގައި އޮތް މިންވަރުން ގެދޮރު ބިނާކުރުން، ކުޅިވަރުތައް، އަދި ހޮސްޕިޓަލް ތަރައްޤީކުރުންވެސް އެބައޮތް. މިހާރު މިއޮތް ހޮސްޕިޓަލަށް ޖާގައިތުރުކޮށް، އަދި ހޮސްޕިޓަލް ތަރައްޤީކުރުން. މިހެންގޮސް ގިނަ ކަންކަން އެބަހުރި ކުރަން. އެހެންވީމާ، އެކަންކަން އިރާދަކުރެއްވިއްޔާ، ކުރިއަށްގެންދާނެ ވާހަކަ ހަމަ ޔަޤީންކަމާއެކީގައި މި ދަންނަވަނީ.
އެއާއެކީގައި، ދެންހުރި ކަންކަން. ބިން ހިއްކައިގެން، ފަޅު ހިއްކައިގެން އަޅުގަނޑުމެން އެ މާސްޓަރ ޕްލޭނާ އެއްގޮތަށް އިސްކަންދީގެން ކަންކަން ކުރިއަށް ގެންދާނަން. ހަމަ އެގޮތަށް، މި އަންނަ އަހަރުގެ ތެރޭގައި، އަޅުގަނޑުމެން މުޅި ރާއްޖޭގެ ތަރައްޤީ ބައްޓަން ކުރަން ނިންމާފައި މިވަނީ.
މި ހުރިހާ ކަމެއް މި ކުރަނީ މި ނިމިގެންދާ އަހަރުގެ ތެރޭގައި، އިޤްތިޞާދު ހަމަޔަކަށް އެޅުވުމަށްޓަކައި އަޅުގަނޑުމެން މި ކުރި ކަންކަމުގެ މައްޗަށް ބިނާކޮށް. ހަމައެއާއެކީގައި، ޤައުމުގައި ހުރި މުހިންމު އެތައް މައްސަލަތަކެއް ޙައްލުކުރުމަށް ފެށި މަސައްކަތާ އެކީގައި. އެއީ، އަޅުގަނޑު ހިތުން ވަށާޖެހޭ ތަރައްޤީއަކީ. ހަމައެކަނި ފިޒިކަލީ އަތްލެވޭގޮތަށް ހިންގޭ މަޝްރޫޢުތަކެއް ނޫން ތަރައްޤީއަކީ. އަޅުގަނޑު މަގާމާ ހަވާލުވެ، ފުރަތަމަ ދުވަހުވެސް އަޅުގަނޑު ދެންނެވީ، ދެވައްތަރެއްގެ ތަރައްޤީއެއް ކުރަން ބޭނުމޭ. އެއީ، ޢުމްރާނީ، އަދި ޢަމަލީގޮތުން ގެނެވޭ ބިނާކުރެވޭ ތަރައްޤީއާއި، ނުފެންނަ، ފިކުރީ އިންސާނީ ތަރައްޤީއާ. އެއީ، މި ދެ ކަންތައް އެކުވީމާ ޙަޤީޤަތުގައި ޤައުމަށް އެ އަންނަނީ މާނަވީ ތަރައްޤީއެއް. އެހެން ނޫނީވިއްޔާ، ހަމައެކަނި މެޓީރިއަލިސްޓިކް ޑިވެލޮޕްމަންޓެއް އެ އަންނަނީ.
ފިކުރީގޮތުން އަންނަ ޑިވެލޮޕްމަންޓް ވަރަށް މުހިންމު. އެއީ ކޮން ކަމެއްތޯ؟ އެއީ، ޤައުމުގެ މުޖުތަމަޢަށް އަންނަ އަޚްލާޤީ ތަރައްޤީ. އަޅުގަނޑުމެންގެ ތެރެއިން ނެތިގެންދާ އާދަތައް. ރީތި އާދަތައް އަނބުރާ ގެނައުމުގެ ތަރައްޤީ. އިސްލާމީ ރީތި އުޞޫލުތަކާއި، އަޚްލާޤީ މިންގަނޑުތައް އަނބުރާ ގެނައުމުގެ ތަރައްޤީ. އަޅުގަނޑުމެންގެ ތެރޭގައި ވަރަށް ބޮޑަށް ނެތިގެން އެބަދޭ، އަމުދުން މި ފަހަކަށްއައިސް، ސިޔާސީ މައިދާން ފުޅާވެގެން ގޮސް، ތަޣައްޔަރުވަމުންދާ ވަރަކަށް، އޭގެ ތެރޭގައި އެ އަވައިގައި ޖެހިގެން، އަޅުގަނޑުމެންގެ ތެރޭގައި ހުރި ވަރަށްގިނަ ރީތި އާދަތަކެއް ގަސްދުގައި ނޫނަސް އެބަ ގެއްލޭ. އެހެންވީމާ، އެކަންކަން އެބަޖެހެއޭ އިއާދަކުރަން. އެހެން ނޫނީވިއްޔާ، ޙަޤީޤަތުގައި ޤައުމެއް ނެތް. އަޅުގަނޑުމެންގެ ތެރޭގައި މީހުންނަށް އިޙްތިރާމު ކުރުން، ރީތިބަހުން ވާހަކަ ދެއްކުން. މިހެންގޮސް ގިނަ ކަންކަން އެބަހުރި.
އެހެންވީމާ، މިކަންކަން އިއާދަކުރުމަކީ، އަޅުގަނޑު ގަބޫލުކުރާގޮތުގައި، ޙަޤީޤަތުގައި ކޮންމެހެން ކުރަންޖެހޭ ކަމެއް. ޤައުމުގެ މުސްތަޤްބަލް އަޅުގަނޑުމެންގެ ދަރިންނަށްޓަކައި ފޯރުކޮށްދޭން ބޭނުންވަންޏާ، ރަނގަޅު ގޮތުގައި ފޯރުކޮށްދޭން ބޭނުންވަންޏާ، މި ބިނާކުރާ ބިނާތަކާ އެއްގޮތަށް، އަޅުގަނޑުމެންގެ އަމިއްލަވަންތަކަން، އަޅުގަނޑުމެންގެ އައިޑެންޓިޓީ، ކުރީގައި އޮތް ރީތިގޮތް އަނބުރާ ގެނެސް، ފޯރުކޮށްދޭން ޖެހޭނެ. އެހެންވީމާ، އެކަހަލަ ތަރައްޤީއާއި، އަޅުގަނޑުމެންގެ ތެރޭގައި އާދަވެފައި ހުރި، އަށަގަނެފައި ހުރި ނުބައި ކަންކަމުން ސަލާމަތްވުމާ އެކީގައި ގެނެވޭ ސާފުކުރުމާ އެކީގައި ގެނެވޭ ތަރައްޤީ. އަޅުގަނޑުމެންގެ ތެރޭގައި މި ބަވަނަވަމުންދާ ދުނިޔޭގައި، ގްލޯބަލައިޒް ވަމުންމިދާ ދުނިޔޭގައި އެބައާދޭ ގިނަ ކަންކަން. ނައިސް ނުދާނެ ކަންކަން. އެ އަންނާނެ. އެކަންކަމުން އަޅުގަނޑުމެން ޢަޒުމް ކަނޑައަޅައިގެން ސަލާމަތްވާން ބޭނުންވެއްޖިއްޔާ ސަލާމަތްވެވޭނެ. މިސާލަކަށް، ވޭޕްގެ ވަބާ. އަޅުގަނޑަށް އެނގޭ، ހަމަ ޤާނޫނީގޮތުން ކުރީގައި ހަމަ ހުއްދަ އޮވެގެން ވިޔަފާރިކުރީ. އެ މީހުންގެ ނެތް ކުށެއް. އެހެން ނަމަވެސް، މި ޤައުމަށް ވަރަށްބޮޑު ގެއްލުމެއް ވަނީ. އެ ވިޔަފާރި ކުރި މީހުންގެ ކުށެއް ނެތް. އެއީ، ހަމަ ހުއްދަދީގެން ކުރަމުންދިޔަ ކަމެއް. އެހެން ނަމަވެސް، ޤައުމުގެ ރައްޔިތުން ހާލުގެ ދުލުން އެދެމުންދިޔައީ، މިކަމުން ތިމަންނަމެންގެ ދަރިން ސަލާމަތްކޮށްދޭށޭ. އެހެންވީމާ، އަޅުގަނޑުމެން ނިންމީ އެކަން ހުއްޓާލަން. މިއަދުން ފެށިގެން، ރޭ ދަންވަރު 12 އިން ފެށިގެން ޤާނޫނީގޮތުން މި ރާއްޖޭގައި ވޭޕް ބޭނުންކުރުމާއި، ވިއްކުމާއި، މިކަމުގެ އެއްވެސް ކަމެއް ކުރުން މަނާވެގެން އެދިޔައީ.
އެހެންވީމާ، ދެންހުރި ކަންކަންވެސް ހަމަ އެގޮތަށް ކުރެވޭތޯ މަސައްކަތް މި ކުރަނީ. އެއީ، މި ދެންނެވި ވަށާޖަހޭ ތަރައްޤީ ގެނައުމަށްޓަކައި. އަޅުގަނޑުމެންގެ މުޖުތަމަޢު އެބަޖެހޭ، މިއިން ކޮންމެ ރަށެއްގެ ރައްޔިތުން ހިމެނޭގޮތަށް، މި ދެންނެވި ގޮތަށް މިކަހަލަ ކަންކަމުން ސަލާމަތް ކުރެވިފައި އޮންނަ ތަނަކަށް ހަދަން. ޞިއްޙީގޮތުން ޒުވާނުންނާއި، ޢާންމު ރައްޔިތުން ސަލާމަތްތެރިކަމާ އެކީގައި ތިބެގެން ނޫނީވިއްޔާ، އަޅުގަނޑުމެންނަށް ޙަޤީޤަތުގައި ޤައުމަށްވެސް ކަމެއް ނުކޮށްދެވޭނެ. އެހެންވީމާ، މިކަހަލަ ކަންކަމުން މިޖެހެނީ ސަލާމަތްވާން.
ވޭޕުގެ ވަބާއިން ސަލާމަތްވުން ކަމުގައިވިޔަސް، އަދި އަޅުގަނޑުމެންގެ ތެރޭގައި އެތައް އަހަރެއްވީ ބޮޑު މައްސަލައެއް ޑްރަގުގެ މައްސަލަ. ސާޅީހަކަށް، ފަންސާހަކަށް އަހަރު މިވަނީ އެ މައްސަލަ ފެށިގެން ބޮޑުވަމުން، ފުޅާވަމުން ގޮސް، މުޅި ރާއްޖެއަށް ފެތުރިފައި މިއޮތީ. ފަސޭހައެއް ނުވާނެ އެކަމުން ސަލާމަތްވާކަށެއް. ފަސޭހައެއް ނުވާނެ. އެކަމަކު ހަމަ ކޮންމެ ޢާއިލާއަކުން ބޭނުންވާނެ އެކަމުން ސަލާމަތްވާން. ގާތްގަނޑަކަށް ކޮންމެ ޢާއިލާއެއްގައި އެކަމުގައި ޖެހިފައި ހުރި ކޮންމެވެސް ކުއްޖަކު ހުންނާނެ. ގަސްދަކު ނޫން އޭގެތެރެއަށް ވަދެގެން ދަނީކީ. އެހެން ނަމަވެސް، މުޅި މުޖުތަމަޢު އައިގޮތުން އެވަނީ އޭގެތެރެއަށް ވަދެފައި. އެހެންވީމާ، އެކަމުންވެސް ނުކުންނަން ޢަޒުމް ކަނޑައަޅައިގެން، އެކަމާއިގެން އުޅެން ފެށީމާ ދޮގެއްތޯ އެކަން ޙައްލުވާނީ.
އެހެންވީމާ، އަޅުގަނޑު ނިންމީ، ޤައުމަށް ހެޔޮއެދިގެން، ޤައުމުގެ ރައްޔިތުންނަށްޓަކައި، ކުރިއަށް އޮތް ޖީލުތަކަށް މި ޤައުމު ހެޔޮގޮތުގައި ފޯރުކޮށްދިނުމަށްޓަކައި އެއީ ކުރަންޖެހޭ ކަމެއްކަމަށް. ޑްރަގުގެ ވަބާއިންވެސް ސަލާމަތްވާން މިހާރަށްވުރެ ރަނގަޅު ނިޒާމެއް ޤާއިމުކޮށްގެން އެކަން ކުރަން. މިހާރުވެސް ޤާނޫނު އެބައޮވޭ. އެކަމަކު ޙަޤީޤަތުގައި ގިނަ ލޫޕް ހޯލްސްތައް، ގިނަ މައްސަލަތައް އޭގައި ހުރީމަ، އެކަމުގައި ބޭނުންވާ ފެންވަރުގައި، ބޭނުންވާ ބާރުމިނުގައި، ބޭނުންވާ ސްޕީޑްގައި އެކަން ކުރުމަށް ދަތިތަކެއް ހުރީ. އެހެންވީމާ، އާ ބިލެއް މި ހުށަހެޅީ މަޖިލީހަށް. އެއާ ގުޅިފައި މިއޮތީ ނުރައްކާތެރި ކުށްތައް ކުރުން. އޯގަނައިޒް ކްރައިމް ހިންގުން. އެހެން ގޮތަކަށް ދަންނަވަންޏާ ގޭންގް ވަޔަލަންސް. މިކަމަށްވެސް އޮވޭ ޤާނޫނެއް. އެކަމަކު ޙަޤީޤަތުގައި އެ ޤާނޫނުގެ ތެރެއަކު މިވަގުތަކު ނެތް، މިއޮތްވަރުގައި މި މައްސަލަ އޮއްވައި، އެކަމަށް އެދެވޭ ޙައްލެވޭ ގެނެވޭނެވަރުގެ ފަރުވާތަކެއް. އެހެންވީމާ، އެ މައްސަލަ ޙައްލުކުރަންވެސް ބިލެއް ހުށަހެޅިފައި މިހާރު ވަނީ.
މިހެންހުރި ކަންކަމަށް ޙައްލު ގެނައުމަށް، ރައްޔިތުންގެ މަޖިލީހުން ޢިއްޒަތްތެރި މެންބަރުން އަޅުގަނޑުމެންނާ އެކުގައި ގެންދަވަނީ ރެޔާއިދުވާލު ވަރަށް ބުރަކޮށް މަސައްކަތް ކުރައްވަމުން. ދެން ދައުރު ހުޅުވިގެންދާއިރުގައި އަޅުގަނޑަށް ޔަޤީންކުރެވެނީ، ސަރުކާރުން މިހާރު ހުށަހަޅާފައި މި އޮތް ނުރައްކާތެރި ކުށްތަކާއި، ގޭންގް ކުށްތަކާބެހޭ ބިލާއި، އަދި ޑްރަގުގެ ބިލް ފާސްވެގެންދާނެ ކަމަށް. ފާސްވީމާ، އިމްޕްލިމެންޓް ކުރާ އޭޖެންސީތަކާއި، ޕޮލިހާއި، ދެންހުރި ފަރާތްތަކާއި، ހުރިހާ ރައްޔިތުންގެ އެހީތެރިކަމާ އެކީގައި، މިކަން ޙައްލުކުރުމުގައި ނަތީޖާތަކެއް ނެރެވޭނީ. ހުރިހާ ރައްޔިތުންގެ އެހީތެރިކަމާ އެކީގައި.
އަޅުގަނޑުމެން ބޭނުމެއްނޫން، ބަޔަކު ކުށްވެރިކުރާކަށް. އަޅުގަނޑުމެން ބޭނުންވަނީ، މިކަންކަމުގެ ތެރޭގައި، ޑްރަގާއި އެކިކަހަލަ ކުށްތަކުގެ ތެރޭގައި މި އުޅޭ ޒުވާނުންނާއި، ޢާންމު ރައްޔިތުން ސަލާމަތްކުރަން. މެއިން ސްޓްރީމް ކުރަން. އެ ނުބައި ޢަމަލުތައް ހިންގުމުގެ ނިޔަތުގައި، އެކަމުގައި އުޅޭ މީހުންނަށް އެކަނި، އެކަމަށް ލިބެންޖެހޭ އަދަބު ލިބެންޖެހޭނެ. އެހެނެއްނޫން، ޢާންމު ރައްޔިތުންގެ ހަމަ ގިނަ ރައްޔިތުންވެސް އެދިވަޑައިގަންނަވާ ފަދައިން، އަޅުގަނޑުމެން ބޭނުންވަނީ، ބިނާކުރަނިވި މަސައްކަތްކުރާ، ޤައުމަށް، މުޖުތަމަޢަށް ފައިދާތަކެއް ކޮށްދޭ ބަޔަކަށް އޭގެ ބޮޑުބައި އަނބުރާ ހަދައިދޭން. އެހެންވީމާ، މި ވިސްނުމުގައި ޤައުމު ތަރައްޤީކުރުމުގެ ކަންކަން އަޅުގަނޑުމެން މިގެންދަނީ. ގެންދެވޭނީވެސް، ގެންދަންވާނީވެސް އެގޮތަށް.
އެހެންވީމާ، މި ރަށުގެ ތަރައްޤީގެ ވާހަކަ ދައްކާއިރުގައިވެސް، ހަމަ ޔަޤީނުންވެސް ތިޔަބޭފުޅުންވެސް ބޭނުންފުޅުވާނީ، މި ރަށުގައި މި އަރބަން ސެންޓަރ ތަރައްޤީވުމާއި، ދެންހުރި ކަންކަން ކުރެވިގެންދާއިރުގައި، އިންސާނީ ގޮތުން، ފިކުރީގޮތުން މި އަންނަންޖެހޭ ބަދަލު އައުން. އައިސްގެން މި ރަށަށްވެސް އަދި މުޅި ރާއްޖެއަށްވެސް ޙަޤީޤަތުގައި ކުރިއެރުމެއް ލިބިގެންދާނީ. އެއީ، އަޅުގަނޑު ގަބޫލުކުރާ ގޮތުގައި، އިޚްލާޞްތެރިކަމާ އެކީގައި ރައްޔިތުންނަށް ޚިދުމަތް ކުރުމަކީ.
އެހެންވީމާ، އަޅުގަނޑު އެދެނީ، މުޅި ރާއްޖޭގެ ލޮބުވެތި ހުރިހާ ރައްޔިތުންގެ ކިބައިން، މިގޮތަށް މިހިރަ ކަންކަން ޙައްލުކުރުމުގައި، އެންމެން އެކަތިގަނޑަކަށްވެ އަތުކުރިއޮޅާލަދެއްވާށޭ. މިއީ އަޅުގަނޑުމެންގެ ޙައްޤުގައި، އަޅުގަނޑުމެންނަށްޓަކައި އަޅުގަނޑުމެން ކުރާ ކަމެއް. މިއީ އަޅުގަނޑުމެންގެ ޤައުމު. އަޅުގަނޑުމެންގެ ޤައުމު އަޅުގަނޑުމެން މުސްތަޤްބަލަށްޓަކައި ސަލާމަތްކޮށްގެން ކުރިއަށް ގެންދިޔުމަށްޓަކައި ކުރެވޭ ކަމެއް. އެހެންވީމާ، މިކަމުގައި އެންމެން އެބަޖެހޭ ޤައުމީ ވިސްނުމެއްގައި އެކަތިގަނޑަކަށްވާން. މިއީ އެއްވެސް ވަކިބަޔަކާ ޒާތީވެގެން، ވަކި ބަޔަކަށް ގެއްލުމެއް ދިނުމަށްޓަކައި، ވަކިބަޔަކާ ދެކޮޅުވެގެން ކުރާ ކަމެއް ނޫން. އެ ހުރިހާ ރައްޔިތުންނަކީވެސް ދިވެހި ރައްޔިތުން. އެންމެންނަކީ، އަޅުގަނޑުމެން އެންމެންނަކީ ލޮބުވެތި ދިވެހި ރައްޔިތުން. އަޅުގަނޑުގެ ކުރިމަތީގައި ކޮންމެ ބޭފުޅަކީ، ދިވެހި ކޮންމެ ރައްޔިތަކީ ހަމަހަމަ ރައްޔިތެއް. އެއިން ކޮންމެ ރައްޔިތަކަށްވެސް އަޅުގަނޑުގެ ކިބައިން ލިބޭނީ ޢަދުލުވެރިކަމާއި، އިންޞާފުވެރިކަމާ އެކީގައި ހަމަހަމަކަން. އެހެންވީމާ، އެކަމުގައި އެންމެން އެކުގައި ހިންގަވާށޭ މަސައްކަތް ކުރަން.
އާދެ، އަދިވެސް އެއްފަހަރު، މަހިބަދޫގެ ލޮބުވެތި ރައްޔިތުންނަށް ވަރަށް ބޮޑަށް ޝުކުރު ދަންނަވަން. އަދި އަޅުގަނޑު ދޭ ޔަޤީންކަން ހަމަ ތަކުރާރުކޮށް އަނެއްކާވެސް ދެން. ކުރިއަށް މިއޮތް މަސްތަކަކީ، މި އަންނަ އަހަރަކީ، މި ރަށުގެ ތަރައްޤީއަށް އަދި މި ދާއިރާގެ ތަރައްޤީއަށް އަޅުގަނޑުމެން މި ކަނޑައަޅާފައި އޮތް މުހިންމު ބޮޑު ބިޔަ މަޝްރޫޢާ އެކުގައި ދެންހުރި ކަންކަން އިރާދަކުރެއްވިއްޔާ ހިނގާނެ އަހަރު. އިރާދަކުރެއްވިއްޔާ މިގޮތަށް އަޅުގަނޑުމެންނަށް ކަންކަން ގެންދެވޭނެ.
އަޅުގަނޑުގެ ދުޢާއަކީ، އަޅުގަނޑުމެންގެ ޤައުމުގެ ތަރައްޤީއަށް މިކުރެވޭ މަސައްކަތުގައި اللهُ سُبْحَانَهُ وَتَعَالَى ބަރަކާތް މިންވަރުކުރައްވައި، ހެޔޮ ތައުފީޤު މިންވަރުކުރެއްވުން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.