بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ދަނގެތީގެ ކައުންސިލްގެ ރައީސާއި، ކައުންސިލަރުން، ޑަބްލިޔޫ.ޑީ.ސީ.ގެ މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ކުންފުނިތަކުގެ ވެރިން، ވަޑައިގެން ތިއްބެވި، އެހެނިހެން ރަށްރަށުގެ ކައުންސިލްތަކުގެ ބޭފުޅުން، އަދި މި ޖަލްސާ ބައްލަވަމުން، އަޑުއައްސަވަމުން ގެންދަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މިއަދު މި ރަށަށް އަޅުގަނޑުމެންނަށް އާދެވުމުން، ތިޔަބޭފުޅުން ވިދާޅުވި ވަރަށް ހޫނު މަރުޙަބާއަށްޓަކައި އަޅުގަނޑުގެ ހިތުގެ އެންމެ ފުންމިނުން ތިޔަ ލޮބުވެތި ހުރިހާ ރައްޔިތުންނަށް ފަށްފަށުން ޝުކުރު އަރިސްކުރަން. ވަރަށް ބޮޑަށް ޝުކުރިއްޔާ.
އަޅުގަނޑު ޙަޤީޤަތުގައިވެސް ވަރަށް އުފާވޭ، މި ރަށަށް އާދެވި، ތިޔަބޭފުޅުންނާ އެކުގައި މިވަގުތު ހޭދަކޮށްލުމަށް ފުރުޞަތު ލިބިގެންދިޔައިމަ.
އާދެ، އަޅުގަނޑު މިކުރާ ދަތުރުތަކަކީ، ރަށްރަށުގެ ރައްޔިތުންނާ ގާތުން ބައްދަލުކުރުމަށްޓަކައި ކުރާ ދަތުރުތަކެއް. އަދި މިއިން ކޮންމެ ދަތުރެއްގައި، ކޮންމެ ރަށެއްގައި ރައްޔިތުންގެ މަންދޫބުންގެ ގޮތުގައި ކައުންސިލްގައި ތިއްބެވި ކައުންސިލަރުންނާއި، ޑަބްލިޔޫ.ޑީ.ސީ.އާ ބައްދަލުކުރަމު. މި ހުރިހާ ޑަބްލިޔޫ.ޑީ.ސީ.ތަކާއި ކައުންސިލްތަކާ ބައްދަލުކޮށް ގާތްގަނޑަކަށްހެން މިހާރު މި ނިމެނީ. ދެން އޮތީ ހަމަ ވަރަށްމަދު ޢަދަދުތަކެއް އެގޮތަށް ފުރިހަމަކުރަން.
އާދެ، އެގޮތުން، މި ރަށާއި މި ދާއިރާގެ އަދި މި ކައިރި ރަށްތަކުގެ ވަރަށްގިނަ ރަށްރަށުގެ ކައުންސިލްތަކާއި، ޑަބްލިޔޫ.ޑީ.ސީ.އާ މިއަދު ވަނީ ބައްދަލުކުރެވިފައި. އާދެ، އަޅުގަނޑު މި އަންނަ އަހަރު، 2025 ވަނަ އަހަރުގެ ތެރޭގައި، މިގޮތަށް ކޮންމެ ރަށެއްގައިވެސް ކުރަންހުރި ކަންކަމުގައި އިރާދަކުރެއްވިއްޔާ ޢަމަލީސިފަ ގެނެސްދޭނަން. އަޅުގަނޑު ވެފައިވާ ވަޢުދުތައް ފުއްދުމަށް މި އަންނަ އަހަރު ވެގެންދާނީ އިރާދަކުރެއްވިއްޔާ ގިނަ މަސައްކަތްތަކެއް ޢަމަލީގޮތުން ފެށޭ އަހަރަށް. މިހެން މި ދަންނަވަން ޖެހުނު ސަބަބަކީ، ޙަޤީޤަތުގައި މިއަހަރަކީވެސް އަޅުގަނޑުމެން މަސައްކަތް ކުރަންޖެހޭ އަހަރަކަށްވާތީ. އެހެން ނަމަވެސް، މަސައްކަތް މި ކުރެވެނީ ޤާނޫނީ ނިޒާމު އޮންނަ ގޮތުން ބަޖެޓެއް ފާސްކޮށްގެން.
ދެން ރާއްޖޭގެ ޤާނޫނުތައް އޮންނަގޮތަށް އެކަން ވާނީ. ރިޔާސީ އިންތިޚާބަކުން ސަރުކާރެއް ރައްޔިތުން ހޮވިޔަސް، ފުރަތަމަ އަހަރުގެ ބަޖެޓް ފާސްކުރަން ހުށަހަޅަން ފުރުޞަތު މި ލިބެނީ ނިމިގެންދާ ސަރުކާރަށް. މި ނިމެމުންދާ ބަޖެޓަކީ، އެގޮތަށް މިދިޔަ ސަރުކާރުގެ ފިނޭންސް މިނިސްޓަރ މަޖިލީހަށް ވަޑައިގެން، އޭރުގައި އޮތް މަޖިލީހަށް ހުށަހެޅުއްވި ބަޖެޓް. ހުރިހާ ރައްޔިތުންވެސް ހަނދުމަފުޅު ހުންނާނެ، އޭރުގެ މަޖިލިސް އޮތީކީއެއް ހަމަ އެއްގޮތަކަށްވެސް ޕީ.އެން.ސީ.އަކަށް އެއްވެސްވަރެއްގެ ބާރެއް އޮތް ގޮތަކަށް، ތާއީދެއް އޮތް ގޮތަކަށް ނޫންކަން. ހަމަ ދިމާ އިދިކޮޅަށް.
އެހެންވީމާ، ޓްރާންސްޒިޝަން މަރުޙަލާގައި އަޅުގަނޑުމެން ހުށަހެޅި އެއްވެސް ކަމެއް ކުރެވޭގޮތަށް ބަޖެޓް ހަދައެއްނުދިން. ހަމަ ގަސްދުގައި އޮތީ، މި ރަށުގައިވެސް ކުރަންހުރި ކަންކަން ހިމެނޭހެން، ކުދިކުދި ޢަދަދުތަކުން ނަންބަރުތަކެއް ޖަހާލާފައި ބަޖެޓް ހަދާފައި. އެހެންވީމާ، އަޅުގަނޑުމެން ބޭނުންވިވަރަކަށް، ވަޢުދުތައް ފުއްދާކަށް އަޅުގަނޑުމެންނަށް މާގިނަ މަސައްކަތްތަކެއް ނުކުރެވޭ. އަޅުގަނޑު މި އަހަރުގެ ކުރީކޮޅު ރަށްރަށަށް ކުރި ދަތުރުތަކުގައިވެސް ވާނީ އެ ވާހަކަ ދައްކާފައި. އެހެންވީމާ، އަޅުގަނޑު އެދުނީ، ރައްޔިތުން ގާތުގައި، ރައްޔިތުންގެ މަޖިލީހުގެ އިންތިޚާބުގައި، މިކަންކަމަށް މަގުފަހިކޮށްދޭނެ މަޖިލީހެއް ހޮވައިދޭށޭ. އެގޮތަށް ރާއްޖޭގެ ރައްޔިތުން ނިންމެވީ.
އާދެ، އެހެންވީމާ، މިހާރު މި އޮތް މަޖިލީހުން މި އަންނަ އަހަރަށް މި ފާސްކޮށްދިން ބަޖެޓް މިއޮތީ، އަޅުގަނޑު ވެފައި ހުރި ވަޢުދުތައް، އަދި ރަށްރަށުގައި ކުރަންހުރި ކަންކަމާއި، ރައްޔިތުންގެ އުންމީދުތަކާ ގުޅިފައި ހުރި ކަންކަން ކުރެވޭގޮތަށް ފާސްކޮށްދެއްވާފައި. ކަން މިހެން އޮތް ނަމަވެސް، ޙާލަތުގެ ގޮތުން ކުރެވެންހުރި ކަންތައްތަކެއް މި އަހަރުވެސް އެވަނީ ގިނަ ރަށްތަކެއްގައި ކުރެވިފައި. ޙަޤީޤަތުގައިވެސް އެންމެބޮޑު އިސްކަމެއް ދިނީ އަޅުގަނޑުމެންގެ އިޤްތިޞާދު ހަރުދަނާކުރުމަށް. ވަރަށްބޮޑު، ފުން އަނދަވަޅެއްގައި ޤައުމުގެ އިޤްތިޞާދު އޮއްވައި، އަޅުގަނޑުމެންނާ ހަވާލުވީ. ސީދާ ހަމަ ބަނގުރޫޓުވާން ދަނިކޮށް. އެހެން ނަމަވެސް، އަޅުގަނޑުމެން އެންމެން ކުރި މަސައްކަތުން އިރާދަކުރެއްވީތީ އެކަމުން ސަލާމަތްވެފައި ވަނީ. اَلْحَمْدُ للَّهِ. އަދި ރާއްޖޭގެ ރައްޔިތުން އެކަމުގައި ދެއްވި ތަރުޙީބަށާއި ތާއީދަށް ވަރަށް ބޮޑަށް ޝުކުރު ދަންނަވަން. އިރާދަކުރެއްވީތީ އެކަމުން އަރައިގަނެވިއްޖެ. ދެންއޮތީ ކުރިއަށްދިޔުން.
އާދެ، އެހެންވީމާ، ކުރިއަށްދިޔުމުގެ ގޮތުން ދަންނަވާލާނަން. މި ރަށުގައި އެންމެ މުހިންމީ، ހުރިހާ ނަޒަރިއްޔާތަކުން، ރަށުގެ އިޤްތިޞާދީ ކުރިއެރުމަށް ބެއްޔަސް، ރަށުގެ ރައްޔިތުންގެ ގެދޮރުވެރިކަމާއި، އިޤްތިޞާދީ އެހެނިހެން ކަންކަމާއި، އިޖުތިމާޢީ ކަންކަމަށް ބެލި ނަމަވެސް، ލަފާފުރުމަށް ބެލި ނަމަވެސް، ރަށް ގިރުމުގެ މައްސަލައަށް ބެލި ނަމަވެސް، ހުރިހާ ކަމަކާވެސް ގުޅިފައި މިއޮތީ ބަނދަރުގެ ކަންތައް. އެހެންވީމާ، އަޅުގަނޑު ދޭ ޔަޤީންކަމަކީ، ތިޔަ ލޮބުވެތި ރައްޔިތުން އެދިވަޑައިގަންނަވާ ގޮތަށް، އެ ހުރިހާ ކަމެއް ޙައްލުވާގޮތަށް، މި ފެށޭ އަހަރު އިރާދަކުރެއްވިއްޔާ އެ ބަނދަރު ހަދައިދޭނަމުގެ ޔަޤީންކަން.
މިއަދުގެ ކައުންސިލް ބައްދަލުވުމުގައި ތަފްޞީލުކޮށް ވާހަކަ ދެކެވުނު. ކުރިއަށް އޮތީ އެކަމުގެ ތަފްޞީލުތައް ނިންމައި، ބަޖެޓުގެ ތެރެއިން އެކަން ކުރިއަށް ގެންދިޔުން. އެއީ، އެންމެބޮޑު މައްސަލަ. އެންމެބޮޑު މައްސަލަ. ދެ އަހަރެއްހާ ދުވަސް ވަންދެން ފުރޭގޮތަކަށް ނޫން، ކުރިއަށް އޮތް އަހަރުތަކަށްވާވަރަށް، ލަފާފުރާނެ އެކަށީގެންވާ ޖާގަ، ހަމަ ފުދޭވަރެއްގެ މުއްދަތަކަށް އެ ބަނދަރު ބޭނުންކުރެވޭ ގޮތަށް ހަދައިދޭނަން.
އަޅުގަނޑަށް މަޢުލޫމާތު ލިބިފައިވާ ގޮތުގައި، މި ރަށުގައި ލޯކަލް ޓޫރިޒަމްގެ އަށާރަވަރަކަށް ގެސްޓްހައުސް މިހާރުވެސް އެބަހުރި. 200 އެތައް އެނދެއް. އަދި އަޅުގަނޑު ވަރަށް އުފާކުރަން. ލޯކަލް ޓޫރިޒަމްގެ މި ހުރިހާ ވިޔަފާރިއެއް، ކުރަނީ ރަށުގެ ރައްޔިތުން ކަމަށްވާތީ. އެހެންވީމާ، ޙަޤީޤަތުގައި އަޅުގަނޑު ވަރަށް އުފާކުރަން އެކަމާ. ރަށުގެ ރައްޔިތުން އެކަން ކުރައްވާތީ. އަދި ކުރިއަށް އޮތީ އެކަން ފުޅާވުން. އަޅުގަނޑަށް ތިޔަބޭފުޅުން މަޢުލޫމާތު ދެއްވި ގޮތުން، ކުރިއަށް މިއޮތް ދެ އަހަރުގެ ތެރޭގައި، އެ ޢަދަދު ޑަބަލްވާނެ. ހަސަތޭކައެއްހާ އެނދަށް ބަދަލުވޭ. އެގޮތުން ބަލާއިރުގައިވެސް ވަރަށް މުހިންމުވޭ، އެކަށީގެންވާ ގޮތަކަށް އެ ބަނދަރު ހެދިގެންދާން. އެއީ، އިންވެސްޓްމަންޓެއް. އެހެންވީމާ، އެ ޔަޤީންކަން އަޅުގަނޑު މިދިނީ. އެކަން ތިޔަބޭފުޅުންނަށް އިރާދަކުރެއްވިއްޔާ ޢަމަލީގޮތުން މި އަންނަ އަހަރު ކޮށްދޭނަން. އެ މަސައްކަތް ފެށިގެން ގޮސް، ހަމަ ޙަޤީޤަތުގައިވެސް ކޮންމެގޮތެއްވިޔަސް ނަގާނެ އަހަރެއް، ދޮޅުއަހަރު. އެހެންވީމާ، މި އަންނަ އަހަރު ފެށި، 2026ގެ ތެރޭގައި، އެންމެ ލަސްވެގެން ނިމޭނެ. ވީހާވެސް އަވަހަކަށް ބާރަށް ގެންގޮސް މަސައްކަތްތައް ނިންމާނަން.
ދެން އެއާއެކީގައި، ގެދޮރުވެރިކަމުގެ މައްސަލަ ޙައްލުކުރުން މިއޮތީ. މި އަންނަ އަހަރުގެ ބަޖެޓަށް އަޅުގަނޑު މި ކިޔަނީ ބޯހިޔާވަހިކަމުގެ ބަޖެޓް. ޙަޤީޤަތުގައިވެސް އެއީ، ބޯހިޔާވަހިކަމުގެ ބަޖެޓް. ރާއްޖޭގެ އެކި ކަންކޮޅުތަކުގައި، އަޅުގަނޑު ވަޢުދުވީ ގާތްގަނޑަކަށް ހުރިހާ ރަށެއްގައިހެން ޢަމަލީގޮތުން މަޝްރޫޢުތައް ފެށޭވަރަށް ހިމަނާފައި ވާނެ ބަޖެޓުގައި. 1500 މިލިއަން ރުފިޔާގެ މަޝްރޫޢު. 1.5 ބިލިއަން ރުފިޔާގެ ހައުސިންގ މަޝްރޫޢު ހިންގަން ބަޖެޓް އެއޮތީ ހަދާފައި. މި ރަށަށް އެކަމަކު ބިން ބޭނުންވޭ. އެހެންވީމާ، ޙަޤީޤަތަށް އަޅުގަނޑު ދަންނަވާނީ. މި އަންނަ އަހަރު ބިން ހިއްކަން ނުފެށިދާނެ. އެކަމަކު ފެށެންޏާ ފަށައިދޭނަން. ގައިމުވެސް މި އަންނަ އަހަރު ނުވަންޏާ، ފަޅުތެރެއިން 27 ހެކްޓަރުގެ ބިން ތިޔަބޭފުޅުންނަށް 2026 ގައި ހިއްކައިދޭނަން. ހިއްކައިދީފައި، ގެދޮރުގެ މަޝްރޫޢު ހިންގައިދޭނަން.
ތިޔަބޭފުޅުން ބޭނުންވޭ ގޯތި ދޫކުރަން. ގޯތި ދިނުމާ އެކީގައި، ހައުސިންގ މަޝްރޫޢުތައް ހިންގުން. އަޅުގަނޑު ގަބޫލުކުރާ ގޮތުގައި، އަދި ރައްޔިތުންގެ ޙާލަތު ހުރިގޮތަށް ބަލާއިރުގައި، ޤައުމުގެ ޙާލަތަށް ބަލާއިރު ގެދޮރުވެރިކަމަކީ އެންމެ މުހިންމު މައްސަލަ. ގެދޮރުވެރިކަން، ހައުސިންގގެ މައްސަލަ ޙައްލުވާ ކަމުގައިވާނަމަ، އެއާ ގުޅިގެން ގިނަ ކަންތައްތަކެއް ޙައްލުވޭ. އެހެންވީމާ، އަޅުގަނޑު އެންމެ އިސްކަމެއް ދެނީ، ތަރައްޤީގެ މަޝްރޫޢުތަކަށް ބަލާއިރުގައި، ގެދޮރުވެރިކަމުގެ މަޝްރޫޢުތައް ހިންގަން. އެހެންވީމާ، ގެދޮރުވެރިކަމުގެ ދާއިރާއިން އަޅުގަނޑު ވެފައި ހުރި ގިނަ ވަޢުދުތައް ފުއްދުމުގެ ޢަމަލީ މަސައްކަތް ފަށަން މި އަންނަ އަހަރަށް ބަޖެޓް ހަދާފައި އެއޮތީ.
އާދެ، އެހެންވީމާ، މި ތަރުތީބުން މި ރަށުގެ ތަރައްޤީ އަޅުގަނޑުމެން އިރާދަކުރެއްވިއްޔާ ގެންދާނީ. ބޮޑު މައްސަލައެއްގެ ގޮތުގައި ބަނދަރު. ދެން ބިން ހިއްކުމާ ގުޅިގެން އަންނަ ކަންތައްތައް. ބަނދަރު ހަދާއިރުގައި، ރަށް ގިރުމާއި، މި ހުރިހާ ކަމެއް ޝާމިލްވާގޮތަށް އިރާދަކުރެއްވިއްޔާ. އޯލް-އެންކޮމްޕެސިންގ، ހުރިހާ މައްސަލައެއް ޙައްލުވާގޮތަށް ގެންދިޔުން އަމާޒަކީ.
އާދެ، ހަމަ އެއާއެކީގައި، ދެންހުރި ދާއިރާތައް. އަޅުގަނޑުމެން މި އަންނަ އަހަރުގެ ބަޖެޓް ހަދާފައި މިވަނީ ވަކި ތަރުތީބަކުން. ވަކި ޕްލޭނެއްގެ ތެރެއިން ގެންދަން. ގެދޮރުވެރިކަމާ އެކީގައި، ދެން ހަމަ އެންމެ އިސްކަމެއް މިދެނީ ރަށްރަށުގައި ތަޢުލީމީ ދާއިރާ ރަނގަޅުކުރަން. އެއާ އެކީގައި، ޞިއްޙީ ދާއިރާ ރަނގަޅުކުރަން. މި ރަށުގައިވެސް އެ ދެ ދާއިރާއިން އެބަހުރި، ތަރައްޤީގެ މަޝްރޫޢުތައް ކުރިއަށް ގެންދަން. އެހެންވީމާ، އެހެން ހުރިހާ ރަށެއްގައިވެސް. އަދި އަޅުގަނޑަށް ކޮންމެ ރަށެއްގެ ނަން މިތާނގައި ނުދެންނެވިދާނެ. މި ދާއިރާއަށް، މި އަތޮޅަށް އަދި މުޅި ރާއްޖެއަށްވެސް މިއޮތީ ހަމަ މި ސިޔާސަތު.
ގެދޮރުވެރިކަމާ އެކީގައި، ދެން އެންމެ އިސްކަން މިދެނީ، ތަޢުލީމީ ދާއިރާގައި ހުރި މަލްޓި ޕަރޕަސް ހޯލުވިޔަސް، ކްލާސްރޫމްވިޔަސް، ދެން ލެބޯރެޓަރީ، ލައިބްރަރީ، މިހެންގޮސް ސްކޫލްގައި ހުރި އެކަހަލަ އިންފްރާސްޓްރަކްޗަރ މަސައްކަތަށް. ޞިއްޙީ ދާއިރާގެ ހެލްތް ސެންޓަރު ބޮޑުކުރުން، ތަކެތި ހޯދުން، ހޮސްޕިޓަލް ހެދުން، މިހެންގޮސް އެބަހުރި، އެކި ރަށްތަކުގައި އެކި ރިކްއަރމަންޓް. އެހެންވީމާ، މި ދެ ދާއިރާއަށް ކަންތައްތައް ކޮށްދިނުން، މި އަންނަ އަހަރުގެ ބަޖެޓުގައި ދެން އެންމެ އިސްކަން މިދެނީ.
ހަމައެއާއެކީގައި، ކުޅިވަރުގެ ދާއިރާ ދެންއޮތީ. ޒުވާނުންނާއި އެކި އުމުރުފުރާގެ ރައްޔިތުން ކުޅިވަރު ކުޅުމަށް އެކި ރަށްރަށުގައި ހުރި އެކި ރިކްއަރމަންޓް. މިތާނގައި ދެންމެ ޢިއްޒަތްތެރި މަޖިލިސް މެންބަރު ފާހަގަކުރެއްވި، އެކި ރަށްތަކުގައި މި ދާއިރާގައި ހުރި ކަންތައްތައްވެސް. ފުޓްސަލް ދަނޑުއެޅުން، ފުޓްބޯޅަ ދަނޑު ހެދުން، ފަށާފައި، ނުނިމި އޮތް ދަނޑު، ލައިޓްޖެހުން، ވަށާފާރު ރޭނުން. މިހެންގޮސް އެކި ރަށްތަކުގައި ހުރީ ކުޅިވަރުގެ އެކި ރިކްއަރމަންޓް. އެކި ކަންކަން ފުރިހަމަކުރަން. އެހެންވީމާ، އެއީ އެންމެ އިސްކަމެއް ދޭ، އިޖުތިމާޢީ ގޮތުން، ދީނީ ގޮތުން މިސްކިތްތަކާ މިހެންގޮސް އިޖުތިމާޢީ ދާއިރާގެ ކަންކަން. އެހެންވީމާ، ވަކި ސްޕެސިފިކް ނަންތަކެއް އޭގައި އަޅުގަނޑު ނުދެންނެވިޔަސް، މި ދެންނެވި ތަރުތީބުން މި ރަށަށް، މި ދާއިރާއަށް، މި އަތޮޅުގައިވެސް ހުރި މި ދެންނެވި ގޮތަށް ކުރަންހުރި، ތަޢުލީމީ، ޞިއްޙީ، ކުޅިވަރު އަދި ދެންވެސް ހުރި ދާއިރާތަކުގެ މަޝްރޫޢުތައް، އަޅުގަނޑު ވެފައި ހުރި ވަޢުދުތަކަށް އިސްކަންދީގެން މި އަންނަ އަހަރު އިރާދަކުރެއްވިއްޔާ މަސައްކަތްތައް ހިނގަން ފަށާނެ. އަހަރުތެރޭގައި އެކި ކުއާރޓަރތަކަށް ބަހާލައިގެން، މަސައްކަތްތައް ފަށައިގެން އަޅުގަނޑުމެން ކުރިއަށް ގެންދާނީ.
އަޅުގަނޑުމެން އިރާދަކުރެއްވިއްޔާ އެގޮތަށް މަސައްކަތްތައް ގެންދާނަން. ވަކި މަޝްރޫޢުތަކުގައި، ވަކި ނަންތައް އަޅުގަނޑު ނުދެންނެވިޔަސް، ތިޔަބޭފުޅުންނަށް އެ ޔަޤީންކަން އަޅުގަނޑު އަރުވަން. އިރާދަކުރެއްވިއްޔާ އެގޮތަށް ކަންކަން ދާނީ.
ދެން ވަކިން ފާހަގަކުރެއްވި ކަލްޗަރ ސެންޓަރުގެ ވާހަކަ. އެކަމާ ކަންބޮޑުވެނުލައްވާ. އިރާދަކުރެއްވިއްޔާ އެ މަޝްރޫޢު ކުރިއަށްގެންދާނަން.
އާދެ، ދެން ހަމަ އެއާއެކީގައި އަޅުގަނޑުމެން ވަރަށް އިސްކަންދެން، ހަމަ ނެޗްރަލް އެންވަޔަރަންމަންޓާ ގުޅިފައި މި ހުންނަނީ ކުނި މެނޭޖް ކުރުމުގެ ކަންތައްވެސް. ވަރަށް ބޮޑަށް ޚާއްޞަކޮށް، މިކަހަލަ ރަށެއްގައި އޭގެ އެ ފެކްޓް ވަރަށް ޑަބަލްވާ ކަމެއް އެއީ، ޓޫރިޒަމް ކުރިއަށްދަންޏާ. އަދި އާބާދީ ބޮޑިއްޔާ، ތޮއްޖެހިއްޖިއްޔާ. ނޯވޭ އެހެން ތަނެއް، އެކަން ޙައްލުކުރާކަށް. އަދި ތަން އޮތަސް، ތަކެތި ނެތިފައި އެބަހުރޭ. އެހެންވީމާ، މުޅި ރާއްޖެއަށް ޝާމިލްވާ، ކުނި މެނޭޖް ކުރުމުގެ މަޝްރޫޢެއް ކުރިއަށް ގެންދަން މިއޮތީ ރާވާފައި. އަޅުގަނޑު ހަމަ ވަޢުދުވީގޮތް އެއީ. އެހެންވީމާ، މިގޮތަށް މި ރަށުގައިވެސް އޮތް އެ މައްސަލައަށް އިރާދަކުރެއްވިއްޔާ ޙައްލެއް ގެނައުން އެއީ ،އަޅުގަނޑުމެން ކުރިއަށް ގެންދަން ވިސްނާފައި އޮތްގޮތް.
އާދެ، އެހެންވީމާ، އަޅުގަނޑު ހިތުން ދަނގެތީގެ ރައްޔިތުންނަށް ބޭނުންވާ ހުރިހާ ކަމެއްގެ ވާހަކަ ޖުމްލަ ގޮތެއްގައި އަޅުގަނޑަށް މި ދެންނެވުނީ. ބަނދަރުގެ މައްސަލަ. ތިޔަބޭފުޅުން އެދިވަޑައިގަންނަވާ، އެއާ ގުޅިފައިވާ ހުރިހާ ކަމަކަށް އެޑްރެސްވާ ގޮތަށް އެ މަޝްރޫޢު ކުރިއަށް ގެންދިޔުމާއި، ބިން ހިއްކުމުގެ މަޝްރޫޢު ކުރިއަށް ގެންދިޔުމާއި، ގޯތިދިނުން، ހައުސިންގ މަޝްރޫޢު ކުރިއަށް ގެންދިޔުން. އަދި އެއާއެކީގައި ދެންހުރި ކަންކަން. ކުޅިވަރު، ތަޢުލީމީ ދާއިރާގައްޔާއި، ޞިއްޙީ ދާއިރާއިން އެދިވަޑައިގަންނަވާ، ތިޔަބޭފުޅުން އެކްސްޕެކްޓް ކުރައްވާ ކަންތައްތަކެއް އެބަހުރި. އެހެންވީމާ، މިކަންކަން އަދި މި ދާއިރާގެ އެހެން ރަށްތަކުގައިވެސް އަދި ޖުމްލަކޮށް މުޅި ރާއްޖޭގައިވެސް އަޅުގަނޑުމެން ކުރިއަށް ގެންދާނަން.
އާދެ، ކުރިންވެސް އަޅުގަނޑު ދެންނެވި ފަދައިން، އަޅުގަނޑުމެން މި ހުރިހާ ކަމެއް މި ކުރަނީ، އަޅުގަނޑުމެންގެ އިޤްތިޞާދު ވެއްޓިފައި އޮތް ފުން އަނދަވަޅުން ނަގައި ކޮޅަށްޖަހަމުން. އަޅުގަނޑުމެން ބަނގުރޫޓުވަމުން ދަނިކޮށް އިރާދަކުރެއްވީތީ ސަލާމަތްކޮށްގެން. ދައްކަންހުރި، ބޭރާއި އެތެރޭގެ ދަރަނިތައް ދައްކަމުން. ބިލްތަކަށް ފައިސާ ޕޭ ކުރަމުން.
ތިޔަބޭފުޅުން ހަނދުމަފުޅު ހުންނާނެ، މަސްވެރިންނަށް އަޅުގަނޑުވީ ވަޢުދުގެ ދަށުން، 48 ގަޑިއިރުގެ ތެރޭގައި ފައިސާގެ ކަންތައް، ދާދިފަހުން މަސްވެރިންގެ ދުވަހު އެވަނީ ފެށިފައި. އެ ދުވަހުން ފެށިގެން މިހާރު ހަމަ އެދަނީ ބަރާބަރަށް، ހަމަ މަސްކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ލިބެމުން. އެކަން ދާނެ އެގޮތަށް ބަރާބަރަށް.
ހަމަ އެގޮތަށް، ދެން ހުރި ވަޢުދުތައްވެސް. ރައްޔިތުންނަށް ދޭންޖެހޭ ފައިސާ. ރައްޔިތުންނަށް ކަންކަން ފަހިކޮށްދީގެން، އާމްދަނީ ހޯދޭނެ ގޮތްގޮތް ހޯދައިދިނުމާ އެކީގައި، ރައްޔިތުންގެ މުއްސަނދިކަން އިތުރުކުރުމުގެ މަސައްކަތްތައް ކުރިއަށް މިގެންދަނީ.
އެހެންވީމާ، އެގޮތަށް އިރާދަކުރެއްވިއްޔާ ދެންހުރި ކަންކަންވެސް އަޅުގަނޑުމެން ކުރިއަށް ގެންދާނީ.
އަޅުގަނޑު އެގޮތުން ދަންނަވާލާނަން. އަންހެން ބޭފުޅުންނަށް ހަމަ ވަރަށް މުހިންމު ކަމެއް. ޑަބްލިޔޫ.ޑީ.ސީ.ތަކަށް. އަޅުގަނޑު އެންމެ ގިނައިން ކުރިން ކުރި ދަތުރުތަކުގައި އެކަން ފާހަގަކޮށްފައި ވާނެ. ރައްޔިތުންނަށް، ޑަބްލިޔޫ.ޑީ.ސީ.ތަކަށް ވަޢުދުވީ ކަމެއް އެއީ. އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ ޤާނޫނުގައި އޮންނަ ޕޮއިންޓެއް ނަގައިގެން، ވަރަށް ބޭއިންޞާފު ގޮތަކަށް، ވަރަށް ނިކަމެތި ގޮތެއް ހަދާފައި އޮންނަ ކޮމިޓީތަކެއް. އެހެން ނަމަވެސް، އަންހެން ބޭފުޅުންނަކީ ރަށުގެ ތަރައްޤީގައި ވަރަށް މުހިންމު ދައުރެއް އަދާކުރާ ބައެއް. އެހެންވީމާ، އަޅުގަނޑު ދެންނެވިން، އަންހެނުންގެ ތަރައްޤީއަށް މަސައްކަތްކުރާ ކޮމިޓީ، ޑަބްލިޔޫ.ޑީ.ސީ.ގެ މެންބަރުންގެ ވަރަށްގިނަ ކަންތައްތަކެއް ޙައްލުކޮށްދޭނަމޭ. ޤާނޫނު ހަދާ މަޖިލިސް ތެރެއިން. އެހެންވީމާ، ދެން މަޖިލިސް ހުޅުވޭ ދައުރަށް، އެންމެ ފުރަތަމަކޮޅު، ހަމަ ފުރަތަމަ، ފެބުރުވަރީ މަހު ކުރީކޮޅު މަޖިލިސް ހުޅުވޭނީ. ސަރުކާރުގެ ފަރާތުން އަޅުގަނޑު ހުށަހަޅާނަން ޤާނޫނުތަކަށް ގެންނަންޖެހޭ އިޞްލާޙުތައް. ދުވަސްކޮޅެއް މި ނެގީ. އެއީ، ޚާއްޞަ ބަދަލުތަކެއް ގެންނަންޖެހޭ ކަމަކަށްވާތީ. ޑަބްލިޔޫ.ޑީ.ސީ.ގައި މަސައްކަތްކުރާ މެންބަރުންނަކީ، ފުލްޓައިމް ވަޒީފާއެއް ނޫން. އެހެން ނަމަވެސް، ހަމަ ވަރަށްގިނަ ވަގުތެއް ހޭދަކުރައްވާ މެންބަރުންތަކެއް.
އެހެންވީމާ، އަޅުގަނޑު ވަޢުދުވީ، އެ ލިބިލައްވާ އެލަވަންސަކީ، މުސާރައެއްގެ ގޮތުގައި އެ އެލަވަންސް ކަނޑައެޅޭނެގޮތް ޤާނޫނުން ހަދައިދީ، ތިޔަބޭފުޅުންގެ ކަންބޮޑުވުންތަކަށް ޙައްލުގެނެސްދިނުން. އެއީ، ރޯދަމަހުގެ ޢިނާޔަތް ލިބުން، ވިހެއުމުގެ ޗުއްޓީ ނެގުން، އަދި އެ ލިބޭ މުސާރަ، ނޫނީ އެލަވަންސް، ބޭންކްތަކުން ރެކޮގްނައިޒްކޮށް، އޭގެ ސަބަބުން ތިޔަބޭފުޅުންނަށް ލޯނުތަކަށް ދެވޭގޮތްވުން. އެކި ތަންތަނުން ދޫކުރާ ފެސިލިޓީތަކަށް ފުރުޞަތު ލިބިގެންދިޔުން. މިކަންކަން މިހާރަކު ނުވޭ. މިއިން އެއްވެސް ކަމެއް ނުވޭ. އެހެންވީމާ، ލާމަރުކަޒީ ޤާނޫނަށް ގެންނަންޖެހޭ އިޞްލާޙެއް އެބައޮތް. އަދި ވަޒީފާއާބެހޭ ޤާނޫނަށް ގެންނަންޖެހޭ އިޞްލާޙެއް އެބައޮތް. މިކަމަށް ދިރާސާކުރަން ވަގުތުކޮޅެއް ނެގީ. ދެން މަޖިލިސް ހުޅުވޭއިރު، އިރާދަކުރެއްވިއްޔާ
މި އިޞްލާޙުތައް ހުށަހަޅައިދޭނަން. ފެބުރުވަރީ މަހު ކުރީކޮޅު. އަދި އެއާއެކު، އެ އިޞްލާޙުތައް ގެނެސް، ޑަބްލިޔޫ.ޑީ.ސީ.ގެ މެންބަރުންނަށް، މި އަންނަ ރަމަޟާން މަހުން ފެށިގެން ކޮންމެ ރަމަޟާން މަހަކު ރޯދަމަހުގެ ޢިނާޔަތް ދޭނެކަމުގެ ޔަޤީންކަން އަޅުގަނޑު ދެން. އެހެންވީމާ، އެހެން މުވައްޒަފުންނެކޭ އެއްގޮތަށް ރޯދަމަހުގެ ޢިނާޔަތް، ޑަބްލިޔޫ.ޑީ.ސީ.ގެ މެންބަރުންނަށް، މި އަންނަ ރޯދަމަހުން ފެށިގެން ލިބެން ފަށާނެ.
އެހެންވީމާ، އަޅުގަނޑުމެން މި ބަލަނީ، ރައްޔިތުންނަށް ލިބޭ އެއްޗެއް އަތުނުލައި، ރައްޔިތުންނަށް އިތުރު މުއްސަނދިކަން ހޯދައިދެވޭނެ ގޮތްތައް ފަހިކުރަން. ރާއްޖެ ބަނގުރޫޓުވިޔަނުދީ ސަލާމަތްކޮށްގެން މިކަން ކުރަން. އަދި މި ހުރިހާ ކަމެއް މި ކުރަނީ ފައިސާ ޗާޕުނުކޮށް. އަޅުގަނޑުމެން އިރާދަކުރެއްވިއްޔާ، ފައިސާ ޗާޕެއްނުކުރާނަން. ނުކޮށް އިރާދަކުރެއްވިއްޔާ ރައްޔިތުންނަށް މުއްސަނދިކަން ގެންނާނީ.
މި އިޤްތިޞާދުގެ ތެރޭގައި ވަރަށް ގިނަ ޑޮލަރު އެބަ ހިނގާ. މި ރަށަކީ ލޯކަލް ޓޫރިޒަމްގެ ވަރަށްބޮޑު ރަށެއް. މިއަދު އަޅުގަނޑު މި ގެޒެޓްކުރީ، ތަޞްދީޤުކުރީ، މިކަމާބެހޭ ބިލު. ބޭރު ފައިސާގެ ބިލު. އެއީ، ލޯކަލް ޓޫރިޒަމް އަދި ގެސްޓްހައުސްތައް ވިއްޔާ، ބޮލަކަށް 25 ޑޮލަރު، ނޫނީވިއްޔާ ގެސްޓްހައުސްތަކަށް ލިބޭ އާމްދަނީގެ 20 ޕަސެންޓް ބޭންކުތަކަށް މާރުކުރަންޖެހެނީ. ރިޒޯޓުތަކުން ވިއްޔާ 500 ޑޮލަރު. ނޫނީވިއްޔާ، ހަމަ ރިޒޯޓުތަކުގެ އާމްދަނީގެ 20 ޕަސެންޓް. އެހެންވީމާ، ބޭންކުތަކަށް މި ޑޮލަރު މާރުކުރީމާ، އޭގެ ސަބަބުން ވަރަށްގިނަ ފައިދާތަކެއް ލިބޭނެ. ވިޔަފާރިތަކަށް ޓީ.ޓީ. ހެދުމުގައި، ތިޔަބޭފުޅުންގެ ކްރެޑިޓް ކާޑުގެ ލިމިޓް، އަޅުގަނޑު އިޢުލާނު ކޮށްފައި އޮންނާނީ، ވަކި މުއްދަތެއްގެ ތެރޭގައި ޑަބަލް ކުރެވިގެންދާނެ ވާހަކަ. ބޭރުގައި ކިޔަވާ ކުދިންނަށް ލިބޭ އެއްޗެއް އިތުރުކުރެވިގެންދާނެ ވާހަކަ. ލިމިޓްތަކާއި ހުރިހާ އެއްޗެހި. ވަރަށްގިނަ ފައިދާތައް ވާނެ އިރާދަކުރެއްވިއްޔާ. އެގޮތަށް ވިޔަފާރިތަކުން، ޓޫރިޒަމްގެ ދާއިރާގައި އަދި މިފަހަރު މި ބިލު އަޅުގަނޑުމެން ފާސްކުރިއިރުގައި ހިމެނިފައި އޮންނާނެ، ވަކިވަރަކަށްވުރެ ބޮޑަށް އާމްދަނީ ލިބޭ، ޑޮލަރުން އާމްދަނީ ލިބޭ އެހެން ވިޔަފާރިތަކުންވެސް ވަކި އިންސައްތައެއް މާރުކުރަންޖެހޭ ގޮތަށް.
އެހެންވީމާ، އެގޮތަށް، ޤާނޫނާ އެއްގޮތަށް މާރުކުރަމުންދާނަމަ، އިރާދަކުރެއްވިއްޔާ ކުރިއަށް އޮތް 6 މަސް ތެރޭގައި، 12 މަސް، އާދެ، އެގޮތަށް އަޅުގަނޑު އޮންނާނީ އިޢުލާނުކޮށްފައި. ކުރިއަށް އޮތް 6 މަހުން ދޮޅުއަހަރާ ދޭތެރޭގައި އެކި ކަންތައްތައް ހަމަޖެހިގެން ގޮސް އިރާދަކުރެއްވިއްޔާ ވަރަށްބޮޑު ތަނުން ރައްޔިތުންނަށް ފައިދާވާނެ. އެހެންވީމާ، މިފަދަ ޕްލޭނެއްގެ ތެރެއިން އަޅުގަނޑުމެން ކަންކަން މިގެންދަނީ. އިރާދަކުރެއްވިއްޔާ އޭގެ ނަތީޖާ ލިބިގެންދާނެ.
އަޅުގަނޑު ވެފައި އޮތް އެހެން ވަޢުދެއް، ލޯކަލް ޓޫރިޒަމްގެ ތެރެއިން ޚާއްޞަކޮށް، ޖުމްލަކޮށް ޓޫރިޒަމުން ލިބޭ ޓެކްސްގެ ތެރެއިން ވަކި އިންސައްތައެއް ކައުންސިލްތަކަށް ޖަމާކޮށްދޭ ގޮތަށް ޤާނޫނަށް އިޞްލާޙު ގެންނަ ވާހަކަވެސް. އޭގެ ޓެކްނިކަލް މަސައްކަތް ފެށިފައި ވަނީ. އެހެންވީމާ، އެވެސް ނިމުނުހާ އަވަހަކަށް މަޖިލީހަށް ހުށަހަޅާނަން. އޭރުން ކައުންސިލްތަކަށް ޓޫރިޒަމުން ލިބޭ ޓެކްސް ސީދާ ކައުންސިލްތަކުގެ އެކައުންޓަށް ލިބޭނެ. އެއިންވެސް ރައްޔިތުންނަށް ޚިދުމަތް ދިނުމުގައި ކައުންސިލްތަކަށް އިތުރު މާލީ ބާރުވެރިކަމެއް އެބަ ލިބޭ. އެހެންވީމާ، މިފަދަ ކަންތައްތަކެއް އަޅުގަނޑުމެން ކުރިއަށް މިގެންދަނީ.
އެހެންވީމާ، ޑަބްލިޔޫ.ޑީ.ސީ.ތަކަށް އިރާދަކުރެއްވިއްޔާ ވަރަށް އުފާވެރި ޚަބަރެއް ކަމަށް އަޅުގަނޑު ގަބޫލުކުރަން މި ލިބުނީ. ޑަބްލިޔޫ.ޑީ.ސީ.ތަކުގެ ވާހަކަ ދަންނަވާއިރު އަޅުގަނޑު ހަމަ މިއަދު ފާހަގަކޮށްލަން. މިއަދު ހދ. ކުރިނބީގައި، ޑަބްލިޔޫ.ޑީ.ސީ.ގެ ތިން ގޮނޑިއަށް މެންބަރުން އިންތިޚާބު ކުރުމަށްޓަކައި ނެގުނު ވޯޓުގައި، ކުރިނބީގެ ތިން ގޮނޑިއަށް ކުރިމަތިލީ ޕީ.އެން.ސީ.ގެ ތިން ބޭފުޅުން، ތިން ކަނބަލުން. އެ ތިން ބޭފުޅުން ކުރިނބީގެ ރައްޔިތުން ހޮއްވަވައިދެއްވި. އެކަމަށްޓަކައި ކުރިނބީގެ ރައްޔިތުންނަށް ވަރަށް ބޮޑަށް ޝުކުރު ދަންނަވަން. އަދި ހޮވިވަޑައިގެންނެވި ޑަބްލިޔޫ.ޑީ.ސީ.ގެ ތިން މެންބަރުންނަށް މަރުޙަބާ ދަންނަވަން. އަދި މިކަމުގައި މަސައްކަތް ކޮށްދެއްވި ޕާޓީގެ ހުރިހާ ބޭފުޅުންނަށް ޝުކުރު ދަންނަވަން.
އަޅުގަނޑު ވަރަށް އުފާކުރަން، އަޅުގަނޑު މި ކުރާ މަސައްކަތުގައި، އަޅުގަނޑުމެން އެންމެން މިކުރާ މަސައްކަތުގައި، ހުރިހާ ރައްޔިތުން އިތުބާރާ އެކީގައި ޝާމިލްވެގެން ކުރިއަށް ވަޑައިގަންނަވާތީ. އިރާދަކުރެއްވިއްޔާ ޤައުމުގެ މުސްތަޤްބަލް އޮތީ ވަރަށް އުޖާލާކޮށް. އަޅުގަނޑުމެންގެ ޕްލޭނާ އެއްގޮތަށް، ރައްޔިތުންގެ އުންމީދާއި ވިންދާ އެއްގޮތަށް ރައްޔިތުން ގާތަށް އައިސްގެން، ރައްޔިތުންގެ ކަންކަން އޮޅުންފިލުވައިގެން މިކުރާ މަސައްކަތުގެ ނަތީޖާ ރަނގަޅުވާނެ. އެކަމުގެ ފުރިހަމަ ޔަޤީންކަން ތިޔަބޭފުޅުންނަށް އަޅުގަނޑު ދެން.
އަޅުގަނޑުމެންނަށް އެކިކަހަލަ ޗެލެންޖްތައް ކުރިމަތިވޭ. އެކި ޒާތްޒާތުގެ ޗެލެންޖްތައް ކުރިމަތިވޭ. ބައެއް ކަންކަމަކީ ހިނގާ ހާދިސާތައް. މިސާލަކަށް، މިދިޔަ ބުރާސްފަތި ދުވަހު ހިނގި ހާދިސާއެއް. މާލޭގައި ސަރުކާރުގެ ތިން ވުޒާރާއެއް ހިންގާ އިމާރާތެއް. ހައުސިންގ މިނިސްޓްރީ، ކޮންސްޓްރަކްޝަން މިނިސްޓްރީ، އެންވަޔަރަންމަންޓް މިނިސްޓްރީ ހިންގާ އިމާރާތް ހަމަ އެކީގައި އަނދާ ހުލިވީ. އަޅުގަނޑު އެތާ ހުރިން. ހުއްޓާ އަޅުގަނޑު ކުރިމަތީގައި އަނދައިގެން، ތިރިވެގެންދިޔަ ތަން އަޅުގަނޑަށް ފެނުނު. ކޮންމެ މިނިސްޓްރީއަކަށް، ނޫނީ ކޮންމެ އިމާރާތަކަށް ގެއްލުންވިޔަސް ހަމަ އަޅުގަނޑަށް އޭގެ އަސަރުކުރާނެ. އެހެން ނަމަވެސް، ޕަރސަނަލީ ވަރަށްބޮޑު އަސަރެއް ކުރާ ކަމަކަށް އެކަންވި ސަބަބަކީ، އެތަނުގައި އެ ހިނގަމުންދިޔަ ތިން މިނިސްޓްރީއާއި އަދި މާލޭސިޓީ ކައުންސިލަކީ، މީގެކުރީގައި އަޅުގަނޑު އިސްކޮށްހުރި ތަންތަން. ކޮންމެވެސްއިރެއްގައި. ގާތްގަނޑަކަށް 7 އަހަރު މި ތިން މިނިސްޓްރީވެސް އެކިގޮތްގޮތުން ހިންގުމުގެ ފުރުޞަތު އަޅުގަނޑަށް އޭރުގެ ރައީސުން ދެއްވާފައިވޭ. ރައީސް ވަޙީދު ފުރަތަމަ އަޅުގަނޑު ޢައްޔަންކުރީ، ހައުސިންގ އެންޑް އެންވަޔަރަންމަންޓް ކިޔާ މިނިސްޓްރީއަކަށް. އެހެންވީމާ، މިހާރުގެ ތިން މިނިސްޓްރީ އެއްކޮށް އެއީ. ދެން ހައުސިންގ އެންޑް އިންފްރާސްޓްރަކްޗަރަށް ބަދަލުކުރެއްވީ. ދެން ރައީސް ޔާމީންވެސް ހައުސިންގ އެންޑް އިންފްރާސްޓްރަކްޗަރ ހަވާލުކުރެއްވީ. ދެން މާލޭސިޓީ މޭޔަރަކަށް ފަހުންހުރީ.
އެހެންވީމާ، މި ހުރިހާ ތަނެއް ހިނގާ ތަން، އިމާރާތް އެތައް އަހަރެއްގެ މަސައްކަތްކުރި ތަން، އެތައް މުވައްޒަފުންނަކާ އެކީގައި މަސައްކަތް ކުރަމުންދިޔަ ތަން، ހަމަ ކުޑަވަގުތުކޮޅެއްގެ ތެރޭގައި އެކީގައި އަނދައި ހުލިވެ، ބިންމައްޗަށް ތިރިވެގެން ދިޔައިމަ، ވަރަށްބޮޑު އަސަރެއްކުރި. އެހެން ނަމަވެސް، މި ޗެލެންޖްވެސް އަޅުގަނޑުމެން ނެގީ ވަރަށް ވަރުގަދަ ހިތްވަރަކާ އެކީގައި. އަޅުގަނޑުމެންގެ ހުރިހާ ބޭފުޅުން، ވަޒީރުން، ކުންފުނިތަކުގެ ވެރިން، މުވައްޒަފުން، އެންމެން އެކުގައި އަތުކުރިއޮޅާލައިގެން ތެދުވެ، ބުރަ މަސައްކަތްތަކެއް ކުރަން ފަށައި، އެ ދުވަހުން ފެށިގެން އެރޭ ޢަމަލީގޮތުން އަލުން މަސައްކަތަށް އެނބުރި އައުމަށްޓަކައި ފެށި މަސައްކަތް މެދުނުކެނޑި ކުރަމުން އެދަނީ. އިރާދަކުރެއްވިއްޔާ މާދަމާ ހެނދުނު 8 ޖަހާއިރު މި ތިން މިނިސްޓްރީގެ ޚިދުމަތްވެސް ރައްޔިތުންނަށް ދޭން ފަށާނެ. ދަރުބާރުގޭގައި އެ މަސައްކަތް އެ ފެށެނީ. މިކަން އިއާދަކޮށްދިނުމަށް، ޚިދުމަތްތައް އިއާދަކޮށްދިނުމަށް އެހީތެރިކަން ދެއްވަމުން ގެންދަވާ މިކަމުގައި ޝާމިލްވި ހުރިހާ ބޭފުޅުންނަށް ހިތުގެ ފުންމިނުން ހަމަ ޝުކުރު ދަންނަވަން.
އަޅުގަނޑު ދަންނަވަން ބޭނުންވާ ވާހަކައަކީ، މިފަދަ ކަމެއް ދިމާވީމާވެސް، މިކަހަލަ ޗެލެންޖެއް ކުރިމަތިވީމަވެސް އަޅުގަނޑުމެންގެ ހިތްވަރު އިރާދަކުރެއްވީތީ ބައްޔެއް ނުވެއޭ. ﷲ އަށް ޙަމްދުކުރުމާއެކު، އަޅުގަނޑުމެން ހިތްވަރާއެކީގައި، ވަރުގަދަ ޢަޒުމެއްގައި، ވަރަށް ސާބިތުކަމާ އެކީގައި، ކުރިމަތިވާ ކޮންމެ ކަމަކާ ކުރިމަތިލައިގެން ރައްޔިތުންނަށް ޚިދުމަތް ދިނުމުގައި ކެރިގެން ކުރިއަށްދިޔުން އެއީ، އަޅުގަނޑުގެ ޢަޒުމަކީ. އެއީ، އަޅުގަނޑުމެން މަސައްކަތްކުރާ ގޮތަކީ. އެއީ، ރައްޔިތުންނަށް ޚިދުމަތް ދިނުމުގައި އަޅުގަނޑުމެން މި ސަރުކާރުން މަސައްކަތް ކުރަމުންދާނެ ގޮތަކީވެސް. އިރާދަކުރެއްވިއްޔާ، އޭގެ ނަތީޖާ ރައްޔިތުންނަށް ފޮނިވާނެ. މި ރަށުގެ ލޮބުވެތި ރައްޔިތުންނަށްވެސް އެ ޔަޤީންކަން އަޅުގަނޑު ދެން.
އާދެ، އެހެންވީމާ، ކުރިއަށް އޮތް ދުވަސްތަކުގައި، މިހެން ކުރިމަތިކުރާ ޗެލެންޖްތަކާއި، ކުރިމަތިވާ ޗެލެންޖްތަކާއި، މި ހުރިހާ ކަމެއް ގިރާކުރަމުން، ރައްޔިތުންގެ އަޑުއަހައިގެން، ރައްޔިތުންގެ ފަޅީގައި އޮވެގެން މި ސަރުކާރު ހިންގާނީ. އަޅުގަނޑުމެން އެންމެން އެދޭ ކަންތައްތައް، މުޅި ޤައުމަށް ގެންނަންވާ ބަދަލުތަކާއި، ކުރިއެރުންތަކާއި، ރަށްރަށުގެ މުޖުތަމަޢުތަކަށް ގެންނަންވާ ކުރިއެރުންތަކާއި، ބަދަލުތައް އަޅުގަނޑުމެން ގެންނަމުންދާނީ. އަޅުގަނޑުމެން އެންމެން މަސައްކަތް ފަށާފައި މިވަނީ ބޮޑެތި ކަންކަން ޙައްލުކުރަމުން. އަޅުގަނޑުމެން އެންމެން އަބަދުވެސް، މިކަން ޙައްލުވާނެބާވައޭ، ވެއްޖިއްޔާ ކިހާ ރަނގަޅުހޭ، ހިތުގެ ތެރޭގައި ކިޔާލަ ކިޔާލަ ބާއްވަން ޖެހިފައި ހުރި ކަންކަން، އިރާދަކުރެއްވީތީ އަޅުގަނޑުމެން ޙައްލުކުރަން މަސައްކަތް ފަށާފައި މިވަނީ. އިރާދަކުރެއްވިއްޔާ ޙަޤީޤީ މާނައިގައި މި ދިވެހި ޤައުމަށް ކުރިއެރުމާއި ތަރައްޤީ އަޅުގަނޑުމެން ގެންނަމުންދާނީ.
އާދެ، އަޅުގަނޑު އަދިވެސް އެއްފަހަރު، ދަނގެތީގެ ލޮބުވެތި ރައްޔިތުންނަށް ވަރަށް ބޮޑަށް ޝުކުރު ދަންނަވަން. އަދި ތަކުރާރުކޮށް އަޅުގަނޑު ދޭ ޔަޤީންކަމަކީ، މި ރަށުގެ ތަރައްޤީއަށްޓަކައި ކުރަންހުރި ކަންކަމުގައި، ތިޔަ ލޮބުވެތި ރައްޔިތުން އެދިވަޑައިގަންނަވާ ކަންކަން އަޅުގަނޑުމެން އިރާދަކުރެއްވިއްޔާ ހާސިލުކޮށްދޭނަމޭ. އަދި ހަމަ އެފަދައިން، ދެންހުރި ރަށްތަކުގެ ރައްޔިތުންނަށްވެސް އެއްވެސް ތަފާތުކުރުމެއްނެތި، އެ ރަށް އެއީ، ކިތަންމެ ކުޑަ ރަށެއް ކަމުގައިވިޔަސް، އެއީ ސަތޭކަ ރައްޔިތުން އުޅޭ ރަށަކަށްވިޔަސްވެސް އަދި ނޫނީވިއްޔާ ދިހަހާސް ރައްޔިތުން އުޅޭ ރަށަކަށްވީ ނަމަވެސް، ތަފާތެއްނުކުރާނަން. އަޅުގަނޑު އަބަދުވެސް ދަންނަވާ ވާހަކައެއް، ކޮންމެ ރައްޔިތަކީވެސް އަޅުގަނޑުގެ ކުރިމަތީގައި ހަމަހަމަ ރައްޔިތެކޭ. އެ ރައްޔިތަކު ނިސްބަތްވާ ރަށުގެ އާބާދީއަކުން ތަފާތެއް ނާންނާނެ. އެ ރައްޔިތެއް ނިސްބަތްވާ ސިޔާސީ ފިކުރަކުން އަންނާނެ ތަފާތެއް ނޯންނާނެ.
އެހެންވީމާ، އަޅުގަނޑުމެން ޚިދުމަތްދޭއިރުގައި ކުޑަރަށެއް، ބޮޑުރަށެއް ނުބަލައި ޚިދުމަތް ދެމުންދާނީ. އެހެންވީމާ، އެ ޚިދުމަތް ދިނުމުގައި، ރަށުގެ ރައްޔިތުން އެދިވަޑައިގަންނަވާ ކަންކަން އަޅުގަނޑުމެން ކޮށްދެމުން ދާނީ. ދެން މިކަންވެސް އޮޅުވާލަން ބައެއް މީހުން މަސައްކަތް ކުރާނެ. އެހެންވީމާ، މިކަން އޮތްގޮތް މި ދެންނެވީ.
މިއާ އެކީގައި، ދުރު ރާސްތާގެ ޕްލޭންތައް އަޅުގަނޑުމެން ހަދައިގެން ތަރައްޤީގެ ބައެއް މަޝްރޫޢުތައް ގެންދާތީ، އޮޅުވާލަން ބައެއް މީހުން މަސައްކަތްކުރޭ. ހަމަ ޙަޤީޤަތުގައިވެސް ރާއްޖޭގެ ދެމެހެއްޓެނިވި ތަރައްޤީގައި ކޮންމެގޮތެއްވިޔަސް އޮތް ޙައްލަކީ، ސަރަޙައްދީ ތަރައްޤީ. ވަކި ސެންޓަރުތަކެއް، ވަކި ސަރަޙައްދުތަކެއް ތަރައްޤީކޮށް، ހުރިހާ ރައްޔިތުންނަށް އެންމެމަތީ ފެންވަރުގެ ޚިދުމަތް ލިބޭނެ ފެންވަރަށް، އެ ތަންތަން ތަރައްޤީ ކުރެވިގެން ދިޔައިމަ އެއީ، ދެމެހެއްޓެނިވި ތަރައްޤީއަކީ ހުރިހާ މާނައެއްގައިވެސް. އެކަމަކު އެކަން ކުރަމުންދާއިރުވެސް، އެންމެ ކުޑަރަށަށްވެސް ބޭނުންވާ ކަންކަން ކޮށްދެމުންދާނީ. އެހެންވީމާ، އެއްވެސް ރައްޔިތަކު ބާކީއެއްނުވާނެ. އެހެންވީމާ، އެއީ އަޅުގަނޑުމެންގެ ސިޔާސަތަކީ.
އަޅުގަނޑުގެ ދުޢާއަކީ، އަޅުގަނޑުމެން މި ކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް ލައްވައި، އަޅުގަނޑުމެންގެ މި ލޮބުވެތި ޤައުމަށް އުފާފާގަތިކަން މިންވަރުކުރެއްވުން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.