ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އަރިއަތޮޅު ދެކުނުބުރީ ކުނބުރުދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ (އ.ތ.މ.) ކޮމިޓީއާ ބައްދަލުކުރައްވައި އެރަށުގެ ތަރައްޤީއަށް ބޭނުންވާ ކަންކަމާގުޅޭގޮތުން މަޝްވަރާކުރައްވައިފިއެވެ.
މިއަދު ހެނދުނު އަރިއަތޮޅު ދެކުނުބުރީ އަތޮޅު ކައުންސިލް އިދާރާގައި ކުރިއަށްދިޔަ މި ބައްދަލުކުރެއްވުމުގައި ކައުންސިލުން ވަނީ ރާއްޖޭގެ ރައީސަކު އެރަށަށް ޒިޔާރާތްނުކުރާތާ 15 އަހަރުވެފައިވާކަން ކަންބޮޑުވުމާއެކު ފާހަގަކުރައްވާފައެވެ. އަދި ކައުންސިލުން ވަނީ ރަށުގެ ސުކޫލު ހާލަތު ރަނގަޅުކުރުމަށް ބޭނުންވާކަމަށާއި ބަނދަރު ބޮޑުކުރުމަށް ބޭނުންވާކަމުގައި ފާހަގަކުރައްވާފައެވެ. ހަމައެއާއެކު ރަށުގެ ކުނި ނެގުމާއި ކުނި ނައްތާލުމުގެ މައްސަލައަށް ހައްލުބޭނުންވާކަމަށާއި ރަށުގެ ކުޅިވަރުގެ ދާއިރާ ހަރުދަނާކުރުމަށް ބޭނުންކަމުގައި ވެސް ކައުންސިލުން ފާހަގަކުރެއްވިއެވެ. މީގެ އިތުރުން ކުނބުރުދޫ ރައްޔިތުންނަށް އެންމެ ބޭނުންވާ އެންމެ މުހިންމުކަމަކީ ބޯހިޔާވަހިކަންކަމުގައި ކައުންސިލުން ވިދާޅުވިއެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނު ވަޢުދުވެވަޑައިގެންނެވި ކަންކަން ކުރިއަށްދާނެކަމަށެވެ. އަދި ދެންވެސް ޖުމްލަކޮށް ކައުންސިލުން ފާހަގަކުރެއްވި ކަންކަން ބައްލަވައި ކުރިއަށްގެންދަވާނެކަމުގައި އެމަނިކުފާނު ވިދާޅުވިއެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ކުނބުރުދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ