بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ހިންމަފުށީ ކައުންސިލްގެ ރައީސް އަދި ކައުންސިލަރުންނާއި، ޑަބްލިޔޫ.ޑީ.ސީ.ގެ މެންބަރުންނާއި، ރަށުގައި ހުރި ހުރިހާ މުއައްސަސާތަކުގެ ވެރިންނާއި، އަދި ރަށުގެ ލޮބުވެތި ރައްޔިތުން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ އެހެނިހެން ޢިއްޒަތްތެރި މެންބަރުން، ކުންފުނިތަކުގެ ވެރިން، ވަޑައިގެން ތިއްބެވި އެންމެހައި ބޭފުޅުން، އަދި މި ޖަލްސާ ދުރާއިގާތުން ބައްލަވާ، އަޑުއައްސަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މި ހަވީރުގެ ވަގުތުގައި، މި ރަށަށް އާދެވުމުން، ރަށުގެ ލޮބުވެތި ވަރަށް ގިނަ ރައްޔިތުން ނުކުމެވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
އާދެ، ވަރަށް ގިނަ ދުވަސްތަކެއް، އަހަރެއްހާ ދުވަސް ހިނގައްޖެ، އަޅުގަނޑަށް ނާދެވި. އެހެންނަމަވެސް، ތިޔަބޭފުޅުން އަޅުގަނޑަށް މިއަދު ތިޔަ ވިދާޅުވި ހޫނު މަރުޙަބާއިން ވަރަށް ބޮޑު އުފަލެއް ލިބިގެން ހިނގައްޖެ.
އާދެ، ރަށުގެ ތަރައްޤީއަށް ކުރަންހުރި ގިނަގުނަ ކަންތައްތައް އެބަހުރި. އެކިއެކި ދާއިރާތަކުން ކުރަންހުރި މަސައްކަތްތައް. އިރާދަކުރެއްވިއްޔާ، 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓަކީ، މި ދެންނެވި ކަންކަމުގެ އުފާވެރި މަންޒަރުތައް ޢަމަލީގޮތުން ފެނިގެންދާނެ ބަޖެޓް. އިރާދަކުރެއްވިއްޔާ، މި ދެންނެވި ގޮތަށް މި އަންނަ އަހަރު މަސައްކަތްތައް ކުރެވިގެންދާނެ.
އާދެ، މި ނިމިގެން މިދާ އަހަރުގެތެރޭގައި، އަޅުގަނޑުމެންނަށް މާގިނަ މަސައްކަތްތަކެއް ނުކުރެވުނު. އަޅުގަނޑުމެން ތަންފީޛު ކުރަން މަޖުބޫރުވެފައި އޮތް ބަޖެޓުގެ ސަބަބުން، އަޅުގަނޑުމެންގެ މައްޗަށް ލާޒިމުކުރެވި، ފާސްކޮށްފައި، ކުރީ ސަރުކާރުން ނިމިގެންދިޔައިރު ހަވާލުކޮށްފައި ދިޔަ ބަޖެޓް، އޭގައި އެއްވެސް މަޝްރޫޢެއް އެކަށީގެންވާ ގޮތެއްގައި ނުކުރެވޭގޮތަށް އޮތުމުން، މި ދެންނެވި ކަހަލަ މުހިންމު ކަންކަމަށް އަޅުގަނޑުމެންނަށް ޙަޤީޤަތުގައިވެސް އެންމެ އެދެވޭގޮތަކަށް ކަންކަން ނުކުރެވުނު.
އެހެންވީމާ، މި އަހަރު ރައްޔިތުންގެ މަޖިލީހުން، މި އަންނަ އަހަރަށް މި ފާސްކުރި ބަޖެޓުގެ ތެރެއިން އިރާދަކުރެއްވިއްޔާ، ތިޔަބޭފުޅުން ތިޔަ އެދިވަޑައިގަންނަވާ ކަންކަމުގައި ޢަމަލީ ސިފަ ޖެއްސޭނެ.
އާދެ، މި ދެންނެވި ގޮތުން، އަޅުގަނޑުމެން މަޝްރޫޢުތައް ކުރިއަށްގެންދަން ރާވާފައި އޮތް ތަރުތީބުން އަޅުގަނޑުމެން ގެންދާނީ. ތަކުރާރުކޮށް ދަންނަވާލަން. އަދިވެސް ދަންނަވާލަން ބޭނުން. މި ދެންނެވި ތަރުތީބުގެ ތެރެއިން އެންމެ އިސްކަމެއް ދޭނީ ގެދޮރު ބިނާކުރުމަށް. ގެދޮރު ބިނާކުރުމުގެ އެންމެ ގިނަ މަޝްރޫޢުތައް، އެއް އަހަރެއްގެ ތެރޭގައި ކުރިއަށްގެންދެވޭ އަހަރަށް އިރާދަކުރެއްވިއްޔާ 2025 ވާނެ. ވަރަށް ގިނަ ރަށްރަށުގައި ގެދޮރުގެ މަޝްރޫޢުތައް ހިންގުމަށް އަޅުގަނޑު ވާނީ އިންތިޚާބުގައި ވަޢުދުތަކެއް ވެފައި.
އަދި އެހެންނޫނަސް، ގެދޮރުވެރިކަމަކީ، މި ސަރަޙައްދަށް އަދި އަމުދުން ވަރަށް ބޮޑުވެފައިވާ މައްސަލައެއް. އެހެންވީމާ، ގެދޮރުވެރިކަމުގެ މަޝްރޫޢުތައް ހިންގުން އެއީ، އެންމެ މުހިންމު އެއް ކަންތައް. މި ރަށުގައިވެސް ބިންހިއްކުމުގެ މަޝްރޫޢެއް ހިންގިފައި އޮތުމާ އެކީގައި، ބިމުގެ ބޭނުން އެންމެ އެދެވޭގޮތުގައި ހިފުމުގައި، ގެދޮރުވެރިކަމަކީ މުހިންމު ކަމެއްގެ ގޮތުގައި، އަޅުގަނޑު ހިތުން ރައްޔިތުން ގަބޫލުކުރައްވާނެ.
ދެން، ތަރުތީބުގެ ތެރެއިން، އެންމެ އިސްކަމެއް މިދެނީ، ތަޢުލީމީ ދާއިރާއަށާއި، ޞިއްޙީ ދާއިރާއަށް ކުރިއެރުން ގެނެސްދިނުމަށްޓަކައި، ރަށްރަށުގައި ކުރަންހުރި މަސައްކަތްތަކަށް. ދެންމެގައި އެ ފާހަގަކުރެއްވި ގޮތަށް، މި ރަށުގައިވެސް އެބަހުރި، މި ދެ ދާއިރާއިން ކުރަންހުރި ކަންކަން. ސްކޫލްގެ މަސައްކަތްތަކެއް ކުރަން އެބަހުރި. ޞިއްޙީ ޚިދުމަތުގައި އިތުރުކުރަން ހުރި، ފުޅާކުރަން ބޭނުންވާ ކަންކަން އެބަހުރި.
އެހެންވީމާ، މި އަންނަ އަހަރު އެ ބަޖެޓުގެ ތެރެއިން، އަލަށް ހިންގާ ނިއު ޕޮލިސީ އިނީޝިއޭޓިވްގެ ތެރޭގައި، މި ދެންނެވި ދެ ދާއިރާއިން އިރާދަކުރެއްވިއްޔާ މި ރަށުގައިވެސް އަޅުގަނޑުމެން ކަންތައްތައް ކުރާނަން.
ދެން ކުރަން ހުރި ކަންތައްތަކަކީ، މަގުތަކާ ގުޅިފައި ހުރި ކަންކަން. ގިނަ ރަށްތަކެއްގައި މަގުތައް އޮތީ ހަލާކުވެފައި. އެހެންވީމާ، އެންމެ ފުރަތަމަ އަޅުގަނޑުމެން ތަރުތީބުކޮށްފައި މިވަނީ، ފެނާއި ނަރުދަމާ އަޅަން. ފެނާއި ނަރުދަމާ އަޅައި ނިމިފައި ހުރި ރަށްރަށުގައި ވިއްޔާ، މަގުތައް ހެދުން. މަގުހެދުމުގައިވެސް އަޅުގަނޑުމެން ވަރަށް ތަފްސީލުކޮށް އެކަން އެއޮތީ މެނިފެސްޓޯގައި ބަޔާންކޮށްފައި. އަދި އަޅުގަނޑު ތަކުރާރުކޮށް ވަޢުދުވެފައި އޮންނާނެ އެ ކަންތައް. ގިނ ރަށްތަކުގައި މުހިންމު ހުރިހާ މައި މަގުތައް ހެދުމަށް. އެހެންވީމާ، މިގޮތަށް މަގުހެދުމުގެ، ނޫނީވިއްޔާ ފެނާއި ނަރުދަމާއާއި މަގުހެދުން އެއީ، މި އަންނަ އަހަރު ދެން އެންމެ އިސްކަމެއް ދޭނެ ކަންކަން.
އެއާއެކީގައި، ދެން އެކި ކަހަލަ އިޖުތިމާޢީ މަޝްރޫޢުތައް، ކުޅިވަރާ ގުޅޭ، އަދި އިޖުތިމާޢީ ގޮތުން ކުރިއަށް ގެންދަން ހުރި އެކިއެކި މަޝްރޫޢުތަކަށް އިސްކަންދެވޭނެ.
އެހެންވީމާ، މިކަހަލަ ގޮތަކަށް ތަރުތީބު ކުރެވިގެން، އަޅުގަނޑު ވެފައި ހުރި ވަޢުދުތަކާއި، އަދި ރަށްރަށަށް ބޭނުންވާ މުހިންމު ކަންކަން ފުއްދުމުގައި ޢަމަލީ މަސައްކަތްތައް، މި އަންނަ އަހަރުގެ ތެރޭގައި ފަށާނަން. އަދި ދެން އަންނަ އަހަރަށް، އޭގެ ބާކީ ހުރި މަސައްކަތްތައް ފެށުމަށް ރޭވިފައި މިއޮތީ. އެހެންވީމާ، މި ތަރުތީބުގެ ތެރެއިން އިރާދަކުރެއްވިއްޔާ، މަސައްކަތްތައް ހިނގާނެ.
އަދި މި ރަށުގައިވެސް މި ދެންނެވި ގޮތަށް، ޞިއްޙީ ދާއިރާއާއި، ތަޢުލީމީ ދާއިރާގެ ތެރެއިން ކުރަންހުރި ކަންކަން ކުރުމާއި، މަގުހެދުމާއި، މިފަދަ ކަންކަން އެބައޮތް، މުހިންމު ކަންތަކުގެ ގޮތުގައި ކުރިއަށް ގެންދަވަން ތިޔަބޭފުޅުން ވިދާޅުވެލައްވާފައި.
އާދެ، އެހެންވީމާ، ހަމަ އެގޮތަށް އިޤްތިޞާދީ ގޮތުން ކުރިއަށް ގެންދަން ރައްޔިތުން އެދޭ ކަންކަން، ލޯކަލް ޓޫރިޒަމް، އަދި މަސްވެރިކަން، ދަނޑުވެރިކަން، މިހެން ހުރި އެކިއެކި ޞިނާޢަތްތައް މިހިރީ ރައްޔިތުން އުންމީދުކުރާ. އެހެންވީމާ، މި ރަށުގައިވެސް އެގޮތަށް ކުރަންހުރި ކަންކަންވެސް އަޅުގަނޑުމެން އިރާދަކުރެއްވިއްޔާ، ކައުންސިލާ މަޝްވަރާކޮށްގެން، މި އަންނަ އަހަރުގެ ތެރޭގައި ކުރެވޭ ކަންކަން ބަލާނަން. އަޅުގަނޑުމެން ބަލާނީ ހަމަ ވީހާވެސް ރަނގަޅަކަށް އެކަންކަމަށްވެސް ޢަމަލީ ސިފަ ގެނެސްދިނުމަށް.
އާދެ، އެހެންވީމާ، ޖުމްލަގޮތެއްގައި އަޅުގަނޑު ދަންނަވާލަން ބޭނުންވަނީ، ހިންމަފުށީގެ ތަރައްޤީއަށްޓަކައި، މި އަންނަ އަހަރުގެ ތެރޭގައި އަޅުގަނޑުމެން ވަރަށް ބޮޑު ސަމާލުކަމެއްދީގެން، ރައްޔިތުންނަށް މުހިންމު ކަންކަމުގައި ޢަމަލީ ސިފަ ޖައްސައިދޭނަމޭ އިރާދަކުރެއްވިއްޔާ. އެ ޔަގީންކަން ދެން.
އާދެ، ހަމައެއާއެކީގައި، ދެން މުޅި ރާއްޖެއަށް ޝާމިލުވާ މުހިންމު ކަންކަންވެސް ހައްލުކުރުމުގައި އަޅުގަނޑުމެން މަސައްކަތް ކުރަމުން ގެންދާނަން. މިހާރު މިވަނީ ވަރަށް ގިނަ މައްސަލަތަކެއް ހައްލުކުރުމުގައި އަޅުގަނޑުމެން ޢަމަލީގޮތުން މަސައްކަތް ފަށާފައި. އެހެންވީމާ، އަޅުގަނޑު ތަޞައްވުރެއް ކުރަހާލާނަމަ، ކުރިއަށް އޮތް އަހަރު ވެގެންދާނީ އިރާދަކުރެއްވިއްޔާ، މުޅި ރާއްޖޭގެ ހުރިހާ ރައްޔިތުންނަށް ޝާމިލުވާ، މުހިންމު ބޮޑެތި މައްސަލަތައް ހައްލުކުރުމަށް، ކޮންމެ ސޮސައިޓީއަކަށް، ކޮންމެ ރަށަކަށް، ކޮމިއުނިޓީއަކަށް މުހިންމު، އެ ރަށަކަށް ޚާއްޞަ ކަންކަން ކޮށްދެވޭނެ އަހަރަކަށް. އަދި އެއާއެކީގައި، އަޅުގަނޑުމެންގެ މުޅި އިޤްތިޞާދު ހަރުދަނާކޮށް، ފުޅާކޮށް، މިހާރު މި ބިނާކުރެވުނު ބިންގަލުގެ މަތީގައި، ފައިސާ ޗާޕުނުކޮށް، އަޅުގަނޑުމެންގެ ޤައުމަށް، ރައްޔިތުންނަށް މުއްސަނދިކަން ގެނެސްދިނުމުގެ ސިޔާސަތު ތަންފީޛު ކުރުން. އެހެންވީމާ، އިރާދަކުރެއްވިއްޔާ މި މަގުން އަޅުގަނޑުމެން ކަންތައްތައް ކުރިއަށް ގެންދާނަން.
އާދެ، އަޅުގަނޑުމެންގެ މި ދަތުރަކީ، ރަށްރަށުގެ ރައްޔިތުންނާއި އަދި ކައުންސިލްތަކާ ބައްދަލުކުރުމަށް އަޅުގަނޑު ފަށައިގެން އުޅޭ ސިލްސިލާގެ ދަށުން ކުރެވިގެންދާ ދަތުރެއް. މިހާރު ގާތްގަނޑަކަށް ހުރިހާ ރަށެއްގެ ކައުންސިލްތަކާ މި ބައްދަލުވީ. ދެން ވަރަށް މަދު ކައުންސިލްތަކެއް އޮތީ. އަޅުގަނޑު އުންމީދުކުރަނީ، އެ ކައުންސިލްތަކާވެސް އިރާދަކުރެއްވިއްޔާ، މާލަސްތަކެއް ނުވެ ބައްދަލުވާނެ ކަމަށް.
ހަމައެއާއެކީގައި، ދެން އަޅުގަނޑަށް ނުދެވި ހުރި ހުރިހާ ރަށްތަކަށްވެސް، ވަރަށް ބޮޑަށް ބޭނުން، ވީހާވެސް އަވަހަކަށް ތަރުތީބެއްގެ ތެރެއިން، މި ފެށޭ އަހަރު ތެރެއަށް ބަހާލައިގެން ހުރިހާ ރަށަކަށް ދާން. އަޅުގަނޑު ބޭނުންވަނީ، ރައްޔިތުންގެ ގާތަށް ގޮސްގެން، ކަންކަމުގެ އަޑުއަހައިގެން، ރައްޔިތުން ބޭނުންވާގޮތަށް އިރާދަކުރެއްވިއްޔާ ކަންތައްތައް ގެންދަން.
އާދެ، އަދިވެސް އެއްފަހަރު، ވަރަށް ބޮޑަށް ތިޔަބޭފުޅުންނަށް ޝުކުރު ދަންނަވަން. ތިޔަބޭފުޅުން ވަޑައިގެން، ތިޔަ ހޭދަކުރައްވާ ވަގުތާއި، ދެއްވާ ތަރުހީބަށް. އިރާދަކުރެއްވިއްޔާ ހިންމަފުށީގެ ތަރައްޤީގައި ޙަޤީޤީ ކުލަ ޖައްސައިދިނުމުގައި، އަޅުގަނޑުމެން ވަރަށް ފަރުވާތެރިކަމާއެކީގައި، ކަންކަން ކޮށްދޭނެކަމުގެ ޔަގީންކަން އަދިވެސް ދެމުން، އަޅުގަނޑުގެ ވާހަކަކޮޅު ނިންމާލާނަން.
އަޅުގަނޑުގެ ދުޢާއަކީ، އަޅުގަނޑުމެން މި ކުރާ މަސައްކަތްތަކުގައި اللهُ سُبْحَانَهُ وَتَعَالَى ބަރަކާތް މިންވަރު ކުރެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.