بِسْمِ ٱللّٰهِ ٱلرَّحْمٰنِ ٱلرَّحِيمِ
الْحَمْدُ لِلَّـه، وَالصَّلَاة وَالسَّلَامُ عَلَىٰ أَشْرَفِ الْأَنْبِيَاءِ وَالْمُرْسَلِين، وَعَلَىٰ آلـه وَصَحْبِـهِ أَجْمَعِين.
މި ރަށަށް އަޅުގަނޑު އައުމުން، ރަށުގެ ލޮބުވެތި ރައްޔިތުންގެ ފަރާތުން އަޅުގަނޑަށް ވިދާޅުވި ހޫނު މަރުޙަބާއަށްޓަކައި، އެންމެ ފުރަތަމަވެސް ވަރަށް އިޚްލާޞްތެރިކަމާއެކީ ހިތުގެ ފުންމިނުން ވަރަށް ބޮޑަށް ޝުކުރު ދަންނަވަން. ޝުކުރިއްޔާ!
އަޅުގަނޑު ގަބޫލުކުރާގޮތުގައި، އަޅުގަނޑުމެންގެ ދިވެހިރާއްޖޭގެ ކޮންމެ ރަށެއްގައިވެސް ރައްޔިތުން ބޭނުންވާނެ ވަރަށް ގިނަ ކަންކަން އެބަހުރި. އެކަންކަން ހާސިލުކޮށްދިނުމަށްޓަކައި، ރައްޔިތުން ތާއަބަދުމެ އެއިރެއްގައި އޮންނަ ސަރުކާރަކަށް އެދެމުން، ކައުންސިލްތައް މެދުވެރިކޮށް، ހުށަހެޅުންތައް ހުށަހަޅަމުން އެބަގެންދޭ. އެއަށް ބިނާކޮށް، ސަރުކާރަކުން އެކުލަވައިލެވިފައިވާ ކަންތައްތަކެއް، ނޫނީވިއްޔާ ރައްޔިތުންނަށް ހުށަހަޅާ ކަންތައްތަކެއްވެސް އެބަހުރި. އެއަށް އަޅުގަނޑުމެން ކިޔައި މި އުޅެނީ، އަޅުގަނޑުމެންގެ މި ސަރުކާރުން ހުށަހަޅާފައިވާ މެނިފެސްޓޯގެ ވާހަކަ. އޭގައި، ވަރަށް ސާފު، ޞަރީޙަ ބަހުން ރައީސުލްޖުމްހޫރިއްޔާ، ރައީސް ޑޮކްޓަރ މުޙައްމަދު މުޢިއްޒު ވިދާޅުވެފައިވާނެ، އެއްވެސް ސަރުކާރަކުން، އޭގެ މާނައަކީ، ނިމިދިޔަ ސަރުކާރުން ފެށްޓެވި މަޝްރޫޢެއް ކަމުގައިވީނަމަވެސް، އެ މަޝްރޫޢަށް މި ސަރުކާރުން އިޙްތިރާމް ކުރާނެ ވާހަކަ. އަދި އެއަށްވުރެ ބާރު ސްޕީޑުގައި، އެ ކަންކަން ކުރިއަށް ގެންދެވެން އޮތް މަގު ހޯއްދަވައިގެން، އެއަށް ފައިސާ ހޯއްދަވައިގެން، އެކަމެއް ރައްޔިތުންގެ ޙައްޤުގައި ނިންމަވައި ދެއްވާނެ ވާހަކަ.
މިއަދު މި ރަށުގެ މި ދަނޑު އެކަމުގެ ނަމޫނާއަކަށް ފުދޭ. އެ ދައްކައިދެނީ، ޚާއްޞަގޮތެއްގައި ޒުވާނުންނަށް ހުރި ކަންކަން. ޒުވާނުންނަށް ހުރި ގިނަ ވަސީލަތްތަކުގެ ބޭނުން ނުހިފި، މިއަދު މިހާ ހިސާބަށް އައިއިރު، ހުރިހާ ރަށެއްގެ ކަންކަން ގާތްގަނޑަކަށް ހުއްޓި، ބައެއް ދަނޑުތައް ވީރާނާވެފައި ހުރިކަން އަޅުގަނޑުމެންނަށް އެނގެން އޮތީ.
އެހެންނަމަވެސް، ރައީސްގެ ފުރިހަމަ އިރުޝާދާ އެކީގައި، ވަޒީރު ޢަބްދުﷲ ރާފިޢު ވަރަށް ހިތްވަރާއެކީގައި، ޒުވާނުންނާ ގުޅިގެން، ޒުވާނުންގެ އަޑު އައްސަވަމުން ގެންދަވާކަމީ، އަޅުގަނޑުމެންނަށް ލިބޭ އެންމެ ބޮޑު ހިތްހަމަޖެހުން. އަދި ޒުވާނުންނަށް އަޅުގަނޑުމެން ދޭން ބޭނުންވާ ޔަޤީންކަމަކީ، މިހެން ހުރި ހުރިހާ ދަނޑުތަކެއް، ދާދި އަވަހަށް މި ސަރުކާރުން ނިންމައިދޭނެ ކަމުގެ ޔަޤީންކަން. އަދި ޒުވާނުން ބޭނުންވާ ކަންކަން އެއްވެސް ހިނދުކޮޅަކަށްވެސް ހުއްޓާލައިގެން ނުވާނެއޭ. އެ އަޑު އުފުލަންޖެހޭނެއޭ. އަޅުގަނޑުމެން ބޭނުން، ޒުވާނުންގެ ފަރާތުން އެދޭ އެދުމަކީ، ޒުވާނުން ބޭނުންވާ ކަންކަމަށް ޒުވާނުން އެދޭށޭ. ޒުވާނުން އަޑު އުފުލައިދޭށޭ. އެއީ، އެ ޒުވާނުން، ޒުވާނުންގެ ގޮތުގައި އަޅުގަނޑުމެން ބަލައިގަންނަ ގޮތަކީ. އެއީ، ޤައުމުގެ ހަކަތަ. އެ ހަކަތައިގައި ވަރުނެތިއްޖެ ކަމުގައިވާނަމަ، އަޅުގަނޑުމެންގެ ޤައުމެއް ނުހިނގާނެ.
ދެންމެ ކައުންސިލްގެ ރައީސް ވަރަށް ތަފްޞީލުކޮށް ވިދާޅުވެއްޖެ، މި ރަށަށް ބޭނުންވެފައި ހުރި އިތުރު ކަންތައްތަކެއްގެ ވާހަކަ. އެއީ، ޕްލޭން ކުރެވިގެން ކުރިއަށް ގެންދެވޭ ކަންކަން. އިރާދަކުރެއްވިއްޔާ، އަޅުގަނޑުމެންގެ ވަޒީރު އެކަންކަމަށް އިސްކަން ދެއްވައިގެން، ތަރުތީބު ކުރައްވައިގެން ކުރިއަށް ގެންގޮސްދެއްވައި، ޒުވާނުންނަށް ބޭނުންވާ ކަންކަން ފުރިހަމަކޮށްދެއްވާނެ.
އާދެ، މިއީ އެހާ ގިނަ ވާހަކަ ދައްކަން އޮތް ފުރުޞަތެއް ނޫން. ވަރަށް ލޯބި، ތުއްތު ތުއްތު ކުދިންވެސް މި އުފަލުގައި ބައިވެރިވާ ތަން އަޅުގަނޑުމެންނަށް އެބަ ފެނޭ. މުޅި ރަށުގެ ލޮބުވެތި ރައްޔިތުންނަށް މި ލިބިދޭ ހިތްހަމަޖެހުންތަކަކީ، ރައީސް އެންމެ ބޮޑަށް އެދިވަޑައިގަންނަވާ ކަންކަން. އިރާދަކުރެއްވިއްޔާ، މި ސަރުކާރުން އެކަންކަން ރައްޔިތުންނަށް ކަށަވަރުކޮށްދޭނެ.
ތިޔަބޭފުޅުން އަޅުގަނޑާމެދު ބެހެއްޓެވި ގާތްކަމާއި، ދެއްވި އިޙްތިރާމަށްޓަކައި، އަދިވެސް އެއްފަހަރު ވަރަށް ބޮޑަށް ޝުކުރު ދަންނަވަން، އަޅުގަނޑުމެން މިކުރާ މަސައްކަތުގައި اللّـه تَعَالَى ބަރަކާތް ލައްވާށި!
وَالسَّلَامُ عَلَيْكُمْ.