بِسْمِ ٱللّٰهِ ٱلرَّحْمٰنِ ٱلرَّحِيمِ
اَلحَمْـدُ لِلّـهِ رَبّ العَـالَمِـين، وَالصَّلاَة ُوَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ދިވެހި ބަހާއި، ސަގާފަތާއި، ތަރިކައާ ބެހޭ ވަޒީރު، އާދަމް ނަޞީރު އިބްރާހީމް، މި ޤައުމީ ދަރުބާރުގައި ބައިވެރިވެވަޑައިގަންނަވާ ޢިއްޒަތްތެރި އެދުރުންނާއި، އުސްތާޛުންނާއި، ތަޖުރިބާކާރުން، ވަޑައިގެން ތިއްބެވި އެންމެހައި ޢިއްޒަތްތެރީން، އަދި މި މަހާސިންތާ އަޑުއައްސަވާ ލޮބުވެތި އެންމެހައި ރައްޔިތުން؛
السَّلَامُ عَلَيْكُمْ وَرَحْمَةُ اللهِ وَبَرَكَاتُه.
އާދެ، ދިވެހި ޤައުމިއްޔަތާއި، ދިވެހި ބަހަށް އިސްކަންދިނުމަށް ޚާއްޞަ ކުރެވިގެން، ރާއްޖޭގެ ތާރީޚުގައި މިހާތަނަށް އުފެއްދި ފުރަތަމަ ވުޒާރާއިން އިންތިޒާމު ކުރައްވާ މިފަދަ ދަރުބާރެއް އިފްތިތާޙުކުރުމަކީ، އަޅުގަނޑަށް ލިބޭ ވަރަށް ބޮޑު އުފަލެއް. އަޅުގަނޑަށް މަޢުލޫމާތު ލިބިފައިވާ ގޮތުގައި، ދިވެހި ޤައުމިއްޔަތާ މެދު މަޝްވަރާކޮށް، މަޢުލޫމާތު ބަދަލުކުރުމަށް، ފަހުގެ ތާރީޚެއްގައި، މިފަދަ ދަރުބާރެއް ބޭއްވިފައެއް ނުވޭ. އެހެންކަމުން، މިއީ ދިވެހީންގެ ޤައުމިއްޔަތާއި، އަމިއްލަވަންތަކަން ރައްކާތެރިކުރުމަށާއި، އެކަމަށް ހޭލުންތެރިކަން އިތުރުކުރުމަށް، ކުރިއަށް އެޅޭ ވަރަށް ހަރުދަނާ، އަދި ވަރަށް އީޖާބީ ފިޔަވަޅެއް.
އަޅުގަނޑު ޤަބޫލުކުރާ ގޮތުގައި، މިނިވަން އަދި ތަހުޒީބު ޤައުމެއްގެ ގޮތުގައި އެތައް ހާސް އަހަރަކަށް ރާއްޖެ ދެމިއޮތުމަށްޓަކައި އެންމެ މުހިންމު ކަމަކީ، ދިވެހި ޤައުމިއްޔަތު ނެގެހެއްޓުން. ދިވެހީންގެ ޤައުމިއްޔަތާ މެދު ފަޚުރުވެރިވާ ބަޔަކަށް އަޅުގަނޑުމެން އެންމެންވެސް ވުން. އެހެންކަމުން، މިއަދު މި ފެށޭ ދަރުބާރުގައި، ދިވެހި ޤައުމިއްޔަތާ ގުޅުންހުރި، އަދި ދިވެހީންގެ އަމިއްލަވަންތަކަމާ ގުޅުންހުރި، ވަރަށް މުހިންމު ދާއިރާތަކަކުން މަޢުލޫމާތު ހުށަހެޅި، ޢިލްމީ މަޝްވަރާތަކެއް ކުރެވި، އައު އީޖާދީ ވިސްނުންތަކެއް ލިބިގެންދާނެ ކަމަށް ޔަޤީންކުރަން.
އަޅުގަނޑުމެންގެ އަމިއްލަ ބަހެއް، އަމިއްލަ އަކުރެއް، އަމިއްލަ ސަގާފަތެއް، އަމިއްލަ އާދަކާދަތަކެއް، އަދި އަމިއްލަ ފަންނުވެރިކަމެއް އެބައޮތް. މިއީ ދުނިޔޭގެ ބައެއް ޤައުމުތަކަށް ލިބިފައިނުވާ ނަސީބެއް. އަޅުގަނޑުމެންނަށްވުރެ މާ ބޮޑެތި، މާ މުއްސަނދި، ޤައުމުތަކެއްވެސް ވޭ. މި ދެންނެވި ޤައުމިއްޔަތުގެ ރުކުންތައް ފުރިހަމައެއް ނުވޭ. އެހެންކަމުން، ދިވެހީންނަކީ ވަރަށް ނަސީބުގަދަ ބަޔެއް.
އަޅުގަނޑުމެންގެ ޤައުމުގެ ޤުދުރަތީ ރީތިކަމުގެ ވާހަކަ އެންމެންވެސް އެބަ ދައްކާ. ރާއްޖޭގެ ޗާލު ތުނޑިތަކާއި، ހިތްގައިމު ފިނޮޅުތަކާއި، ސާފު މޫދާއި، ކުލަ ރީތި އުދަރެސް، މުޅި ދުނިޔޭގައިވެސް ސިފަކުރަނީ، އެފަދަ ދެވަނައެއް ނެތް ފުރިހަމަކަމެއްގެ ގޮތުގައި. އެއާއެކު، ދިވެހީންނަކީ، ފަޚުރުވެރި ތާރީޚީ ޒަމާންވީ އާދަކާދަތަކާއި، ކާބަފައިންގެ ހީވާގި ދިރިއުޅުމާއި، ދިވެހި ބަހުގެ ޗާލުކަން ފަދަ އަޅުގަނޑުމެންގެ ޤައުމިއްޔަތުގެ ބަހާތަކަކީ އަޅުގަނޑު ދެކޭގޮތުގައި، ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށްދޭން އެބަޖެހޭ. ރާއްޖޭގެ އަމާންކަން، ދިވެހީންގެ އެކުވެރިކަން، ޚުލްގު ހެޔޮކަން، މި ޤައުމަށް އަންނަ ކޮންމެ ފަތުރުވެރިއަކަށް ޢަމަލީގޮތުން އަޅުގަނޑުމެން ދައްކަން އެބަޖެހޭ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ސަމާލުކަން ދެއްވާ އެއްކަމަކީ، ދިވެހީންގެ އަމިއްލަވަންތަކަމާއި، ޤައުމިއްޔަތު ހިމާޔަތްކުރެއްވުން. ތަޢުލީމީ މަންހަޖުގައި ޤައުމިއްޔަތު، ވަކި މާއްދާއެއްގެ ގޮތުގައި ހިމެނުއްވި ސަބަބަކީ މިއީ. އަދި ދިވެހި ދިދައަށާއި، ދިވެހި ޤައުމީ ސަލާމަށް ޚާއްޞަ އިސްކަމެއް އެ މަނިކުފާނު ދެއްވާ ސަބަބަކީވެސް މިއީ. އަދި ރާއްޖޭގެ މިނިވަންކަން ކަށަވަރުކުރެއްވުމަށް އެހާ ބޮޑު އަހައްމިއްޔަތެއްވެސް އެ މަނިކުފާނު ދެއްވާ ސަބަބަކީ މިއީ. ޤައުމިއްޔަތުގެ އިސްވަރު އުފައްދަވައި، ޤައުމީ ކަންކަން އެންމެ އުހަށް ނަންގަވަން އެ މަނިކުފާނު ކުރައްވަމުން އެ ގެންދަވާ މަސައްކަތްޕުޅަށް އަޅުގަނޑުމެން އެންމެންގެ ފުރިހަމަ އެއްބާރުލުން ދޭންޖެހޭ.
އަޅުގަނޑު އުންމީދުކުރަނީ، މި ދަރުބާރަކީ ވަރަށް ކާމިޔާބު ދަރުބާރަކަށް ވެގެންދިޔުން. ބިނާކުރަނިވި މަޝްވަރާތަކެއް ކުރެވި، މުހިންމު ލަނޑުދަނޑިތަކެއް، މި ދަރުބާރުން ހާސިލުވެގެން ދިޔުން.
އަޅުގަނޑުމެން މި ކުރާ މަސައްކަތުގައި، اللهُ سُبْحَانَهُ وَتَعَالَى ބަރަކާތް ލައްވާށި! ދިވެހީންގެ މަޖްދާއި، ކަރާމަތާއި، ސިޔާދަތަށް ނަޞްރާއި ކާމިޔާބު މިންވަރުކުރައްވާށި!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.