بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علـٰى سيّدنا محـمَّدٍ وَ علـٰى آلـه وَأصحابِـهِ أجمـعـين.
ދިވެހިރާއްޖޭގެ ލޮބުވެތި ރައްޔިތުން!
السّلام عليكم ورحمـة اللّـه وبركاته.
މިދިޔަ ހުކުރުދުވަހު ބޭއްވުނު ރައްޔިތުންގެ އާންމު ސިއްރު ވޯޓުގައި، ކުރިއަށް އޮތް ފަސްއަހަރުވެސް ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގައި ހުރުމަށް، ތިޔަ ލޮބުވެތި ރައްޔިތުންގެ ވަރަށްބޮޑު އަޣްލަބިއްޔަތަކުން އަޅުގަނޑު އިންތިޚާބު ކުރެއްވި ކަމަށްޓަކައި، اللّـه سبحـانـه وتعـالىގެ ޙަޟްރަތަށް ޙަމްދާއި ޝުކުރުކޮށް، ތިޔަ ލޮބުވެތި އެންމެހައި ރައްޔިތުންނަށް ނުހަނު އިޚްލާޞްތެރިކަމާއެކު ޝުކުރު ދަންނަވަން.
މި އިންތިޚާބުގައި، އަޅުގަނޑަށް އާނއެކޭ ވިދާޅުވި ހުރިހާ ބޭފުޅުންނަށް، އަޅުގަނޑުގެ ހިތުގެ އެންމެ ފުންމިނުން ޝުކުރު ދަންނަވާއިރު، އަޅުގަނޑަށް ނޫނެކޭ ވިދާޅުވި ބޭފުޅުންނަށްވެސް ޝުކުރު ދަންނަވަންޖެހޭ. އެއީ، ވޯޓުގައި ބައިވެރިވެވަޑައިގެންނެވި ހުރިހާ ބޭފުޅުންވެސް، ދީމުޤްރާޠީ އުޞޫލު ނިޔާކުރާގޮތުގެ މަތިން، އެ ބޭފުޅެއްގެ އިންތިޚާބީ ޙައްޤު ފުރިހަމަ މިނިވަންކަމާއެކު ބޭނުންކުރައްވާފައިވާތީ.
މި އިންތިޚާބުގައިވެސް، ކުރީ ފަހަރުތަކެކޭ އެއްފަދައިން، ރާއްޖޭގެ ރައްޔިތުން އަޅުގަނޑަށް ތިޔަ ދެއްވީ، ވަރަށް މަތިވެރި ޝަރަފެއް. އަދި ވަރަށްބޮޑު އިތުބާރަކާއި ތާއީދެއް. އެހެންކަމުން، އެކަމަށްޓަކައިވެސް، ތިޔަ ޢިއްޒަތްތެރި ރައްޔިތުންނަށް އަޅުގަނޑު މި ޝުކުރު ދަންނަވަނީ، ނުހަނު ލޯތްބާއި ވަފާތެރިކަމާއެކު.
އާ ދައުރަކަށް އަޅުގަނޑު އިންތިޚާބުވުމާ ގުޅިގެން، މި އޮފީހަށް ވަޑައިގެން ނުވަތަ ސިޓީއާއި މެސެޖު ފޮނުއްވައިގެން، އަޅުގަނޑަށް ތަހުނިޔާ ވިދާޅުވި ލޮބުވެތި ހުރިހާ އަޚުންނާއި އުޚުތުންނަށްވެސް، އަޅުގަނޑުގެ އިޚްލާޞްތެރި ޝުކުރާއި ހެޔޮއެދުންތައް ފޮނުވަން.
ރިޔާސީ އިންތިޚާބުގެ ކަންތައްތައް އިންތިޒާމު ކުރައްވައި ހިންގެވުމަށް ކޮމިޝަނަރ އޮފް އިލެކްޝަންސް އަލްފާޟިލް އިބްރާހީމް ރަޝާދު ކުރައްވާފައިވާ މަސައްކަތްޕުޅުތަކަށްޓަކައި، އެމަނިކުފާނަށް ޝުކުރު ދެންނެވުމަކީވެސް، މިއަދު އަޅުގަނޑުގެ އުފާވެރި ވާޖިބެއް.
އިލެކްޝަންސް ކޮމިޝަނަރަށް ލަފާ ދެއްވި ޤާނޫނީ ކޮމިޓީއަށާއި، އެމަނިކުފާނުގެ އޮފީހުގެ ވެރިންނަށާއި، މުވައްޒަފުންނަށާއި، މާލެއާއި ރާއްޖޭގެ އަތޮޅުތަކުގައި، މި އިންތިޚާބުގެ ކަންތައްތައް ބަލަހައްޓަވައި، އެކިގޮތްގޮތުން އެހީތެރިވެދެއްވި ހުރިހާ ބޭފުޅުންނަށްވެސް އަޅުގަނޑު ޝުކުރު ދަންނަވަން.
އިންތިޚާބުގެ ކަންތައްތައް ހަމަޖެހިފައިވާ ގޮތާއި، އިންތިޚާބުގެ މަޢުލޫމާތާއި، ޚަބަރުތަކާއި، އިންތިޚާބުގެ ނަތީޖާތައް، ރާއްޖޭގެ ރައްޔިތުންނަށް ވަގުތުން ވަގުތަށް ގެނެސްދެއްވުމުގައި، ރާއްޖޭގެ ޚަބަރުފަތުރާ ވަސީލަތްތަކުން ވަނީ، ވަރަށް ބުރަ މަސައްކަތްތަކެއް ކުރައްވާފައ. މިކަމުގައި ޚާއްޞަކޮށް، ދިވެހިރާއްޖޭގެ އަޑާއި، ޓެލެވިޜަން މޯލްޑިވްސްއާއި، ރާއްޖޭގެ ނޫސްތައް އަދާކުރެއްވި ދައުރަށްޓަކައި އެފަރާތްތަކަށް ޝުކުރު ދެންނެވުމަކީވެސް މި ފުރުޞަތުގައި އަޅުގަނޑަށް ލިބޭ އުފަލެއް.
ރާއްޖޭގެ ލޮބުވެތި ރައްޔިތުން!
ރާއްޖޭގެ ރައީސުލްޖުމްހޫރިއްޔާކަމުގެ މަގާމުގެ ވާޖިބުތައް އަދާކުރުމުގައި، ވޭތުވެދިޔަ 25 އަހަރު އަޅުގަނޑަށް ލިބުނު އެންމެބޮޑު އުފަލަކީ އަދި ހިތްހަމަޖެހުމަކީ، ތިޔަ ލޮބުވެތި ރައްޔިތުން މެދުކެނޑުމެއްނެތި އަޅުގަނޑަށް ދެއްވަމުން ގެންދެވި މަތިވެރި އެހީތެރިކަމާއި އެއްބާރުލެއްވުން. އެހެންކަމުން، ކުރިއަށް އޮތް 5 އަހަރުވެސް ތިޔަބޭފުޅުންގެ ފުރިހަމަ ތާއީދާއި، އެހީތެރިކަމާއި، އެއްބާރުލެއްވުން އަޅުގަނޑަށް ލިބޭނެކަމަށް އަޅުގަނޑު ޔަޤީންކުރަން.
ރާއްޖޭގެ ލޮބުވެތި ރައްޔިތުން!
ދުނިޔެ މިދަނީ ބަދަލުވަމުން. އަޅުގަނޑުމެންގެ ރާއްޖެވެސް މިދަނީ ތަރައްޤީވަމުން، ބަދަލުވަމުން. ރާއްޖޭގެ ރައްޔިތުންގެ އުންމީދުތަކާއި، ހާސިލުކުރަން އެދޭ ލަނޑުދަނޑިތައްވެސް، މިދަނީ ބަދަލުވަމުން. އެހެންކަމުން، ރާއްޖެ ތަރައްޤީގެ އާ ފިޔަވައްސަކާ ކުރިމަތިލާއިރު، އަޅުގަނޑުމެންގެ ވިސްނުމާއި، ކަންތައްތައް ހިންގަމުންގެންދާ ނިޒާމުތަކަށާއި، ގެންގުޅޭ އުޞޫލުތަކަށް ޒަމާނާ ގުޅޭ އެކަށީގެންވާ ހެޔޮ ބަދަލުތަކެއް ގެންނަންޖެހޭނެ ކަމަށް އަޅުގަނޑު ދެކެން. މިގޮތުން، ޤައުމުގެ ކަންތައްތަކަށް ގެންނަންޖެހޭ ބަދަލުތަކާ ބެހޭގޮތުން ގިނަ ބައެއްގެ ޚިޔާލު ހޯދުމަށްޓަކައި، ވަރަށް މިނިވަން ޖައްވެއްގައި އަޅުގަނޑު މަޝްވަރާ ކުރަން ގަސްތުކުރާ ވާހަކަ، މި ފުރުޞަތުގައި ދަންނަވަން. މި ދެންނެވި ބަދަލުތައް ގެނައުމުގައި، ކުރިއަށް އޮތް ފަސް އަހަރު ރާއްޖޭގެ ލޮބުވެތި ރައްޔިތުން އަޅުގަނޑަށް އެހީތެރިވެވަޑައިގެންދެއްވުމަކީ، އަޅުގަނޑުގެ އިޚްލާޞްތެރި އެދުމެއް.
މާތްﷲ، ރާއްޖޭގެ ލޮބުވެތި ރައްޔިތުންނަށް، މާތްވެގެންވާ އިސްލާމްދީނުގެ ހިދާޔަތުގައި ސާބިތުވެ ތިބުމުގެ މަތިވެރި ނިޢްމަތް ދެއްވާށި! ރާއްޖޭގައި މިއޮތް ޞުލްޙަމަސަލަސްކަމާއި، ޤައުމީ އެއްބައިވަންތަކަން ދަމަހައްޓަވާށި! ރާއްޖޭގެ ކަންތައްތަކަށް އެއްދުވަހުން އަނެއްދުވަހަށް ގެންނަންޖެހޭ އިޞްލާޙުތަކާއި ބަދަލުތައް ގެނައުމުގެ ހެޔޮ ވިސްނުމާއި ތައުފީޤު އަޅުގަނޑުމެންނަށް ދެއްވާށި! އާމީން.
والسّلام عليكم ورحمـة اللّـه وبركاته.