بِسْمِ ٱللّٰهِ ٱلرَّحْمٰنِ ٱلرَّحِيمِ
اللهُ سُبْحَانَهُ وَتَعَالَى އަށް ޙަމްދާއި ޝުކުރުކުރަން. ޢާލަމްތަކަށް ނިޢުމަތެއް ކަމުގައި އެކަލާނގެ ލެއްވި، ކައު مُحَمَّدٌ مُصْطَفٰى صـلّى الله علـيـه وسـلّم އަށް ޞަލަވާތާއި ސަލާމް ލެއްވުން އެދި ދުޢާކުރަން. މި ދުޢާގައި އިތުރު އެކަލޭގެފާނުގެ އެންމެހައި އާލު އަޞްޙާބުން ޝާމިލްކުރަން.
އިޤްތިޞާދީ ތަރައްޤީއާއި، ވިޔަފާރިއާ ބެހޭ ވަޒީރު، މުޙައްމަދު ސަޢީދު، ބީ.ސީ.ސީ.ގެ މެނޭޖިންގ ޑިރެކްޓަރ އިބްރާހިމް ޟިޔާއު މުޙައްމަދު، އަދި އެ ކުންފުނީގެ އިސްވެރިންނާއި، ހީވާގި އެންމެހައި މުވައްޒަފުން، ވަޑައިގެން ތިއްބެވި އެންމެހައި ޢިއްޒަތްތެރިން؛
السَّلَامُ عَلَيْكُمْ وَرَحْمَةُ اللهِ وَبَرَكَاتُه.
އާދެ، މިއީ ވަރަށް އުފާވެރި ވަގުތުކޮޅެއް. އުންމީދީ ހިނދުކޮޅެއް. ދިވެހި އިޤްތިޞާދުގެ އުޖާލާ ކުރިމަގަކަށް ކޮށައިލެވޭ ފަހި ރާސްތާއެއް. މިރޭ ބީ.ސީ.ސީ.ން ފަށްޓަވަން ނިންމެވި އުންމީދީ މަސައްކަތްޕުޅުގެ ސަބަބުން، ދިވެހިރާއްޖޭގެ އިޤްތިޞާދަށް މަންފާވަނިވި، ލާބަހުރި ދޮރުތަކެއް ހުޅުވޭނެ. ފަރުދީ ގޮތުންނާއި، ޤައުމީ ގޮތުންނާއި، ބައިނަލްއަޤްވާމީ ގޮތުން، ދިވެހި އިޤްތިޞާދީ މައިދާނުގައި، އާ ވިޔަފާރިތައް އާލާވެ، ފައިދާވާނެ.
އާދެ، އިޤްތިޞާދީ ތަރައްޤީގައި، އެންމެ ކުދި އަދި މެދުފަންތީގެ ވިޔަފާރިތަކުގެ ދައުރު، ވަރަށް ބޮޑު. މިރޭ މި ތަޢާރުފް ކުރެވުނު އެމް.އެސް.އެމް.އީ. އެވޯޑަކީ، ބިޒްނަސް ސެންޓަރ ކޯޕަރޭޝަން މެދުވެރިކޮށް، ސަރުކާރުން ރާއްޖޭގެ އެންމެ ކުދި، އަދި މެދުފަންތީގެ ވިޔަފާރިތައް ކުރިއަރުވައި ތަރައްޤީކޮށް، ދެމެހެއްޓުމަށްޓަކައި ޤައުމީ ފެންވަރުގައި ލިބިދޭ ވަރަށް ބޮޑު ހިތްވަރެއް. ޤައުމީގޮތުން އެ ވިޔަފާރިތަކުގެ އަގު ވަޒަންކޮށް އަރުވާ ޚާއްޞަ ޝަރަފެއްވެސް މެ.
އެއްވެސްޝައްކެއްނެތް، އެންމެ ކުދި އަދި މެދުފަންތީގެ ވިޔަފާރިތަކަކީ، އަޅުގަނޑުމެންގެ އިޤްތިޞާދުގެ ނާރެސް. އެއީ، ވަޒީފާގެ ފުރުޞަތުތައް އުފެއްދުމާއި، އާ އީޖާދުތައް ކުރުމާއި، އިޤްތިޞާދީ ދުވެލި ހަލުވިކުރުމާއި، އެންމެ މުހިންމު ދައުރެއް އަދާކުރާ ވިޔަފާރިތައް ކަމަށްވާތީ. މި ވިޔަފާރިތައް ހިންގާ ވިޔަފާރިވެރިންނަކީ، އަޅުގަނޑުމެންގެ މުޖުތަމަޢުގެ ތަރައްޤީއާއި، ދިރުމާއި، ކުރިއެރުމަށްޓަކައި ވަރަށް ބުރަ މަސައްކަތްޕުޅުތަކެއް ކޮށްދެއްވައި، ޤައުމީ ތަރައްޤީއަށްޓަކައި ވަރަށް ބޮޑެތި ޤުރުބާނީތަކެއް ވެވަޑައިގަންނަވާ ޚިދުމަތްތެރިންތަކެއް.
އަޅުގަނޑު ދެކެނީ، އެންމެ ކުދި އަދި މެދުފަންތީގެ ވިޔަފާރިތައް ހިންގަވާ ވިޔަފާރިވެރިންގެ ހިތްވަރާއި، ކެރުންތެރިކަމާއި، އީޖާދީ ޚިޔާލުތަކަކީ، އަޅުގަނޑުމެންގެ އިޤްތިޞާދު ކުރިއަރުވާ ބާރު ކަމުގައި. 21 ވަނަ ޤަރުނުގައި، އަޅުގަނޑުމެން ދެކެމުން މި އަންނަނީ، ފަންނިއްޔާތުގެ އާ ކަންކަމާއި، ޑިޖިޓަލް މާކެޓުތަކާއި، ބައިނަލްއަޤްވާމީ ވިޔަފާރީގެ ފަހި ފުރުޞަތުތައް. މި ދާއިރާތަކުން ފަހި ނަތީޖާ ހާސިލުކުރައްވައި، ފުރިހަމަ ކާމިޔާބަށް ވާސިލުވެވަޑައިތުމަށްޓަކައި، އަޅުގަނޑުމެންގެ ވިޔަފާރިވެރިން، މި އާ ހުނަރުތަކާއި، އުކުޅުތައް ދަސްކުރައްވައި، އޭގެ ބޭނުންހިއްޕަވަން އެބަޖެހޭ. ދިވެހިރާއްޖޭގެ އަދުގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޤައުމީ ތަރައްޤީގެ ތަޞައްވުރުގެ އެންމެ މުހިންމު އެއް ސިޔާސަތަކީ، އީޖާދީ އިޤްތިޞާދެއް ބިނާކުރުމުގެ މި ސިޔާސަތު. އަޅުގަނޑު ހިތުން، މި އިޤްތިޞާދުގެ އެންމެ މައި މަސައްކަތްތަކާއި، ދިރުންހުރި ޚިދުމަތުގެ ޞަފްޙާތަކުން، ބޮޑު ބައެއް ލިޔެވެމުން އަންނަނީ، އެންމެ ކުދި އަދި މެދުފަންތީގެ ވިޔަފާރިތަކުގެ މައްޗަށް.
އާދެ، މި މަހުގެ 17 ވަނަ ދުވަހަކީ، އަދުގެ ސަރުކާރަށް އެއް އަހަރު ފުރުނު އުފާވެރި ތާރީޚީ ދުވަސް. ޝައްކެއްނެތް، ވޭތުވެދިޔަ 52 ހަފްތާއަކީ، ދިވެހިރާއްޖެއަށް އެކި ރޮނގުތަކުން ކުރިއެރުމާއި، ތަރައްޤީގެ ކާމިޔާބީތައް ހާސިލުކުރެވުނު ދުވަސްތަކެއް. ދިވެހިރާއްޖޭގެ ތަރައްޤީއާއި ތަހުޒީބަށްޓަކައި ކުރައްވާ އިޚްލާޞްތެރި ބުރަ މަސައްކަތްޕުޅަށް، ދިވެހިރާއްޖޭގެ ލޮބުވެތި ރައީސުލްޖުމްހޫރިއްޔާއަށް އަޅުގަނޑު މި ފުރުޞަތުގައި އިޚްލާޞްތެރި ޝުކުރެއް ދަންނަވަން.
ހަމައެއާއެކު، އެ މަނިކުފާނުގެ އިޤްތިޞާދީ ތަޞައްވުރު ޙަޤީޤަތަކަށް ހައްދަވަން، އިޤްތިޞާދާ ބެހޭ ވަޒީރު، މުޙައްމަދު ސަޢީދު ކުރައްވާ މާނަހުރި މަސައްކަތްޕުޅުތަކަށްޓަކައި އެ މަނިކުފާނަށް ޝުކުރު ދަންނަވަން. އަދި އެ މަނިކުފާނުގެ ހީވާގި މުވައްޒަފުންވެސް މި ޝުކުރުގައި އަޅުގަނޑު ބައިވެރިކުރަން.
އާދެ، އަޅުގަނޑުމެންގެ މި ވިޔަފާރިތައް ކުރިއެރުވުމަށްޓަކައި، އަދިވެސް ވަރަށް ބޮޑެތި ބުރަ މަސައްކަތްތަކެއް އެބަ ކުރަންޖެހޭ. މާލީ އެހީތެރިކަމާއި، ފަންނީ ތަމްރީނުތަކާއި، ޤާނޫނީ ލުއިތައް ހޯދައިދޭން އެބަޖެހޭ. މިރޭ މި ތަޢާރުފް ކުރެވުނު އެވޯޑަކީ، މި މަގުން ވިޔަފާރިތައް ކުރިއަރުވަން އެޅުނު ހަރުދަނާ ފިޔަވަޅެއްކަން އަޅުގަނޑު ފާހަގަކުރަން. އެއާއެކު، ރާއްޖޭގެ އެންމެ ކުދި އަދި މެދުފަންތީގެ ވިޔަފާރިތައް ތަރައްޤީކުރައްވައި، އީޖާދީ އިޤްތިޞާދެއް ބިނާކުރަން ގެންނަން ބީ.ސީ.ސީ.އިން ކުރައްވާ ބުރަ މަސައްކަތް ފާހަގަކޮށް، އެކަމުގެ އަގުވަޒަން ކުރަން. ބީ.ސީ.ސީ.އިން ކުރައްވާ ބުރަ މަސައްކަތުގައި، އިސްވެރިންނާއި، ހީވާގި މުވައްޒަފުން ތިޔަ ކުރައްވާ އުފެއްދުންތެރި މަސައްކަތަށް އަޅުގަނޑު އިޚްލާޞްތެރި ޝުކުރެއް ދަންނަވަން.
އާދެ، ނަމޫނާ އިޤްތިޞާދެއް ބިނާކުރުމުގައި، އެންމެ ކުދި އަދި މެދުފަންތީގެ ވިޔަފާރިތަކުގެ ދައުރު މުހިންމުކަން، މިހާރަށްވުރެވެސް ބޮޑަށް ދެނެގަނެ، މި ވިޔަފާރިތައް ކުރިއަރުވަން ވިޔަފާރިވެރިންގެ ޤާބިލްކަން އިތުރުކޮށްދިނުމަކީ، އަޅުގަނޑުމެންގެ އެންމެންގެވެސް ޒިންމާއެއް. އެހެންކަމުން، އަޅުގަނޑުމެންގެ އިޤްތިޞާދު އިތުރަށް ކުރިއަރުވަން، އެންމެން ގުޅިގެން މަސައްކަތް ކުރުމަށް، އަޅުގަނޑު މި ފުރުޞަތުގައި އިލްތިމާސް ކުރަން.
އަޅުގަނޑުގެ އިޚްލާޞްތެރި އެދުމަކީ، މިރޭ މި ތަޢާރުފް ކުރެވުނު އެވޯޑަކީ، ދިވެހި އިޤްތިޞާދަށް ހުޅުދާންވި، އުޖާލާ ފަނާރެއްގެ ގޮތުގައި ހައްދަވަން، ކަމާ ގުޅުންހުރި ހުރިހާ ފަރާތްތަކުން މަސައްކަތްޕުޅު ކޮށްދެއްވުން. ދިވެހި އެކި ފަންތީގެ، އެކި ގިންތީގެ ވިޔަފާރިތަކަށް ކުރިއެރުމާއި ފާގަތިކަން اللهُ سُبْحَانَهُ وَتَعَالَى މިންވަރުކުރައްވާށި! އަޅުގަނޑުމެންގެ އިޤްތިޞާދަށް ކުރިއެރުމާއި ފާގަތިކަން މިންވަރުކުރައްވާށި!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.