بِسْمِ ٱللّٰهِ ٱلرَّحْمٰنِ ٱلرَّحِيمِ
الْحَمْدُ لِلَّـه، وَالصَّلَاة وَالسَّلَامُ عَلَىٰ أَشْرَفِ الْأَنْبِيَاءِ وَالْمُرْسَلِين، وَعَلَىٰ آلـه وَصَحْبِـهِ أَجْمَعِين
ފުރަތަމަވެސް އަޅުގަނޑަށް މިފަދަ ފުރުޞަތެއް ދެއްވީތީ، ޔޫތު މިނިސްޓަރަށް ވަރަށް ބޮޑަށް ޝުކުރު ދަންނަވަން. އަދި ޓީމަށްވެސް ޝުކުރު ދަންނަވަމުން، އަޅުގަނޑު ވަރަށް ކުރުކޮށްލާފައި، ބަހެއް ދަންނަވާލުމަށްޓަކައި މި ފުރުޞަތުގެ ބޭނުން މިހިފީ.
ޙަޤީޤަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސިޔާސަތުތަކުގެ ތެރެއިން، އެންމެ ބޮޑު އިސްކަމެއް ދެއްވާ އެއްކަމަކީ، ޒުވާނުންގެ ކުރިމަގު އުޖާލާކުރުމުގެ މަސައްކަތް ކުރެއްވުން. މެނިފެސްޓޯގައިވެސް އެންމެ ބާރުއަޅުއްވާ އެއްކަމަކީ، ޒުވާނުންނަށް ކަންތައްތަކެއް މަގުފަހިކުރުވައި، ޒުވާނުން ކުރިއެރުވުމަށްޓަކައި، ޒުވާނުން ބާރުވެރިކުރުވުމަށްޓަކައި ކުރަންޖެހޭ މަސައްކަތް ކުރުން.
އެހެންވީމާ، އަޅުގަނޑު މި ފުރުޞަތުގެ ބޭނުން މިހިފީ، މި ތަނުގައި ވަރަށް ޒުވާން މޫނުތަކެއް، ޚާއްޞަގޮތެއްގައި، ދެންމެ ވަޒީރު ފާހަގަކުރެއްވި ފަދައިން، މިކަމަށް ލިބުނު ވަގުތުގެ ކުޑަމިނަށް ބަލާފައި، ދެއްވި އަހަންމިއްޔަތުކަމާއި، އެ ކަމަށް ބެހެއްޓި ޝައުޤުވެރިކަމުން ދޭހަވެގެންދަނީ، މި ޤައުމުގައި ޒުވާނުން މިތިބީ ފުރުޞަތުތަކަކަށް އެދިއެދިކަން.
އެހެންކަމުން، އަޅުގަނޑު ދޭން ބޭނުންވާ ޔަޤީންކަމަކީ، ރައީސުލްޖުމްހޫރިއްޔާގެ ފަރާތްޕުޅުން، ތިޔަ ޒުވާނުން ބޭނުންވާ ކަންކަމުގައި، އެންމެ ފުކެއްވެސް މި ސަރުކާރުން ފަހަތަށް ނުޖެހޭނެއޭ. އަދި ޒުވާނުން ބޭނުންވާ ކަންކަމުގައި މި ސަރުކާރުން ފުރިހަމައަށް އެއްބާރުލުންދީ، އެކަންކަމަށް ތާއީދުކުރާނެ ކަމުގެ ޔަޤީންކަން މި ފުރުޞަތުގައި އަޅުގަނޑު ދެން. އަދި ޚާއްޞަގޮތެއްގައި، ތިޔަކުދިންގެ މި މައުރަޒުން އަދި އެހެނިހެން ފުރުޞަތުތަކުގައިވެސް ކާމިޔާބީތަކަށް އެދެމުން، އަޅުގަނޑު ފާހަގަކޮށްލަން ބޭނުންވާ އަނެއް ކަމަކީ، ޒުވާނުންނަށް ދަންނަވާލަން ބޭނުންވާ އަނެއް ކަމަކީ، ޤައުމުގައި ހިނގާ، ތިޔަކުދިންގެ މުސްތަޤްބަލަށް ދަތިވާ އެހެނިހެން ކަންކަމަށް ފުރުޞަތު ނުދިނުމަށް. ޖާގަ ނުދިނުމަށް.
އަޅުގަނޑުގެ ވާހަކަ ކުރުކޮށްލާނަން. އަދިވެސް އެއްފަހަރު، ތިޔަ ހިތްވަރުގަދަ އަދި އުފާވެރިކަން މި ގެނެސްދޭ ތިޔަކުދިންނަށް ފާގަތި މުސްތަޤްބަލަކަށް އެދެން.
އަޅުގަނޑުމެން މި ކުރާ މަސައްކަތުގައި اللّـه سبحـانـه وتعـالى ބަރަކާތް ލައްވާށި! އާމީން.
وَالسَّلَامُ عَلَيْكُمْ.