ޚަރާބުގެ މަގަށް ދުއްވާލާފައިހުރި އެތައް ކަމެއް ހަމަ މަގަށް ގެނައުމުގެ މަސައްކަތް ކުރައްވަމުންދާ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އެމަނިކުފާނުގެ ސަރުކާރަށް އެއް އަހަރު ފުރުން ފާހަގަކުރެއްވުމަށް، "ހަފުތާ 52- ރައްޔިތުންނާއެކު ކުރިއަށް" މިނަމުގައި މިރޭ ބޭއްވި ޚާއްޞަ އިހުތިފާލުގައި ރައްޔިތުންނާ މުޚާޠަބުކުރައްވަމުންނެވެ.
އެ މަނިކުފާނުގެ ވާހަކަފުޅުގައި، މި ސަރުކާރުން ރައްޔިތުންގެ އިހުސާސް އަޑުއަހައިގެން ރައްޔިތުންނަށް ބޭނުންވާ ކަންތައްތައް ކޮށްދެމުންދާ ކަމަށާއި، އެކަން މި ކުރަނީ ކުރީގައި ކަންތައްތައް ކޮށްފައި، ޚަރާބުކޮށްލާފައިއޮތް އަޅުގަނޑުމެންގެ އިޤުތިޞާދުގެ ތެރެއިން ކަންތައްތައް ރަނގަޅުކޮށްގެން ކަމުގައި ވިދާޅުވިއެވެ. އެގޮތުން އޭގެ އެއް މިސާލަކީ ފައިސާ ޗާޕުކުރުން ކަމަށާއި އޭގެ އިތުރަށް ބަދަލުގެ ގޮތުގައި ދޫކޮށްފައި ހުރި ފައިސާއަކީވެސް ނިޒާމުން ބޭރުން، ޤާނޫނާ ޤަވާއިދާ ޚިލާފަށް ދީފައިވާ ރައްޔިތުންގެ ފައިސާކަން އެ މަނިކުފާނު ފާހަގަކުރެއްވިއެވެ. ޤާނޫނާ ޤަވާއިދާ ޚިލާފަށް މިދިޔަ ސަރުކާރުން ވަނީ އެއްހާސް މިލިއަން ރުފިޔާ (އެއް ބިލިއަން ރުފިޔާ) ބަދަލުގެ ގޮތުގައި ދީފައި ކަމުގައި އެ މަނިކުފާނު ވިދާޅުވިއެވެ. އަދި އެކަން މި ސަރުކާރުން ނުކުރާނެ ކަމަށާއި އެމަނިކުފާނު ވެރިކަމާ ހަވާލުވެވަޑައިގެން އެންމެ ފުރަތަމަ ކުރެއްވި އެއް ކަމަކީ ސެޓްލްމަންޓް ކޮމިޓީ އުވާލުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިދިޔަ އަހަރުތަކުގައި ނުހޯދާ ހުރި ރައްޔިތުންގެ ފައިސާގެ ގޮތުގައި ދައުލަތަށް ވައްދަންޖެހޭ 16 ބިލިއަން ރުފިޔާ އެބައޮތް ކަމަށާއި އޭގެ ތެރެއިން މިދިޔަ 52 ހަފުތާ ތެރޭގައި 2.6 ބިލިއަން ރުފިޔާ ދައުލަތަށް ވައްދަދީފައިވާނެ ކަމުގައި ވިދާޅުވިއެވެ. އަދި މި ސަރުކާރު ވެރިކަމާ ހަވާލުވިއިރު މަސްވެރިންނަށް ނުދީ 250 މިލިއަން ރުފިޔާ އޮތް ކަމަށާއި އެ ފަރާތްތަކަށް އެ ފައިސާ ދީ، އޭގެ އިތުރަށްވެސް މިދިޔަ ނޮވެމްބަރ 11 އާއި ހަމައަށް ދޭން ހުރި އެއް ބިލިއަނަށް ވުރެ ގިނަ ރުފިޔާ ދީ، އެ ތާރީޚާއި ހަމައަށް މަސްވެރިންނަށް ދޭން ހުރި ހުރިހާ ފައިސާއެއްދީ ނިމިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
"ގުޅިފަޅު ހިއްކަން ފަށާފައި އޮތީ 44 ޕަސެންޓް މަސައްކަތް ނިންމާފަ. އަޅުގަނޑުމެން ވާނީ މިހާރު އެބައި އެއްކޮށް ހިއްކާ ނިންމާފައި. މުޅި ޕްރޮޖެކްޓްގައި އަޅުގަނޑުމެން އިތުރަށް ހިއްކަން ބުނި ބައި، އެއީ އެންމެ ފުން ސަރަޙައްދު، އެތަންވެސް އިރާދަކުރެއްވިއްޔާ ވަރަށް އަވަހަށް ހިއްކަން ބަޔަކާ ހަވާލުކުރާނަން. އެތަން ނުލާ ބަލައިފިއްޔާ އެއްކޮށް ހިއްކާ ނިމިއްޖެ، އެތަން ލައިގެން ގާތްގަނޑަކަށް 70 ޕަސެންޓް އެއޮތީ ހިއްކިފަ. މިއަންނަ އަހަރުތެރޭގަ އިރާދަކުރެއްވިއްޔާ މުޅި ގުޅީފަޅު ހިއްކާ ނިންމަދޭނަން." ރައީސުލްޖުމްހޫރިއްޔާ ވިދާޅުވިއެވެ.
ފޭސް 3 ނުވަތަ ހުޅުމާލޭ ފަޅުތެރެއިން، ނުހިއްކާ އޮތްތަނުން ގޯތި ދީފައިވާއިރު، މި ސަރުކާރު ހަވާލުވިއިރު ހިއްކާފައި އޮތީ 17 ޕަސެންޓް ކަމަށާއި މިހާރު އެތަނުގެ 38 ޕަސެންޓް ހިއްކާ ނިމިއްޖެކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި އިރާދަކުރެއްވިއްޔާ އެންމެ ލަސްވެގެން ކުރިޔަށް އޮތް ހައެއްކަ މަސްދުވަހުގެ ތެރޭގައި އެތަން ހިއްކާ ނިންމާނެކަން އެ މަނިކުފާނު މިރޭ ޢިއުލާން ކުރެއްވިއެވެ. މި ސަރުކާރު ހަވާލުވިއިރު ގިރާވަރު ފަޅުގައި ހިއްކާފައި އޮތީ 19 ޕަސެންޓް ކަމަށާއި މިހާރު 33 ޕަސެންޓް ހިއްކިފައިވާކަމުގައި އެ މަނިކުފާނު ވިދާޅުވިއެވެ. އެ މަނިކުފާނު ވަނީ އެ މަޝްރޫޢުގެ މަސައްކަތް ހަވާލުކުރުމުގައި ޤަވާޢިދާ ޚިލާފަށް އެއްވެސް އިންސާފެއް ނެތް ގޮތަށް، ބޭރުގެ ފަރާތަކަށް ވަރަށް ބައިވަރު ބިންތައް ލިބޭގޮތަށް ހަދާފައިވަނީ ލޮޕްސައިޑެޑް އެގްރީމަންޓެއްގެ ތެރެއިން ކަމަށާއި އެ އެގްރީމަންޓުން ނިކުމެ، އެތަން ރައްޔިތުންނަށް އެންމެ ފައިދާވާނެ ގޮތަށް، އެންމެ ކުޑަ ޚަރަދަކުން އެތަން ހިއްކާ ނިންމަން ސަރުކާރުން މަސައްކަތް ކުރައްވަމުންދާ ކަމުގައި ވިދާޅުވިއެވެ.
ގޯތި ވިޔަސް އަދި ފްލެޓު ވިޔަސް، ގެޒެޓްކޮށްފައި އޮތް އެއްވެސް ލިސްޓެއްގައި ދީފައި އޮތް ތަނެއް އަތުލެއްވުމަކީ އެ މަނިކުފާނުގެ ސިޔާސަތެއް ނޫން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެހެންނަމަވެސް، އަބަދުވެސް ކަންކުރާ އުސޫލުން، ޤަވާޢިދާ ޚިލާފަށް، އޮޅުވާލައިގެން، މަކަރު ހަދައިގެން، ޑޮކިއުމަންޓްތައް ނުލައި، އެކަން ކޮށްފައި އޮވެއްޖެނަމަ، އެމީހަކު ކެންސަލްކުރެވޭނެ ކަމަށާއި އެއީ އެންމެ ކުރިއްސުރެވެސް އެކަން ކުރާ ގޮތްކަން އެ މަނިކުފާނު ފާހަގަކުރެއްވިއެވެ. އަދި ރަނގަޅަށް ހުށައަޅައިގެން، ޕޮއިންޓް ހަމަވެގެން، ފްލެޓް ނުވަތަ ގޯތި ލިބިފައި ހުރި އެއްވެސް މީހެއްގެއަތުން، ގޯއްޗެއްވެސް އަދި ފްލެޓެއްވެސް އަތުނުލައްވާނެ ކަމުގެ ފުރިހަމަ ޔަޤީންކަން އެ މަނިކުފާނު ދެއްވިއެވެ.
"ހައުސިންގ މިނިސްޓްރީން ވަރަށް ގިނަ ވަގުތު އެބަ ހޭދަކުރޭ އެކަމުގަ. އަދި އެކަމަށްޓަކައި ނަގާފައިހުރި ކޮމިޓީތަކުންވެސް އެކަން އޯވަރސީކުރަމުން އެ ގެންދަނީ. އެކަން މިކުރަނީ އެއްވެސް ފަރާތެއްގެ ނުފޫޒު އެއަށް ނުވަންނަ ގޮތަށް. އެއްވެސް ފަރާތަކުން ނުފޫޒެއް ނުފޯރުވޭނެ. އެކަމެއް ނުކުރެވޭނެ. އަޅުގަނޑު ބޭނުންވަނީ ވަރަށް ނަޒާހަތްތެރި ގޮތުގައި، ހަމަ އެންމެ އިންސާފުވެރިކޮށް، ޢިއުލާނުކޮށްފައިހުރި ޝަރުތުތަކާ އެއްގޮތަށް، ޕޮއިންޓް ނިޒާމާއި އެއްގޮތަށް، އެންމެ ތަރުތީބުން، މަތިން ތިރިއަށް، 4000 މީހުން ހަމަކުރަން. އެ ތަރުތީބުން ލިބޭ 4000 މީހުންނަށް އެ ފްލެޓްތައް ދެވޭނީ. ގަވާއިދާ ހިލާފަށް، ނޫނިއްޔާ ޑޮކިއުމަންޓް އޮޅުވާލައިގެން، ނޫނީ އެހެން ގޮތަކުން ލާފައޮތް މީހެއްވިއްޔާ އެއީ އަބަދުވެސް ކެންސަލްވާ ގޮތަށް އެމީހަކު ކެންސަލްވާނެ." ރައީސުލްޖުމްހޫރިއްޔާ ވިދާޅުވިއެވެ.
