ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫ.އެން.އެފް.ސީ.ސީ.ސީ)ގެ 29 ވަނަ ކޮންފަރެންސް އޮފް ދަ ޕާޓީސް (ކޮޕް29) ގައި ބައިވެރިވެވަޑައިގަތުމަށް ކުރެއްވި ދަތުރުފުޅަށްފަހު، އަޒަރުބައިޖާންގެ ބާކޫއިން ފުރާވަޑައިގެންފިއެވެ.
ދުނިޔޭގެ އެކި ކަންކޮޅުތަކުން އެތައް ޤައުމެއްގެ ލީޑަރުންނާއި، ތިމާވެށީގެ ތަޖުރިބާކާރުންނާއި އެކްޓިވިސްޓުންގެ ބައިވެރިވުން ފެނިގެންދިޔަ ކޮޕް29ގެ ބައިނަލްއަޤުވާމީ ޕޯޑިއަމްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، މޫސުމަށް އަންނަ ނޭދެވޭ ބަދަލުތަކުގެ ނުރައްކާ އެންމެ ބޮޑު ޤައުމުތަކަށް އަމާޒުވާގޮތަށް ވަޢުދުތައް ބަދަލުކުރެއްވުމަށް ބައިނަލްއަޤްވާމީ މުޖުތަމަޢަށް ގޮވާލައްވާފައެވެ. ރައީސުލްޖުމްހޫރިއްޔާގެ ވާހަކަފުޅުގައި، ދިވެހިރާއްޖެއަކީ ބިންތިރި ޖަޒީރާ ޤައުމަކަށް ވާއިރު، ރާއްޖެއަށް ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުއްވާލައްވައި، ހޫނުމިން އުފުލޭ މިންވަރު ދަށްކުރުމަށާއި، މޫސުމީ ނޭދެވޭ ބަދަލުތަކަށް އަހުލުވެރިކުރުވުމުގެ މަސައްކަތްތަކަށް އެއްބާރުލުން ދިނުމަށްޓަކައި ބައިނަލްއަޤްވާމީ ފެންވަރުގައި އަޅަންޖެހޭ ފިޔަވަޅުތަކުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.
މީގެއިތުރުން ކޮޕް29ގެ ހަވާސާގައި ރައީސުލްޖުމްހޫރިއްޔާ ވަނީ ދުނިޔޭގެ ބައެއް ލީޑަރުންނާއެކު މަތީ ފަންތީގެ ބައްދަލުވުންތަކުގައި ބައިވެރިވެވަޑައިގެން، ދޭދޭ މަސްލަހަތު ހިމެނޭ ދާއިރާތައް ކުރިއެރުވުމާ ބެހޭގޮތުން މަޝްވަރާކުރައްވައި، މޫސުމަށް އަންނަ ނޭދެވޭ ބަދަލުތަކުން އަރައިގަތުމަށް ބައިނަލްއަޤްވާމީ ފެންވަރުގައި ކުރެވެމުންދާ މަސައްކަތްތައް ހަރުދަނާކުރުމަށް ވަކާލާތު ކުރައްވާފައެވެ. މި މަޝްވަރާތަކުގެ މައިގަނޑު މަޤްޞަދަކީ ކުރިމަތިވަމުންދާ ގޮންޖެހުންތަކުން އަރައިގަތުމަށް ގުޅިގެން މަސައްކަތްކުރެވޭނެ ގޮތްތައްހޯދުމާއި، މޫސުމީ ލަނޑުދަނޑިތައް ޙާޞިލުކުރުމަށް ބޭނުންވާ ވަސީލަތްތައް ޤައުމުތަކުގެމެދުގައި ހިއްސާކޮށް، ބަދަލުކުރުމުގައި އެއްބަޔަކު އަނެއްބަޔަކަށްދޭ އެއްބާރުލުން އިތުރުކުރުމެވެ.
މީގެ އިތުރުން ރައީސުލްޖުމްހޫރިއްޔާ ވަނީ މޫސުމީ ނޭދެވޭ ބަދަލުތަކާ ދެކޮޅަށް ދިވެހިރާއްޖެއިން ކުރަމުންދާ ބުރަ، އަދި ގިނަގުނަ މަސައްކަތްތަކާބެހޭ މައުލޫމާތު ބައިނަލްއަޤުވާމި މުޖުތަމަޢުއާއި ހިއްސާކުރައްވައި، ދެމެހެއްޓެނިވި ތަރައްޤީއަށް ރާއްޖެއިން ކުރަމުން ގެންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރާއްޖެއާއި ތަރައްޤީވަމުން އަންނަ ކުދިޖަޒީރާ އެހެން ޤައުމުތަކުގެ ތަރައްޤީގެ ލަނޑުދަނޑިތައް ޙާޞިލުކުރުމުގައި، ޚާއްޞަކޮށް، އިޢާދަކުރަނިވި ހަކަތައާއި، މޫސުމަށް އަންނަ ނޭދެވޭ ބަދަލުތަކާއި، ވިލުންވެރިކަން އިތުރުކުރުމުގެ މަސައްކަތްތަކުގައި އެހީތެރިކަން ފޯރުކޮށްދިނުމަށްޓަކައި ހަރުދަނާ މާލީ އަދި ފަންނީ އެހީތެރިކަން ބޭނުންވާކަން ތަކުރާރުކުރެއްވިއެވެ.
ރައީސުލްޖުމްހޫރިއްޔާ، ކޮޕް29އަށް ކުރެއްވި މި ރަސްމީ ދަތުރުފުޅުގެ ސަބަބުން، މޫސުމަށް އަންނަ ނޭދެވޭ ބަދަލުތަކާ ގުޅިގެން ބައިނަލްއަޤުވާމީ މައިދާނުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިސްކޮށް ހުންނަވައިގެން، ތަރައްޤީވަމުން އަންނަ ކުދިޖަޒީރާ ޤައުމުތަކާއި ތަރައްޤީވަމުން އަންނަ އެހެން ގައުމުތަކަށް މިހާރުން މިހާރަށް ބޭނުންވާ، އަދި ދުރު ރާސްތާގެ ބޭނުންތަކަށް ހައްލު ހޯދައިދެނިވި ސިޔާސަތުތަކަށް ވަކާލާތު ކުރައްވާކަން ކަށަވަރުވެގެންދެއެވެ.
