بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علٰـى سيّدنا محمّد، خاتم الأنبياء والمرسلين، وعلى آلـه وأصـحابه أجمعـين.
ރައްޔިތުންގެ މަޖިލީހުގެ ޢިއްޒަތްތެރި ރައީސް، ޢިއްޒަތްތެރި މެންބަރުން؛
السّــلام عليكم ورحمـة اللّـه وبركاته.
اللّـه سبحـانـه وتعـالىގެ ޙަޟްރަތުން ވާގިއެދިހުރެ، ދެންމެ ތިޔަ ޢިއްޒަތްތެރި މަޖިލީހުގެ ކުރިފުޅުމަތީގައި، އާ ދައުރަކަށް، ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ ޤާނޫނީ ހުވާ ކުރުމަށްފަހު، ދިވެހިރާއްޖޭގެ ލޮބުވެތި ރައްޔިތުން އަޅުގަނޑާ ތިޔަ މަތިކުރެއްވި ބުރަ މަސްއޫލިއްޔަތުތަކާއި ވާޖިބުތައް، އަޅުގަނޑުގެ ލިޔާޤަތު ތަންދިން އެންމެ މަތީ ދަރަޖައަކަށް އަދާކުރަމުން ގެންދިޔުމުގެ މަދަދާއި ތައުފީޤަށް އެދި، اللّـه سبحـانـه وتعـالىގެ ޙަޟްރަތުގައި ދުޢާ ދަންނަވައި، އިބްތިހާލު ކުރަން.
އެއަށްފަހު، މި ބަރަކާތްތެރި ރަމަޟާން މަހުގެ އިޚްލާޞްތެރި ތަހުނިޔާ، ރައްޔިތުންގެ މަޖިލީހުގެ ޢިއްޒަތްތެރި ރައީސަށާއި، ޢިއްޒަތްތެރި މެންބަރުންނަށާއި، ހާޒިރުވެވަޑައިގެން ތިއްބެވި ހުރިހާ ބޭފުޅުންނަށް ދަންނަވަން.
އަދި ބޭރު ޤައުމުތަކުން ވަޑައިގެން ތިއްބެވި އާނަންދަ މެހްމާނުން، ބުރަ އުފުއްލަވައިގެން، މި ރަސްމިއްޔާތުގައި ބައިވެރިވެވަޑައިގަތުމަށް ރާއްޖެ ވަޑައިގެންނެވީތީ، އެބޭފުޅުންނަށް ނުހަނު އިޚްލާޞްތެރިކަމާއެކު ޝުކުރު ދަންނަވަން.
ޢިއްޒަތްތެރި ރައީސް، ޢިއްޒަތްތެރި މެންބަރުން؛
ރިޔާސީ އާ ދައުރަކަށް، ރައީސުލްޖުމްހޫރިއްޔާ ކަމުގެ މަގާމަށް، ދިވެހި ރައްޔިތުން އަޅުގަނޑު ހޮއްވެވުމާ ގުޅިގެން، ޤައުމާ މުޚާޠަބުކޮށް އަޅުގަނޑު ދެއްކި ވާހަކައިގައި، ކުރިއަށް އޮތް ދައުރުގައި ޤައުމުގެ ކަންތައްތަކަށް ގެންނަންޖެހޭ ބަދަލުތަކާ ބެހޭގޮތުން ގިނަ ބަޔެއްގެ ޚިޔާލާއި މަޝްވަރާ ހޯދުމަށް ގަސްދުކުރާ ވާހަކަ، ވާނީ ދަންނަވާފައި. އެމަސައްކަތް މިހާރު އަޅުގަނޑު ވަނީ، ފަށާފައި.
އެހެންކަމުން، ދިވެހި ރައްޔިތުންގެ ޚިޔާލާއި މަޝްވަރާގެ އަލީގައި މިއަދު މިފެށޭ އާ ރިޔާސީ ދައުރުގައިވެސް، ރާއްޖެއަށް އިތުރު ކުރިއެރުމާއި ތަރައްޤީއާއި ހަމަޖެހުން ޙާޞިލްކުރުމަށް މަގުފަހިކޮށްދެވޭތޯ، މާތް اللّـه ގެ ވާގިފުޅާއެކު، އަޅުގަނޑު ވަރަށް ބޮޑަށް މަސައްކަތް ކުރާނެ ވާހަކަ ދަންނަވަން.
މިމަސައްކަތް ކުރުމުގައި އަޅުގަނޑުގެ އަމާޒަކަށްވާނީ، 2020ގެ ތަޞައްވުރުގައިވާ، ދިވެހިރައްޔިތުންގެ އުންމީދުތައް ޙާޞިލްކުރުމަށްޓަކައި ކަނޑައަޅާފައިވާ މިޞްރާބަށް ދަތުރުކުރަމުން ގެންދެވޭތޯ ބެލުން.
މިއަމާޒަށް މަސައްކަތް ކުރުމުގައި، ކުރިއަށް އޮތް ފަސް އަހަރު އިސްކަންދޭނެ މައިގަނޑު ފަސް ދާއިރާއެއް، މިހާރު އަޅުގަނޑުވަނީ ޚިޔާރު ކޮށްފައި.
އޭގެތެރެއިން ފުރަތަމަ ދާއިރާއަކީ، ވެރިކަން ހިންގުމުގެ ދީމުޤްރާޠީ ނިޒާމުތަކާއި އޮނިގަނޑުތައް ވަރުގަދަ ކުރުން.
މީގެތެރޭގައި، ރާއްޖޭގެ ޤައުމީ އަދި ސިޔާސީ ޙަޔާތުގައި، ރައްޔިތުންގެ މަޖިލީހުގެ ދައުރު އިތުރަށް ފުޅާކޮށް ހަރުދަނާ ކުރުމާއި، ވެރިކަން ހިންގުމަށް އުފެދިފައިވާ ދީމުޤްރާޠީ އިދާރާތަކާއި އޮނިގަނޑުތައް ވަރުގަދަ ކުރުމާއި، ދިވެހިރާއްޖޭގައި އިންސާނީ ޙައްޤުތައް ޙިމާޔަތްކޮށް ދެމެހެއްޓުން ހިމެނޭ.
މިގޮތުން، ދިވެހިރާއްޖޭގެ ޤާނޫނުއަސާސީގައި ބަޔާންކޮށްފައިވާ، ރައްޔިތުންގެ އަސާސީ ޙައްޤުތައް ޙިމާޔަތްކޮށް، ދިވެހިރާއްޖޭގައި އިންސާނީ ޙައްޤުތައް ރައްކާތެރިކޮށް ދެމެހެއްޓުމަށްޓަކައި، ރާއްޖޭގެ ހިއުމަން ރައިޓްސް ކޮމިޝަނެއް އިރާދަކުރެއްވިއްޔާ ޤާއިމު ކުރެވޭނެ.
ހަމައެހެންމެ، އިޖްތިމާޢީ އަދި އިޤްތިޞާދީ، އަދި ސިޔާސީ ދާއިރާގައި ރައްޔިތުން ޙަރަކާތްތެރިވުމުގެ ފުރުޞަތުތައް އިތުރުކުރުމަށާއި، ޤައުމުގެ ތަރައްޤީއަށް ބޭނުންވާ، ޤާނޫނީ އޮނިގަނޑު ފުރިހަމަކުރުމަށް ކުރެވެމުންދާ މަސައްކަތްތައް ހަލުވިކުރުމަށް ސަމާލުކަން ދެވޭނެ.
އަދި އަޅުގަނޑުމެންގެ ޤައުމީ ޙަޔާތުގައި، އަންހެނުން ޙިއްޞާކުރާ މިންވަރު އިތުރުކުރުމަށާއި، ހުރިހާ މައިދާނެއްގައިވެސް، ދެޖިންސަށް ހަމަހަމަ ފުރުޞަތުތަކެއް ހޯދައިދިނުމަށް އިތުރަށް މަސައްކަތް ކުރެވޭނެ.
މީގެއިތުރުން، ދުނިޔޭގެ އިޤްތިޞާދަށާއި، ރާއްޖޭގެ ކަންކަމަށް އަންނަމުންދާ ބަދަލުތައް ދެނެގަނެ، އެކަންކަމާ ގުޅޭގޮތުން ކުރިއަށް ވިސްނައިގެން، ޤައުމުގެ ކަންތަކާއި ސަރުކާރުގެ ސިޔާސަތުތައް ރާއްޖެއަށް ފަހިވާގޮތަށް ބައްޓަންކުރަމުން ގެންދިޔުމަށް، ޢިލްމީ ފެންވަރެއްގައި އަޅުގަނޑަށް މަޝްވަރާ ލިބެމުންދާނެ ގޮތްތަކެއް ހަމަޖެއްސުމަށްވެސް، އަޅުގަނޑު ގަސްދުކުރަން.
ދެވަނަ ދާއިރާއަކީ، ސަރުކާރުން ރައްޔިތުންގެ އަޑުއަހައި، ރައްޔިތުންނާ ގުޅިގެން މަސައްކަތްކުރުމުގެ ވިސްނުން ގެންގުޅެ، އެކަމުގެ ނިޒާމެއް ތަޢާރުފުކުރުން.
މީގެތެރޭގައި، ސަރުކާރުގެ ކަންތައްތައް ހިންގުމުގައި، ވަޒީރުންނާއި، ސަރުކާރުގެ ދާއިރާތަކުގެ ވެރިންނާއި، ސަރުކާރުގެ ކޮންމެ މުވައްޒަފަކުވެސް، އެމީހެއްގެ މަސައްކަތުގައި ޒިންމާދާރުވުމާއި، ޖަވާބުދާރީވުން ވަރުގަދަކުރުން ހިމެނޭ.
ހަމައެފަދައިން، ސަރުކާރުގެ ސިޔާސަތުތައް ކަނޑައަޅައި، އެކި ޕްރޮގްރާމްތަކާއި މަޝްރޫޢުތަކާއި މަސައްކަތްތައް ހިންގުމާއި، ހިނގާނުހިނގާގޮތް ބެލުމުގައި، ރައްޔިތުންގެ ޚިޔާލާއި މަޝްވަރާ ހޯދުމާއި، އެކަންކަމުގައި އަމިއްލަ ޖަމްޢިއްޔާތަކާއި ޖަމާޢަތްތައް ބައިވެރިވުން އިތުރުކުރުންވެސް ހިމެނޭ.
ސަރުކާރުގެ އޮފީސް އޮފީހުން ކަންތައްތައް ހިންގުމަށް ހަމަޖެހިފައިވާ ގަވާއިދުތަކާއި އުޞޫލުތައް އާންމުކޮށް އެނގި، އަދި ސަރުކާރުން ޢަމަލުކުރަމުން ގެންދަނީ އެއުޞޫލުތަކާ އެއްގޮތަށްކަން އެނގޭގޮތަށް މަސައްކަތްތައް ރޭވުންވެސް، އޭގެތެރޭގައި ހިމެނޭ.
ތިންވަނަ ދާއިރާއަކީ، ސަރުކާރުގެ ބުރަހެލިކަން ބޮޑުވަމުންދާ ދިޔުން ހުއްޓުވައި، އޮފީސް އޮފީހުގެ އުފެއްދުންތެރިކަން އިތުރުކުރުމާއި، ސަރުކާރުގެ މުވައްޒަފުންގެ މެދުގައި ޚިދްމަތުގެ ރޫޙު އިތުރުކުރުމާއި، ތެދުވެރިކަމާއި، މުދަލާއި ފައިސާގެ އަމާނާތްތެރިކަން ވަރުގަދަކުރުން.
ހަތަރުވަނަ ދާއިރާއަކީ، ނަތީޖާ ޙާޞިލްކުރާ، ހިންގުމުގެ ޒަމާނީ ގޮތްތައް ތަޢާރުފުކުރެވިފައިވާ އޮފީސްތަކެއްގެ ގޮތުގައި، ސަރުކާރުގެ އޮފީސްއޮފީސް ޤާއިމުކުރުން.
ބޭނުމަކީ، ސަރުކާރުގެ މުވައްޒަފުންގެ ކިބައިގައި، ޒަމާނީ ހުނަރުވެރިކަން އިތުރުކުރުމާއި، މަސައްކަތަށް އިސްނެގުމާއި، މަސައްކަތުގެ އަޚްލާޤާއި ސުލޫކު ވަރުގަދަކުރުން.
ފަސްވަނަ ދާއިރާއަކީ، އުފާވެރި މުޖްތަމަޢެއް ބިނާކުރުމަށްޓަކައި، މުޖްތަމަޢުގައި ޢާއިލާގެ ދައުރު ވަރުގަދަކޮށް، ޤައުމުގެ ކަންތައްތައް އިޞްލާޙުކުރުމުގައި މުޅި މުޖްތަމަޢުގެ ބައިވެރިވުން އިތުރުކުރުމަށް މަސައްކަތްކުރުން.
މިގޮތުން، އިސްލާމްދީނުގައި ކަނޑައަޅުއްވާފައިވާ އުޞޫލުތަކާ އެއްގޮތްވާގޮތުގެ މަތިން، ރާއްޖޭގެ ކުޑަކުދިންނާއި ޒުވާނުންނަކީ، އުފާވެރި މާޙައުލެއްގައި ބޮޑެތިވަމުން އަންނަ، ޤައުމަށް ފައިދާހުރި ބަޔަކުކަމަށް ހެދުމަށްޓަކައި، ޢާއިލާތައް ޙިމާޔަތްކުރުމާއި، ޤައުމުގެ ކަންތައްތަކުގައި، ރައްޔިތުންނާއި، ވިޔަފާރިއާއި އިޤްތިޞާދީ ދާއިރާތަކުގައި އުޅުއްވާ ބޭފުޅުންނާއި، އަމިއްލަ ޖަމްޢިއްޔާތަކާއި އަފްރާދުންގެ ބައިވެރިވުން އިތުރުކުރުމަށް ޕްރޮގްރާމްތަކެއް ހިންގުމަށް، އިރާދަކުރެއްވިއްޔާ މަސައްކަތް ކުރަމުން ގެންދާނަން.
ޢިއްޒަތްތެރި ރައީސް، ޢިއްޒަތްތެރި މެންބަރުން؛
ދިވެހިރާއްޖެއަކީ، ސައްތައިންސައްތަ މުސްލިމު ޤައުމަކަށްވުމާއެކު، އަޅުގަނޑުމެންގެ މެދުގައި ދީނީ އެއްބައިވަންތަކަމުގެ ރޫޙު އިތުރަށް ވަރުގަދަކޮށް، ދީނީ މައްސަލަތަކުގައި ޚިޔާލު އެއްގޮތް ކުރުމަކީ، ރާއްޖޭގެ ހަމަޖެހުމާއި ސަލާމަތަށްޓަކައި ކޮންމެހެން ބޭނުންކަމެއް. އެހެންކަމުން، މިކަމަކީ، މިއަދު މިފެށޭ ރިޔާސީ ދައުރުގައިވެސް، އިރާދަކުރެއްވިއްޔާ އަޅުގަނޑު ވަރަށް ބޮޑު އިސްކަމެއް ދޭނޭ ކަމެއް.
ހަމައެފަދައިން، ޢަދްލު އިންޞާފު ޤާއިމުކުރުމުގެ ދާއިރާ، އިސްލާމީ އުޞޫލުތަކާއި ޤާނޫނީ ހަމަތަކާ އެއްގޮތްވާގޮތުގެ މަތިން، އިތުރަށް ހަރުދަނާކުރުމަށް، އަޅަންޖެހޭ ފިޔަވަޅުތައް އެޅުމަށް އަޅުގަނޑު ގަސްދުކުރަން.
މިގޮތުން، ކުށުގެ މައްސަލަތައް ތަޙްޤީޤުކުރުމާއި، ކުށުގެ މައްސަލަތައް ސާބިތުކުރުމާބެހޭ މިންގަނޑުތައް މިޒަމާނުގެ އުޞޫލުތަކާ ގުޅޭގޮތަށް އިޞްލާޙުކޮށް، އެމިންގަނޑުތަކަށް ޢަމަލުކުރަން ފެށުމަށްވަނީ، ގަސްދުކޮށްފައި.
ޢިއްޒަތްތެރި ރައީސް، ޢިއްޒަތްތެރި މެންބަރުން؛
ރާއްޖޭގެ އިޤްތިޞާދީ ބިންގާ ފުޅާކުރުމުގެ މުހިންމުކަން ބޮޑުކަމުން، ކުރިއަށް އޮތް ފަސްއަހަރުވެސް، އިރާދަކުރެއްވިއްޔާ އެމަސައްކަތް އަޅުގަނޑު ކުރަމުން ގެންދާނަން.
މިގޮތުން، ރާއްޖޭގައި ތަޢާރުފު ކުރެވިދާނެ އިތުރު ޞިނާޢަތްތަކަކީ ކޮބައިތޯ ބެލުމާއި، އެފަދަ ޞިނާޢަތްތައް ފެށުމަށް ބޭނުންވާ ވަސީލަތްތަކާއި ހުނަރުތައް ހޯދައިދިނުމަށް، ސަރުކާރާއި އަމިއްލަ ފަރާތްތަކާ ގުޅިގެން މަސައްކަތްކުރުމަށް ގަސްދުކުރަން.
އަދި މަސްވެރިކަމާއި ފަތުރުވެރިކަމުގެ ދާއިރާއިން ތަފާތު އުފެއްދުންތައް ތަޢާރުފުކޮށް، އިތުރު މާކެޓުތަކަކަށް ދޮރު ހުޅުވާލުމަށް މަސައްކަތްތައް ކުރުމަކީ، އަޅުގަނޑު ވަރަށްބޮޑު ސަމާލުކަމެއް ދޭނެ ކަމެއް.
މީގެތެރޭގައި، އަމިއްލަ އިންވެސްޓްމަންޓްތަކަށް ބޭނުންވާ ލޯނުތައް މިހާރަށްވުރެ ލުއިގޮތަކަށް، ދިގުމުއްދަތަކަށް ލިބޭނެ އިންތިޒާމު ހަމަޖެއްސުން ހިމެނޭ.
އަދި ބޭރުގެ އިންވެސްޓްމަންޓްތައް ރާއްޖެއަށް ލިބުން މިހާރަށްވުރެ ބޮޑަށް ފަހިވާނޭ ގޮތްތައް ހަމަޖެއްސޭތޯ ބެލުމާއި، ބޭރުގެ ފަރާތްތަކުން ރާއްޖޭގައި އިޤްތިޞާދީ މަސައްކަތްތައް ފެށުމަށް ޝައުޤުވެރިކުރުވުމަށް އަޅަންޖެހޭ އިތުރު ފިޔަވަޅުތައް އެޅުންވެސް، އޭގެތެރޭގައި ހިމެނޭ.
ޢިއްޒަތްތެރި ރައީސް، ޢިއްޒަތްތެރި މެންބަރުން؛
ރާއްޖޭގައި ދެވޭ ތަޢްލީމުގެ ފެންވަރު މަތިކުރުމަށާއި، ތަޢްލީމުގެ ފުރުޞަތުތައް ފުޅާކުރުމަށާއި، ދިވެހިވަންތަކަމާބެހޭ ތަޢްލީމު އިތުރުކުރުމަށާއ، ކުދިން ދީނީ އަދި އަޚްލާޤީ މިންގަނޑުތަކާ އެއްގޮތަށް ތަރުބިޔަތު ކުރުމަށް އިތުރު މަސައްކަތްތަކެއް، އިރާދަކުރެއްވިއްޔާ ކުރިއަށް އޮތް ފަސްއަހަރުގެ ތެރޭގައި ކުރެވޭނެ.
މަތީ ތަޢްލީމު ދިނުމާއި، މީހުން ބިނާކުރުން އިތުރަށް ހަރުދަނާ ކުރުމަށްޓަކައި، ޑިޕާޓްމަންޓް އޮފް ހަޔަރ އެޑިޔުކޭޝަން އެންޑް ޓްރޭނިންގގެ ނަމުގައި، ވަކި ޑިޕާޓްމަންޓެއް، މިނިސްޓްރީ އޮފް އެޑިޔުކޭޝަންގެ ދަށުގައި އުފެއްދުމަށް، މިހާރުވަނީ ހަމަޖެހިފައި.
ރާއްޖޭގައި ދެވޭ ޞިއްޙީ ޚިދްމަތްތަކުގެ ފެންވަރު މަތިކުރުމަށާއި، އެޚިދްމަތް މުޅި ރާއްޖެއަށް ފޯރުވުމުގެ ނިޒާމު ވަރުގަދަ ކުރުމަށާއި، ރާއްޖޭގެ އާބާދީއަކީ، ދުޅަހެޔޮ އާބާދީއަކަށް ހެދުމަށްވެސް، މިއަދު މިފެށޭ ދައުރުގައި އިތުރު މަސައްކަތްތަކެއް ކުރެވޭނެ.
ރާއްޖޭގެ ކުރިއެރުމާއި ތަރައްޤީއަށްޓަކައި، ރާއްޖެއަކީ، ހުރިހާ ދާއިރާއެއްގައި އިންފޮމޭޝަން އަދި ކޮމިއުނިކޭޝަން ޓެކްނޯލޮޖީގެ ބޭނުންކުރާ ޤައުމަކަށް ހެދުމަށްވެސް، އިރާދަކުރެއްވިއްޔާ، އިތުރު މަސައްކަތްތަކެއް ކުރެވޭނެ.
ޒުވާނުންނަށާއި، ވަޒީފާ ނެތުމުގެ ދަތިކަން އިޙްސާސްކުރަން ޖެހިފައިވާ މީހުންނަށް ވަޒީފާގެ ފުރުޞަތުތައް ތަނަވަސްކޮށްދިނުމަށާއި، ކޮންމެ ރައްޔިތަކީ، އުފެއްދުންތެރި މަސައްކަތެއް ކުރާ، ޒިންމާދާރު މީހަކަށް ހެދުމަށް ކުރެވޭ މަސައްކަތްތައް އިތުރަށް ފުޅާކުރެވޭނެ.
ރާއްޖޭގެ ބިން ހެޔޮގޮތުގައި ބޭނުންކުރުމަށާއި، ބިމުގެ ތަނަވަސްކަން އިތުރުކުރުމަށާއި، ހިޔާވަހިކަމާބެހޭ މަޝްރޫޢުތައް ރާވައި ހިންގުމަށް ވަކި އިދާރާއެއް ހުރުމުގެ ބޭނުންތެރިކަން ބޮޑުކަމުން، މިނިސްޓްރީ އޮފް ހައުސިންގ އެންޑް އާރބަން ޑިވެލޮޕްމަންޓްގެ ނަމުގައި، އާ މިނިސްޓްރީއެއް އުފެއްދުމަށް އަޅުގަނޑު ގަސްދުކުރަން.
ރާއްޖޭގެ ނާޒުކު ތިމާވެށި ޙިމާޔަތްކުރުމަކީ، ޤައުމުގެ ދެމިއޮތުމާއި، އަޅުގަނޑުމެންގެ އިޤްތިޞާދީ އަދި އިޖްތިމާޢީ ތަރައްޤީއާ ގުޅިލާމެހިފައިވާ ކަމެއްކަމަށްވާތީ، ރާއްޖޭގެ ތިމާވެށި ރައްކާތެރިކުރުމަށް، މާތް اللّـه ގެ ވާގިފުޅާއެކު، އިތުރު މަސައްކަތްތަކެއް ކުރުމަށް، އަޅުގަނޑު ގަސްދުކުރަން.
ހަމައެހެންމެ، ޚަބަރާއި މަޢްލޫމާތު ހަލުވިކަމާއެކު ތަނަވަސް ގޮތެއްގައި ރައްޔިތުންނަށް ލިބިދިނުމަށާއި، ރާއްޖޭގެ ޒަމާންވީ ސަގާފަތާއި ދިވެހިވަންތަކަން ބަދަހިކުރުމަށްޓަކައި، ޚަބަރާއި މަޢްލޫމާތު ފަތުރާ ސަރުކާރުގެ ވަސީލަތްތައް އިތުރަށް ހަރުދަނާ ކުރުމުގެ މަސައްކަތްތަކެއް ފެށުމަށްވެސް، އަޅުގަނޑު ގަސްދުކުރަން.
މަސްތުވާތަކެތީގެ ވަބާގައި ޖެހޭ ކުދިންނާއި ޒުވާނުން އިތުރުވަމުންދާ ދިޔުމަކީ، މިއަދު ރާއްޖެއަށް ކުރިމަތިވެފައިވާ ވަރަށްބޮޑު މައްސަލައަކަށްވާތީ، މަސްތުވާތަކެތީގެ ނުރައްކަލުން މުޅި ޤައުމު ސަލާމަތްކުރުމަށްޓަކައި ހިންގުމަށް އަޅުގަނޑު ގޮވާލާފައިވާ ޤައުމީ ކެމްޕޭނުގެ މަސައްކަތް ފެށުމަށް މިހާރު މިދަނީ، ތައްޔާރުވަމުން.
މި ކެމްޕޭނުގައި ހުރިހާ ދާއިރާތަކަކާއި ރައްޔިތުންގެ ފުރިހަމަ އެއްބާރުލެއްވުން ލިބެމުންދާނެ ކަމަށް އަޅުގަނޑު ޔަޤީންކުރަން.
މިއަދު މި ފެށޭ ރިޔާސީ ދައުރުގައި، މިދެންނެވި ކަންތައްތައް ކުރުމުގައި، ރައްޔިތުންގެ ފަރާތުން އަޅުގަނޑަށް ޚިޔާލާއި މަޝްވަރާ ލިބެމުންދާނެ ކަމަށް ޔަޤީންކުރަން. އަދި ޚިޔާލާއި މަޝްވަރާ ދެއްވާ ފަދައިން، ރައްޔިތުން ޢަމަލީގޮތުން ބައިވެރިވެވަޑައިގެން ދެއްވާނެ ކަމަށްވެސް ޔަޤީންކުރަން.
ކުރިއަށް އޮތް ފަސް އަހަރުވެސް، ބައިނަލްއަޤްވާމީ ދާއިރާގައި ރާއްޖެއިން މަސައްކަތް ކުރަމުން ގެންދާނީ، ދުނިޔޭގެ ޞުލްޙައާއި އަމާންކަމާއި ހަމަޖެހުމަށްޓަކައި. އަދި ރާއްޖެއާ ހުރިހާ ޤައުމުތަކާ ދެމެދު އޮންނަ ރަޙްމަތްތެރިކަމުގެ ގުޅުން އިތުރަށް ބަދަހިކޮށް، ބައިނަލްއަޤްވާމީ އަދި ސަރަޙައްދީ އެއްބާރުލުން އިތުރުކުރުމަށް.
ޢިއްޒަތްތެރި ރައީސް، ޢިއްޒަތްތެރި މެންބަރުން؛
ރިޔާސީ އާ ދައުރަކަށް، ރާއްޖޭގެ ރައީސުލްޖުމްހޫރިއްޔާކަމުގެ މަގާމާ މިއަދު އަޅުގަނޑު މިހަވާލުވަނީ، ރާއްޖޭގެ ކުރިމަގުގެ ތަޞައްވުރާމެދު އާ އުންމީދުތަކެއް ކުރަމުން. އާ ވިސްނުންތަކަކަށް މަރްޙަބާ ކިޔަމުން.
ކުރިއަށް އޮތް ފަސް އަހަރުގެ ތެރޭގައި ކުރުމަށް އަޅުގަނޑު ގަސްދުކުރާ ވަރަށް މުހިންމު ވަރަށް ބޮޑެތި ކަންތައްތަކެއްގެ ވާހަކަ، މިއަދު ދަންނަވާލެވިއްޖެ.
އެކަންތައްތައް ކާމިޔާބު ކުރެވޭނީ، މާތް اللّـه ގެ ހެޔޮ ތައުފީޤުން. އެއަށްފަހު، ތިޔަ ޢިއްޒަތްތެރި މަޖިލީހުގެ ތާއީދާއި އެއްބާރުލެއްވުން ލިބިގެން. އަދި ރާއްޖޭގެ ލޮބުވެތި ރައްޔިތުންގެ ފުރިހަމަ ބައިވެރިވުން އޮވެގެން. އެކިއެކި އިޤްތިޞާދީ މަސައްކަތްތައް ކުރައްވާ ފަރާތްތަކާއި، އަމިއްލަ ޖަމާޢަތްތަކާއި، އަމިއްލަ ފަރްދުންގެ އިޚްލާޞްތެރި އެހީތެރިކަމާއި އެއްބާރުލެއްވުން ލިބިގެން.
އެހެންކަމުން، އަޅުގަނޑުމެން މި ފަށާ ޤައުމީ އާ ދަތުރަކީ، އެންމެން އަތުގުޅާލައިގެން، އެންމެން ބައިވެރިވެގެން ކުރާ ނިޔާމަ، އަމާން، ކާމިޔާބު ދަތުރަކަށް ހެދޭތޯ މަސައްކަތް ކޮށްދެއްވުމަށް އަޅުގަނޑު، ވަރަށް އިޚްލާޞްތެރިކަމާއެކު، ތިޔަ ޢިއްޒަތްތެރި މަޖިލިހާއި ދިވެހި ރައްޔިތުންގެ އަރިހުން އެދެން.
މާތް اللّـه، ދިވެހިރާއްޖޭގެ މިނިވަންކަމާއި، އަމިއްލަވަންތަކަމާއި، ޞުލްޙަމަސަލަސްކަން ޙިމާޔަތް ކުރައްވާށި! ރާއްޖެއަކީ ސައްތައިންސައްތަ މުސްލިމް ޤައުމެއްގެ ގޮތުގައި ދަމަހައްޓަވާށި! ރާއްޖޭގެ ކަންތައްތައް، އެންމެ ހެޔޮގޮތުގައި ކުރިޔަށް ގެންދިޔުމުގެ ހެޔޮވިސްނުމާއި ތައުފީޤު، އަޅުގަނޑުމެން އެންމެންނަށް ދެއްވާށި! އާމީން.
والسّـلام عليـكم ورحـمة اللّـه وبـركاتـه.