بِسْمِ ٱللّٰهِ ٱلرَّحْمٰنِ ٱلرَّحِيمِ‎

اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.

އާދެ، ވަރަށް އުފާކުރަން، މިއަދުގެ މި ޙަފުލާއަށް ތިޔަ ހުރިހާ ބޭފުޅުން ވަޑައިގެންދެއްވި ކަމަށްޓަކައި. ސަބަބަކީ، އަޅުގަނޑު ރިޔާސީ އިންތިޚާބުގެ ކެމްޕެއިން ތެރޭގައި ވީ އެންމެ މުހިންމު އެއް ވަޢުދު މިއީ، ރާއްޖޭގެ ދެމެހެއްޓެނިވި ތަރައްޤީގެ ވިސްނުމުން، ރާއްޖޭގެ ހުރިހާ ރައްޔިތުން ޝާމިލްވެގެން، ބައިވެރިވެގެން، 20 އަހަރު ދުވަހުގެ ތަރައްޤީގެ ޕްލޭނެއް އެކުލަވައިލާނެ ކަމަށް. އެ ވަޢުދު ފުއްދުމުގައި އެކަން ޙަޤީޤަތަކަށް ވެގެންދާނީ، ހުރިހާ ބޭފުޅުންގެވެސް ބައިވެރިވުން ލިބިގެން ކަމުގައިވާތީ، ވަރަށް އުފާކުރަން ތިޔަބޭފުޅުން ވަޑައިގެންނެވި ކަމަށްޓަކައި.

އަޅުގަނޑު ޚާއްޞަ ކަމެއްގެ ގޮތެއްގައި ފާހަގަކޮށްލަން، އަޅުގަނޑުމެންގެ މި ޤައުމުގެ ކުރީގެ ޕްލޭނިންގ މިނިސްޓަރ ޙަމްދޫން ޙަމީދު މިތަނަށް ވަޑައިގެން އިންނެވި ކަމަށްޓަކައި. އެ މަނިކުފާނަށް ވަރަށް ބޮޑަށް ޝުކުރު ދަންނަވަން.

އާދެ، ޕްލޭނިންގގެ މަސައްކަތަކީ، ޤައުމުގެ ތަރައްޤީގެ ޕްލޭންގެ މަސައްކަތަކީ، ވަރަށް ވަރަށް މުހިންމު ކަމެއް ދީގެން ކުރަންޖެހޭ ކަމެއް. ސިޔާސީ އޮއިވަރުގައި ޖެހިގެން، އެއިރެއްގައި އޮންނަ ސަރުކާރެއްގެ ވިސްނުމާ އެއްގޮތަށް، އަބަދުއަބަދު ބަދަލުތަކެއް އަންނަ ގޮތަށް، ޤައުމުގެ ތަރައްޤީގެ ކަންކަން ގެންދަން ވެއްޖިއްޔާ، ރައްޔިތުންނަށް އެންމެ ހެޔޮގޮތް ނުލިބިދާނީ. ކަންތައްތައް އެހެން ވަމުން މިދަނީ.

އޭގެ ބަދަލުގައި، ރައްޔިތުން ކަނޑައަޅާފައި އޮންނަ މަގަކުން، ދާން ބޭނުންވާ މިޞްރާބަށް ދެވޭގޮތަށް، ކަންތައްތައް ބައްޓަން ކުރެވިއްޖިއްޔާ، ރައްޔިތުންނަށް އެންމެ ރަނގަޅަށް ފައިދާވާނީ. އެހެންވެ އަޅުގަނޑު ނިންމީ، މިގޮތަށް މިކަން ކުރަން. މިކަމަށް ޚާއްޞަ ޤާނޫނެއް، ޤައުމީ ތަރައްޤީއާ ބެހޭ ޤާނޫނެއްވެސް ފަރުމާކޮށް، ތަޢާރުފްކޮށްގެން މިކަން ކުރިއަށް ގެންދަން. އެކަމާ ބެހޭ މަސައްކަތްވެސް ކުރިއަށްދާނެ މިއާ އެކީގައި. މި މަސައްކަތަކީ ޤާނޫނުއަސާސީގައިވެސް ރިކޮގްނައިޒް ކުރާ ކަމަކަށް ހެދުމަށްޓަކައި، ޤާނޫނުއަސާސީއަށްވެސް އިރާދަކުރެއްވިއްޔާ އިޞްލާޙެއް ގެންނަން ނިންމާފައި މިއޮތީ.

ބޭނުމަކީ، އަޅުގަނޑުމެންގެ ރައްޔިތުން، އެންމެން އެކުވެގެން ނިންމާގޮތަށް ޤައުމުގެ ކަންކަން ދާނެކަން ޔަޤީންކުރުން. ސިޔާސީގޮތުން ބޭނުންވާ ބަދަލުތައް ގެނެވޭނެ މިންގަނޑުވެސް، އިންވެސް، އޭގައި ބަޔާންކުރެވިފައި އޮންނަ، މައިގަނޑު ޑައިރެކްޝަން ރައްޔިތުން ބޭނުންވާގޮތަށް ދާނެކަން ޔަޤީންވާގޮތަށް، ކަންކަން ބައްޓަން ކުރަން. އެހެންވީމާ، އެގޮތަށް ކުރިއަށް ގެންދަން ނިންމީ.

އަޅުގަނޑުމެން ބޭނުންވަނީ ޤައުމު ތަރައްޤީކުރަން. ރައްޔިތުން މުއްސަނދިވާން. ފުދުންތެރިވާން. ގެދޮރުވެރިކަން އެންމެންނަށް ލިބިގެންދާން. ހުރިހާ ރައްޔިތުންނަށް ތަފާތުކުރުމެއްނެތި ވަޒީފާގެ ފުރުޞަތު ލިބޭނެކަން ޔަޤީންވާން. އަޅުގަނޑުމެންގެ ޞިއްޙީ ކަންކަމާއި، ތަޢުލީމީ ކަންތައްތައް، އަދި އިޖުތިމާޢީ ހުރިހާ ކަންތައްތަކެއްވެސް އަޅުގަނޑުމެން ބޭނުންވާ ފެންވަރަށް ގެންދަން.

އަޅުގަނޑު ޔޫ.އެން.ގައި ވާހަކަ ދައްކަމުން، އިޢުލާނު ކުރިން، އަޅުގަނޑު ބޭނުމޭ، 2040 އަންނައިރު، އެއީ، މި 20 އަހަރުގެ މާސްޓަރ ޕްލޭންގެ މުއްދަތުގެ ތެރޭގައި އަންނަ އަހަރެއް އެއީ 2040. އަޅުގަނޑުމެންގެ ޖީ.ޑީ.ޕީ.ގެ މިންގަނޑާއި، އަދި ޖުމްލަކޮށް ހިއުމަން ޑިވެލޮޕްމަންޓް އިންޑެކްސްގައިވެސް، އަދި އެހެން ހުރިހާ ގޮތަކުންވެސް ދިވެހިރާއްޖެއަކީ، ޑިވެލޮޕްޑް ނޭޝަނެއްގެ ގޮތުގައި، ޑިވެލޮޕްޑް ނޭޝަނެއްގެ ސްޓޭޓަސް ލިބޭ ޤައުމަކަށް 2040އާ ހަމައަށްދާއިރުގައި ހަދަން ބޭނުމޭ. އެހިސާބަށް އަޅުގަނޑުމެންނަށް ދެވޭނީ، ވަރަށް ގިނަ ކަންތައްތަކެއް ކުރެވިގެން. ވަރަށް ގިނަ އޭންގަލުން ކަންތައްތަކެއް ރަނގަޅުވެސް ކުރެވިގެން. ތަރައްޤީ ކުރެވިގެން.

އިޖްތިމާޢީ ގޮތުންވެސް، އަދި ޢުމްރާނީ ތަރައްޤީގެ ގޮތުންވެސް، އިޤްތިޞާދީ ތަރައްޤީގެ ގޮތުންވެސް، ވަރަށްގިނަ ކަންތައްތަކެއް ކުރެވެންޖެހޭނެ. ހައި އެކްސްޕެކްޓޭޝަނެއް އެއިމް ކުރަންވީ އެންމެ މައްޗަށް. އެހެންނަމަވެސް، ޢަޒުމަކާ އެކުގައި، އެކުވެރިކަމާ އެކީގައި، ޤައުމީ ވިސްނުމެއްގައި، އެންމެން މަސައްކަތް ކޮށްފިއްޔާ، ހާސިލުކުރެވޭނެ ކަންތައްތައް އެ ހުންނަނީ.

އެހެންވީމާ، އިރާދަކުރެއްވިއްޔާ މިއަދު މި ފެށޭ މަސައްކަތް، ރާއްޖޭގެ ހުރިހާ ރަށެއްގައި ކުރިއަށް ގެންދާނަން. ތިޔަ ހުރިހާ ބޭފުޅުންގެ ބައިވެރިވުމާ އެކީގައި. ކޮންމެ ރަށެއްގެ ރައްޔިތުންވެސް، މި ޕްލޭނަށް އެއްޗެއް ވިދާޅުވާންޖެހޭނެ. ރައްޔިތުން ބޭނުންވާ ކަންތައް، ކޮންމެ ރަށެއް މީގައި ރެޕްރެޒެންޓްވާން ޖެހޭނެ. އަދި އެހެން ހުރިހާ ސްޓޭކް ހޯލްޑަރުންވެސް، ހުރިހާ ދާއިރާތަކުންވެސް، ސިޔާސީ ޕާޓީތައްވެސް، މީގައި ބައިވެރިވާން އަޅުގަނޑު ބޭނުން. އަޅުގަނޑު އެދެން، ހުރިހާ ސިޔާސީ ޕާޓީތައްވެސް، ސިޔާސީ ވިސްނުން ދޫކޮށްލެއްވުން. މިއީ ޤައުމީ މަސައްކަތެއް. ޤައުމީ ތަރައްޤީގެ ވާހަކަ މި ދައްކަނީ. 20 އަހަރު ދުވަހަކީ ޖީލެއް.

އެހެންވީމާ، ޖީލެއްގެ ތަޞައްވުރު އަޅުގަނޑުމެން މިއުޅެނީ ކަނޑައަޅަން. ކުރިއަށް އޮތް ޖީލުގެ ތަޞައްވުރު ކަނޑައަޅަން މިއުޅެނީ. މިއީ ސިޔާސީ ކަމެއް ނޫން. އެހެންވީމާ، ހުރިހާ ސިޔާސީ ޕާޓީތައްވެސް، މަދަނީ ޖަމުޢިއްޔާތައްވެސް، އަދި އެކިއެކި ފަރާތްތަކުން ރާއްޖޭގެ ހުރިހާ ބޭފުޅުންވެސް ބައިވެރިވެގެން ހިންގަވާށޭ މިކަން ކުރަމާ. އިރާދަކުރެއްވިއްޔާ ކާމިޔާބީ ހާސިލުވާނެ އޭރުން.

އާދެ، މިކަމުގައި ޔޫ.އެން.ޑީ.ޕީ.އިން ވަރަށް ބޮޑަށް އެހީތެރިކަން ދެއްވާ. އަދި އޮސްޓްރޭލިއާ ސަރުކާރުންވެސް އެބަ ދެއްވާ. އެ ދެ ފަރާތަށް ހަމަ ވަރަށް ބޮޑަށް ޝުކުރު ދަންނަވަން. އަދި ހަމައެއާއެކީގައި، މި މަސައްކަތުގައި ބޭރުގެ އެކިއެކި އެކްސްޕާޓުން ބައިވެރިކުރުމަށް ހަމަޖެހިފައިވޭ. އެހެންނަމަވެސް، ލީޑްކުރާނީ ދިވެހީން. މިއީ، ދިވެހީންގެ ތަރައްޤީގެ މާސްޓަރ ޕްލޭން. ދިވެހީންގެ ރާއްޖެ އަޅުގަނޑުމެން ޤާއިމުކުރަން މިއުޅެނީ. ޤައުމިއްޔަތު ތަރައްޤީކުރަން ބޭނުންވޭ. އަޅުގަނޑުމެންގެ ތަރައްޤީއަކީ، ދެ މަގަކުން ގެންދެވޭ ތަރައްޤީއަކަށް ވާންޖެހޭ. އަޅުގަނޑުމެންގެ ފިކުރާއި، އަޅުގަނޑުމެންގެ ދީނާއި، ޤައުމިއްޔަތު އަޅުގަނޑުމެންގެ ބަހާތަކާ ޙިމާޔަތްވެގެން، އަންނަން އޮތް ޖީލުތަކަށް ރައްދުކޮށްދޭ ތަރައްޤީގެ ޕްލޭނަކަށް ވާންޖެހޭ. ހަމައެއާއެކީގައި، އަޅުގަނޑުމެންގެ ޢުމްރާނީ ތަރައްޤީއާއި، އިޤްތިޞާދީ ތަރައްޤީ، އަޅުގަނޑުމެން ބޭނުންވާ މިންގަނޑަށް ގެންދަންޖެހޭ. އެހެންވީމާ، ދިވެހީންގެ އިސްނެގުން، ލީޑްކުރުމުގައި، މިކަމުގައި މަސައްކަތް ކުރުމުގައި، އުޅޭނީ. އުޅޭއިރުގައި، އެކިއެކި ދާއިރާތަކުން ބޭރުގެ އެކްސްޕާޓުންވެސް ބައިވެރިކުރެވޭނެ.

އަޅުގަނޑުމެން، މި ތަރައްޤީގެ ޕްލޭން ހަދާއިރުގައި، ދުނިޔެއަށް އަންނަ ތަރައްޤީވެސް އަޅުގަނޑުމެން ބަލައިގަންނަން ޖެހޭނެ. އާޓިފިޝަލް އިންޓެލިޖެންސަކީ، މިހާރުގެ ޙަޤީޤަތް. އޭ.އައި. އެންހާންސްޑް ތަރައްޤީގެ ޕްލޭނެއް އަޅުގަނޑުމެން ބަލައިގަންނަން ޖެހޭނެ. ބަލައިގަންނައިރުގައި އެކަމަކު، ވަރަށް ރަނގަޅަށް ރެގިއުލޭޓް ކުރެވެންޖެހޭނެ. ވަރަށް ރަނގަޅަށް އަޅުގަނޑުމެން ބޭނުންވާ މަފްހޫމްގައި، އަޅުގަނޑުމެން ބޭނުންވާ ފެންވަރަށް އެކަން ބައްޓަންކުރެވޭ ގޮތަށް. އެހެންނަމަވެސް، އޭ.އައި. އެންހާންސްޑް ޑިވެލޮޕްމަންޓް ޕްލޭނެއްގެ ތެރެއިން، ނޫނީވިއްޔާ ދުނިޔެއަށް މިއަންނަ ތަރައްޤީއަށް ބަލާއިރުގައި، ކުރިއަކަށް ނުދެވޭނެ.

އަޅުގަނޑުމެން 2040އާ ހަމައަށް، އަދި އެއަށްވުރެ ފަހަތަށްދާއިރުގައިވެސް، ތަރައްޤީވެފައި އޮތް ޤައުމަކަށް ހަދަން ބަލާއިރުގައިވެސް، އާރޓިފިޝަލް އިންޓެލިޖެންސަކީ މިހާރުގެ ޙަޤީޤަތް. އަޅުގަނޑުމެންނަށް މި ފެނިގެންދަނީ، ޑިޖިޓަލީ ޑްރިވަން އިކޮނޮމީތައް އުފެދެމުންދާ ތަން. އަޅުގަނޑު ވާނީ ބަޔާންކޮށްފައި، 2030އާ ހަމައަށްދާއިރުގައި އަޅުގަނޑުމެންގެ ޖީ.ޑީ.ޕީ. އަހަރަކުން އަހަރަކުން ޑިޖިޓަލް އިކޮނޮމީ ފުޅާކުރަމުންގޮސް، ޖީ.ޑީ.ޕީ.ގެ 15 ޕަސެންޓަކީ، އެންމެ މަދުވެގެންވެސް، ޑިޖިޓަލް އިކޮނޮމީން ކަވަރ ކުރާ އެއްޗަކަށް ހަދަންޖެހޭނެ ކަމަށް. އެއީ، ދުނިޔޭގެ ޙަޤީޤަތް މިހާރު. ޑިޖިޓަލް ކަރަންސީ އެދަނީ ފުޅާވަމުން.

އަޅުގަނޑު ދާދިފަހުން އެމް.އެމް.އޭ.ގައި ދެންނެވިން، ގަވަރުނަރަށް، ބައްލަވައިދެއްވާށޭ، ފުލީ ރެގިއުލޭޓަޑް ގޮތަކަށް އަޅުގަނޑުމެންނަށް ކިހާވަރަކަށްތޯ ކްރިޕްޓޯ ކަރަންސީ، ޑިޖިޓަލް ކަރަންސީގައި، ރާއްޖެއަށް ތަޢާރުފް ކުރެވޭނީ. އަޅުގަނޑުމެންގެ އިކޮނޮމީ ޑައިވަރސިފައި ކުރެވޭނީ ކިހާވަރަކަށްތޯ، ޑިޖިޓަލް ކަރަންސީ ތަޢާރުފް ކޮށްގެން. މި ދަންނަވަން އުޅޭ ވާހަކައަކީ، ދުނިޔެއަށް އަންނަ ބަދަލުތަކާއި، ދުނިޔެ ތަރައްޤީވަމުންދާ ހިސާބަށް އަޅުގަނޑުމެން ފައިހަމަކޮށްގެންނޭ އަޅުގަނޑުމެންގެ ޤައުމު ތަރައްޤީވާނީ.

އެހެންވީމާ، މި ހުރިހާ ޙަޤީޤަތްތަކާ އެކީގައި، އަޅުގަނޑުމެންގެ އަޞްލު އަޅުގަނޑުމެން އަބަދުވެސް ހަނދާން ބަހައްޓައިގެން، އަޅުގަނޑުމެންނަކީ މާތްވެގެންވާ އިސްލާމްދީނުގައި ތިބި، ފައިތިލަ ސާބިތުކޮށްގެން ތިބި ފަޚުރުވެރި ދިވެހީން ކަމުގައިވާތީ. އަޅުގަނޑުމެންގެ ކާބަފައިން އަޅުގަނޑުމެންނާ ހަމައަށް ޤައުމަށް ގެނެސްދިން ޙަޤީޤަތް މަތިން އަބަދު ހަނދާންކޮށް، ޝަހީދުވި އަބްޠާލުން އެ ކުރި ބުރަ ޤައުމީ މަސައްކަތް އަބަދު ހަނދާންކޮށް، އަބަދުވެސް ޤައުމަށްޓަކައި ޤުރުބާންވުމަކީ، އަޅުގަނޑުމެންގެ ފަޚުރުކަމުގައި ދެކިގެން، އަންނަން އޮތް ޖީލުތަކަށް އަޅުގަނޑުމެންގެ ޤައުމު ގެންދިޔުމުގައި، އެ މަފްހޫމްގައި ޤައުމު ތަރައްޤީކުރުމުގައި އެންމެން ބައިވެރިވެގެން، ޤައުމީ މަސައްކަތް މިއަދު ފަށަމާ ހިނގާށޭ. އެއީ، އަޅުގަނޑު ދަންނަވަން ބޭނުންވާ ވާހަކައަކީ. އަޅުގަނޑު ޔަޤީންކުރަން، ހުރިހާ ބޭފުޅުން މިކަމުގައި ބައިވެރިވެވަޑައިގަންނަވާނެ ކަމަށް. އަދި މިތަނުންވެސް ފެނިގެންދަނީ އެކަން.

އެހެންވީމާ، އަޅުގަނޑަށް ވަރަށް ބޮޑު އުފަލެއް އެބަ ލިބޭ، މިކަން ޔަޤީންކަމާ އެކީގައި، އެއް އަހަރު ދުވަހުގެ ތެރޭގައި، ކާމިޔާބުކަމާ އެކީގައި ނިންމާލެވޭނެ ކަމަށް. އެއް އަހަރު މި ކަނޑައެޅީ. ޙަޤީޤަތުގައި ކުޑަ ވަގުތުކޮޅެއް އެއީ، މި ވަރުގެ ބޮޑު މަސައްކަތެއް ކުރަން. އެހެންނަމަވެސް، އަޅުގަނޑުމެން އެންމެން ބައިވެރިވެގެން، އޯލް އިންކްލޫސިވް މަސައްކަތެއް، ވަރަށް ފޯކަސްޑް، އިންޓެންސިޓީ ވަރަށް ހައިކޮށް މަސައްކަތް ކޮށްފިއްޔާ، ކާމިޔާބުކަމާ އެކީގައި، ހާސިލުވާނެ.

އަޅުގަނޑު ދެކެން ބޭނުންވަނީ، މި އަންނަ އަހަރުގެ ނޮވެންބަރު މަހުގެ މިހާތަނުގައި، އަޅުގަނޑުމެން މި މަސައްކަތްކޮށް ނިންމައި، މިއަށް ޢަމަލުކުރަން ފަށާ ޙަފްލާ ބޭއްވޭނެ ކަމަށް. ވަރަށް ބޮޑަށް ޝުކުރިއްޔާ!

އަޅުގަނޑުގެ ދުޢާއަކީ އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތްލެއްވުން. އާމީން.

وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.