އޮސްޓްރޭލިއާއަކީ ރާއްޖޭގެ ތަރައްޤީގެ ވަރަށް މުހިންމު ބައިވެރިއެއް ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، "އޮސްޓްރޭލިއާ ޑޭ" ފާހަގަކުރުމުގެ ގޮތުން ހޮލިޑޭއިން ހޮޓަލުގައި ރޭ ބޭއްވުނު ޙަފްލާއެއްގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ވާހަކަފުޅުގައި، އޮސްޓްރޭލިއާއަކީ ޒަމާނުއްސުރެ ރާއްޖެއާއެކު ވަރަށް ގާތް ގުޅުމެއް ބާއްވަމުން ގެންދަވާ ޤައުމެއް ކަމަށް ވިދާޅުވެ، އޮސްޓްރޭލިއާއިން ރާއްޖެއަށް ވެދެއްވާފައިވާ އަދި ވެދެއްވަމުން ގެންދަވާ އެހީތަކަށް އޮސްޓްރޭލިއާ ސަރުކާރަށާއި ރައްޔިތުންނަށް ޝުކުރުއަދާކުރެއްވިއެވެ.
ދެޤައުމުގެ ގުޅުމުގެ މައްޗަށް ބައްލަވާލައްވަމުން، އޮސްޓްރޭލިއާގެ ބޮޑުވަޒީރު ކެވިން ރަޑާ އެކިފަހަރުމަތިން ރައީސުލްޖުމްހޫރިއްޔާއާ ބައްދަލުވެވަޑައިގެންފައިވާ ކަމަށާއި، ކެވިން ރަޑަކީ ވަރަށް ޤާބިލު ބޭފުޅެއް ކަމުގައި ވިދާޅުވިއެވެ. އަދި، ކޯޕަންހޭގަން ސަމިޓްގައި ޤައުމުތަކުން އެކުލަވާލި އެކޯޑް އެކުލަވާލުމުގައިވެސް ބޮޑުވަޒީރު ރަޑް ވަރަށް ބޮޑަށް މަސައްކަތްޕުޅުކުރެއްވި ކަމުގައި ރައީސް ނަޝީދު ވިދާޅުވިއެވެ. މިމޭރުމުން ވާހަކަފުޅު ކުރިއަށް ގެންދަވަމުން، މޫސުމަށް އަންނަމުންދާ ނޭދެވޭ ބަދަލުތަކަށް ޙައްލެއް ހޯދުމުގައި ބޮޑުވަޒީރު ރަޑަކީ ވަރަށް ބޮޑަށް މަސައްކަތްޕުޅު ކުރައްވަމުން ގެންދަވާ ބޭފުޅެއް ކަމުގައި ވިދާޅުވިއެވެ.
މި ޙަފްލާގައި، އޮސްޓްރޭލިއާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު މިޒް ކެތީ ކްލޫގްމަންވެސް ވާހަކަފުޅު ދެއްކެވިއެވެ.
ރޭ ބޭއްވި މިޙަފްލާގައި ނައިބު ރައީސް ޑޮކްޓަރ މުޙަންމަދު ވަޙީދާއި، އެމަނިކުފާނުގެ އަނބިކަނބަލުން އިލްހާމް ޙުސައިނާއި ސަރުކާރުގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ.
