بِسْمِ ٱللّٰهِ ٱلرَّحْمٰنِ ٱلرَّحِيمِ
اَلحَمْـدُ لِلّـهِ، وَالصّـلاة وَالسّلام علـى أشرف الأنبياء والمرسلين، وعلى آلـه وصحبـه أجمعـين.
ފުރަތަމަވެސް، ދުވަހުގެ ތަހުނިޔާ ތިޔަ އެންމެހައި ބޭފުޅުންނަށް ދަންނަވަމުން، އަޅުގަނޑަށް މި ފަޚުރުވެރި ފުރުޞަތު ދެއްވިކަމަށްޓަކައި، ޕީ.އެސް.އެމް. ގެ ހުރިހާ މުވައްޒަފުންނަށް، އަޅުގަނޑު ވަރަށް އިޚުލާސްތެރި ޝުކުރެއް ދަންނަވަން. ޝުކުރިއްޔާ ވަރަށް ބޮޑަށް.
އާދެ! ތިޔަބޭފުޅުން ފާހަގަކުރައްވަމުން ތިޔަގެންދަވާ ނޫސްވެރިކަމުގެ ދުވަހަކީ، އަޅުގަނޑުމެން އެންމެންގެ ހިތްތަކާ ވަރަށް ބޮޑަށް ގުޅި ލާމެހިފައިވާ ދުވަހެއް. އަޅުގަނޑުމެންގެ ދުވަސް ތަރުތީބުވެގެން އަންނައިރުގައި، އަޅުގަނޑުމެން މި ނޭވާލާލުމަށް ވަރަށް ބޮޑު ތަސައްލީއެއް ނޫނީ އޭގެ އުނދަގޫތަކެއް ތަހައްމަލު ކުރުމަށް މަގުފާރު ހުޅުވާލާ ކަމެއްގެ ވާހަކަ އަޅުގަނޑުމެން މިދައްކަނީ.
އެހެންކަމުން، ތިޔަބޭފުޅުން ރެއާއިދުވާލު ތިޔަކުރައްވަނީ ވަރަށް ބުރަ، ވަރަށް މިންނެތް މަސައްކަތްތަކެއް، ރައްޔިތުންނަށް ކަންކަން އޮޅުންފިލުވައިދިނުމަށްޓަކައި. ކެމެރާގެ ފުރަގަހުގައި އަދި ކެމެރާގެ ކުރިމަތީގައިވެސް، ދެގޮތެއްނުވެ ތިޔަދައްކަވާ ހިތްވަރަށްޓަކައި އަޅުގަނޑު އިޚުލާސްތެރި ޝުކުރެއް ތިޔަބޭފުޅުންނަށް ދަންނަވަން.
ރެއާއިދުވާލު ތިޔަކުރައްވާ މަސައްކަތުގެ ސަބަބުން، މުޖުތަމަޢުގައި ހުރި ގިނަގުނަ ކަންތައްތަކެއް، ސަރުކާރާއި ރައްޔިތުންނާ ގުޅުވައިދީ އަދި ރައްޔިތުންނާއި ސަރުކާރާ ގުޅުވައިދިނުމުގެ މި މައި ދޮރު، މި ފާލަން ތިޔަބޭފުޅުން ސާބިތުކަމާއެކީގައި އެއްގޮތެއްގައި ދަމަހައްޓަވާ ދެމެހެއްޓެވުމަކީ، މުޖުތަމަޢު، ދުޅަހެޔޮ ޞިއްޙަތެއްގައި ބޭއްވުމަށްޓަކައި ކުރެވޭ ވަރަށް ބުރަ މަސައްކަތެއް ކަމުގައިވެސް މިފުރުޞަތުގައި އަޅުގަނޑު ފާހަގަކުރަން.
އާދެ! ޕީ.އެސް.އެމް. އަށް 7 އަހަރު ވެގެން މިދާދިޔުމުގައި، މިއުފާވެރި ދުވަހު އަޅުގަނޑު ފާހަގަކޮށްލަން ބޭނުން، މަޤުބޫލު ޗެނަލަކަށް މިޗެނަލް ވެފައިވާކަން. އަދި ޚާއްޞަގޮތެއްގައި ދުނިޔޭގެ ކަންކޮޅުތަކުން މިގެންނަ، ތިޔަބޭފުޅުން ޚާއްޞަގޮތެއްގައި ތިޔަގެންނަވާ ޕުރޮގުރާމު، އަޅުގަނޑު ނަން ހަނދާނެއްނެތް، ނަމަވެސް ކަޅި، މި ފަހަތު ނަން އަޅުގަނޑު ހަނދާން މިވީ. އެ ޕުރޮގުރާމު ވެގެން މިދިޔައީ ވަރަށް މަޤުބޫލު ޕުރޮގުރާމަކަށް އިނގޭތޯ. އެ ޕުރޮގުރާމުގެ ސަބަބުން ވަރަށް ތާޒާ ޚަބަރު އަޅުގަނޑުމެންނާ ހަމައަށް އެބަ ލިބޭ. އަދި މީގެ 7 އަހަރު ކުރިން، އަޅުގަނޑުވެސް އޭރު ޕަރލިއެމެންޓޭރިއަނަކަށް ހުރިއިރުގައި ފާހަގަކުރެވިގެންދިޔަ. އޭރު ދާއިމީ ގޮތެއްގައި ދިވެހިރާއްޖޭގެ އަޑާއި، ޓީ.ވީ.އެމް. ގެ ނަމުގައި މި ހިންގަމުން އައީ. އަޅުގަނޑުމެންގެ ޝައުޤުވެރިކަން ހުންނަ ކަންކަމުގައި، ލަވަ، މުނިފޫހިފިލުވުން، ކުޅިވަރު، ދީނީ، ނޫނީ އަޅުގަނޑުމެން ބޭނުންވާ ކަހަލަ މަޢުލޫމާތު ހޯދާލަންވެސް އަޅުގަނޑުމެންގެ ލޮލާއި ކަންފަތް ހުއްޓާލައިގެން ތިބެން މިޖެހެނީ އެއްދިމާއަކަށް. އެހެންނަމަވެސް ދަޢުލަތުގެ މީޑީއާ ތެރެއިން، ޗެނަލްތައް ހުޅުވިގެން އެ ޝައުޤުވެރިކަން ހުންނަ ބޭފުޅުން، އެބޭފުޅަކު ބޭނުންވާ ދިމާއެއްގެ ޚަބަރުތައް އެބޭފުޅަކަށް ތާޒާ ކަމާއެކީ ލިބިގެން ދިޔުމުގެ ފުރުޞަތު މީގެ 7 އަހަރު ކުރިން ހުޅުވިގެން މިހިސާބަށް އައިއިރު އަޅުގަނޑު މިދެންނެވި، ކާމިޔާބީތަކެއް މިއޮތީ ހާސިލުކުރެވިފައި.
އިތުބާރާއި ޔަގީންކަން ދެމެހެއްޓުން، ދެން ޒިންމާއަކަށް މިއޮތީ. އެކަމުގައި ގާބިލު ބޭފުޅުން މިތަނުގައި އެބަތިއްބެވި. އެކަން ކުރެއްވޭނެ ކަމުގެ ހުނަރުވެރި ބޭފުޅުން އެބަ ތިއްބެވި. އެހެންވީމާ، ސަރުކާރުގެ އަމާޒަކަށް މިއަދު ވެފައިވަނީ، ރައްޔިތުން އިތުބާރު ކުރައްވައި، ރައީސް ޑޮކްޓަރ. މުޙައްމަދު މުޢިއްޒާ ހަވާލުކުރެއްވި ޒިންމާތައް އަދާކުރުން. އެމަނިކުފާނު އިންތިޚާބީ ރައީސެއްގެ ހައިސިއްޔަތުން، އިންތިޤާލީ މަރުޙަލާގައި ވަނީ ތިޔަބޭފުޅުންނަށް ވަރަށް އުންމީދީ ވާހަކަފުޅުތަކެއް ހިއްސާކުރައްވާފައި. އެއީ، ޙަޤީޤީ މާނައިގައި އެކަން ތަންފީޒު ކުރުއްވުމަށްޓަކައި އެމަނިކުފާނު އެ ހުންނެވީ ވަރަށް ކެރިވަޑައިގެން އަދިވެސް އެގޮތުގައި ސާބިތުކަންމަތީ އިރާދަކުރެއްވިއްޔާ އެކަންކަން ތަންފީޒުކޮށްދެއްވާނެ. އަމިއްލަ ފައިމައްޗަށް، މީޑީއާ ތެދުވުމުގެ ފުރުޞަތު އެމަނިކުފާނު ހޯއްދަވައިދެއްވާނެ.
އެހެންވީމާ އަދިވެސް އެއްފަހަރު، އަޅުގަނޑަށް މިފަދަ ފުރުޞަތެއް ތިޔަބޭފުޅުން ދެއްވިކަމަށްޓަކައި ޝުކުރުދަންނަވަމުން ވާހަކަ ކުރުކޮށްލާނަން. މި ދުވަހުގެ ތަހުނިޔާ ހުރިހާ ބޭފުޅުންނަށް އަރިސްކުރަން.
ޝުކުރިއްޔާ ވަރަށް ބޮޑަށް.