ނައިބު ރައީސް ޑޮކްޓަރ މުޙަންމަދު ވަޙީދު، އިސްލާމިކް ޑިވެލޮޕްމަންޓް ބޭންކް (އައި.ޑީ.ބީ.) ގްރޫޕްގެ ރައީސް ޑޮކްޓަރ މުޙަންމަދު ޢަލީއާ މިއަދު ބައްދަލުކުރައްވައިފިއެވެ.
މިބައްދަލުކުރެއްވުމުގައި ރާއްޖޭގައި އިސްލާމިކް ބޭންކެއް ތަޢާރަފް ކުރެއްވުމާބެހޭގޮތުންނާއި، އައި.ޑީ.ބީ.ގެ އެހީތައް ކުރިއަށް ގެންދެވުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
އައި.ޑީ.ބީ. ހެޑްކުއާޓަރޒްގައި ބޭއްވެވި މިބައްދަލުކުރެއްވުމުގައި، އައި.ޑީ.ބީ. ގްރޫޕްގެ ރައީސް ދެއްކެވި ވާހަކަފުޅުގައި، ދިވެހިރާއްޖެއާއި އެބޭންކާ ދެމެދުގައި ގުޅުން ބަދަހިކުރެއްވުމަށް ބޭނުންފުޅު ކަމަށް ވިދާޅުވެ، އައި.ޑީ.ބީ.އިން ރާއްޖެއަށް ވެދެއްވަމުން ގެންދަވާ އެހީތައް ކުރިއަށް އޮތްތާނގައިވެސް ވެދެއްވަމުން ގެންދަވާނެ ކަމުގެ ޔަޤީންކަން ދެއްވިއެވެ.
ނައިބު ރައީސް ދެއްކެވި ވާހަކަފުޅުގައި، އައި.ޑީ.ބީ.އިން ރާއްޖެއަށް ވެދެއްވަމުން ގެންދަވާ އެހީތަކަށް ޝުކުރު އަދާކުރެއްވިއެވެ. އަދި، ރާއްޖޭގައި ބޭއްވުމަށް ހަމަޖެހިފައިވާ ޑޯނަރ ކޮންފަރެންސާބެހޭ މަޢުލޫމާތު އައި.ޑީ.ބީ.ގެ ރައީސަށް ދެއްވިއެވެ.
އައި.ޑީ.ބީ. ގްރޫޕްގެ އިސްބޭފުޅުންނާވެސް ނައިބު ރައީސް މިއަދު ބައްދަލުކުރެއްވިއެވެ. މިބައްދަލުކުރެއްވުމުގައި، އައި.ޑީ.ބީ. ގްރޫޕްގައި ހިމެނޭ ތަފާތު މުއައްސަސާތަކުގެ މަސައްކަތްތަކާ ބެހޭގޮތުންނާއި، އައި.ޑީ.ބީ. ގްރޫޕާއި ރާއްޖެއާ ދެމެދުގައިވާ ގުޅުމާ ބެހޭގޮތުން ނައިބު ރައީސަށް އެގްރޫޕްގެ ފަރާތުން މަޢުލޫމާތު ދެއްވިއެވެ. އެބޭފުޅުންގެ ވާހަކަފުޅުގައި، ރާއްޖޭގައި އިސްލާމިކް ބޭންކެއް ވަރަށް އަވަހަށް ތަޢާރަފް ކުރެވޭނެ ކަމަށް އުންމީދު ކުރައްވާ ކަމަށާއި، ރާއްޖޭގެ ޑޯނަރ ކޮންފަރެންސްގައި އެ ގްރޫޕްގެ ފަރާތުން ބައިވެރިވާނެ ކަމުގައި ވިދާޅުވިއެވެ.
މިބައްދަލުކުރެއްވުމުގައި، ރާއްޖޭގެ ތަރައްޤީގެ މައި ދާއިރާތަކާބެހޭގޮތުން ނައިބު ރައީސާއި، މިނިސްޓަރ އޮފް ސްޓޭޓް ފޮރ ފިނޭންސް އެންޑް ޓްރެޜަރީ މަޢުލޫމާތު ދެއްވިއެވެ. އަދި، ޑޯނަރ ކޮންފަރެންސްގައި އައި.ޑީ.ބީ. ގްރޫޕްގެ ބައިވެރިވުން ވަރަށް ރަނގަޅަށް ފެނިގެންދާނެ ކަމަށް އުންމީދު ކުރައްވާ ކަމުގައި ވިދާޅުވިއެވެ.
