ނޭޕާލްގެ ކުރީގެ ބޮޑުވަޒީރު ގިރިޖާ ޕްރަސާދު ކޮއިރާލާ އަވަހާރަވުމާ ގުޅިގެން، އެކަމުގެ ހިތާމައިގައި ރައީސުލްޖުމްހޫރިއްޔާ މުޙަންމަދު ނަޝީދު، ނޭޕާލްގެ ރައީސް ޑޮކްޓަރ ރާމް ބަރަން ޔާދޭވަށް ތަޢުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، މި ޚަބަރު އެއްސެވީ ވަރަށް ފުންހިތާމައާ އެކުގައި ކަމަށް ވިދާޅުވެ، ދިވެހި ސަރުކާރާއި ރައްޔިތުންނާއި އަދި ރައީސުލްޖުމްހޫރިއްޔާގެ ނަންފުޅުގައި، ނޭޕާލްގެ ރައީސަށާއި، ނޭޕާލް ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ތަޢުޒިޔާ ވިދާޅުވެފައިވެއެވެ. އަދި ބޮޑުވަޒީރު ކޮއިރާލާގެ ޢާއިލާގެ މެންބަރުންނަށްވެސް ރައީސުލްޖުމްހޫރިއްޔާ ތަޢުޒިޔާ ފޮނުއްވާފައިވެއެވެ.
ރައީސުލްޖުމްހޫރިއްޔާގެ މެސެޖުގައި، ބޮޑުވަޒީރު ކޮއިރާލާއަކީ، އެމަނިކުފާނުގެ ދިގު އަދި ކުލަގަދަ ސިޔާސީ ޙަޔާތްޕުޅުގައި، ނޭޕާލަށް ކުރިއެރުން ހޯއްދަވައިދެއްވުމަށާއި، އަދި އެޤައުމަށް ޑިމޮކްރަސީ ގެންނެވުމަށް އަގުހުރި މަސައްކަތްޕުޅުތަކެއް ކުރައްވާފައިވާ ބޭފުޅެއްކަމުގައި ވިދާޅުވެފައިވެއެވެ.
