ރާއްޖޭގައި ހުރި އިންވެސްޓްމަންޓް ފުރުސަތުތަކާބެހޭ މަޢުލޫމާތު، ނައިބު ރައީސް ޑޮކްޓަރ މުޙަންމަދު ވަޙީދު، ސަޢޫދީޢަރަބިއްޔާގެ ރިޔާޒް ޗެމްބަރ އޮފް ކޮމަރސް އެންޑް އިންޑަސްޓްރީއަށް މިއަދު ދެއްވައިފިއެވެ.
ރާއްޖޭގައި ބޭއްވުމަށް ހަމަޖެހިފައިވާ ޑޯނަރ ކޮންފަރެންސަށް އެހީތެރިކަން ހޯއްދެވުމަށްޓަކައި ނައިބު ރައީސް، ސަޢޫދީޢަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގައި، ރިޔާޒްގެ ޗެމްބަރ އޮފް ކޮމަރސް އެންޑް އިންޑަސްޓްރީގެ ޗެއަރމަން ޑޮކްޓަރ ޢަބްދުއްރަޙްމާން އަލް ޖުރޭސީއާއި އެ ޗެމްބަރގެ އިސް ބައެއް ބޭފުޅުންނާ މިއަދު ބައްދަލުކުރައްވައި، ރާއްޖެއަށް އިންވެސްޓްމަންޓް އެންމެ ބޮޑަށް ބޭނުންވާ ދާއިރާތަކާ ބެހޭގޮތުން މަޢުލޫމާތު ދެއްވިއެވެ. މިގޮތުން، ގެދޮރުއެޅުމާއި ތަފާތު ޢުމްރާނީ މަސައްކަތްތަކާއި ޢާންމު ޚިދުމަތްތައް ފޯރުވައިދިނުމުގައި ދިވެހި ސަރުކާރާއެކު ބައިވެރިވާނެ ފަރާތްތައް ބޭނުންފުޅުވާ ކަމުގައި އެމަނިކުފާނު ވިދާޅުވިއެވެ. އަދި، ސަރުކާރުން ބޭނުންފުޅުވަނީ ވިޔަފާރީގައި ސަރުކާރުގެ ދައުރު ވީހާވެސް ކުޑަކުރައްވައި އަމިއްލަ ވިޔަފާރިތައް ކުރިއެރުވުމަށް އެހީތެރިވެދެއްވުމަށް ކަމުގައިވެސް ނައިބު ރައީސް ވިދާޅުވިއެވެ. މީގެ އިތުރުން، ޑޯނަރ ކޮންފަރެންސާބެހޭ މަޢުލޫމާތުވެސް ނައިބު ރައީސް ދެއްވިއެވެ.
މިބައްދަލުކުރެއްވުމުގައި މިނިސްޓަރ އޮފް ސްޓޭޓް ފޮރ ފިނޭންސް އެންޑް ޓްރެޜަރީ އަޙްމަދު އައްސަދު ދެއްކެވި ވާހަކަފުޅުގައި، ރާއްޖެއާއި ސަޢޫދީޢަރަބިއްޔާއާ ދެޤައުމުގެ ދެމެދުގައި ވިޔަފާރީގެ ގުޅުން މާބޮޑަށް ޤާއިމުކުރެވިފައި އަދި ނުވާ ކަމަށާއި، އެހެންނަމަވެސް މިއީ، ގުޅުން ވަރަށްބޮޑަށް ބަދަހިކުރެވިދާނެ ދާއިރާއެއް ކަމުގައި ވިދާޅުވިއެވެ.
ޗެމްބަރ އޮފް ކޮމަރސް އެންޑް އިންޑަސްޓްރީގެ ޗެއަރމަން ޑޮކްޓަރ ޢަބްދުއްރަޙްމާން އަލް ޖުރޭސީ ދެއްކެވި ވާހަކަފުޅުގައި، އިޤްތިޞާދީ އަދި ވިޔަފާރީގެ ރޮނގުން ދެޤައުމުގެ ދެމެދުގައި ގުޅުން ބަދަހި ކުރުމަށްޓަކައި، ދެޤައުމުގެ ވިޔަފާރިވެރިންގެ ވަފްދުތަކުގެ ދަތުރުތައް ވަރަށް މުހިންމު ކަމުގައި ވިދާޅުވިއެވެ.
