ނައިބު ރައީސް ޑޮކްޓަރ މުޙަންމަދު ވަޙީދު، ސަޢޫދީޢަރަބިއްޔާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، އެޤައުމުގެ ވަލީޢަހުދު ސުލްޠާން ބިން ޢަބްދު ޢަޒީޒާ އިއްޔެ ބައްދަލުކުރައްވައިފިއެވެ.
ވަލީޢަހުދުގެ ގަނޑުވަރުގައި ބޭއްވެވި މިބައްދަލުކުރެއްވުމުގައި، ދިވެހިރާއްޖެއާއި ސަޢޫދީޢަރަބިއްޔާއާ ދެޤައުމުގެ ދެމެދުގައިވާ އަޚްވަންތަކަމުގެ ގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
ނައިބު ރައީސް ދެއްކެވި ވާހަކަފުޅުގައި، ދިވެހި ސަރުކާރުން ކުރިއެކޭވެސް އެއްގޮތަށް ސަޢޫދީޢަރަބިއްޔާއާކު ގާތްގުޅުމެއް ބަހައްޓަވަން ބޭނުންފުޅުވާކަން ހާމަކުރައްވަމުން، ސަޢޫދީޢަރަބިއްޔާއިން ރާއްޖެއަށް ވެދެއްވާފައިވާ ދީލަތިއެހީތަކަށް ޝުކުރުއަދާކުރެއްވިއެވެ. އަދި، އެމަނިކުފާނުގެ މިދަތުރުފުޅަކީ ރާއްޖޭގައި ބޭއްވުމަށް ހަމަޖެހިފައިވާ ޑޯނަރ ކޮންފަރެންސަށް ތައްޔާރުވުމުގެ ގޮތުން ކުރައްވާ ދަތުރުފުޅެއް ކަމަށާއި، މިކޮންފަރެންސްގައި ސަޢޫދީޢަރަބިއްޔާއިން ބައިވެރވާނެކަމަށް އުންމީދު ކުރައްވާ ކަމުގައި ވިދާޅުވިއެވެ.
ވަލީޢަހުދު ސުލްޠާން ބިން ޢަބްދުލް ޢަޒީޒް ދެއްކެވި ވާހަކަފުޅުގައި، ރާއްޖެއާއި ސަޢޫދީޢަރަބިއްޔާއާ ދެޤައުމުގެ ދެމެދުގައިވާ ޒަމާންވީ ގުޅުން ބިނާވެފައި އޮންނަނީ އިސްލާމީ އަޚްވަންތަކަމުގެ ގުޅުމުގެ މައްޗަށް ކަމަށާއި، ރާއްޖޭގެ އާ ސަރުކާރާއެކުވެސް މިގުޅުން ދަމަހައްޓަވަން ބޭނުންފުޅުވާ ކަމުގައި ވިދާޅުވިއެވެ.
ކުރިއަށް އޮތްތާނވެސް ސަޢޫދީޢަރަބިއްޔާއިން ރާއްޖެއަށް އެކިކަންކަމުގައި އެހީތެރިވެދެއްވަމުން ގެންދަވާނެ ކަމުގެ ޔަޤީންކަން ދެއްވަމުން، ޑޯނަރ ކޮންފަރެންސްގައި ސަޢޫދީ ސަރުކާރުން ބައިވެރިވެވަޑައިގަންނަވާނެ ކަމުގައި ވަލީޢަހުދު ވިދާޅުވިއެވެ.
ނައިބު ރައީސްގެ ވާހަކަފުޅުގައި، ސަޢޫދީ ރަސްގެފާނަށް ރައީސުލްޖުމްހޫރިއްޔާގެ އިޚްލާޞްތެރި ހެޔޮއެދުންތައް ރައްދުކޮށްދެއްވުމަށް އެދިވަޑައިގެންނެވިއެވެ.
