ދިވެހިރާއްޖެ ކާބަން ނިއުޓްރަލްވުމަށް ކުރާ މަސައްކަތުގައި އެހީތެރިވުމުގެ ގޮތުން، މަޝްހޫރު ވިޔަފާރިވެރިޔާ، ބެންޖަމިން ރޮތްސްޗައިލްޑްގެ ކުންފުނި، (ސީ.ޓީ.ބީ.އާރު) އާއެކު ދިވެހި ސަރުކާރުން އެއްބަސްވުމެއްގައި ސޮއިކުރައްވައިފިއެވެ. މިއެއްބަސްވުމުގައި ސޮއިކުރެއްވީ ރައީސުލްޖުމްހޫރިއްޔާ މުޙަންމަދު ނަޝީދު، ސްވިޓްޒަރލޭންޑަށް ކުރެއްވި ދަތުރުފުޅުގައި، ބެންޖަމިން ރޮތްސްޗައިލްޑްގެ ދެކަނބަލުންނާއެކު ބޭއްވެވި ބައްދަލުކުރެއްވުމުގެ ތެރޭގައެވެ.
މިއެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރެއްވީ، މިނިސްޓަރ އޮފް ހައުސިން، ޓްރާންސްޕޯޓް އެންޑް އެންވަޔަރަންމަންޓް މުޙަންމަދު އަސްލަމެވެ. ސީ.ޓީ.ބީ.އާރުގެ ފަރާތުން ސޮއިކުރެއްވީ، ބެރޮން ބެންޖަމިން ރޮތްސްޗައިލްޑެވެ. އެކުންފުނީގެ ތިމާވެށްޓާބެހޭ ލަފާދޭ ގްރޫޕް "ބީސިޓިޒަން"ގެ ފަރާތުން ސޮއިކުރެއްވީ ބެރޮން ބެންޖަމިން ރޮތްސްޗައިލްޑްގެ އަނބިކަނބަލުން ބެރޮނެސް އޭރިއާން ޑި ރޮތްސްޗައިލްޑެވެ.
މިއެއްބަސްވުމުގެ ދަށުން ރާއްޖޭގެ ރާއްޖޭގެ ކާބަން ފުޓްޕްރިންޓް އޯޑިޓް ކުރުމަށާއި ކާބަން ނިއުޓްރަލް މާސްޓަރ ޕްލޭނަށް ބައިނަލްއަޤްވާމީ ފަރާތްތަކުން ފައިސާ ހޯދުމުގެ ޒިންމާ އަދާކުރާނީ ސީ.ޓީ.ބީ.އާރު. އިންނެވެ. އަދި، ރާއްޖޭގެ ކާބަން ފުޓްޕްރިންޓްގެ ފުރިހަމަ އޯޑިޓެއް ހަދާނިމުމުން، ބީސިޓިޒަންސްއިން 2020ވަނަ އަހަރާ ހަމައަށް ރާއްޖެ ކާބަން ނިއުޓްރަލް ވެވިދާނެ ގޮތްތަކާ ބެހޭގޮތުން މާސްޓަރ ޕްލޭނެއް އެކުލަވާލާނެއެވެ. އެއަށްފަހު، މިޕްލޭންގެ ދަށުން އެކިއެކި މަޝްރޫޢުތައް ތަންފީޒު ކުރުމަށް ބައިނަލްއަޤްވާމީ ފަރާތްތަކުގެ އެހީ ހޯދުމަށް ސީ.ޓީ.ބީ.އާރު. އިން އެހީތެރިވެދޭނެއެވެ.
މިއެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވާހަކަފުޅު ދައްކަވަމުން، ދުނިޔެ ނުސާފުނުކޮށްވެސް ތަރައްޤީވެވިދާނެކަމުގެ މިސާލަކަށް ރާއްޖެ ހެދުމަށް ބޭނުންފުޅުވާ ކަމަށާއި، ތަރައްޤީވެ ކުރިއެރުމަށް ރާއްޖެވެސް އެދޭ ކަމަށާއި، އެހެންނަމަވެސް، ރާއްޖެއިން ބޭނުންވަނީ ފެހި ތަރައްޤީއެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބެންޖަމިން ރޮތްސްޗައިލްޑްގެ ދެކަނބަލުން، ރާއްޖޭ ކާބަން ނިއުޓްރަލްވުމަށް ނިންމި ނިންމުމަށް މަރުޙަބާ ވިދާޅުވެ، މި ނިންމުމުގެ ސަބަބުން އިޢާދަކުރަނިވި ހަކަތައިގެ ދާއިރާގައި ރާއްޖެ އިސްސަފުގައި ހިމެނިގެންދާނެ ކަމުގައި ވިދާޅުވިއެވެ.
