ރައީސުލްޖުމްހޫރިއްޔާ މުޙަންމަދު ނަޝީދު، އިންޑިޔާގެ ފޮރިން ސެކްރެޓަރީ މިސިޒް ނުރިޕަމާ ރާއޯ އާ ބައްދަލުކުރައްވައިފިއެވެ.
މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި، އިންޑިޔާއާއި ރާއްޖެއާ ދެމެދުގައިވާ ގާތްގުޅުމާއި، މި ގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން ވާހަކަފުޅު ދެއްކެވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މޫސުމަށް އަންނަ ބަދަލުތަކަކީ، ރާއްޖެއަށް ކުރިމަތިވެފައިވާ ވަރަށް ބޮޑު މައްސަލައެއް ކަމަށާއި، ކޯޕަންހޭގަން ސަމިޓުން އެކުލަވާލި އެއްބަސްވުމުގައި ޤައުމުތަކުން ސޮއިކުރުމަކީ، މިއެއްބަސްވުން ތަންފީޒުކުރުމަށް މުހިންމު ކަމެއް ކަމުގައި ވިދާޅުވިއެވެ. އަދި، މޫސުމަށް އަންނަ ބަދަލުތަކަށް ޙައްލު ހޯދުމުގައި އިންޑިޔާއިން އިސްދައުރެއް އަދާކުރެވިދާނެކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސް ނަޝީދުގެ ވާހަކަފުޅުގައި، ރާއްޖޭގެ ރަށްތަކާއި، ދިވެހި މަސްވެރިންގެ ސަލާމަތަކީ ސަރުކާރުން ވަރަށް ބޮޑު އަހަންމިއްޔަތުކަމެއް ދެއްވާ ކަމެއް ކަމަށާއި، މިކަމުގައިވެސް އަވަށްޓެރި އިންޑިޔާގެ އެހީތެރިކަން ވަރަށް ބޭނުންތެރި ކަމުގައި ވިދާޅުވިއެވެ.
މިސިޒް ނުރިޕަމާ ރާއޯ ދެއްކެވި ވާހަކަފުޅުގައި، އިންޑިޔާއިން ރާއްޖެއާމެދު ދެކެނީ ވަރަށް ގާތް ޤައުމެއްގެ ގޮތުގައި ކަމަށާއި، ރާއްޖޭގެ ތަރައްޤީއަށާއި ކުރިއެރުމަށް ވެދެއްވެން އޮތް ހުރިހާ އެހީއެއް އިންޑިޔާއިން ވެދޭނެ ކަމުގައި ވިދާޅުވިއެވެ. އަދި، ރާއްޖޭގެ އެކިއެކި ދާއިރާތަކަށް ބޭނުންވާ އިންސާނީ ވަސީލަތްތަކާއި އެހެނިހެން އެހީތައް ހޯއްދަވައިދެއްވުމަށް އިންޑިޔާއިން ކުރިއަށް އޮތްތާނގައިވެސް މަސައްކަތްކުރާނެ ކަމުގައި ވިދާޅުވިއެވެ.
