ރައީސުލްޖުމްހޫރިއްޔާ މުޙަންމަދު ނަޝީދު، އަބޫދާބީ، ބަޙްރައިން އަދި އިންޑިޔާއަށް ކުރެއްވި ދަތުރުފުޅުތައް ނިންމަވާލެއްވުމަށްފަހު، ރޭ މެންދަމުގެ ވަގުތެއްގައި މާލެ ވަޑައިގެންފއެވެ.
މިދަތުރުފުޅުގައި، އަބޫދާބީގައި ބޭއްވުނު [ވާރލްޑް ފިއުޗަރ އެނަރޖީ ސަމިޓް]ގައި ރައީސުލްޖުމްހޫރިއްޔާ ތަޤްރީރު ކުރެއްވިއެވެ. އަދި، ބަޙުރައިނަށް ވަޑައިގެން، އެޤައުމުގެ ރަސްގެފާނާއި، ސަރުކާރާއި، ވިޔަފާރި ކުންފުނިތަކުގެ ބައެއް އިސްވެރިންނާ ބައްދަލުކުރައްވައި ރާއްޖޭގެ ތަރައްޤީގެ މަޝްރޫޢުތަކަށް އިންވެސްޓްމަންޓާއި އެހީ ހޯއްދެވުމާ ގުޅޭގޮތުން ރައީސުލްޖުމްހޫރިއްޔާ މަޝްވަރާކުރެއްވިއެވެ.
ރައީސުލްޖުމްހޫރިއްޔާ އިންޑިޔާއަށް މިކުރެއްވި ދަތުރުފުޅުގައި، ކޮންފެޑަރޭޝަން އޮފް އިންޑިޔަން އިންޑަސްޓްރީޒުން އިންތިޒާމްކޮށްގެން ޗެންނާއީގައި ބޭއްވި [ޕާޓްނަރޝިޕް ސަމިޓް 2010]ގައި ވާހަކަފުޅު ދެއްކެވިއެވެ.
ސަރުކާރުގެ އިޤްތިޞާދީ ސިޔާސަތާއި ރާއްޖޭގައި ލިބެންހުރި އިންވެސްޓްމަންޓް ފުރުސަތުތައް، މި ވާހަކަފުޅުގައި އެމަނިކުފާނު ހާމަކުރެއްވިއެވެ. އަދި، މިދަތުރުފުޅުގައި އިންދިރާގާންދީ މެމޯރިއަލް ހޮސްޕިޓަލް ހިންގުން އިންޑިޔާގެ އެޕޯލޯ ހޮސްޕިޓަލް ގްރޫޕާ ހަވާލުކުރެއްވުމުގެ އެއްބަސްވުމުގައި ރާއްޖެއާއި އެ ހޮސްޕިޓަލާ ދެމެދު ސޮއި ކުރެއްވުމުގެ ރަސްމިއްޔާތުވެސް ބޭއްވެވިއެވެ.
