ރައީސުލްޖުމްހޫރިއްޔާ މުޙަންމަދު ނަޝީދު، އެމް.އެން.ޑީ.އެފް. ނޯދަން އޭރިއާ އިފްތިތާޙް ކޮށްދެއްވައިފިއެވެ. މިކަމަށްޓަކައި ފާދިއްޕޮޅު ނައިފަރުގައި މިއަދު ހަވީރު އޮތް ރަސްމިއްޔާތުގައި، ނޯދަން އޭރިއާ އިފްތިތާޙް ކޮށްދެއްވަމުން ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި ސަރުކާރުގެ އެންމެހާ ސިޔާސަތުތަކާއި، މި ސަރުކާރުން ތަންފީޒު ކުރައްވަމުން ގެންދަވާ އެންމެހާ މަޝްރޫޢުތަކާއި، އެންމެހާ ކަންކަން ހިންގަވަމުން ގެންދަވާއިރު، މިކަންކަމަކީ، ވީ އެންމެ ފުރިހަމައަށް ރައްޔިތުންނާ ގާތުން ހިންގޭ ކަންކަންކަމަށް ހެއްދެވުމަށް މަސައްކަތްޕުޅު ކުރެއްވުމަކީ، ސަރުކާރުގެ ވާޖިބެއް ކަމުގައި ވިދާޅުވިއެވެ. އަދި ރާއްޖޭގެ ކަނޑުގެ ސަރަޙައްދު ރަނގަޅަށް ބަލަހައްޓައިގެން ރައްޔިތުންނަށް އެކަމުގެ ފައިދާ ހޯއްދަވައިދެއްވުމަކީވެސް، ސަރުކާރުގެ ވާޖިބެއް ކަމަށާއި، މި ސަރުކާރު ދެމިއޮންނަނީ ރައްޔިތުންނަށް ޚިދްމަތް ކުރުމަށް ކަމުގައި ވިދާޅުވިއެވެ. އަދި އަބަދުވެސް މަސައްކަތް ކުރައްވަމުން ގެންދަވާނީ އެކުރައްވާ ކަމަކުން ރައްޔިތުންނަށް ލާބައާއި މަންފާ ހޯއްދަވައިދެއްވުމަށް ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސަރަޙައްދު ބެލެހެއްޓުމުގައި ނޯދަން އޭރިޔާ ހެޑްކްއާޓަރޒުން މުހިންމު ދައުރެއް އަދާކުރައްވާނެ ކަމަށް ޔަޤީން ކުރައްވާކަމަށްވެސް ވިދާޅުވިއެވެ. އަދި ރާއްޖެއަށް ދިމާވާ އެކި ކަންތައްތަކާއި ނުރައްކާތެރި ކާރިސާތަކުން ރާއްޖެއާއި ރާއްޖޭގެ ރައްޔިތުން ސަލާމަތް ކުރެއްވުމަށް އެމް.އެން.ޑީ.އެފް.އިން ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި ރައީސުލްޖުމްހޫރިއްޔާ ޝުކުރުއަދާކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސަރުކާރުގެ ބޭނުންފުޅަކީ، މުޅިން އެހެން ނައިފަރެއް، ވަރަށް ތަރައްޤީވެފައވާ ނައިފަރެއް ހޯއްދަވައިދެއްވުން ކަމަށާއި، އެކަން ޙަޤީޤަތަކަށް ހެއްދެވުމަށް ސަރުކާރުންވަނީ މައިގަނޑު ވަޢުދުތަކެއް ވެވަޑައިގެންފައި ކަމަށް ވިދާޅުވިއެވެ. މި ރޮނގުން ވާހަކަފުޅު ދައްކަވަމުން، މިކަމުގެ ޢަމަލީ މަސައްކަތްތައް ނައިފަރުން ފެނިގެންދާނެ ކަމަށް ވިދާޅުވެ، ގެދޮރު އެޅުމުގެ މަޝްރޫޢުގެ ޢަމަލީ މަސައްކަތް މިފެށޭ 2010 ވަނަ އަހަރުގެ ތެރޭގައި ފެށިގެންދާނެކަން އެމަނިކުފާނު ހާމަކުރެއްވިއެވެ.
މިރަސްމިއްޔާތަށް ރައީސުލްޖުމްހޫރިއްޔާ ނައިފަރު ސްޓޭޑިއަމަށް ވަޑައިގަތުމުން، އެމަނިކުފާނާ އިސްތިޤްބާލް ކުރެއްވީ، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އަމީން ފައިޞަލާއި، ޗީފް އޮފް ޑިފެންސް ފޯސް މޭޖަރ ޖެނެރަލް މޫސާ ޢަލީ ޖަލީލާއި، އެމް.އެން.ޑީ.އެފް. ނޯދަން އޭރިއާގެ ކޮމާންޑަރ ބްރިގޭޑިއަރ ޖެނެރަލް އަޙްމަދު މުޙަންމަދެވެ. ރައީސުލްޖުމްހޫރިއްޔާ ކުރުނީސް އަށްޓަށް އަރާވަޑައިގަތުމާއެކު ލަޝްކަރު ރިޔާސީ ކުރުނީހެއް އެރުވިއެވެ. އަދި ސިފައިންގެ ބޭންޑުގައި ޤައުމީ ސަލާން ކުޅުނެވެ. އަދި ރައީސުލްޖުމްހޫރިއްޔާ ސިފައިންގެ ދިދަ، ނޯދަން އޭރިޔާގެ ކޮމާންޑަރު ބްރިގޭޑިއަރ ޖެނެރަލް އަހްމަދު މުޙަންމަދާ ހަވާލުކުރެއްވުން އޮތެވެ.
މި ރަސްމިއްޔާތުގެ ކުރިން ރައީސުލްޖުމްހޫރިއްޔާ ފާދިއްޕޮޅު މަޑިވަރަށް ވަޑައިގެން، އެމް.އެން.ޑީއެފް ނޯދަން އޭރިޔާގެ ހެޑްކްއާޓަރޒްގެ ނަންބޯޑު ކަޝްފު ކޮށްދެއްވައި، ނޯދަން އޭރިޔާގައި ޤާއިމުކުރެވޭ ރެސްކިޔު ކޯޑިނޭޝަން ސެންޓަރުގެ މަސައްކަތްތައް ރަސްމީކޮށް ފަށްޓަވައިދެއްވިއެވެ. އެ ސެންޓަރުގެ މަސައްކަތް ރަސްމީ ގޮތުން ފެށުނީ، ރައީސުލްޖުމްހޫރިއްޔާ ފޯން މެދުވެރިކުރައްވައި އެމް.އެން.ޑީ.އެފް ހއ. އުލިގަމު ޕޯސްޓުގައި ހުންނެވި ކުޅުދުއްފުށީ ޕޯސްޓުގެ އޮފިސަރ އިން ޗާޖް ލެފްޓެނަންޓް އިބްރާހީމް ޢާޒިމާ ވާހަކަފުޅު ދައްކަވާލެއްވުމުންނެވެ.
ރައީސުލްޖުމްހޫރިއްޔާ މުޙަންމަދު ނަޝީދު، ފާދިއްޕޮޅުގެ ބައެއް ރަށްރަށަށް ކުރައްވާ ދަތުރުފުޅު ފެށްޓެވީ މިއަދު މެންދުރުފަހުއެވެ. އެމަނިކުފާނުގެ މި ދަތުރުފުޅުގައި ހިންނަވަރު ބިން ހިއްކުމުގެ މަޝްރޫޢު ފަށްޓަވައިދެއްވާނެއެވެ. މިކަން އޮންނާނީ މާދަމާ ހެނދުނުއެވެ.
