ޑޮލަރުން ބޮންޑް ވިއްކުމުން، ސަރުކާރުން އަމިއްލަ ފަރާތްތަކަށް އަދި އަމިއްލަ ބޭންކުތަކަށް ޑޮލަރު ދޫކުރެވޭ މިންވަރު އިތުރުވާނެ ކަމަށާއި، އިރާދަކުރެއްވިއްޔާ ޑޮލަރުގެ ތާށިކަމަށް މިކަމުން ލުޔެއް ލިބިގެންދާނެ ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ އަޑު މެދުވެރިކުރައްވައި، އެމަނިކުފާނު މިއަދު ހެނދުނު 10 ޖެހިއިރު ދެއްވި ހަފްތާ ރޭޑިޔޯ ޚިޠާބުގައި، ޔޫ.އެސް.ޑޮލަރުން ޓްރެޜަރީ ބޮންޑް ވިއްކަން ފެށުމާ ގުޅިގެން، އެކަމުން ރާއްޖޭގެ މާލިއްޔަތަށް ކުރާނެ ފައިދާތަކުގެ މައްޗަށް ބައްލަވާލައްވަމުންނެވެ.
ރައީސުލްޖުމްހޫރިއްޔާގެ ރޭޑިޔޯ ޚިޠާބުގައި، ބޮންޑް ވިއްކުމުން، ނުވަތަ މިގޮތުން ދިވެހި ދައުލަތަށް، ޓްރެޜަރީއަށް ފައިސާ ހޯދުމުން، ރާއްޖޭގެ އިޤްތިޞާދަށާއި މާލިއްޔަތަށް ކިތަންމެ ރަނގަޅު އަސަރުތަކެއް ކުރާނެކަމަށް ދެކެވަޑައިގަންނަވާ ކަމުގައި ވިދާޅުވިއެވެ. މީގެކުރީގައި ސަރުކާރަށް ބޭނުންވާ ވަރަށް ފައިސާ ނުލިބުނީމާ، ސަރުކާރުން އެފައިސާ އެމް.އެމް.އޭ.އިން ދަރަންޏަށް ނަންގަވަމުން ގެންދެވި ކަމަށާއސަރުކާރުން އެމް.އެމް.އޭ.އިން ފައިސާ ނަންގަވާ ކޮންމެފަހަރަކުމެ ރާއްޖޭގައި ދައުރުވާ ފައިސާގެ އަދަދު އިތުރުވާ ކަމުގައި ވިދާޅުވިއެވެ، އިޤްތިޞާދުގެ ތެރޭގައި ފައިސާ ދައުރުވާ އަދަދު އިތުރުވީމާ، އެ ފައިސާއާ ގުޅިގެން ދެން ގުޅިފައި ހުންނަ އެހެން ބޭރުފައިސާތަކުގެ އަގު މައްޗަށް އަރައިގެންދާ ކަމަށާއި، ޑޮލަރުގެ ދަތިކަން އަޅުގަނޑުމެންނަށް ވަރަށްބޮޑަށް އިޙްސާސްކުރަން ޖެހެނީ ކަމުގައި ވިދާޅުވިއެވެ.
ޑޮލަރުން ބޮންޑު ވިއްކުމުން، ސަރުކާރަށް މި ލިބޭ އެންމެބޮޑު އެއް ރަނގަޅަކީ، ސަރުކާރުގެ ރިޒަރވްގައިވެސް އަދި ފިނޭންސް މިނިސްޓްރީގައިވެސް އެ މުއްދަތަށް އެ ޑޮލަރު ހުރުންކަން ރައީސުލްޖުމްހޫރިއްޔާ ބަޔާންކުރެއްވިއެވެ. ހަމައެހެންމެ، ތަކެތީގެ އަގު އުފުލިގެންދާ މިންވަރު ހުރީވެސް، އެ އިޤްތިޞާދެއްގެ ތެރޭގައި ފައިސާ ދައުރުވާ މިންވަރާ ގުޅިފައި ކަމަށާއި، ބޮންޑް ވިއްކައިގެން ސަރުކާރުގެ ދަރަނި ފޫބެއްދުމަށް ފައިސާ ހޯދުމުން، ޙަޤީޤަތުގައި ސަރުކާރު ދަރަނިވެރިވީކަމުގައި ވިޔަސްވެސް، އޭގެސަބަބުން ޚިދްމަތާއި ތަކެތީގެ އަގު އުފުލިގެންދާ މިންވަރު ހިފެހެއްޓޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ރޭޑިޔޯ ޚިޠާބުގައި، ސަރުކާރުން މިފަހަރު ހުށަހަޅުއްވާފައިވާ ބަޖެޓުގެ އެންމެ ބޮޑު އެއް އަމާޒަކީ، މުދަލާއި ޚިދްމަތުގެ އަގު ތިރިކުރެއްވުން ކަމަށާއި، ސަރުކާރުގެ ސިޔާސަތަކީ، ރާއްޖޭގެ ރައްޔިތުންގެ ޖީބަށް ވަންނަ ފައިސާގެ އަގު ހިފަހައްޓަވައި ދެއްވުން ކަމުގައި ވިދާޅުވިއެވެ. "ޙަޤީޤީ ތަރައްޤީއަކީ، އަޅުގަނޑުމެންގެ ރާއްޖޭގެ އާންމު ރައްޔިތުންގެ ޖީބަށް ވަންނަ ފައިސާ އަދަދު އިތުރުވުން ނުވަތަ ޖީބުގައިހުރި ފައިސާގެ އަދަދު އުފުލިގެންދިޔުން. އެ ފައިސާއިން ކުރެވޭ ހޭދަ އިތުރުވުން. ފައިސާއިން ކުރެވޭ ހޭދަ އިތުރުކުރެވެން މިއަންނަނީ، އިންފްލޭޝަން ނުވަތަ ތަކެތީގެ އަގު އުފުލޭ މިންވަރު ކޮންޓްރޯލް ކުރެވިގެން. އެކަން ކޮންޓްރޯލް ކުރުމަށްޓަކައި، ސަރުކާރުގެ ޚަރަދު އެބަ ކުޑަކުރާންޖެހޭ." ރައީސުލްޖުމްހޫރިއްޔާ ވިދާޅުވިއެވެ. އަދި ޓްރެޜަރީ ބޮންޑް ވިއްކަންފެށުމާ ގުޅިގެން، ރާއްޖޭގެ މާލިއްޔަތަށާއި އިޤްތިޞާދަށް ހަމަޖެހުން އަންނާނެ ކަމަށާއި، އިރާދަކުރެއްވިއްޔާ، ކުރިއަށްއޮތްތަނުގައި ޑޮލަރުގެ ދަތިކަން ފިލައިދިޔުމަށް، މި ފިޔަވަޅުން އެހީތެރިކަމެއް ލިބޭނެ ކަމުގައި އެމަނިކުފާނު ވިދާޅުވިއެވެ.
