ނައިބު ރައީސް ޑޮކްޓަރ މުޙަންމަދު ވަޙީދު، ލީބިޔާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، އިބްރާހީމް އިލް ޢާބިދު މުޚްތާރު ހެނޭތިޝާއި، ރާބިޠަތުލް ޢާލަމިލް އިސްލާމިއްޔާގެ ޑިރެކްޓަރ ޖެނެރަލް އަބޫ މުޙަންމަދު އަސީނާ މިއަދު ބައްދަލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު މެންދުރުފަހު ވަކިވަކިން ބޭއްވެވި މިދެ ބައްދަލުކުރެއްވުމުގައި މިދެބޭފުޅުންނަށް ނައިބު ރައީސް ވަރަށް ހޫނު މަރުޙަބާއެއް ވިދާޅުވިއެވެ. އަދި، ދިވެހިރާއްޖެއަށް ލީބިޔާ ސަރުކާރުންނާއި، ރާބިޠަތުލް ޢާލަމިލް އިސްލާމިއްޔާއިން ވެދެއްވަމުން ގެންދަވާ އެހީތަކަށްޓަކައި އެބޭފުޅުންނަށް ނައިބު ރައީސް ޝުކުރު އަދާކުރެއްވިއެވެ.
ލީބިޔާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، މިސްޓަރ އިބްރާހީމް އިލް ޢާބިދު މުޚްތާރު ހެނޭތިޝާއެކު ނައިބު ރައީސް ބޭއްވެވި ބައްދަލުކުރެއްވުމުގައި، ލީބިޔާއާއި ރާއްޖެއާ ދެޤައުމުގެ ދެމެދު އުފެދިފައިވާ ގާތް ގުޅުން އިތުރަށް ބަދަހިކުރެއްވިދާނެ ގޮތްތަކާމެދު ދެބޭފުޅުން މަޝްވަރާކުރެއްވިއެވެ. މިގޮތުން، ވިޔަފާރީގެ ދާއިރާގައި ދެޤައުމުގެ ގުޅުން ބަދަހިކުރެއްވުމާ ބެހޭގޮތުންނާއި، ލީބިޔާގެ ކުންފުނިތަކުގެ އިންވެސްޓްމަންޓްތައް ރާއްޖޭގައި އިތުރުކުރުމާ ބެހޭގޮތުން ދެބޭފުޅުން މަޝްވަރާކުރެއްވިއެވެ.
ރާބިޠަތުލް ޢާލަމިލް އިސްލާމިއްޔާގެ ޑިރެކްޓަރ ޖެނެރަލް އަބޫ މުޙަންމަދު އަސީނާއާއެކު ބޭއްވެވި ބައްދަލުކުރެއްވުމުގައި ނައިބު ރައީސް ވާހަކަފުޅުދައްކަވަމުން، ރާބިޠާއަކީ ރާއްޖޭގައި އިސްލާމްދީން ކުރިއެރުވުމަށް ވަރަށް ބޮޑު އެހީތެރިކަމެއް ދެއްވާ ޖަމްޢިއްޔާއެއްކަން ފާހަގަކުރެއްވިއެވެ.
ރާބިޠަތުލް ޢާލަމިލް އިސްލާމިއްޔާގެ ޑިރެކްޓަރ ޖެނެރަލް އަބޫ މުޙަންމަދު އަސީން ދެއްކެވި ވާހަކަފުޅުގައި، ރާއްޖޭގެ އިތުރު މިސްކިތްތައް ތަރައްޤީ ކުރުމަށާއި، ކީރިތި ޤުރުއާނާބެހޭ ޢިލްމް ކުރިއެރުވުމަށް ރާބިޠާއިން އެހީތެރިކަން ފޯރުއްވައިދެއްވާނެ ކަމުގައި ވިދާޅުވިއެވެ.
