ޤައުމީ އިނާމަށް ނަން ހުށަހެޅުއްވުމަށް ހުޅުވާލި ފުރްޞަތުގައި ވަރަށްބޮޑު ތަރުޙީބެއް ލިބިވަޑައިގެންފައިވާ ކަމުގައި ޤައުމީ އިނާމާބެހޭ ކޮމިޓީއިން މިއަދު ހާމަކުރައްވައިފިއެވެ. ނަން ހުށަހެޅުއްވުމުގެ މުއްދަތު ހަމަވިއިރު އިނާމަށް އެދި 373 ފަރާތުން ނަން ވަނީ ހުށަހަޅުއްވާފައެވެ. ޤައުމީ އިނާމަށް ނަން ހުށަހެޅުއްވުމަށް ފުރްޞަތު ހުޅުއްވާލެއްވީ، މިދިޔަ އޯގަސްޓް މަހުގެ 16 ވަނަ ދުވަހުއެވެ. މުއްދަތު ހަމަވީ، މިމަހުގެ 15 ވަނަ ދުވަހުގެ މެންދުރު 1.00 އަށެވެ.
ޤައުމީ އިނާމު ދެއްވާނީ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ. މިއަހަރު ޤައުމީ އިނާމު ލިބޭނެ ފަރާތްތައް ހޮއްވެވުމުގެ މަސައްކަތް، ޤައުމީ އިނާމާބެހޭ ކޮމިޓީއިން މިހާރުވަނީ ފަށްޓަވާފައެވެ.
