ޑިމޮކްރަސީގެ އުޞޫލުތަކަށް ތަބާވެގެން، ޤައުމުގެ ހެވާއި ލާބަ ކުރިއަށް ނެރުއްވައިގެން، ހުރިހާ ފަރާތްތަކަކުންވެސް މަސައްކަތް ކުރެއްވުމަށް ނައިބު ރައީސް ޑޮކްޓަރ މުޙަންމަދު ވަޙީދު ޙަސަން މަނިކު ގޮވާލައްވައިފިއެވެ. ނައިބު ރައީސް ޑޮކްޓަރ މުޙަންމަދު ވަޙީދު މިކަމަށް ގޮވާލެއްވީ، މިއަދަކީ ބައިނަލްއަޤްވާމީ ޑިމޮކްރަސީ ދުވަސް ކަމަށްވުމާއެކު، ޚަބަރުފަތުރާ ވަސީލަތްތަކާ ބައްދަލުކުރައްވައި، މި މުނާސަބަތުގައި އެމަނިކުފާނު މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި ދެއްވި ބަޔާނެއްގައެވެ.
ނައިބު ރައީސް ވިދާޅުވިގޮތުގައި، ޑިމޮކްރަސީއަކީ ކުޅިބަލާ މީހުންގެ ކުޅިވަރެއް ނޫނެވެ. ޑިމޮކްރަސީއަކީ ދިގު މުއްދަތެއްގައި ކެތްތެރިކަމާއެކު ހިނގަންޖެހޭ މަގެކެވެ. މި ރާސްތާގައި އަޅުގަނޑުމެންނާއެކު ދަތުރުކުރާ ހުރިހާ ދަތުރުވެރިންނަކީ، އަޅުގަނޑުމެންގެ އަޚުންނާއި އުޚުތުންނެވެ. އެހެންކަމުން، އެންމެންގެ ހެވާއި ލާބައަށްޓަކައި އިޙްތިރާމާއި އެކުވެރިކަން އޮތުމަކީ މުހިންމު ކަމެކެވެ.
ނައިބު ރައީސްގެ ބަޔާނުގައި ސިޔާސީ ޕާޓީތައް ވަރުގަދަވެ ހަރުދަނާވުމަކީ، ޑިމޮކްރަސީ ވަރުގަދަ ކުރުމަށް އޮތް މުހިންމު ޝަރުޠެއްކަން ބަޔާންކުރައްވަމުން، ސިޔާސީ ޕާޓީތަކަށް ކުރިމަތިވެފައިވާ ބައެއް ގޮންޖެހުންތަކާމެދު މިއަދު އަޅުގަނޑުމެން ވިސްނާލަންޖެހޭ ކަމުގައި ވިދާޅުވިއެވެ. ހަމައެއާއެކު، މިނިވަން ނޫސްވެރިކަމެއްގެ މުހިންމުކަންވެސް ވަރަށްބޮޑުކަން އެމަނިކުފާނު ބަޔާން ކުރެއްވިއެވެ.
ޤާނޫނުއަސާސީ ދީފައިވާ ޑިމޮކްރެޓިކް ޙައްޤުތައް ދެމެހެއްޓޭނީ، ޤާނޫނީ ހަމަ ޤާއިމު ކުރުމުގައި ޢަދުލު އިންޞާފުގެ މުއައްސަސާތައް މިނިވަންކަމާއެކު އެއްފަރާތަކަށްނުޖެހި ރަނގަޅަށް ހިންގިގެން ކަމުގައި ނައިބު ރައީސް ވިދާޅުވިއެވެ. މިރޮނގުން ވާހަކަފުޅު ދައްކަވަމުން، ޑިމޮކްރަސީ ހަރުދަނާ ކުރުމުގައި އެންމެ މުހިންމު ބައެއް އަދާކުރަނީ، ރައްޔިތުންގެ މަޖިލީހުންކަން އެމަނިކުފާނު ފާހަގަކުރެއްވިއެވެ. ހެޔޮވެރިކަމެއް ޤާއިމު ކުރުމަށްޓަކައި ޤާނޫނުއަސާސީއާ އެއްގޮތަށް ޤާނޫނުތައް އިޞްލާޙު ކުރުމުގެ މަސައްކަތަކީ ވަރަށްބޮޑު މަސައްކަތެއް ކަމުގައި ވިދާޅުވިއެވެ. އަދި ޤައުމީ މައްސަލަތަކުގައި ޤައުމުގެ މަޞްލަޙަތު އިސްކުރައްވައި، ޕާޓީތަކުގެ ހަނި ބޭނުންތަކަށް ނުބައްލަވައި، ޤާނޫނުތައް ނިންމަވަމުން ގެންދެވުމަށް ނައިބު ރައީސް އެދިވަޑައިގެންނެވިއެވެ.
ނައިބު ރައީސް ޑޮކްޓަރ ވަޙީދުގެ ވާހަކަފުޅުގައި، އަޅުގަނޑުމެން ދިވެހިރާއްޖޭގެ ވެރިކަމަށް ބޮޑެތި ބަދަލުތަކެއް ގެނައީ، ހަމައެކަނި ވެރިކަންކުރާ މީހުންގެ މޫނުތައް ބަދަލުކޮށްލުމަށް ނޫން ކަމަށާއި، މިބަދަލު ގެނައީ، ރައްޔިތުންގެ ވެރިކަމެއް އުފެއްދުމަށާއި، ރައްޔިތުންގެ ހުރިހާ އެންމެންނަށް ފައިދާވާ ގޮތަކަށް ޤައުމުގެ އިޤްތިޞާދީ އަދި އިޖްތިމާޢީ ކަންކަން ރާވައިގެން ހިންގުމަށް ކަމުގައި ވިދާޅުވިއެވެ. ނައިބު ރައީސް ވިދާޅުވިގޮތުގައި، ރައްޔިތުންގެ މެދުގައި ބޮޑެތި ތަފާތުތައް އުފައްދާފައިވާ ނިޒާމަކަށް ދެން އަޅުގަނޑުމެން އަނބުރައެއް ނުދާނަމެވެ. ވެރިކަމުގެ ދާއިރާގައި ޚުދު މުޚުތާރު ގޮތްތަކެއް އަޅުގަނޑުމެން ގަބޫލެއް ނުކުރާނަމެވެ. ރައްޔިތުން، ވެރިކަމުގެ ދާއިރާއިން އެކަހެރި ކުރެވިފައިވާ ގޮތަކަށް ވެރިކަމެއް ނުކުރާނަމެވެ.
