މިހާރު ރާއްޖެ ވަޑައިގެން އުޅުއްވާ އިންޑިއާގެ ނޭޝަނަލް ސެކިއުރިޓީ އެޑްވައިޒަރ މިސްޓަރ އެމް.ކޭ.ނަރަޔާނަން، ރައީސުލްޖުމްހޫރިއްޔާ މުޙަންމަދު ނަޝީދާ ބައްދަލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި މިބައްދަލުކުރެއްވުމުގައި ދިވެހިރާއްޖެއާއި އިންޑިއާއާ ދެޤައުމުގެ ދެމެދުގައިވާ ގުޅުން މިހާރަށްވުރެ ބޮޑަށް ބަދަހިކުރެއްވުމަށާއި ޚާއްޞަކޮށް ދިފާޢީ އަދި ސަލާމަތީ ކަންކަމާބެހޭ ދާއިރާގައި ގުޅުން ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
ނޭޝަނަލް ސެކިއުރިޓީ އެޑްވައިޒަރ މިސްޓަރ އެމް.ކޭ.ނަރަޔާނަންއާއި އޭނާގެ އަރިހުގައި ވަޑައިގެން އުޅުއްވާ މަތީ ފެންވަރުގެ ވަފްދުގެ ބޭފުޅުންގެ ޝަރަފުގައި ރައީސުލްޖުމްހޫރިއްޔާ ދެއްވި ރޭގަނޑުގެ ފަރިއްކޮޅެއް އާރަށުގައި ރޭ އޮތެވެ. މި ފަރިއްކޮޅުގައި މިނިސްޓަރުންނާއި، ސަރުކާރުގެ އިސް ބައެއް ބޭފުޅުންނާއި، އިންޑިއާ ސަރުކާރުން ރާއްޖެ ކަނޑައަޅުއްވާފައި ހުންނަވާ ސަފީރު ބައިވެރިވެވަޑައިގެންނެވިއެވެ.
