ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މާޅޮސްމަޑުލު އުތުރުބުރީ އިފުރު އެއަރޕޯޓް، މިއަދު ހެނދުނު ރަސްމީކޮށް ހުޅުއްވައިދެއްވައިފިއެވެ. އިފުރު އެއަރޕޯޓް ހުޅުވިގެންދިޔައީ، އެއަރޕޯޓްގެ ނަންބޯޑުގެ ފަރުދާ ރައީސުލްޖުމްހޫރިއްޔާ ކައްސަވާލަދެއްވުމުންނެވެ.
އިފުރު އެއަރޕޯޓް ހުޅުއްވައިދެއްވުމަށް ބޭއްވެވި ރަސްމިއްޔާތުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އިފުރު އެއަރޕޯޓް ހުޅުވިގެންދިޔުމާއެކީ، ރ. އަތޮޅަށް އިތުރު އާރޯކަމެއް އަންނާނެކަން ޔަޤީންކުރައްވާކަމުގައި ވިދާޅުވިއެވެ. އަދި، ރ. އަތޮޅަކީ ރާއްޖޭގެ ނިސްބަތުން އާބާދީގެ ތިންވަނަ އަތޮޅުކަން ފާހަގަކުރައްވަމުން، އެއަތޮޅަކީ އެއްވެސް ގޮތެއްގައި ސަރުކާރުގެ ވިސްނުމުގެ ޗާޓުން އުނިވެގެންދާނެ އަތޮޅެއް ނޫން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ޒުވާނުންގެ އަތްމަތި ތަނަވަސްކުރުމާއި، ގެދޮރުވެރިކަން އިތުރުކޮށްދިނުމާއި އަދި ޒުވާނުންނަށް ވަޒީފާގެ ފުރްޞަތުތައް އިތުރުކޮށްދެއްވުމަކީ މިސަރުކާރުގެ އެންމެ އިސް އެއް އަމާޒުކަމުގައި ރައީސުލްޖުމްހޫރިއްޔާގެ ވާހަކަފުޅުގައި ބަޔާންކުރެއްވިއެވެ. މިގޮތުން، މިސަރުކާރުގެ ދައުރު ނިމިގެންދާއިރު، އިފުރު އެއަރޕޯޓާއި، އިފުރު އިންވެސްޓްމަންޓުގެ ފަރާތުން ބިނާކުރާ ސިޓީހޮޓަލުގެ އިތުރުން، ސަރުކާރުން ރ. އަތޮޅުގައި ހަދަން ރާއްވަވާފައިވާ ފަނަރަވަރަކަށް ރިޒޯޓުން، ރާއްޖޭގެ އެހެން އެއްވެސް އަތޮޅެއްގައި ނެތްވަރަށް ވަޒީފާގެ ފުރްޞަތުތައް ރ.އަތޮޅުގައި އިތުރުވެގެންދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
މިމޭރުމުން ރައީސުލްޖުމްހޫރިއްޔާގެ ވާހަކަފުޅު ކުރިއަށްގެންދަވަމުން، ރާއްޖޭގެ އިޤްތިޞާދުގެ މައި ބަދަޔަކީ ޓުއަރިޒަމް ކަމުގައި ވިދާޅުވެ، ޤައުމުގެ ޒުވާނުންނަށް ވަޒީފާ ލިބޭނެ ހުރިހާ ފުރްޞަތެއް ސީދާކޮށް ނުވަތަ ނުސީދާކޮށް ގުޅިފައިވަނީ ޓުއަރިޒަމްގެ ޞިނާޢަތާކަން ފާހަގަކުރެއްވިއެވެ. މިގޮތުން ޓުއަރިޒަމްގެ ދާއިރާ އިތުރަށް ތަރައްޤީކުރުމަށްޓަކައި ސަރުކާރުން މިހާރު ކުރައްވަމުން ގެންދަވާ މަސައްކަތްޕުޅުތަކުގެ ތެރޭގައި، ޓުއަރިޒަމްގެ ތަފާތު ޕްރޮޑަކްޓްތަކެއް ރާއްޖޭގެ މި ޞިނާޢަތަށް ތަޢާރުފް ކުރުމަށް އިޢުލާނު ކުރެވި، މެދުފަންތީގެ ކުދި ވިޔަފާރިވެރިންނަށް ވެސް ޓުއަރިޒަމް ޞިނާޢަތުގައި ބައިވެރިވެވޭނެ ގޮތްތަކެއް ހޯދައިދިނުމުގެ އިތުރުން، ޓުއަރިޒަމްގެ ދާއިރާގެ މިހާރު ނުހިނގާހުރި ރަށްރަށް ނެގުމަށް ނިންމަވާފައިވާ ކަމުގައިވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގެ އެތެރޭގެ ވައިގެ ދަތުރުފަތުރުގެ ނިޒާމް ތަރައްޤީކުރެއްވުމަށް އައިލެންޑް އޭވިއޭޝަނުން ކުރައްވާފައިވާ ބުރަ މަސައްކަތްތަކުގެ މައްޗަށް އަލިއަޅުއްވައިލައްވަމުން، އެކުންފުންޏަކީ ހަމައެކަނި އިޤްތިޞާދީ ފައިދާހޯދުމުގެ އިތުރުން އިޖްތިމާޢީ ޒިންމާތަކެއްވެސް އަދާކުރާ ކުންފުންޏެއްކަމުގައި ފާހަގަކުރެއްވިއެވެ. މިގޮތުން، ބަލިމީހުން އުފުލުމާއި، އަތްފޯރާފަށުގައި ޓިކެޓްގެ އަގު ބަހައްޓައިގެން ދަތުރުފަތުރުކޮށްދިނުމާއި، ރައްޔިތުން އެއްތަނުން އަނެއް ތަނަށް އުފުލައިދިނުމާއި، މާލެއާއި ރާއްޖޭގެ އެކި ހިސާބުތައް ގުޅުވާލަދިނުން އެއީ އައިލެންޑް އޭވިއޭޝަނުން ރައްޔިތުންނަށްޓަކައި އަދާކުރާ އިޚްލާޞްތެރި ޒިންމާތަކެއްކަމުގައި އެމަނިކުފާނު ވިދާޅުވިއެވެ. މީގެއިތުރަށް، ސަރުކާރުގެ ފަރާތުން އައިލެންޑް އޭވިއޭޝަނަށް ދޭންވާ ހުރިހާ ސަޕޯޓެއްދީގެން، އެތެރޭގެ ވައިގެ ދަތުރުފަތުރުގެ ނިޒާމް، ވަރުގަދަ ސެކްޓަރަކަށް ހަދަން މަސައްކަތްކުރައްވާނެކަމުގައިވެސް ރައީސުލްޖުމްހޫރިއްޔާ ބަޔާންކުރެއްވިއެވެ.
"އައިލެންޑް އޭވިއޭޝަނުން މިއަދު ކުރަންޖެހޭ ކަމަކީ، އައިލެންޑް އޭވިއޭޝަންގެ ފިޔަތައް މިއަށްވުރެ ފުޅާކުރަންވީ. އުދުހުން މިއަށްވުރެ ހަލުއިކުރަންވީ. މިއަށްވުރެ ދުރު ރާސްތާތަކަށް ދަތުރުކުރަންވީ." ރައީސުލްޖުމްހޫރިއްޔާ އިތުރަށް ވިދާޅުވިއެވެ.
މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، 2012 ވަނަ އަހަރު އަނިޔާވެރިގޮތަކަށް މަރާލެވުނު ރައްޔިތުންގެ މަޖިލީހުގެ މެމްބަރު ޑރ. އަފްރާޝީމް ޢަލީގެ ހަނދާނުގައި، އެމަނިކުފާނުގެ ޛިކުރާ އާކުރުމުގެ ގޮތުން، ރ. އުންގޫފާރުގައި އިސްލާމީ މަރްކަޒެއް ބިނާކުރުމަށް ސަރުކާރުން ނިންމަވާފައިވާކަމުގައި ޢިއުލާނުކުރެއްވިއެވެ.
އިފުރު އެއަރޕޯޓު ހުޅުއްވައިދެއްވުމަށް މިއަދު ބޭއްވުނު ރަސްމިޔއްޔާތުގައި، ރ. އަތޮޅު ކައުންސިލްގެ ފަރާތުން ރައީސުލްޖުމްހޫރިއްޔާއަށް ޚާއްޞަ ހަނދާނީ ފިލައެއް އެރުވިއެވެ.
