މުޅި ދިވެހި ދައުލަތުގެ ޝަރަފާއި ޢިއްޒަތާއި، އަބުރާއި ކަރާމާތް ދެމިއޮންނަނީ ދިވެހި ޢަސްކަރިއްޔާއިން ކުރާ ހިތްވަރެއްގެ މައްޗަށް ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، މޯލްޑިވްސް ނޭޝަނަލް ޑިފެންސް ފޯސްގެ ޑިފެންސް އިންސްޓިޓިއުޓް ފޮރ ޓްރޭނިންގ އެންޑް އެޑިޔުކޭޝަންގެ ފަރާތުން ހިންގި 61 ވަނަ އަސާސީ ތަމްރީން ކޯހުގެ ބައިވެރިން، ސިފައިންގެ ހުވާ ކުރުމާއި ބަޑި ހަވާލުކުރުމަށްޓަކައި މިއަދު ހެނދުނު ބަންޑާރަކޮށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި އަލަށް ހުވާކުރި ސިފައިންނާއި މުޚާތަބުކޮށް ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އަސްކަރިއްޔާއަށް ޚިދުމަތްކުރުމަށްވުރެ މަތިވެރި ވަރުގަދަ މަސައްކަތެއް، ޤުރްބާނީއެއް ނުވަތަ ޝަރަފްވެރި މަޤާމެއްވެސް ދިވެހި ދައުލަތަކު ނޯންނާނެ ކަމުގައި ފާހަގަކުރެއްވިއެވެ. އަދި ސިފައިންގެ ޚިދުމަތާ ގުޅެނީ، ދިވެހި ދައުލަތް ދިފާޢުކުރުމަށާއި، ޙިމާޔަތް ކުރުމަށާއި، އިސްލާމްދީން ނެގެހެއްޓުމަށާއި، ދިވެހިރާއްޖޭގެ ޤާނޫނުއަސާސީ ދެމެހެއްޓުމުގެ އިތުރުން، ޤާނޫނީ ސަރުކާރަށް ރައްކާތެރިކަން ދިނުމަށް ކަމުގައި ބަޔާންކުރެއްވިއެވެ. މީގެއިތުރުން، ބޭރުން އަތުވެދާނެ އެއްވެސް ނުފޫޒެއްގެ ސަބަބުން ހިތްތަކާއި ނަފްސުތައް ހަލާކުވެދިޔުމަށް ޖާގަ ނުދިނުމަށް ރައީސުލްޖުމްހޫރިއްޔާ ސިފައިންނަށް ނަސޭހަތްތެރިވެވަޑައިގެންނެވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހި ދައުލަތް މިއަދު ދިފާޢުކުރަން ޖެހިފައި މިވަނީ، ހަމައެކަނި ބޭރުގެ ދުޝްމަނުންނާއި، ޢަދާވާތްތެރިންގެ ފަރާތުން ނޫންކަމަށާއި، އަޅުގަނޑުމެންގެ ތެރޭގައި މިއޮތް ސިޔާސީ ހަލަބޮލިކަމުގެ ތެރެއިންވެސް ދިވެހި ޤައުމު މިއަދު ދިފާޢުކުރަން ޖެހިފައިވާ ކަމުގައި ބަޔާންކުރެއްވިއެވެ. މި މޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ދިވެހި ސިފައިންނަކީ ޤާނޫނީ ހުވާގެ މަތީގައި ދެމިތިބޭ، ސަފުތައް ބަދަހިކުރުމަށް މަސައްކަތްކުރާ، ދިވެހި ދަޢުލަތަކަށް ދިމާވާ ކޮންމެ ނުރައްކަލަކަށް ކުރިމަތިލާން ކެރޭ ބަޔަކަށް ވާން ޖެހޭކަމުގައި ވިދާޅުވިއެވެ. މީގެއިތުރަށް، ދިވެހި ސިފައިންނަކީ ދިވެހި ދައުލަތް ޙިމާޔަތް ކުރުމުގައި، ދެވަނަ ފުރުޞަތަކަށް ސުވާލު އުފެއްދުމަށް ޖާގަދޭ ބަޔަކަށް ވެގެން ނުވާނެކަމަށާއި، އަމާނާތްތެރިކަމާއެކީ އޯޑަރުތަކަށް ތަބާވާ ބަޔަކަށްވުމަށް ރައީސުލްޖުމްހޫރިއްޔާ އިލްތިމާސްކުރެއްވިއެވެ.
މި ރަސްމިއްޔާތުގައި ތަމްރީން ކޯސް ފުރިހަމަ ކުރި ދަރިވަރުންނަށް ހުވާ ލައިދެއްވީ، ސުޕްރީމް ކޯޓުގެ ފަނޑިޔާރު އަލްއުސްތާޛު ޢަބްދުﷲ ޢަރީފެވެ. މި ރަސްމިއްޔާތުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ (ރޓ) މޫސާ ޢަލީ ޖަލީލާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމްގެ އިތުރުން ސިފައިންގެ އިސްވެރިން ވެސް ބައިވެރިވެވަޑައިގެންނެވިއެވެ.
