ރައީސުލްޖުމްހޫރިއްޔާ، މިނިސްޓަރ އޮފް ޔޫތު އެންޑް ސްޕޯޓްސްގެ މަޤާމަށް ހެންވޭރު މާބަނޑޭރިއާގެ އަލްފާޟިލް އަޙްމަދު ޡުހޫރާއި، މިނިސްޓަރ އޮފް ހެލްތުގެ މަޤާމަށް ހެންވޭރު އޯކިޑުގޭ އިރުތިޝާމް އާދަމް މިއަދު ޢައްޔަން ކުރައްވައިފިއެވެ. މި ދެބޭފުޅުންނަށް މަޤާމުގެ ފަތްކޮޅު ދެއްވުމުގެ ރަސްމިއްޔާތު އޮތީ، މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ.
އަލްފާޟިލް އަޙްމަދު ޡުހޫރާއި، އަލްފާޟިލާ އިރުތިޝާމް އާދަމް ވަޒީރުންގެ މަޖިލީހުގެ މެންބަރުކަމުގެ ހުވާކުރެއްވީ، ސުޕްރީމް ކޯޓްގެ ފަނޑިޔާރު އަލްއުސްތާޛު ޢަބްދުﷲ ޢަރީފްގެ ކުރިފުޅުމަތީގައެވެ. ހުވާކުރެއްވުމަށްފަހު، އެބޭފުޅުން ވަޒީރުންގެ މަޖިލީހުގެ މެންބަރުންގެ ހުވާގެ އިޤްރާރުގައި ސޮއިކުރެއްވިއެވެ.
