ޕާކިސްތާނަށް ކުރެއްވެވި ފުރަމާނަ ދަތުރުފުޅުގެ ސަބަބުން ދެޤައުމުގެ ގުޅުން އާ އުސްމިންތަކަކަށް ގެންދެވޭނެކަމަށް ޔަޤީންކުރައްވާކަމުގައި ރައީސުލްޖުމްހޫރިއްޔާ އަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖެއާއި ޕާކިސްތާނާ ދެޤައުމުގެ ދެމެދުގައި ބޭއްވުނު ރަސްމީ ވާހަކަފުޅުތަކުގެ ތަފްޞީލު މީޑިއާއާ ޙިއްޞާ ކުރައްވައި ވާހަކަފުޅު ދައްކަވަމުންނެވެ.
ރަސްމީ ވާހަކަފުޅުތައް ބޭއްވެވީ، ޕާކިސްތާނުގެ ބޮޑުވަޒީރުގެ އޮފީހުގައި މިއަދު މެންދުރުފަހުގައެވެ. ރަސްމީ ވާހަކަފުޅުތަކުގައި ބައިވެރިވި ރާއްޖޭގެ ވަފުދުގެ ވެރިއަކީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. ޕާކިސްތާނުގެ ވަފުދުގެ ވެރިއަކީ ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފެވެ.
މީޑިއާއާ ބައްދަލުކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޕާކިސްތާނަކީ ރާއްޖެއަށް ލިބޭ ކާމިޔާބީއާއި ހިތާމައިގެ ދަނޑިވަޅުތަކުގައިވެސް ރާއްޖެއާއެކު ދެމިއޮތްކަން ސާބިތުކޮށްދީފައިވާ ވަރަށް ވަފާވެރި ރަޙުމަތްތެރިއެއްގެ ގޮތުގައި ސިފަކުރެއްވިއެވެ. މިގޮތުން، ރާއްޖެއަށް ކުރިމަތިވި ސުނާމީ ކާރިސާއިން އަރައިގަތުމަށް ރާއްޖެއިން ކުރަމުން ގެންދިޔަ މަސައްކަތުގައި ޕާކިސްތާން ސަރުކާރުގެ ފަރާތުން ލިބިވަޑައިގެންނެވި ފުރިހަމަ އެއްބާރުލެއްވުމަށްޓަކައި ޕާކިސްތާން ސަރުކާރަށް ރައީސުލްޖުމްހޫރިއްޔާ ޝުކުރުއަދާކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖެއާއި ޕާކިސްތާނާ ދެޤައުމުން ޤަބޫލުކުރާ މިންގަނޑުތަކުގެ އެއްގޮތްކަމުންނާއި، ޞަރަޙައްދީ ގުޅުން އިތުރަށް ބަދަހިކޮށް ހަރުދަނާކުރުމަށް ކުރަމުން އަންނަ މަސައްކަތްތަކުގެ ސަބަބުން ދިވެހިރާއްޖެއާއި ޕާކިސްތާނާ ދެޤައުމުގެ ދެމެދުގައި އުފެދިފައިވާ އުޚުއްވަތްތެރިކަމުގެ ގުޅުން އިތުރަށް ބަދަހިވެގެންދާނެކަމަށް ޤަބޫލުފުޅުކުރައްވާކަމުގައިވެސް ވިދާޅުވިއެވެ.
މީގެއިތުރަށް، މިއަދު ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފާ ބައްދަލުކުރައްވައި ދެޤައުމުގެ ދެމެދު އޮންނަ ގުޅުން އިތުރަށް ބަދަހިކުރެއްވުމާ ބެހޭގޮތުން ކުރެއްވެވި މަޝްވަރާތަކާއި، އަދި ދެޤައުމުގެ ދެމެދުގައި ބޭއްވުނު ރަސްމީ ވާހަކަފުޅުތަކަކީ ވަރަށް ކާމިޔާބު ބައްދަލުވުންތަކެއްގައި ރައީސުލްޖުމްހޫރިއްޔާ ފާހަގަކުރެއްވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ކުޅިވަރާއި، ޞިއްޙަތާއި، ތަޢްލީމީ ދާއިރާއިން އަދި މަސްތުވާތަކެއްޗާ ދެކޮޅަށް މަސައްކަތްކުރުމުގެ ރޮނގުން ދިވެހިރާއްޖެއާއި ޕާކިސްތާނާ ދެޤައުމުގެ ދެމެދުގައި ގުޅުން ބަދަހިކުރުމާބެހޭ ގޮތުން މިއަދު 4 އެއްބަސްވުމެއްގައި ސޮއިކުރެވިފައިވާނެކަމުގައިވެސް އެމަނިކުފާނު ބަޔާންކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، ރާއްޖެއަށް މިނިވަންކަން ލިބުނުތާ 50 އަހަރު ފާހަގަކުރުމަށް ބާއްވާ ރަސްމިއްޔާތުގައި ބައިވެރިވެވަޑައިގަތުމަށް ޕާކިސްތާނުގެ ބޮޑުވަޒީރު ނަވާޒު ޝަރީފަށް ދަޢުވަތުއެރުވިއެވެ.
