މިނިވަން ނޫސްވެރިކަމަކީ ދިވެހިރާއްޖޭގެ ޑިމޮކްރެޓިކް ނިޒާމް ދިރުވާ އާލާކޮށް ތަރައްޤީކުރުމުގައި ވަރަށް މުހިންމު ރަން ދައުރެއް އަދާކޮށްފައިވާ ނިޒާމެއްކަމުގައި ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު ވިދާޅުވެއްޖެއެވެ. ރައީސުލްޖުމްހޫރިއްޔާގެ ނައިބު މިހެން ވިދާޅުވީ، ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމަށްޓަކައި މޯލްޑިވްސް މީޑިއާ ކައުންސިލުން މިރޭ ދަރުބާރުގޭގައި ބޭއްވި ޚާއްޞަ ޙަފްލާއެއްގައި ވާހަކަފުޅު ދައްކަވަމުންނެވެ.
މިޙަފްލާގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، މިނިވަން ކަމާއެކު ނޫސްވެރިކަން ކުރުމާއި، މުޢާސަލާތްތައް ބޭނުންކޮށްގެން ޚަބަރާއި މަޢުލޫމާތުތައް ފޯރުކޮށްދިނުމާއި، މަޢުލޫމާތު ހޯދާ ލިބިގަތުމަކީ މިއަދު ދިވެހިރާއްޖޭގެ ދުސްތޫރުގައި ބިންވަޅު ނެގިފައިވާ އަސާސީ ހައްޤެއްކަމުގައި ފާހަގަކުރެއްވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށްގެންދަވަމުން، މަޢުލޫމާތު ފޯރުކޮށްދިނުމުގެ މިނިވަންކަން ފުޅާވެގެންދިއުމާއެކު ދިވެހި ޤައުމުގެ ރައްޔިތުންނަށް އެތަކެއް ކަންތައްތަކެއް އޮޅުންފިލުވައިދިން ކަމަށާއި، މިއަދު މިޤައުމު ފާއިތުކުރަމުން މިދަނީ ދިވެހި ނޫސްވެރިކަމުގެ މުޅިން އާ މަރުޙަލާއެއް ކަމުގައިވެސް އެމަނިކުފާނު ބަޔާންކުރެއްވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، މިއަދު ރާއްޖޭގެ ނޫސްވެރިކަމަށް ދިމާވެފައިވާ އެންމެ ބޮޑު ގޮންޖެހުމަކީ ރާއްޖޭގެ މަޢުލޫމާތު ފޯރުކޮށްދޭ ފަރާތްތަކުގެ މައްޗަށް އޮތް އިތުބާރާއި، ނަޒާހާތްތެރިކަމާމެދު އުފެދިފައިވާ ސުވާލުކަން ފާހަގަކުރެއްވިއެވެ. މިގޮތުން ހައްޤުބަސް ބުނުމަކީ ކޮންމެ ނޫސްވެރިއެއްގެ މައްޗަށް އޮތް ވާޖިބެއްކަމަށާއި، ސަރުކާރާއި އެހެނިހެން ފަރާތްތަކުން ކުރާ ރަނގަޅުކަންތައް ބަޔާންކޮށް އެކަންތައްތަކަށް ހިތްވަރުދޭ ފަދައިން، ހިނގާ ނުރަނގަޅު ކަންތައްތައްވެސް ރައްޔިތުންގެ ސަމާލުކަމަށް ގެނައުމަކީ ނޫސްވެރިންގެ މައްޗަށް ލާޒިމްވެފައިވާ ކަމެއްކަމުގައި އެމަނިކުފާނު ވިދާޅުވިއެވެ.
"ތިމާ ފޯރުކޮށްދޭ މަޢުލޫމާތަކީ ތިމާއަށް ރަނގަޅަށް އެނގިގެން ފޯރުކޮށްދޭ މަޢުލޫމާތަށް ވާންޖެހޭ. އެހެންވީމާ ނޫސްވެރިކަމަކީވެސް މިއަދު އެކަމުގެ ތަޖުރިބާއާއި މަޢުލޫމާތާއި، އެކަމުގެ ހުނަރާއި ޢިލްމު ހޯދައިގެން ކުރާ މަސައްކަތަކަށް ވާންއެބަޖެހޭ. އަދި މިގޮތުން މަސައްކަތްކުރާއިރުގައި، އެންމެ މުހިންމު ކަމެއްގެ ގޮތުގައި ބަލަހައްޓަންޖެހޭ މިންގަނޑަކީ ނޫސްވެރިންގެ ނަޒާހާތުގެ މިންގަނޑުކަމުގައި އަޅުގަނޑު ދެކެން." ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މިރޭގެ ޙަފްލާގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، މަޢުލޫމާތު ފޯރުކޮށްދިނުމުގައި ނޫސްވެރިންގެ ކޮނޑުގައި އެޅިފައިވާ ޒިންމާ ހަނދާން ނައްތާ ނުލެއްވުމަށާއި، ޙައްޤު ވާހަކަތަކާއި ތެދު މަޢުލޫމާތު ފޯރުކޮށްދިނުމުގައި ފަސްޖެހިވަޑައިނުގަތުމަށް އިލްތިމާސްކުރެއްވިއެވެ. މީގެއިތުރަށް ބިނާކުރަނިވި ފާޑުކިޔުމަކީ މައްސަލައެއްނޫންކަމުގައި ބަޔާންކުރައްވަމުން، ކަންތައްތަކާ ދޭތެރޭ ވިސްނާ ފާޑުކިޔުމަކީ ކުރަންޖެހޭނެކަމެއްކަމުގައިވެސް އެމަނިކުފާނު ފާހަގަކުރެއްވިއެވެ.
ނޫސްވެރިންގެ އަގު ވަޒަންކުރުމުގެ ގޮތުން މޯލްޑިވްސް މީޑިއާ ކައުންސިލުން ދޭ އެވޯޑް "ޖާނަލިސްޓް އޮފް ދަ އިޔާ 2014" މިއަހަރު ހޯދި، ހަވީރު ނޫހުގެ މުޙަންމަދު ޙަމްދޫނާއި ވީޓީވީގެ ޢަލީ ސުލައިމާނަށް އެވޯޑު ޙަވާލުކޮށްދެއްވީ ޑޮކްޓަރ މުޙަންމަދު ޖަމީލް އަޙްމަދެވެ.
