ދިވެހި ރާއްޖޭގައި ޤާނޫނީ ސަރުކާރެއް އޮންނަހާ ހިނދަކު، އަދި އެ ސަރުކާރުން ޤާނޫނާ ޚިލާފުނުވެ، ދިވެހިރާއްޖޭގެ ޙުކޫމަތް ތަންފީޛު ކުރަން މަސައްކަތް ކުރާ ކަމަށްވަންޏާ، ދިވެހި ސިފައިން ތިބެންވާނީ ދިވެހި ސިފައިންގެ ހުވާގެ މަތީގައި އެވާ ޢިބާރާތްތަކުގައިވާ ފަދައިން، އެ ޤާނޫނީ ސަރުކާރު ދަމަހައްޓަންކަމުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، 123 ވަނަ ސިފައިންގެ ދުވަހުގެ މުނާސަބަތުގައި މިރޭ ކަޅުތުއްކަލާކޮށީގައި ބޭއްވުނު ޚާއްޞަ އިޙްތިފާލުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޤާނޫނީ ސަރުކާރެއްގެ މަސްއޫލިއްޔަތު އަދާކުރަމުންދާއިރު، ޤާނޫނީ ސަރުކާރަކަށް ޤާނޫނުން ބޭރުން ހުރަސްއެޅުމަކީ، ޤައުމު ނުރައްކަލުގެ ތެރެއަށް ދިއުމަށް ޖާގަ ލިބޭ ކަންތައްތައްތަކުގައި ބަޔާންކުރެއްވިއެވެ. މިގޮތުން ދިވެހި ސިފައިންނަށާއި އަދި ދިވެހި ކޮންމެ ރައްޔިތަކަށްމެ، އެންމެ މުހިންމުކަމަކަށް ވާންވާނީ ޤައުމުގެ ހަމަޖެހުމާއި، އިސްލާމްދީން ދެމެހެއްޓުމާއި ޤައުމުގެ ސިޔާދަތު ރައްކާތެރިކުރުންކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހިރާއްޖެއަކީ ކުޑަޤައުމެއް ކަމުގައިވީ ނަމަވެސް މިނިވަން ދައުލަތެއް ކަމުގައި ފާހަގަކުރައްވަމުން، ބައިނަލްއަޤްވާމީ އެކިއެކި ޖަމްޢިއްޔާތަކުގައި ދިވެހިރާއްޖެއިން ބައިވެރިވެގެންއުޅެނީ ޤައުމުގެ ސިޔާދަތު ރައްކާތެރި ކުރެވޭނެ ކަމަށް ގަބޫލުފުޅު ކުރެވިގެންކަމުގައި ވިދާޅުވިއެވެ. މިގޮތުން، އަދި އެ ޖަމްޢިއްޔާތަކުން ޢާންމު އުޞޫލެއްގެ ގޮތުން ކަނޑައަޅާފައި ހުންނަ ގިނަ ކަންތައްތައް؛ އެއީ އިންސާނީ ޙައްޤުތަކާއި، ދޭދޭ ޤައުމުތަކުގެ މެދުގައި އޮންނަ ގުޅުންތައް ނުވަތަ އެއް ޤައުމަކުން އަނެއް ޤައުމެއްގެ އިސްތިޤްލާލަށް އިޙްތިރާމް ކުރުން ކަމުގައިވީނަމަވެސް، އެކަންކަމުގެ ފުރިހަމަ މަންފާ، ބޮޑެތި ޤައުމުތަކަށް ލިބޭ އުޞޫލުން ރާއްޖެއަށްވެސް ލިބެންޖެހޭނެކަމަށް ގަބޫލުފުޅުކުރައްވާތީކަމުގައި ރައީސުލްޖުމްހޫރިއްޔާ ބަޔާންކުރެއްވިއެވެ.
މިމޭރުމުން އެމަނިކުފާނުގެ ވާހަކަފުޅު ކުރިއަށްގެންދަވަމުން، ދިވެހިރާއްޖޭގެ ކޯޓުތަކުން ކުރާ ޙުކުމްތައް ތަންފީޛު ކުރުމުގައާއި، ދިވެހިރާއްޖޭގެ ޤާނޫނު ދަމަހައްޓާއިރުގައި ދިވެހި ސަރުކާރަކުން ބައިނަލްއަޤްވާމީ މުޖްތަމަޢުން ނަގަންޖެހޭނެ ހުއްދައެއް އޮންނާނެ ކަމަކަށް އެމަނިކުފާނު ގަބޫލުފުޅު ނުކުރައްވާކަމުގައިވެސް ވިދާޅުވިއެވެ.
އެންމެފަހު ވަގުތާ ޖެހެންދެން، ދައުލަތުގެ ޝަރަފާއި، ދައުލަތުގެ ކަރާމާތާއި، ދައުލަތުގެ އިސްތިޤްލާލާއި، ދައުލަތުގެ މިނިވަންކަން ދެމެހެއްޓުމަށްޓަކައި މަސައްކަތްކުރާ ފަރާތަކީ ދިވެހި ސިފައިންކަމުގައި ސިފަކުރައްވަމުން، ބޭރުގެ ޢުދުވާންތައް ރާއްޖެއަށް އައުމަށް ޖާގަ ލިބޭ ކަންކަމަށް ހުރަސްއެޅުމަކީ މިނިވަންކަން ދިފާޢުކުރަން ކުރެވޭ އެންމެ ވަރުގަދަ މަސައްކަތްކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. މިގޮތުން، ޤާނޫނުއަސާސީ ނެގެހެއްޓުމަށާއި، ސަރުކާރުން ގަބޫލުކުރާ އުޞޫލުތަކެއްގެ މަތީގައި، ޤައުމަށް ބޭނުންވާ ތަރައްޤީ ގެނައުމަށްޓަކައި ޤާނޫނީގޮތުން ކުރަންޖެހޭ ކަންތައްތަކެއް ކުރުމުގައި މި ސަރުކާރު ފަސްނުޖެހޭނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދައުލަތުގެ ސިޔާދަތު ރައްކާތެރި ކުރުމަށްޓަކައި ސިފައިން ކުރައްވަމުން ގެންދަވާ ބުރަ މަސައްކަތް ފާހަގަކުރައްވައި، ސިފައިންގެ ޢާއިލާތަކަށް ރައީސުލްޖުމްހޫރިއްޔާ ޝުކުރުއަދާކުރެއްވިއެވެ.
"ތިޔަބޭފުޅުންގެ ފިރިންނާއި އަނބިން މަތިވެރި ޤައުމީ ވާޖިބަކަށް ދޫކުރައްވާފައި އެތިބީ ރޭގަނޑު ދަންފަޅިއަކަށް ގޮއްސަ އެނބުރި އަންނާނެކަމުގެ ކަށަވަރުކަމެއްނެތި. އަދި މާދަމާ އެމީހުންނާ ކުރިމަތިލާނީ ކޮންކަހަލަ ބަދުނަސީބު ދުވަހެއްކަންވެސް އެނގިވަޑައި ނުގެން" ރައީސުލްޖުމްހޫރިއްޔާ ވިދާޅުވިއެވެ.
123 ވަނަ ސިފައިންގެ ދުވަހުގެ މުނާސަބަތުގައި މިރޭ ކަޅުތުއްކަލާކޮށީގައި ބޭއްވުނު ޚާއްޞަ އިޙްތިފާލުގައި، ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން ފާޠިމަތު އިބްރާހީމް ބައިވެރިވެވަޑެންނެވިއެވެ.
މިރޭގެ އިޙްތިފާލުގައި، ސިފައިންގެ އަތްމަތީފޮތް 'އަސްކަރީ އަދަބު އަޚްލާގް' ރައީސުލްޖުމްހޫރިއްޔާ ނެރެދެއްވިއެވެ. އަދި އެކިއެކި މުޢައްސަސާތަކާއި ފަރުދުން ސިފައިންނަށާއި ސިފައިންގެއަށް ކޮށްދީފައިވާ މަތިވެރި ޚިދުމަތްތަކުގެ އަގުވަޒަންކުރުމުގެ ގޮތުން އެފަރާތްތަކަށް ދެވޭ މަތިވެރި ޚިދުމަތުގެ އައްޑަނައާއި، ސިފައިންގެ ތެރެއިން ޚާއްޞަ ވަނަތަކާއި އެކިއެކި ކާމިޔާބީތައް ހޯއްދަވާފައިވާ ޔުނިޓުތަކަށާއި ސިފައިންނަށް ދެއްވާ ޝަރަފުގެ ފިލާ އެފަރާތްތަކަށް ރައީސުލްޖުމްހޫރިއްޔާ ޙަވާލުކޮށްދެއްވިއެވެ.
