ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަރިހަށް، ޗައިނާގެ ޔުނާން ޕްރޮވިންސްގެ ގަވަރނަރ މިސްޓަރ ޗެން ހާއޯ އިޙްތިރާމުގެ ޒިޔާރަތެއް ކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި، 2014 ވަނަ އަހަރު ޗައިނާގެ ރައީސް ޝީ ޖިންޕިންގ ރާއްޖެއަށް ކުރެއްވި ރަސްމީ ދަތުރުފުޅުގެ ސަބަބުން ދިވެހި ރާއްޖެއާއި ޗައިނާއާ ދެޤައުމުގެ ދެމެދުގައި އުފެދިފައިވާ ގުޅުން އިތުރަށް ހަރުދަނާވެގެން ހިނގައްޖެ ކަމުގައި ފާހަގަކުރެއްވިއެވެ. އަދި އެމަނިކުފާނު މިހާރު ރާއްޖެއަށް ކުރައްވަމުން ގެންދަވާ ޒިޔާރަތުގެ އެންމެ މުހިންމު މަޤްޞަދަކީ، ޗައިނާގެ ރައީސް ރާއްޖެއަށް ކުރެއްވި ދަތުރުފުޅުގައި، ޢަމަލުކުރައްވަން ނިންމަވާފައިވާ ކަންތައްތައް ކުރިއަށް ގޮސްފައިވާ މިންވަރު ބެއްލެވުން ކަމުގައިވެސް ބަޔާންކުރެއްވިއެވެ.
ޔުނާން ޕްރޮވިންސަކީ، ޗައިނާގެ ރަށްތަކުގެ ތެރެއިން ޖޯގްރަފީގެ ގޮތުން ދިވެހިރާއްޖެއާއި އެންމެ ކައިރި ރަށް ކަމަށާއި، ޗައިނާއާއި ދެކުނު އަދި ދެކުނު އިރުމަތީ އޭޝިޔާގެ ޤައުމުތަކާ ގުޅުވައިދޭ ފާލަމަކީވެސް ޔުނާން ޕްރޮވިންސްކަން ގަވަރނަރުގެ ވާހަކަފުޅުގައި ފާހަގަކުރެއްވިއެވެ. މީގެއިތުރަށް ރާއްޖޭގެ ތަރައްޤީއަށް ޔުނާން ޕްރޮވިންސުން އެހީތެރިވެދެވިދާނެ ދާއިރާތަކާ ބެހޭގޮތުން ރައީސުލްޖުމްހޫރިއްޔާއާއި ޔުނާން ޕްރޮވިންސްގެ ގަވަރނަރ މަޝްވަރާ ކުރެއްވިއެވެ. ވަކިން ޚާއްޞަކޮށް އުމްރާނީ ތަރައްޤީއާއި، އިއާދަކުރަނިވި ހަކަތަ އުފެއްދުމުގެ ދާއިރާއިންނާއި، ތަޢުލީމީ އަދި ފަތުރުވެރިކަމުގެ ދާއިރާއިން ދެޤައުމުގެ ދޭތެރޭ އިތުރަށް ގުޅުން ވަރުގަދަ ކުރެވިދާނެ ގޮތްތަކާ ބެހޭގޮތުން ދެބޭފުޅުން ޚިޔާލު ބަދަލުކުރެއްވިއެވެ.
މިބައްދަލުކުރެއްވުމުގައި މިއަހަރުގެ ޖޫން މަހުގެ 12 އިން 16 އަށް ޗައިނާގައި ބޭއްވުމަށް ހަމަޖެހިފައިވާ 3 ވަނަ ޗައިނާ-ސައުތު އޭޝިއާ އެކްސްޕޮޒިޝަން އާއި، 23 ވަނަ ކުންމިންގ އިމްޕޯޓް އަދި އެކްސްޕޯޓް ކޮމޯޑިޓީޒް ފެއަރގައި ދިވެހި ސަރުކާރުގެ ފަރާތުން ބައިވެރިވުމަށް ރަސްމީގޮތުން ދަޢުވަތު އަރުވައި، މި ދަޢުވަތު ސިޓީ ރައީސުލްޖުމްހޫރިއްޔާއަށް ގަވަރުނަރު ޗެން ހާއޯ އެރުއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި އެކްސްޕޯގައި ބައިވެރިވުމަށް ދިވެހި ސަރުކާރަށް ދަޢުވަތު ދެއްވި ކަމަށްޓަކައި ޔުނާން ޕްރޮވިންސްގެ ގަވަރނަރަށް ޝުކުރުއަދާކުރެއްވިއެވެ. އަދި މި އެކްސްޕޯގައި ދިވެހި ސަރުކާރުގެ އިސްވެރިންނާއި ވިޔަފާރިވެރިން ހިމެނޭ ވަފުދެއް ބައިވެރިވާނެކަމުގެ ޔަޤީންކަން ގަވަރުނަރަށް ދެއްވިއެވެ.
މީގެއިތުރަށް، ރާއްޖޭގައި އިޤްތިޞާދީ ތަރައްޤީއަށްޓަކައި ސަރުކާރުން ރާއްވަވާފައިވާ އެކިއެކި މަޝްރޫއުތަކާއި، ޗައިނާގެ އިންވެސްޓަރުންނަށް ރާއްޖޭގައި ހުރި ފުރުޞަތުތަކާބެހޭ މަޢުލޫމާތުވެސް ރައީސުލްޖުމްހޫރިއްޔާ، ޔުނާން ޕްރޮވިންސްގެ ގަވަރނަރއަށް ދެއްވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙަންމަދު ޙުސައިން ޝަރީފު ބައިވެރިވެވަޑައިގެންނެވިއެވެ.
ޔުނާން ޕްރޮވިންސްގެ ގަވަރުނަރުގެ އަރިހުގައި ޗައިނާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވަންގް ފޫކަންގް އާއި ޔުނާން ޕްރޮވިންސްގެ ސަރުކާރުގެ އިސްވެރިން ބައިވެރިވެވަޑައިގަތެވެ.
