2014 ވަނަ އަހަރު ބޭއްވުނު މަތީ ޘާނަވީ އިމްތިޙާނުން ރާއްޖެއިން 1 ވަނަ ހޯދި 23 ދަރިވަރުންނަށް ރައީސުލްޖުމްހޫރިއްޔާ ދެއްވާ ސްކޮލަރޝިޕް ރޭ ދެއްވައިފިއެވެ. ރައީސުލްޖުމްހޫރިއްޔާ ދެއްވާ ސްކޮލަރޝިޕް ހަމަޖެއްސެވި ކަމުގެ ލިޔުން، އެދަރިވަރުންނާ ރައީސުލްޖުމްހޫރިއްޔާގެ ފަރާތްޕުޅުން ޙަވާލުކޮށްދެއްވާފައިވަނީ މަތީ ޘާނަވީ އިމްތިޙާނުން 2014 ވަނަ އަހަރު އެންމެ ރަނގަޅު ނަތީޖާ ހޯދި ދަރިވަރުންނަށް އިނާމާއި ހަނދާނީ ލިޔުން ދެއްވުމަށްޓަކައި ރޭ ދަރުބާރުގޭގައި ބޭއްވެވި ޖަލްސާއެއްގައި، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދެވެ.
2014 ވަނަ އަހަރު ބޭއްވުނު މަތީ ޘާނަވީ އިމްތިޙާނުން [އެކައުންޓް] މި މާއްދާއިން މުޅި ދުނިޔެއިން 1 ވަނަ ހޯދި 11 ދަރިވަރުންނަށް ރައީސުލްޖުމްހޫރިއްޔާ ދެއްވާ މެޑެލާއި، އިނާމާއި، ހަނދާނީ ލިޔުމާއި، މި އިމްތިޙާނުން އެންމެ ރަނގަޅު 10 ނަތީޖާ ހޯދި ދަރިވަރުންނަށް، މިނިސްޓްރީ އޮފް އެޑިޔުކޭޝަނުން ދެއްވާ ޓްރޮފީއާއި ހަނދާނީ ލިޔުން، ރޭގެ ޖަލްސާގައި ދެއްވިއެވެ. އަދި އެޑެކްސެލް އިންޓަރނޭޝަނަލް އެޑްވާންސް ލެވެލް އިމްތިޙާނުން 3 އޭ ސްޓަރ އަށްވުރެ އިތުރަށް ހޯދި 5 ދަރިވަރުންނަށް އެޑެކްސަލްއިން ދެއްވާ މެޑަލް އަދި ހަނދާނީ ލިޔުމާއި، މަތީ ޘާނަވީ އިމްތިޙާނުތަކުން ވަކިވަކި މާއްދާތަކުން ރާއްޖެއިން 1 ވަނަ ޙާޞިލުކުރި 22 ދަރިވަރުންނަށް ގުޅީފަޅު އިންވެސްޓްމަންޓުން ދެއްވި އިނާމާއި، މިނިސްޓްރީ އޮފް އެޑިޔުކޭޝަނުން ދެއްވި ލިޔުންވެސް ޙަވާލުކޮށްދެއްވުން އޮތެވެ. މީގެއިތުރަށް، ދުނިޔޭގެ ފެންވަރުގައި އެކިއެކި މާއްދާތަކުން އެންމެ ރަނގަޅު ނަތީޖާހޯދި 4 ދަރިވަރުންނަށް މިނިސްޓްރީ އޮފް އެޑިޔުކޭޝަނުން ދެއްވާ ޓްރޮފީއާއި ހަނދާނީ ލިޔުންވެސް ވަނީ މިރަސްމިއްޔާތުގައި ދެއްވާފައެވެ.
2013 ވަނަ އަހަރު މަތީ ޘާނަވީ އިމްތިޙާނުން ރާއްޖެއިން 1 ވަނަ ހޯދި 11 ދަރިވަރުންނަށްވެސް ރައީސުލްޖުމްހޫރިއްޔާ ދެއްވާ ސްކޮލަރޝިޕް ވަނީ މިދިޔައަހަރު ދެއްވާފައެވެ.
