ރާއްޖޭގެ ކޮންމެ ދަރިވަރަކީވެސް ޤައުމުގެ އިޤްތިޞާދު ބައްޓަންކުރުމުގަޔާއި، އިޖްތިމާޢީ ހަމަޖެހުން ޤާއިމްކުރުމުގައި ހީވާގިކަމާއެކީގައި އަތުކުރި އޮޅާލައިގެން މަސައްކަތްކުރާ ދަރިވަރަކަށް ވުމަށް ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު އިލްތިމާސްކުރައްވައިފިއެވެ. އެމަނިކުފާނު މިކަމަށް އިލްތިމާސް ކުރެއްވީ، މަތީ ޘާނަވީ އިމްތިޙާނުން 2014 ވަނަ އަހަރު އެންމެ ރަނގަޅު ނަތީޖާ ހޯދި ދަރިވަރުންނަށް އިނާމާއި ހަނދާނީ ލިޔުން ދެއްވުމަށްޓަކައި މިރޭ ދަރުބާރުގޭގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
މިމޭރުމުން ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، މަތީ ޘާނަވީ އިމްތިޙާނުން ހޯދި މަތިވެރި ކާމިޔާބީ ފާހަގަކުރަމުންދާއިރު، ކޮންމެ ދަރިވަރެއްވެސް އެދަރިވަރެއްގެ ކޮނޑުގައި އެޅިފައިވާ މުހިންމު ޒިންމާ ނެގުމުގެ ޢަޒުމު އާކުރަން ޖެހޭކަމުގައި ވިދާޅުވިއެވެ. މިގޮތުން، އަޅުގަނޑުމެންގެ ކޮންމެ ދަރިވަރަކީވެސް ދުނިޔޭގެ އެހެން ތަންތަނަށް އައިސްފައި އޮތް ހަމަޖެހުން ގާތުން ބަލައި، އެއުފާވެރިކަން އިހްސާސްކުރާ ދަރިވަރަކަށް ވެގެން، އަޅުގަނޑުމެންގެ މިރާއްޖެއަކީ އެއުއުފާވެރިކަން ވެރިވެފައިވާ، އެމަގުން ހިނގާ ތަނަކަށް ހަދަން މަސައްކަތްކުރާ ދަރިވަރަކަށް ވާންޖެހޭކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ނާއިބުގެ ވާހަކަފުޅުގައި، ފެންވަރު ރަނގަޅު ތަޢުލީމީ ނިޒާމަކީ ކޮންމެ ޤައުމެއްގެވެސް ފަޚުރުކަމުގައި ފާހަގަކުރައްވަމުން، މިރޭގެ މިރަސްމިއްޔާތު ރަމްޒުކޮށްދެނީ އެއްދުވަހުން އަނެއް ދުވަހަށް، އަދި އެއް އަހަރުން އަނެއް އަހަރަށް ރާއްޖޭގެ ތަޢުލީމީ ނިޒާމުގެ ފެންވަރު މަތިވަމުން އަންނަކަން ކަމުގައި ބަޔާންކުރެއްވިއެވެ. އަދި ރާއްޖޭގައި ދުނިޔޭގެ ނިސްބަތުން ފާހަގަކުރެވޭ ފެންވަރުގެ ކާމިޔާބީ ޙާޞިލުކުރާ ދަރިވަރުން އެއްދުވަހުން އަނެއް ދުވަހަށް އިތުރުވެގެންދާ ދިއުމަކީ ވަރަށް ބޮޑު ކާމިޔާބީއެއް ކަމަށާއި، އޭގެ ސަބަބުން ދިވެހި މުޖުތަމަޢަށް ވަރަށް ބޮޑު ހިތްހަމަޖެހުމެއް ވެރިކުރުވާކަމެއް ކަމުގައި އެމަނިކުފާނު ވިދާޅުވިއެވެ. މީގެއިތުރަށް، އިޖްތިމާޢީ ގޮތުން މުޖުތަމަޢެއް ހަމަޖެހުމުގެ ސިއްރަކީވެސް ތަޢުލީމުކަމުގައި އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
"މިއަދު އަޅުގަނޑުމެން އަމިއްލަ ނަފްސާ ސުވާލުކުރަންޖެހޭ، ދުނިޔޭގެ އެހެން ޤައުމުތަކުގައި އައިސްފައިވާ ހިންގުމުގެ ހަރުދަނާކަމާއި، އެޤައުމުތަކަށް އައިސްފައިވާ ކުރިއެރުމާއި، އުފެއްދުންތެރިކަމާއި، ހަލުއި ދުވެލީގައި ދަތުރުކުރަމުންދާ އިޤްތިޞާދުތަކުގެ ސިއްރަކީ ކޮބައިތޯ. ޖަވާބަކީ އެންމެ ކަމެއް. އެއީ ތަޢުލީމު." ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މިރޭގެ ޖަލްސާގައި މިދިޔަ އަހަރުގެ މަތީ ޘާނަވީ ތަޢުލީމުގެ އިމްތިޙާނުން ރާއްޖެއިން 1 ވަނަ ޙާޞިލުކުރި 23 ދަރިވަރުންނަށް ރައީސުލްޖުމްހޫރިއްޔާ ދެއްވާ ސްކޮލަރޝިޕްގެ ލިޔުމާއި، މިނިސްޓްރީ އޮފް އެޑިޔުކޭޝަނުން ދެއްވާ ޓްރޮފީއާއި ހަނދާނީ ލިޔުން ޙަވާލުކޮށްދެއްވީ، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދެވެ.
މި ޖަލްސާގައި މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމް ވާހަކަފުޅު ދެއްކެވިއެވެ. އަދި ނަތީޖާއާ ބެހޭގޮތުން ތައްޔާރު ކުރެވިފައިވާ ވީޑިއޯ ޕްރެޒެންޓޭޝަނެއް ހުށަހެޅިއެވެ.
