ދިވެހިރާއްޖޭގައި މިއަދު ހިނގަމުންދާ ރަޙުމްކުޑަ ޢަމަލުތައް މި ސަރުކާރުން ބަލައިނުގަންނާނޭ ކަމަށާއި، އެޢަމަލުތައް ހުއްޓުވުމަށް ދައުލަތަށް ކުރެވެން ހުރި ހުރިހާ މަސައްކަތެއް ކުރައްވާނޭކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާގެ މިހެން ވިދާޅުވީ، ފުލުހުންގެ 82 ވަނަ އަހަރީ ދުވަސް ފާހަގަކުރެއްވުމުގެ ގޮތުން، މިރޭ ދަރުބާރުގޭގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ފުލުހުން ޔުނީފޯމްގައި ތިބެގެން ކިތަންމެ ބުރަ، އަދި ފުރާނައަށް ގެއްލުންވާ ގޮތަށް ނުކުމެ މަސައްކަތް ކުރި ކަމުގައިވީނަމަވެސް، މިދެންނެވި ކަހަލަ ރަޙުމްކުޑަ ޢަމަލްތައް ދިވެހިރާއްޖޭގައި މިއަދު ހިނގަމުންދާކަމީ ހިތާމަކުރަންޖެހޭ ކަމެއްކަމުގައި ވިދާޅުވިއެވެ. އަދި އެ ސަބަބަށްޓަކައި ފުލުހުންގެ މަސައްކަތުގައި އެހީތެރިވުމަށް، މިރެއިން ފެށިގެން ސިފައިންވެސް ޙަރަކާތްތެރިވާ ގޮތަށް ސަރުކާރުން ހަމަޖައްސަވައިފި ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހި ރައްޔިތުންނެކޭ އެއްފަދައިން ބިދޭސީއެއް މަރާލުމަކީވެސް ސަރުކާރުން ހަމަ އެހާމެ ކަންބޮޑުވާ ކަމެއްކަމުގައި ފާހަގަކުރެއްވިއެވެ. މިގޮތުން މިކަން ކުރާ ޤާތިލުން ހޯދުމަށްވުރެން، މިކަންކަމަށް ހިތްވަރުދޭ މީހުން އެނގެން މާ މުހިންމު ކަމުގައި އެމަނިކުފާނު ބަޔާންކުރެއްވަމުން، ޙަޤީޤަތުގައި ދިވެހިރާއްޖޭގައި ހަމަޖެހުން ނަގާލާ ބަޔަކީ އެއީ ކަމުގައި ވިދާޅުވިއެވެ.
ފުލުހުންނަކީ އިންސާނީ ޙައްޤުތަކާއި، އިންސާނީ ކަރާމާތަށް އިޙްތިރާމްކޮށްގެން މަސައްކަތްކުރާ ބައެއްކަމުގައި ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވައިލެއްވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ފުލުހުންނަށް ޝުކުރު ޙައްޤު ކިތަންމެ ކަމެއްގައި ތަޢުރީފް އޮހޭ ފަދައިން، ފުލުހުން ކުރާ މަސައްކަތަށް ފާޑުކިޔާ މީހުންވެސް މަދެއްނުވާނޭ ކަމުގައި ވިދާޅުވިއެވެ.
މިރަސްމިއްޔާތުގައި ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި، ދިވެހި ފުލުހުންނަކީ ޤާނޫނުގެ ތެރެއިން ބާރު ލިބިގެން، ޤާނޫނާ އެއްގޮތަށް މަސައްކަތް ކުރާ މުއައްސަސާއެއް ކަމުގައި ބަޔާންކުރައްވަމުން، އެއްވެސް މުޖްތަމަޢެއްގެ ރައްކާތެރިކަމެއް ދައުލަތަކަށް، ނުވަތަ ފުލުހުންނަކަށް ކަށަވަރެއް ނުކޮށްދެވޭނެ ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ. އެހެންނަމަވެސް މުޅި މުޖްތަމަޢުގެ ސަލާމަތަކީ، އަޅުގަނޑުމެން އެންމެން އެކުގައި މަސައްކަތްކުރަން ޖެހިފައިވާ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއވެ.
"ފުލުހުންނަށް ޤާނޫނީ ޒިންމާތަކަކާއި މަސްއޫލިއްޔަތެއް ޙަވާލުކުރެވޭއިރުވެސް، ފުލުހުންނަށް މި ޙަވާލުކުރެވޭ މަސްއޫލިއްޔަތުތަކެއް ޙަވާލުކުރަނީ ޤާނޫނުގެ ޙުދޫދުގެ ތެރެއިން. ޤާނޫނުން ފުލުހުން ޒިންމާދާރު ކުރުވާ. ފުލުހުން ޒިންމާދާރު ކުރުވުމަށް ޕޮލިސް އިންޓެގްރިޓީ ކޮމިޝަން އޮންނާނެ. އަދި ދައުލަތުގެ އެހެން މުއައްސަސާތައް ހުންނާނެ. ރައްޔިތުންގެ މަޖިލިސް އޮންނާނެ. އަދި އޭގެފަހުން ކޯޓުތައްވެސް އެހެރީ" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ސަރުކާރު ދިވެހިރާއްޖޭގެ ވެރިކަން ކުރާ ކަމަށްވަންޏާ، ވެރިކަން ކުރާހާ ދުވަހަކު، ދިވެހިރާއްޖޭގެ އިސްތިޤްލާލަށް، މުޅި ދިވެހި ރައްޔިތުންގެ ޙައްޤަށް އުނިކަމެއް އަންނަ އެއްވެސް ކަމަކީ، މި ސަރުކާރުން ގަބޫލުކުރާނެ ކަމެއް ނޫންކަމުގައި ވިދާޅުވިއެވެ. މިގޮތުން ދިވެހިރާއްޖޭގެ މިނިވަންކަމަށް 50 އަހަރު ފުރޭ ރަންޔޫބީލް ފާހަގަކުރަމުންދާ މިދަނޑިވަޅުގައި، އިންސާނީ ޙައްޤުތައް ކުރިއަށް ގެންދިޔުމަށް އަދި ސިޔާސީ ޙައްޤުތައް ހޯދުމަށް، ނޫނިއްޔާ ޑިމޮކްރަސީގެ ނިޒާމުގެ ތެރެއިން ހޯދަންޖެހޭ ޙައްޤުތަކެއް ހޯދުމުގެ ނަމުގައި، ރާއްޖޭގެ ދާޚިލީ ކަންކަމަށް ބޭރު މީހުން ބެހެން ދަޢުވަތު ދިނުމަކީ ހަމަ ކޮންމެ ދިވެއްސަކު ކުށްވެރި ކުރަންޖެހޭނޭ ކަމެއްކަމުގައި އެމަނިކުފާނު ވިދާޅުވިއެވެ.
"އިންސާނީ ޙައްޤުތައް، މިކަންކަން ކުރާއިރު، ޙައްޤުތަކަށް އަރައިގަނެވޭތީ، ނޫނިއްޔާ އަޅުގަނޑުމެންގެ ކޯޓުތަކުން މައްސަލަތައް ނިންމާއިރު، އިންސާނީ ޙައްޤުތަކަށް އަރައިގަނެވޭތީ، މީހުންނަށް ލިބެންވާ ޙައްޤުތައް ނުލިބޭތީ، މި ދައްކާ ވާހަކަޔަކީ އަޅުގަނޑުމެން އޭގެ ޒާތުގައި އެގޮތަކަށް ބަލައިގަންނާނެ ވާހަކައެއް ނޫން. ޙައްޤުތަކުން މަޙްރޫމްވާ ކަމަށްވަންޏާ، ޙައްގުތައް އިޢާދަކުރުމަށް، ޙައްޤުތައް ހޯދަން ހުންނަ މަގުން ހިނގުމުގެ ޖާގަ އެބައޮތް. އެ ދަޢުވާ އުފުލޭނެ، ނޫނީ އެ ޝަކުވާ އުފުލޭނެ ޖާގަ، ދިވެހިރާއްޖޭގެ ޖުޑީޝަރީގައި އެބައޮތް" ރައީސުލްޖުމްހޫރިއްޔާ ވިދާޅުވިއެވެ.
މި ޖަލްސާގައި، އާންމުންގެ ތެރެއިން ފުލުހުންގެ މަސައްކަތްތަކަށް ވޭތުވެދިޔަ އަހަރު އެހީތެރިވެދެއްވާފައިވާ ފަރާތްތަކަށް އެކަމުގެ އަގު ވަޒަން ކުރެއްވުމުގެ ގޮތުން ދެއްވި ހަނދާނީ ފިލާ، އެ ފަރާތްތަކަށް ދެއްވީ އަދި ފުލުހުންނަށް ކުލައާއި މެޑަލް ހަވާލުކޮށްދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. އަދި ފުލުހުންގެ ޚިދުމަތުގައި 25 އަހަރަށްވުރެ ދިގު މުއްދަތުގައި ޚިދުމަތްކުރައްވާފައިވާ ފަރާތްތަކަށް ދެއްވާ ހަނދާނީ ފިލާ ހަވާލުކޮށްދެއްވީވެސް ރައީސުލްޖުމްހޫރިއްޔާއެވެ.
